Mi Amamas Maski Ol Hevi i Painim Mi​​—Baibel i Helpim Mi Long Karim Hevi

Stori bilong Enrique Caravaca Acosta

Em Epril 15, 1971. Mi go lukim famili bilong mi long fam bilong mipela. Longpela taim liklik mi bin lusim ol, olsem na mi amamas long lukim ol gen. Mi wok long tingting, olgeta bai stap long haus taim mi kamap, na bai mi lukim husat pastaim. Taim mi kamap, mi kirap nogut na pret tru long lukim 4-pela man i dai pinis​—Mama tu​—wanpela man i bin kilim ol i dai!

MI KIRAP nogut na tingting bilong mi i pas. Wanem samting i bin kamap? Bai mi mekim wanem? No gat man i stap, na tingting bilong mi i paul na mi no inap mekim wanpela samting. Paslain long mi stori moa long dispela samting, mi laik stori liklik long mi yet. Na bai yu kliagut long mi bin pilim olsem wanem long dispela hevi na ol narapela hevi long laip bilong mi.

Mipela i Kisim Tok i Tru

Mama i karim mi long Quirimán, klostu long Nicoya, long Kosta Rika. Long 1953, taim mi gat 37 krismas, mi stap wantaim papamama long fam. Mipela i go bikpela long lotu Katolik, tasol mipela i no amamas long sampela bilip na mipela i gat planti askim em ol i no bekim.

Wanpela moning, wanpela man nem bilong em Anatolio Alfaro i kam long haus bilong mipela na i kirapim mipela long stadi long Baibel. Em i kamapim planti skripsa na ol tok bilong Baibel long mipela. Papa, Mama, wanpela brata na susa bilong mi, na gelpren bilong susa i stap wantaim mipela, na mi yet, mipela olgeta i sindaun na harim tok bilong em. Mipela i stori long de olgeta na i go inap long biknait. Mipela i gat planti askim.

Anatolio i slip long haus bilong mipela na long de bihain em i stap wantaim mipela. Mipela i amamas tru long ol tok mipela i harim, na moa yet taim em i kamapim stret ol tok long Baibel bilong bekim ol askim bilong mipela. Dispela i mekim bikpela samting tru long mipela. Mipela i tingting long ol tok mipela i lainim, na mipela i save dispela em tok i tru. Anatolio i lusim sampela nius na buk bilong Baibel long mipela. Long nait mipela famili i save ritim na stadi wantaim long ol dispela buk samting. Em i hatwok, long wanem, mipela i no gat pawa. Paslain long mipela i sindaun bilong stadi, mipela i save karamapim lek bilong mipela long ol beg bilong putim poteto, nogut ol moskito i kaikaim lek.

Inap 6-pela mun bihain, 5-pela long famili bilong mipela, papa, mama na mi tu, mipela i kisim baptais. Mipela i amamas tru na kirap long autim tok long ol haus na tokim ol man long ol samting mipela i lainim. Mipela i save wokabaut inap tupela aua na sampela taim mipela i go long hos long wanpela taun ol i kolim Carrillo, na bung wantaim wanpela grup bilong ol Witnes Bilong Jehova long hap. Anatolio i save kam yet long stadi long Baibel wantaim mipela long haus. Bihain, ol i stretim rot bilong mekim miting long haus bilong mipela, na inap olsem 8-pela manmeri i save bung. Bihain olgeta dispela manmeri i kisim baptais. I no longtaim na dispela grup i kamap wanpela liklik kongrigesen we inap olsem 20 manmeri i save bung long en.

Mekim Wok Bilong God Fultaim

I no longtaim na brens ofis bilong ol Witnes Bilong Jehova long Kosta Rika i singautim ol Witnes husat inap long autim tok bilong God fultaim, long mekim olsem. Long 1957, mi kirap bihainim dispela singaut na mekim dispela wok. Mi amamas tru long mekim dispela wok. Planti taim mi yet i save wokabaut inap planti aua i go long ol ples kanaka bilong autim tok long ol manmeri. Sampela taim ol man i kros long mi. Mi inap tingim tripela taim we ol man i bin holim busnaip na pretim mi, ol i strong long mi mas tokim ol long mi husat na mi mekim wanem.

Long dispela taim long 1950 samting, planti rot em ol bus rot i go namel long bikbus, na mipela i hatwok tru long bungim ol man. Bilong i go long sampela hap, mipela i mas raun long hos. Mipela i save go brukim ol wara, na sampela taim mipela i slip tasol long bus. Ol moskito i save mekim save tru long mipela. Na tu, mipela i mas was gut long ol snek na pukpuk. Maski ol dispela hevi i stap, mi amamas long helpim ol man long kisim save long God Jehova. Taim mi kam bek long haus, mi amamas na belgut, long wanem, mi inap autim tok i tru bilong Baibel long ol narapela. Mi mekim wok autim tok na stadi long Baibel long olgeta de, olsem na pasin bilong mi long laikim God Jehova i wok long kamap strong, na mi pilim olsem mi pas gut wantaim em.

Bihain, ol i givim mi sampela wok moa. Winim 10-pela yia, mi mekim wok wasman raun, em wok lotu we long olgeta wan wan wik mi save go lukim na strongim ol narapela narapela kongrigesen long sampela hap. Helt bilong mi i mekim na mi lusim dispela gutpela wok, tasol mi amamas yet long autim tok na mekim wok bilong God fultaim.

Bikpela Hevi i Kamap

Long 1971, taim mi stap long Nicoya, mi go bek bilong lukim famili bilong mi. Taim mi go insait long haus, mi lukim Mama, em i gat 80 krismas, em i slip long plua. Wanpela man i bin sutim em long gan na naip. Taim mi holim em, em i pulim win yet. Liklik taim bihain, em i dai long han bilong mi. Mi lukluk raun na lukim kuk bilong mipela, em i gat bel inap 8-pela mun, i slip long plua long haus kuk. Em tu i dai pinis. I no tupela tasol i dai, mi lukim bodi bilong wanpela susa wanlotu long narapela rum, na bodi bilong pikinini man bilong kuk long rum waswas. Dispela man i bin sutim ol long gan na i katkatim skin bilong ol long naip. Husat inap mekim kain pasin nogut tru olsem? Na bilong wanem em i mekim?

Taim mi go ausait, mi lukim papa bilong mi. Dispela man i bin sutim em long het, tasol em i stap laip yet! Mi hariap i go long haus bilong brata bilong mi, em longwe inap 15 minit samting, na painimaut olsem dispela man i bin kilim i dai tu narapela meri na pikinini bilong em. Mi kirap nogut long save olsem dispela kilman em kandere bilong mi i gat 17 krismas na em i gat sik long tingting, tasol em i no wanpela Witnes Bilong Jehova! Em i bin ranawe lusim dispela hap. Ol polis i mekim bikpela wok tru bilong painim em, kain bikpela wok olsem i no bin kamap bipo long Kosta Rika.

Stori bilong dispela samting i bikpela tru long ol nius bilong Kosta Rika. Bihain long 7-pela de, ol polis i painim dispela kilman, em i karim wanpela bikpela naip na gan (.22 caliber pistol) em wanpela man i bin salim long em, maski dispela man i save olsem kandere i gat sik long tingting. Ol polis i sut na kilim kandere bilong mi taim ol i traim long holim em.

Taim ol i wok long painim em, planti i tokim mi long lusim dispela hap, ol i pret olsem nogut kandere i kam bek na bagarapim mi. Mi beten long God long dispela samting, long wanem, mi pilim olsem mi mas i stap wantaim ol narapela long famili em ol i stap laip yet na ol lain long kongrigesen, olsem na mi stap bek.

Ol Narapela Bikpela Hevi i Painim Mi

Tarangu, Papa i stap laip wanpela yia tasol na em i dai. Long yia bihain, liklik susa bilong mi, em i gutpela wokmeri bilong God Jehova, em tu i dai, narapela man i bin kilim em. Olgeta wanblut i kirap nogut long wanpela gen long famili i dai. Em hatwok long stori gut long bikpela pen na bel hevi em mipela na ol pren bilong mipela i pilim. Long ol dispela taim bilong hevi, mi save beten oltaim long Jehova na askim em long givim strong long mi.

Long 1985, mi go long wanpela skul bilong ol elda Kristen inap 3-pela de, long biktaun San José. Taim skul i pinis, mi pilim olsem pasin bilong mi long pas gut wantaim Jehova i kamap strong moa. Long Mande bikmoning, mi go bilong kisim bas i go long ples. Taim mi wokabaut i go long bas stop, ol raskol i holim nek bilong mi na kisim ol samting bilong mi. Dispela samting i kamap wantu tasol na mi no inap lukim pes bilong ol. Dispela i mekim na mi no inap bihainim moa pasin bilong ol Kosta Rika long toktok. Hia long provins Guanacaste, ol man i save singaut o bikmaus na tok gude taim ol i bungim narapela, o bilong toksave olsem ol i kam. Bipo mi inap mekim gut dispela singaut, tasol bihain long dispela hevi, mi no inap moa long mekim olsem.

Long 1979 mi maritim Celia, em wanpela wanlotu Witnes long kongrigesen i stap klostu. Celia i laikim tru tok bilong Baibel. Mipela i save rit na stadi long Baibel wantaim long olgeta de. Mi sori tru taim em i dai long sik kensa long Julai 2001. Sampela taim mi bel hevi long i stap wanpis, tasol mi bilip na wet long God bai kirapim bek ol daiman na dispela i strongim mi.​—Jon 5:​28, 29.

Amamas Maski Ol Hevi i Painim Mi

Ating mi bin karim planti hevi moa winim planti man, tasol mi tingim ol dispela hevi i olsem rot bilong mi ken kamapim klia bilip bilong mi na pasin bilong mi long stap gut long Jehova. (Jems 1:13) Bilong helpim mi long kisim stretpela tingting long ol samting i bin painim mi, mi save tingim olsem “taim nogut i save painim yumi olgeta.” (Saveman 9:11) Mi tingim tu olsem em taim bilong “planti hevi nogut tru,” long wanem, ol man i save pait na bagarapim ol man, na ol i no bosim laik bilong bodi bilong ol. (2 Timoti 3:​1-5) Na tu, mi save tingim stori bilong Jop. Maski em i karim pen na hevi​—olgeta pikinini bilong em i dai, em i kisim bikpela sik, na olgeta animal samting bilong em i lus​—Jop i sanap strong na i tok: “Mi litimapim nem bilong [God].” Na Jehova i givim planti samting long Jop, long wanem, em holimpas stretpela pasin. (Jop 1:​13-22; 42:​12-15) Ol dispela tingting mi kisim long Baibel i helpim mi long stap amamas maski planti hevi i bin painim mi.

Long olgeta taim Jehova i bin helpim mi long putim em i stap namba wan long laip bilong mi. Pasin bilong ritim Baibel long olgeta de i save mekim gut bel bilong mi na i strongim mi long karim hevi. Long rot bilong beten long Jehova, mi inap kisim “bel isi God i save givim.” (Filipai 4:​6, 7) Dispela i mekim na bel na tingting bilong mi i stap isi. Pasin bilong i go long ol miting Kristen na insait long en, dispela tu i strongim bilip bilong mi.​—Hibru 10:​24, 25.

Mi lapun pinis, tasol mi tenkyu long Jehova long mi gat strong yet long wok wantaim ol wanlotu Kristen, stadi long Baibel wantaim ol narapela, na insait long wok bilong autim tok. Taim mi mekim ol dispela wok bilong helpim ol narapela, dispela i givim strong long mi long karim bel hevi. Olsem na maski planti bikpela hevi i bin painim mi, mi tok tenkyu tru long Jehova.a

[Futnot]

[Rait long pes 20]

Pasin bilong ritim Baibel long olgeta de i save mekim gut bel bilong mi na i strongim mi long karim hevi

[Piksa long pes 19]

Taim mi nupela yet long mekim tok bilong Baibel

[Piksa long pes 20]

Long wok autim tok taim mi yangpela yet