Stori Bilong Wanpela Man
Jehova i Strongim Mi Long Olgeta Taim
EM STORI BILONG FORREST LEE
Ol polis i kisim ol pikap bilong mipela na ol buk na nius samting bilong Baibel. Namba Tu Pait i opim rot long ol birua long kirapim nupela gavena-jeneral bilong Kanada long tambuim wok bilong ol Witnes Bilong Jehova. Dispela samting i kamap long Julai 4, 1940.
MIPELA i no larim dispela samting i pasim mipela. Mipela i kisim sampela nius moa long hap mipela i bin haitim ol long en na mekim yet wok autim tok. Oltaim bai mi tingim tok bilong Papa long dispela taim: “Mipela i no inap lusim dispela wok. Jehova i tokim mipela long autim tok.” Long dispela taim, mi gat 10-pela krismas na skin bilong mi i gat strong. Tasol long nau tu, pasin bilong papa long wok strong na givim bel long autim tok i save kirapim mi long tingim pasin bilong God bilong yumi, Jehova, long strongim ol man i stap gut long em.
Long narapela taim gen ol polis i pasim mipela, ol i kisim ol buk na nius samting bilong mipela, na tu, ol i kisim papa i go long kalabus na nau mama i stap wanpis wantaim 4-pela pikinini. Dispela samting i bin kamap long Septemba 1940 long Saskatsiwan. I no longtaim bihain na ol i rausim mi long skul, long wanem, mi bihainim maus bilong bel em Baibel i skulim pinis na mi no laik salut long plak o mekim singsing bilong kantri. Mi skul yet long rot bilong pas na dispela i no pulim bikpela hap taim tumas, olsem na mi mekim bikpela wok moa bilong autim tok.
Long 1948, ol i singautim ol painia—em ol Witnes Bilong Jehova i save mekim wok autim tok long olgeta de—bilong go long nambis long hap is bilong Kanada. Olsem na mi go mekim wok painia long Halifaks, Nova Skosia, na long Kep Wulf, Prins Etwat Ailan. Long 1949, ol i singautim mi bilong mekim wok inap 2-pela wik long brens-ofis bilong ol Witnes Bilong Jehova long Toronto, na mi orait long mekim olsem. Dispela 2-pela wik i kamap longpela na winim 6-pela yia mi mekim gutpela wok long Betel. Bihain, mi bungim Myrna, em tu i laikim Jehova, na mitupela i marit long Disemba 1955. Mitupela i go sindaun long Milten, Ontario, na i no longtaim na wanpela nupela kongrigesen i kamap long dispela hap. Rum i stap daunbilo long haus bilong mipela i kamap olsem Haus Kingdom.
Laik Bilong Mekim Bikpela Wok Moa
Long ol yia bihain, mipela i kamap papamama bilong 6-pela pikinini, em narapela i kamap kwiktaim bihain long narapela. Namba wan em pikinini meri bilong mipela, Miriam. Bihain, em Charmaine, na Mark, na Annette, na Grant, na laspela em Glen. Taim mi pinis long wok na kam long haus, planti taim mi lukim ol dispela liklik pikinini i sindaun long plua klostu long paia, na Myrna i save kaunim na kamapim ol stori bilong Baibel long ol na kirapim bel bilong ol long laikim tru Jehova. Mi tenkyu tru long gutpela wok em i mekim bilong helpim ol pikinini, na olgeta pikinini bilong mipela i kisim gutpela save long Baibel taim ol i liklik yet.
Mi tingim na pilim tru long bel pasin bilong papa long givim bel long autim tok. (Sindaun 22:6) Olsem na long 1968, taim ol i singautim ol famili bilong ol Witnes Bilong Jehova long go helpim wok bilong autim tok long Sentral na Saut Amerika, famili bilong mipela i laik mekim olsem. Long dispela taim, ol pikinini i gat 5 i go inap 13 krismas, na i no gat wanpela bilong mipela i save long tok Spen. Mi bihainim tok ol i givim mi, na mi go long sampela kantri bilong sekim sindaun bilong ol man long ol dispela kantri. Taim mi kam bek, mipela famili i beten na skelim gut wanem hap mipela bai go long en, na mipela i pasim tok long go long Nikaragua.
Mekim Wok Bilong God Long Nikaragua
Long Oktoba 1970, mipela i stap long nupela ples bilong mipela, na insait long 3-pela wik ol i makim mi bilong lukautim liklik hap long wanpela miting bilong kongrigesen. Mi hatwok tru long mekim tok Spen, na bilong pinisim tok mi singautim kongrigesen olgeta long kam long haus bilong mipela bilong cerveza long Sarere 9 klok moningtaim. Mi laik tok servicio, em tok i makim wok autim tok, tasol mi popaia na singautim olgeta long kam dring bia. Tru tumas, em i hatwok tru long lainim tok Spen!
Pastaim, mi save raitim long han tok mi laik kamapim long man bilong haus, na mi save mekim traim dispela tok taim mi wokabaut i go long haus. Mi save tok: “Long rot bilong dispela buk yu inap stadi long Baibel, no gat pe.” Wanpela man i laik stadi long Baibel, bihain em i tok olsem em i bin kam long miting bilong mipela, long wanem, em i laik save gut long tok mi bin traim long mekim. Dispela man i kamap wanpela Witnes Bilong Jehova. Dispela i kamapim klia tru olsem God yet i save mekim pikinini kaikai bilong tok i tru i go bikpela long bel bilong ol man i gat pasin daun, olsem aposel Pol i bin tok!—1 Korin 3:7.
Mipela i stap olsem 2-pela yia long biktaun Managua, na bihain ol i askim mipela long go long hap saut bilong Nikaragua. Long dispela hap mipela i wok wantaim kongrigesen long Rivas na ol liklik grup i stap klostu. Pedro Peña, em wanpela lapun brata i stap gut long Jehova, em i save poromanim mi taim mipela i go lukim ol dispela grup. Wanpela grup i stap long wanpela ailan long raunwara Nikaragua, na i gat wanpela famili tasol ol i Witnes Bilong Jehova.
Maski dispela famili i gat liklik samting tasol bilong skin, ol i mekim bikpela wok tru bilong soim olsem ol i amamas tru long mipela i go lukim ol. Long dispela apinun mipela i kamap, ol i redim pinis kaikai bilong mipela. Mipela i stap inap wanpela wik, na planti manmeri long dispela hap ol i laikim tru tok bilong Baibel, ol i givim sampela kaikai bilong ol long mipela. Mipela i amamas tru taim 101 ol i kam bilong harim pablik-tok bilong Baibel long Sande.
Long wanpela narapela taim gen, mipela i redi long go lukim wanpela grup long ol ples maunten klostu long boda bilong Kosta Rika, na long dispela taim mi pilim olsem bikpela strong bilong Jehova i bin helpim mi tru. Long de mipela i laik go, Pedro i kam bilong kisim mi, tasol mi kisim sik malaria na mi slip long bet. Mi tok: “Pedro, mi no inap long go.” Em i putim han bilong em long het bilong mi na i tok: “Skin bilong yu i hat tru, tasol yu mas kam! Ol brata i wet long yumi.” Orait, nau em i mekim wanpela beten em bel bilong mi i pilim tru.
Bihain mi tok: “Yu go kisim wanpela fresco (kol-dring) bilong yu. Bai mi redi insait long 10-pela minit samting.” Tupela Witnes famili ol i stap long dispela hap mipela i go long en, na ol i lukautim mipela gut tru. Long de bihain, mipela i go autim tok wantaim ol, maski skin i hat na mi no gat strong. Winim 100 manmeri ol i kam long miting long Sande na dispela i strongim tru mipela!
Go Long Narapela Hap Gen
Long 1975, namba 7 pikinini bilong mipela, Vaughn, i kamap. Long 1976, hevi bilong mani i mekim na mipela i mas go bek long Kanada. I hatwok tru long lusim Nikaragua, long wanem, mipela i pilim tru olsem bikpela strong bilong Jehova i bin helpim mipela taim mipela i stap long dispela hap. Long taim mipela i lusim Nikaragua, winim 500 long teritori bilong kongrigesen bilong mipela ol i wok long go long ol miting.
Pastaim, long taim ol i makim mi na pikinini meri bilong mipela, Miriam long mekim wok painia salim long Nikaragua, Miriam i askim mi olsem: “Papa, sapos yu mas go bek long Kanada, inap yu larim mi stap long hia?” Mi no gat tingting long lusim dispela hap, olsem na mi tok: “Yes, em i orait!” Olsem na taim mipela i go, Miriam i stap bilong mekim yet wok bilong autim tok long olgeta de. Bihain, em i maritim Andrew Reed. Long 1984, ol i go long namba 77 klas bilong Gileat, em skul bilong ol Witnes Bilong Jehova bilong kamap misineri, na long dispela taim skul i stap long Bruklin, Nu Yok. Nau Miriam wantaim man bilong em ol i mekim wok bilong God long Ripablik Dominika, na long dispela rot em inapim wanpela laik ol gutpela misineri long Nikaragua i bin putim long bel bilong em.
Tok papa i bin mekim, olsem “mipela i no inap lusim dispela wok,” i wok long kirapim yet bel bilong mi. Olsem na long 1981, taim mipela i bungim pinis sampela mani bilong go bek long Sentral Amerika, mipela i go long Kosta Rika. Long taim mipela i mekim wok bilong God long Kosta Rika, ol i singautim mipela long helpim wok bilong wokim nupela haus brens bilong ol. Tasol long 1985, pikinini man bilong mipela, Grant, i mas lukim dokta, olsem na mipela i go bek long Kanada. Glen i stap long Kosta Rika bilong sanapim nupela haus brens, na Annette na Charmaine ol i mekim wok painia salim. Mipela hap lain i lusim Kosta Rika, mipela i no tingting long go olgeta.
Karim Hevi
San i lait gut long moningtaim bilong Septemba 17, 1993. Mi wantaim bikpela pikinini man bilong mipela, Mark, i wok long stretim rup bilong haus. Mitupela i wok gut wantaim na toktok long ol samting bilong spirit—em pasin bilong mipela long mekim olsem. Tasol lek bilong mi i wel na mi pundaun i go daun long graun. Bihain, taim tingting bilong mi i kamap klia gen, mi lukim ol strongpela lait na ol man i putim waitpela klos. Em wanpela rum long haus sik bilong ol man i kisim bikpela bagarap.
Mi tingim tok bilong Baibel, olsem na kwiktaim mi tok: “No ken givim blut, no ken givim blut!” (Aposel 15:28, 29) Bel bilong mi i stap isi taim mi harim Charmaine i tok: “Em i orait, Papa. Mipela olgeta i stap.” Bihain ol i tokim mi olsem, ol dokta i lukim kat i kamapim bilip bilong mi long blut, na ol i no tok pait long blut. Bun bilong nek bilong mi i bruk na olgeta skin bilong mi i dai, na mi no inap long pulim win long strong bilong mi yet.
Nau mi no inap mekim wanpela samting, olsem na em i bikpela samting long Jehova i mas strongim mi, winim olgeta taim bipo. Ol i katim nek bilong mi liklik bilong putim gumi bilong pulim win i go insait, na dispela i pasim rot bilong win long go long hap bilong nek em krai bilong toktok i save kamap. Mi no inap long toktok. Nau ol man i mas lukluk long maus bilong mi taim mi toktok bambai ol inap save long samting mi toktok long en.
Mani mipela i mas lusim bilong baim ol marasin samting i go bikpela hariap. Meri bilong mi na klostu olgeta pikinini bilong mi ol i insait long wok painia samting, olsem na mi tingting olsem ol i mas lusim dispela wok bilong stretim dispela hevi bilong mani o nogat. Tasol Mark i kisim wanpela wok mani na insait long 3-pela mun tasol em i helpim mipela long baim bikpela hap bilong ol marasin samting. Olsem na olgeta inap mekim yet wok painia samting, mi wantaim meri bilong mi tasol i mas lusim.
Planti handet kat na pas ol i salim i kam long 6-pela narapela narapela kantri i pulap long banis bilong rum bilong mi long haus sik. Tru tumas, Jehova i wok long strongim mi. Na tu, kongrigesen i helpim famili bilong mi long rot bilong givim kaikai samting long sampela taim insait long dispela 5-pela mun na hap mi stap long wod bilong ol man i gat bikpela sik. Olgeta de wanpela elda Kristen i save stap wantaim mi long apinun olgeta, na em i save kaunim Baibel na ol buk na nius bilong Baibel, na tu, em i stori long ol gutpela ekspiriens bilong strongim bel bilong mi. Tupela bilong famili i save redim olgeta wan wan miting bilong kongrigesen wantaim mi, olsem na mi no lus long ol gutpela kaikai bilong spirit.
Taim mi stap yet long haus sik, ol i stretim rot bilong mi ken go long wanpela bikpela de kibung. Lain bilong haus sik i stretim rot na wanpela nes na wanpela meri i save gut long helpim man i gat hevi long pulim win ol i stap wantaim mi long kibung inap de olgeta. Mi amamas tru long bung gen wantaim ol brata sista Kristen bilong mi! Mi no inap lusim tingting long samting i painim mi—planti handet manmeri i sanap long lain na ol i wetim taim bilong ol long sekanim mi.
Stap Strong Yet Long Ol Samting Bilong Spirit
Inap wanpela yia samting bihain long mi kisim dispela bagarap, mi inap go bek na stap wantaim famili bilong mi, tasol i mas i gat man bilong was long mi long san na long nait. Wanpela bas i gat ol samting bilong helpim mi i save kisim mi i go long ol miting, na wan wan taim tasol mi save lusim miting. Tasol mi mas tokaut olsem, mi mas i gat strongpela tingting na bai mi go long ol miting. Kirap long taim mi kam bek long haus, mi bin go long olgeta kibung distrik.
Bihain, long Februeri 1997, mi inap toktok liklik gen. Sampela nes i save putim gut yau taim mi tokim ol long ol gutpela samting mi wetim long kamap bihain, em Baibel i as bilong en. Wanpela nes i bin kaunim long mi olgeta tok bilong buk Jehovah’s Witnesses—Proclaimers of God’s Kingdom na ol narapela buk na nius bilong Sosaiti Was Taua. Mi save raitim pas long ol man long rot bilong yusim wanpela stik bilong mekim wok long kompiuta. Maski dispela kain pasin bilong rait i gat bikpela hatwok bilong en, mi amamas long insait yet long wok autim tok.
Ol rop wailis long bodi bilong mi i save pen nogut tru. Tasol taim mi tokim ol narapela long ol tok i tru bilong Baibel o taim ol narapela i kaunim ol dispela tok long mi, dispela i save helpim mi. Wan wan taim mi save autim tok long rot wantaim gutpela meri bilong mi, na em i save kamapim tok bilong mi long ol man taim mi yet i no inap mekim. Sampela taim mi bin insait long wok painia haptaim. Wok bilong mi olsem wanpela elda Kristen i save givim bikpela amamas long mi, na mi save amamas tru taim ol brata i kam toktok wantaim mi long ol miting o kam lukim mi long haus na mi inap helpim na strongim ol.
Mi mas tokaut stret olsem mi save bel hevi kwik. Olsem na taim mi bel hevi, wantu mi save beten bambai mi inap i stap amamas. Long nait na long san mi save beten askim Jehova long strongim mi. Mi save amamas taim mi kisim wanpela pas o taim wanpela i kam lukim mi. Na tu, taim mi kaunim nius Wastaua o Kirap!, dispela i save givim ol gutpela tingting bilong strongim mi. Sampela taim ol narapela narapela nes i save kaunim ol dispela nius long mi. Kirap long taim mi kisim dispela bagarap, mi bin harim ol kaunim bilong Baibel long kaset na mi bin harim tok bilong Baibel olgeta inap 7-pela taim. Em sampela rot Jehova i save mekim wok long en bilong strongim mi.—Song 41:3.
Dispela senis long i stap bilong mi i givim mi bikpela hap taim long tingim tingim long bel pasin bilong Nambawan Tisa bilong yumi, Jehova, long skulim yumi long laip bilong yumi. Em i givim yumi stretpela save long laik bilong em na ol samting em i tok pinis long mekim, na wanpela wok i gat as bilong en, na ol gutpela tok bilong helpim famili long i stap amamas, na gutpela save bilong stiaim yumi long taim bilong hevi. Jehova i bin mekim gut long mi na em i givim mi wanpela gutpela meri em i save stap gut long mi. Ol pikinini bilong mi tu ol i bin helpim mi, na mi amamas, long wanem, olgeta i bin insait long wok painia samting. Long Mas 11, 2000, pikinini man bilong mipela, Mark na meri bilong em, Allyson ol i winim klas namba 108 bilong Skul Gileat na ol i makim ol bilong go long Nikaragua. Mi na meri bilong mi i go long dispela bung bilong winim skul. Mi inap tok tru olsem, hevi i bin senisim i stap bilong mi tasol i no senisim bel bilong mi.—Song 127:3, 4.
Mi tok tenkyu long Jehova long gutpela save em i bin givim mi na dispela i helpim mi long givim ol gutpela samting bilong spirit long famili bilong mi. Pasin bilong ol pikinini bilong mi i save strongim na kirapim bel bilong mi. Ol i save mekim wok bilong God na ol i gat wankain tingting olsem bilong papa bilong mi em i bin tok: “Mipela i no inap lusim dispela wok. Jehova i tokim mipela long autim tok.” Tru tumas! Jehova i bin strongim mi na famili bilong mi long olgeta taim.
[Piksa long pes 24]
Mi wantaim papa na ol brata na susa bilong mi, klostu long trela bilong mipela em mipela i save yusim taim mipela i mekim wok painia. Mi sanap long han sut
[Piksa long pes 26]
Mi wantaim meri bilong mi, Myrna
[Piksa long pes 26]
Piksa bilong famili bilong mipela ol i kisim long nau
[Piksa long pes 27]
Mi save autim tok yet long rot bilong ol pas