Ripot Long Wok Bilong Kingdom
Yangpela i Laikim Tren Em i Lain Long Tok i Tru
SAPOS man i gat gutpela bel na em i laikim pasin i stret na em i gat pasin daun, orait, long rot bilong Krais Jisas na ol ensel holi God Jehova bai stiaim ol samting na bai dispela man i ken harim gutpela tok bilong Kingdom, na ating bihain em bai tanim bel na Jisas i ken orait long em. (Matyu 25:31-33) Kain samting olsem i bin painim wanpela yangpela man long Ostria em i laikim ol samting bilong tren. Em i painim pinis tok i tru.
Em i save raun long ol tren na sindaun long haus kepten wantaim draiva, na kisim ol piksa long kamera video bilong em, na taim em i go bek long haus em i kamapim ol dispela piksa na bai em i ken lukim gen ol dispela ples em tren i bin go long en. Wanpela taim tren i lusim taun Viena na i go long taun Salsbek, na draiva em wanpela Witnes Bilong Jehova, na draiva i no stori long ol samting bilong tren, nogat; em i stori long ol samting bilong Kingdom. Yangpela i kirap nogut long harim wanpela draiva bilong tren i toktok long ol samting bilong God na bilong Baibel, na em i putim gut yau long harim.
Taim em i go bek long haus, em i putim dispela video 10-pela taim, long wanem, em i laikim tru dispela raun bilong em na em i laik lukim gen ol dispela gutpela hap em tren i go long en. Em i pilaim pilaim dispela video planti taim, na ol toktok bilong dispela draiva Witnes i wok long kamap tu long video. Em i harim harim planti taim. Nau em i kirap long tingim gut ol dispela tok na givim bel long en, na em i gat bikpela laik long harim sampela tok moa bilong Baibel.
Em i tingim yet nem bilong dispela draiva, na em i save em i stap long taun Viena. Olsem na em i go long posofis na em i ring long telefon long ol man i gat dispela nem. Em i save askim ol: “Yu wanpela draiva bilong tren, o nogat?” Sapos nogat, orait em i traim narapela namba. Bihain em i painim dispela draiva. Em i tokim draiva long stori bilong em, na em i tok em i laikim ol dispela tok bilong Baibel em i bin harim long video.
Witnes i tokim brens-ofis long salim sampela Witnes i go lukim dispela yangpela. I gat wanpela draiva bilong tren em tu i wanpela Witnes na em i stap long kongrigesen klostu long yangpela, na em i go painim yangpela na toktok gut wantaim em na kirapim Baibel-stadi long em. Long 1991 dispela yangpela man i kisim baptais.
Jehova i save skelim bel bilong olgeta man, na ating em i lukim olsem dispela yangpela em i laikim stretpela pasin. Olsem na em i wokim rot na yangpela i painim pinis tok i tru bilong Baibel—tasol em i painim long narapela kain pasin.—1 Stori 28:9; Jon 10:27.
[Piksa Kredit Lain long pes 9]
Courtesy of the Austrian Railways