Ol Tul Bilong Skulim Yumi, Kirapim Yumi, na Strongim Yumi
1 Ol i gat strong long skulim ol manmeri long Baibel na ol Witnes Bilong Jehova. Ol i bin kirapim planti manmeri long holimpas tok i tru. Ol i bin strongim bilip bilong ol manmeri bilong God i dediket pinis long em na i helpim ol long pilim tru ol samting. Wanem ol dispela samting? Em ol dispela video oganaisesen bilong Jehova i bin wokim. Yu bin lukim olgeta dispela 10-pela video? Nau tasol yu bin lukim? Yu save mekim wok long ol long taim bilong autim tok? Ol dispela gutpela tul inap helpim yu olsem wanem?
2 Stori “Yupela Famili, Bung Wantaim na Stadi Long Tok Bilong God,” i stap long Wastaua bilong Julai 1, 1999, i tok olsem yumi mas “lusim hap taim bilong stadi na lukim wanpela hap bilong wanpela gutpela video bilong Sosaiti . . . na bihain toktok long en.” Bai yumi bihainim dispela gutpela tok, na long Miting Bilong Wok long olgeta 2-pela 2-pela mun bai yumi stori long wan wan bilong ol dispela video. Mipela i laik kirapim olgeta long kongrigesen long lukim dispela video sampela de paslain na bai yumi toktok long dispela video long Miting Bilong Wok. Olsem na Sosaiti i askim ol elda na wasman sekit long stretim rot na bai olgeta wan wan i ken lukim dispela video sampela de paslain long yupela i toktok long dispela video long Miting Bilong Wok.
3 Bai yumi kirap long dispela mun na lukim namba wan video Sosaiti i bin wokim, Jehovah’s Witnesses—The Organization Behind the Name. Lukim dispela video na harim bekim bilong ol dispela askim i stap daunbilo:
◼ Ol man i save gut long wanem wok bilong ol Witnes Bilong Jehova?
◼ Olgeta wok ol i mekim long Betel i stret wantaim wanem skripsa?
◼ Wanem stori bilong Baibel yu lukim ol i wokim, na ol i kisim poto long en, na ol i droim bilong mekim wok long en long ol buk na nius?
◼ Taim ol i wokim ol buk na nius bilong yumi, yu kirap nogut long lukim wanem samting?
◼ Kirap long 1920 i kam inap long 1990, Sosaiti i prinim hamas buk na nius?
◼ Long lain bilong God husat ol inap winim mak bilong wok long Betel?—Snd 20:29.
◼ Long wanem ol rot famili bilong Betel i stap olsem gutpela piksa na ol Witnes Bilong Jehova i ken bihainim?
◼ Yu pilim tru wanem samting long wok ol i mekim long Betel bilong helpim planti manmeri na bai ol i save long gutnius?
◼ Husat i givim ol mani bilong helpim wok long olgeta hap bilong graun?
◼ Yumi ken givim bel long helpim wanem wok, na yumi mas i gat wanem kain tingting?—Jo 4:35; Ap 1:8.
◼ Yu ting olsem wanem long dispela oganaisesen i gat nem bilong Jehova i stap long en?
◼ Olsem wanem yu ken mekim wok long dispela video long wok autim tok?
Long mun Disemba yumi bai lukim video The Bible—Accurate History, Reliable Prophecy.