Ol Witnes Bilong Jehova na Oganaisesen Bilong Ol
LONG Oktoba 6, 1990, miting bilong olgeta yia bilong Sosaiti Was Taua i bin kamap long Haus Kibung bilong ol Witnes Bilong Jehova, long Jesi Siti, Nu Jesi, long Amerika. Klostu inap 5,000 manmeri i kam long dispela miting na ol i kirap nogut long ol tok siaman bilong dispela miting em John E. Barr i mekim, olsem: Sosaiti i kamapim wanpela video-kaset i go inap 55 minit, nem bilong en, Ol Witnes Bilong Jehova na Oganaisesen Bilong Ol. Em namba wan video Sosaiti i wokim, tasol bihain bai i gat sampela moa.
Ol piksa long video i makim lain bilong Jehova ol i gat gutpela lo long mekim wok bilong ol long kamapim nem bilong Jehova na long autim “gutnius bilong kingdom.” (Matyu 24:14) I gat ol piksa bilong nambawan ofis long Bruklin, Nu Yok, na ol piksa bilong ol haus long ol Fam Wastaua. Ol i wokim pinis 500,000 video long tok Inglis, na nau ol i wokim long 26 narapela tok ples tu.
Ol Man i Laikim o Olsem Wanem?
Ol man i no Witnes Bilong Jehova ol i laikim dispela video o olsem wanem? Wanpela bisnisman i rait olsem:
“Mi kisim save olsem pasin bilong wokim dispela video em i nambawan. Mi amamas long ol piksa i klia tru na i gat gutpela kala—i no olsem wanpela video tasol; nogat; i olsem wanpela piksa wokabaut. Ating dispela video bai i gutpela rot bilong helpim ol man long save long wok bilong nambawan ofis bilong yupela long Nu Yok. Yupela i wokim wanpela gutpela samting tru.”—J. J.
Dispela video i bin helpim ol man ol i stadi Baibel wantaim ol Witnes Bilong Jehova. Ol tok i kamap bihain bai i stori long dispela samting, olsem:
“Mi stadi Baibel wantaim wanpela yangpela man em i gat 20 krismas na em i skul long yunivesiti. Em i bin tingting planti long pasin bilong graun i wok long i go nogut. Tasol em i lukim ol piksa long video bilong ol yangpela brata long Betel, i stap bilong ol i gat as bilong en, na bihain tingting bilong em i senis olgeta. Em i kam long Bikpela De Kibung, na em i tokim mi em i laik stadi Baibel tupela taim long olgeta wik. Wanpela meri em i wok tisa long haiskul na em tu i stadi long Baibel, em i kisim dispela video bilong ol famili bilong em i ken lukim. Pastaim ol i ting ol Witnes i olsem wanpela liklik lain nating em planti man ol i no save laikim. Tasol mi tenkyu long Jehova olsem nau ol i save yumi mekim bikpela wok long olgeta hap bilong graun na helpim gut ol man.”—J. B.
“Mi sot long sampela tok bilong kamapim amamas mi pilim taim wanpela meri mi stadi Baibel wantaim em i kirap long aiwara, long wanem, em i amamas na pilim tru ol samting em i bin lukim long dispela video. Em i krai na tok: ‘Man i no ken hatwok long save olsem dispela em oganaisesen bilong God tru, Jehova. Bipo mi no save i gat wanpela lain olsem i stap.’ Na em i tok: ‘Mi laik kisim baptais.’ ”—K. D.
“Dispela video i gutpela tru bilong helpim ol Baibel-stadi bilong mipela. Asde long apinun, man bilong wanpela meri i stadi Baibel wantaim meri bilong mi, em i kam lukim mipela. Bipo em i bin birua long ol Witnes. Em i lukim video. Bihain em i kamapim sampela askim na em i kisim wanpela Baibel na buk Yu Inap i Stap Oltaim Long Paradais Long Graun. Bipo em i bin kukim olgeta buk bilong Baibel bilong meri bilong em!”—D. H.
Ol yangpela tu ol i laikim dispela video, olsem:
“Mi gat 6-pela krismas hap. Mi laikim ol piksa bilong ol Baibel na ol bokis i spit i go.”—K. W.
“Ol yangpela bilong mipela ol i tok dispela video i gutpela tru, winim ol program ol i bin lukim long TV.”—R.K.
“Pikinini man bilong mipela, em i gat 5-pela krismas, em i lukim gut dispela video na bihain long namba tu taim bilong mipela i lukim, em i askim mipela, ‘Inap mipela i lukim long olgeta de?’ Pikinini meri, em i gat 3-pela krismas, em i tok, ‘Mi laik go long Betel na wokim ol buk!’ ”—M. E.
“Mi gat tupela pikinini—Robin i gat 12-pela krismas na Sanin i gat 9-pela krismas na planti taim tupela i lukim dispela video. Bihain long Sanin i lukim video ya em i tok, ‘Mi laik tru long raun autim tok. Em samting bilong amamas.’ Mipela i pilim olsem video yet i bin helpim i stap bilong famili bilong mipela long i kamap gutpela moa. Mipela i amamas olsem i no gat wanpela piksa bilong dispela video em inap bagarapim bel na tingting bilong mipela!”—N. B.
“Mi gat 13 krismas hap. Dispela nupela video i bin helpim mi long save olsem mi no bin tingim tumas ol gutpela samting mi save kisim long han bilong Jehova. Em gutpela samting tru mi insait long lain bilong Jehova.”—K.W.
“Mi gat 16 krismas, na dispela video i kirapim tingting bilong mi olsem ol i mekim dispela wok long olgeta hap bilong graun.”—A. M.
“Ol pikinini i tokim mipela, nau ol i no amamas long lukim TV olsem bipo, long wanem, nau ol i save oganaisesen bilong God inap wokim ol samting ol inap amamas tru long lukim. Na dispela video i mekim na ol i gat strongpela laik long mekim wok bilong God long olgeta de.”—L. M.
Na maski sampela i stap Witnes Bilong Jehova inap planti yia pinis, ol tu ol i kirap nogut long ol samting ol i lukim.
“Sapos dispela video i save kirapim yumi ol man bilong lain bilong Jehova, orait, ating em i mas kirapim moa yet ol man i no Witnes, a? Taim mi hevi long pasin nogut bilong dispela graun, mi save lukim dispela video na i olsem mi go lukim Haus Betel!”—K. B.
“Bihain long mi lukim bikpela wok ol i mekim bilong wokim ol buk samting bilong Baibel, mi gat strongpela laik long kisim ol buk bilong mi na holimpas—ol i gutpela samting tru.”—L. P.
Mipela i kirapim yu tu long lukim dispela video Ol Witnes Bilong Jehova na Oganaisesen Bilong Ol. Bai yu kisim narapela kain tingting long i stap bilong yu na video bai helpim yu long bilip olsem bihain bai yu inap kisim gutpela sindaun.