Ol Video i Mekim Gutpela Wok
1 “Taim pikinini man bilong mipela i no wokabaut yet, em i save lukim dispela video. Em i save lukim planti taim. Em i gutpela samting tru yumi gat ol tul bilong kirapim ol pikinini bilong yumi long laikim tru Jehova!” Dispela mama Kristen i stori long wanem video? Video Noah—He Walked With God. Wanpela mama i no Witnes, em pikinini man bilong em i bin lukim video Noah long haus bilong narapela, em i salim 90 dola kontribiusen long brens-ofis long Amerika na em i laik save yumi gat sampela video moa bilong ol pikinini. Ol video em oganaisesen bilong Jehova i wokim ol i save helpim gut ol yangpela na ol lapun tu.
2 Long Famili: Bihain long wanpela famili Witnes i lukim video Jehovah’s Witnesses Stand Firm Against Nazi Assault, mama i tok: “Long de olgeta mi bin tingting long ol samting Jehova i bin mekim bilong helpim ol dispela man nating long sanap strong na karim bikpela hevi tru! Dispela i bin kirapim mi long tingim olsem ol hevi bilong mi yet ol i liklik samting tru. Mipela i bin lukim dispela video wantaim ol pikinini meri bilong mipela na dispela i bin helpim ol long save gut moa olsem ol i mas bilip na wet long Jehova i helpim ol. Taim mipela i lukim video pinis, mipela i stori wantaim ol long en, na long dispela rot mipela i bin helpim ol pikinini long karim wanem wanem hevi inap painim ol.”
3 Long Skul: Wanpela yangpela Witnes i bin kisim video Stand Firm na soim hap bilong en long ol wanklas bilong em. Paslain long em i bin soim video, tisa i bin tok em i no laikim ol Witnes. Taim tisa i lukim pinis video, em i tok: “Dispela i bin senisim tru tingting bilong mi long ol Witnes Bilong Jehova. Narapela taim ol i kam long haus bilong mi, bai mi harim tok bilong ol na kirap stadi wantaim ol long Baibel!” Wanem samting i bin senisim tingting bilong em long yumi? Em i tok em pasin bilong yumi long “laikim tru na stap gut long narapela.”
4 Long Wok Autim Tok: Wanpela sista i bin autim tok long wanpela meri i no laik kisim litresa, maski em i gat sampela askim long yumi na ol bilip bilong yumi. Sista i kisim video Jehovah’s Witnesses—The Organization Behind the Name i go bek long dispela meri na meri wantaim man bilong em ol i lukim. Tupela i pilim tru dispela video na tupela i orait long stadi long Baibel. Tupela i kirap senisim sampela pasin bilong ol na bai i stret wantaim laik bilong God.
5 Olsem wanem? Yu yet yu save mekim bikpela wok long ol video?