Kisim Helpim Long Nambawan Gutpela Ediukesen!

BAIBEL i kamapim klia olsem God Jehova i bin wokim olgeta samting, na em i wokim yumi ol man tu. (Stat 1:27; KTH 4:11) Em i Nambawan Bikpela Tisa, na em i bin skulim namba wan man na meri, Adam na Iv, bambai ol i ken i stap long naispela gaden Iden. Em i gat tingting long skulim ol na lukautim ol i go inap oltaim oltaim. (Stat 1:​28, 29; 2:​15-17; Aisaia 30:​20, 21) Man! Em gutpela samting tru, a?

Tasol sori tru, tupela i givim baksait long ol gutpela samting ol inap kisim. Ol i bikhet na dispela i mekim na pasin na skin bilong ol manmeri bilong graun i wok long bagarap. (Stat 3:​17-19; Rom 5:12) Baibel i stori long ol lain i stap bihain liklik long taim God i bin wokim namba wan man na meri, na i tok: “Bikpela i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”​​—⁠Stat 6:⁠5.

Long klostu 4,500 yia i go pinis, Jehova i bin lukim olsem ol man bilong graun i tingting oltaim long mekim pasin nogut, na long nau dispela pasin i go nogut moa. Planti man i save giaman na i no sem long dispela, ol i save stil, o bagarapim ol narapela. Ol hevi i wok long i go bikpela long olgeta de, na ol man i wok long lusim pasin bilong tingim ol narapela man. Na i no gat pasin wanbel namel long ol pren na insait long ol famili tu. God i no gat asua long ol hevi i kamap long nau, tasol dispela i no makim olsem em i no tingim ol dispela hevi, nogat. Long olgeta taim Jehova i bin tingim ol man, na em i redi long skulim ol man i wetim em long soim rot bilong i stap amamas. Inap 2,000 yia samting i go pinis, em i salim Pikinini bilong em, Jisas Krais, i kam long graun na Jehova i kamapim klia olsem em i gat laik long skulim ol man i laik bai i stap bilong ol i kamap gutpela. Jisas i stap olsem piksa long pasin bilong givim nambawan gutpela skul long ol man, long wanem, Nambawan Bikpela Tisa i bin skulim em inap planti milion milion yia.

Lotu Kristen Tru​​—⁠Wanpela Ediukesen

Jisas Krais i bin kirapim lotu Kristen tru, em dispela samting i save bosim wokabaut bilong man na pasin laikim i as bilong en. Insait long lotu Kristen tru, olgeta tingting na pasin bilong man i mas stret wantaim laik bilong God, na dispela bai givim ona na litimapim nem bilong Em. (Matyu 22:​37-39; Hibru 10:⁠7) Papa bilong Jisas, Jehova, i bin stiaim em long skulim ol man long dispela rot ol i mas bihainim. Long Jon 8:​29, Jisas i tok: “Papa i bin salim mi na mi kam, em i stap wantaim mi. Em i no lusim mi, na larim mi i stap wanpis . . . long wanem, oltaim mi save mekim ol samting em i laikim.” Tru tumas, taim Jisas i mekim wok bilong em long graun, oltaim Papa bilong em i bin helpim em na soim rot long em. Ol disaipel bilong Jisas long pastaim i no stap wanpis long karim ol hevi na i no gat man long soim rot long ol. Jehova i bin skulim ol long rot bilong Pikinini bilong em. Ol i bihainim ol tok na pasin bilong Jisas na dispela i mekim ol i kamap gutpela man. Na i wankain tu long ol disaipel bilong em long nau.​—⁠Lukim blok “Ol Samting Pasin na Tok Bilong Jisas i Mekim Long Ol Man,” long pes 6.

Wanpela bikpela mak bilong lotu Kristen tru, em wanpela kain ediukesen i save wok insait long tingting na bel bilong ol man na i senisim pasin bilong ol. (Efesus 4:​23, 24) Yumi ken tingim ol tok Jisas i bin mekim long i stap gut long poroman marit bilong yumi. Em i tok: “Yupela i harim pinis bipo ol i tok olsem, ‘Yupela ol marit, yupela i no ken mekim pasin pamuk.’ Tasol mi tokim yupela olsem, sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:​27, 28) Jisas i laik skulim ol disaipel olsem bel i mas i stap klin, na ol tingting na laik nogut bilong bel inap kamapim ol bikpela hevi tru long man, maski em i no mekim yet ol dispela pasin. Yumi save pinis olsem ol tingting nogut inap kirapim man long mekim ol pasin God i no laikim na i nogutim ol narapela.

Olsem na Baibel i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru . . . long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:⁠2) Ating bai yu askim olsem: ‘Tru yumi inap mekim tingting i kamap nupela long rot bilong ediukesen?’ Bilong mekim tingting i kamap nupela, yumi mas stiaim tingting i go long narapela rot, na bilong mekim olsem yumi mas kisim ol stiatok na ol tok bilong skulim yumi i stap long Baibel na putim long tingting. Yumi inap mekim olsem sapos yumi kisim skul God i givim yumi long rot bilong Baibel.

Kirapim Man Long Senisim Pasin

“Tok bilong God em i gat laip, na em i wok strong i stap.” (Hibru 4:12) Em i gat strong yet long senisim tingting na pasin bilong ol man, na dispela i soim olsem tok bilong Baibel i no bilong bipo tasol. Em inap kirapim man long senisim wokabaut bilong em, na kisim lotu Kristen tru, na kamap gutpela man o meri. Nau yumi ken kamapim sampela stori i soim olsem ediukesen long Baibel inap tru long helpim yumi.

Emilia, em pastaim yumi stori long em, i tok: “Mi bin traim long mekim ol samting na bai sindaun bilong mipela i kamap gutpela, tasol mi no inap. Orait taim mi kirap stadi long Baibel wantaim ol Witnes Bilong Jehova, nau mi luksave olsem sindaun bilong mipela inap kamap gutpela, na mi kirap long senisim tingting na pasin bilong mi. Mi lain long stap isi na no ken kros na belhat. Bihain, man bilong mi tu i kirap long stadi. Em i hatwok long lusim dring, tasol em i lusim. Dispela i helpim mipela long kirap bihainim ol gutpela pasin insait long marit bilong mipela. Mipela i kamap Kristen na nau mipela i stap amamas na mipela i wok long lainim ol pikinini bilong mipela long ol stiatok bilong Baibel.”​​—⁠Lo 6:⁠7.

Ediukesen em lotu Kristen tru i save givim, em inap helpim man long lusim ol pasin olsem dring tumas na pasin pamuk samting. Dispela samting i bin kamap long Manuel.a Taim em i gat 13 krismas, em i ranawe lusim papamama na i kirap long smok mariwana. Bihain em i kisim strongpela drak heroin. Em i kirap slip wantaim ol man na meri bilong kisim ples slip na mani. Na sampela taim em i save paitim ol man na kisim mani bilong ol. Klostu olgeta taim em i spak long drak. Pasin bilong em long pait i mekim na planti taim em i kalabus. Wanpela taim em i kalabus inap 4-pela yia na long kalabus em i insait long wok bilong salim ol gan samting long pasin hait. Bihain em i marit, tasol wokabaut bilong em i wok long karim kaikai nogut. Em i tok: “Bihain mitupela i mas sindaun long wanpela liklik pipia haus bipo em i haus kakaruk. Meri bilong mi i save kukim kaikai antap long sampela brik. Sindaun bilong mitupela i nogut tru, olsem na famili bilong mi yet i tokim meri bilong mi long lusim mi.”

Wanem samting i mekim na Manuel i senisim pasin bilong em? Em i tok: “Wanpela man mi save long em i kam long haus na em i toktok long Baibel. Mi orait long em i kam lukim mipela, long wanem, mi laik soim em olsem i no gat wanpela God i stap na i save tingim ol man. Mi ting i stap bilong mi yet i kamapim klia dispela samting. Mi kirap nogut long dispela Witnes em i isi long mi na mekim gutpela tok long mi, olsem na mi orait long go long ol miting long Haus Kingdom. Maski sampela i save long i stap bilong mi, ol i mekim gutpela tok long mi. Olsem na mi pilim olsem mi wanpela bilong ol. Dispela i mekim gut bel bilong mi na i kirapim mi long lusim ol drak na painim wanpela wok mani. Fopela mun bihain long taim mi kirap stadi long Baibel, mi winim mak bilong insait long wok autim tok, na fopela mun bihain long dispela mi kisim baptais na kamap wanpela Witnes Bilong Jehova.”

Lotu Kristen tru i bin helpim Manuel na famili bilong em olsem wanem? Em i tok: “Sapos mi no bin kisim ediukesen long Baibel, ating longtaim yet mi dai pinis. Pasin Jisas i bin skulim ol man long bihainim i mekim na mi kisim bek famili bilong mi. Tupela pikinini bilong mi i no ken kisim taim nogut olsem mi bin kisim taim mi yangpela yet. Mi amamas na mi tenkyu tru long Jehova long mitupela meri bilong mi i stap amamas wantaim. Sampela pren bilong bipo i tok amamas long mi na tokim mi olsem ol i ting dispela rot nau mi bihainim em i nambawan gutpela rot.”

Bilong bihainim pasin Kristen, yumi mas bihainim pasin i stret na yumi mas i stap klin long skin. John i save sindaun long hap bilong Saut Afrika we ol man i stap rabis tru, na em i kisim save long dispela samting. Em i tok: “Sampela taim pikinini meri bilong mipela i no save waswas inap wanpela wik olgeta, na mipela i no wari long dispela.” Meri bilong em i tok haus bilong ol i no klin na ol samting i stap nabaut. Tasol taim ol i kisim dispela ediukesen Kristen, i stap bilong ol i senis. John i no bung moa wantaim wanpela lain i save stilim ol ka na em i kirap mekim ol samting bilong lukautim famili bilong em. Em i tok: “Mipela i kisim save olsem ol Kristen i mas lukautim gut skin na klos na bai ol i stap klin. Mi laikim tok bilong 1 Pita 1:​16, em i tok long yumi mas i stap holi, long wanem, God Jehova i stap holi. Long nau mipela i wok strong long stretim gut haus bilong mipela na bai em i luk nais.”

Yu Inap Painim Nambawan Gutpela Ediukesen

Ol kain stori olsem yumi mekim antap i no painim wan wan man tasol. Planti tausen manmeri i bin kisim ediukesen long Baibel na ol i lain long sindaun gut na laip bilong ol i kamap gutpela. Ol i bihainim stretpela pasin na ol i wok strong, olsem na bos bilong ol i amamas long ol. Ol i stap gutpela neiba na gutpela pren, na ol i save tingim gut ol narapela man. Ol i strong long sakim ol pasin olsem dring tumas na mekim pasin pamuk samting, olsem na ol i save lukautim gut skin na tingting bilong ol. Ol i no save tromoi nating mani long ol amamas bilong skin, nogat, ol i baim ol samting bilong helpim ol yet na bilong helpim famili bilong ol. (1 Korin 6:​9-11; Kolosi 3:​18-23) Tru tumas, taim yumi bihainim ol tok Jehova i putim long Baibel, dispela i kamapim klia olsem pasin bilong bihainim lotu Kristen tru i nambawan, na yumi kisim nambawan gutpela ediukesen. Baibel i stori long man i bihainim ol lo bilong God, na i tok: “Olgeta samting em i mekim i save kamap gutpela.”​—⁠Song 1:⁠3.

Yumi amamas long save olsem God i Gat Olgeta Strong, Jehova, em i laik skulim yumi. Em yet i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Na tru tumas, long rot bilong ol pasin na tok bilong Pikinini bilong em Jisas Krais, Jehova i bin soim rot long yumi. Ol tok Jisas i bin skulim ol man long en i bin senisim tru i stap bilong planti man i save long em taim em i stap long graun, na i wankain tu long planti man i save bihainim ol tok bilong em long nau. Gutpela sapos yu lusim haptaim bilong kisim sampela save moa long ol tok Jisas i bin skulim ol man long en. Ol Witnes Bilong Jehova long hap bilong yu ol bai amamas long helpim yu long kisim gutpela ediukesen olsem.

[Futnot]

[Blok/Piksa long pes 6]

Ol Samting Pasin na Tok Bilong Jisas i Mekim Long Ol Man

Sakius i yusim namba bilong em olsem hetman bilong lain i kisim takis na em i pulim nating mani bilong ol man, na long dispela rot em i kamap maniman. Tasol taim em i bihainim ol tok bilong Jisas, em i senisim pasin bilong em.​—⁠Luk 19:​1-10.

Sol bilong Tarsus em i lusim pasin bilong birua long ol Kristen na em i tanim bel na kirap bihainim lotu Kristen, na em i kamap aposel Pol.​—⁠Aposel 22:​6-21; Filipai 3:​4-9.

Sampela Kristen long Korin, pastaim ol i save ‘mekim pasin pamuk, lotu long ol giaman god, trabel long ol maritmeri, mekim ol kain kain pasin i gat sem, stil, mangal, spak, tok bilas long ol arapela man, na pulim samting bilong ol arapela man.’ Tasol taim ol i kisim save pinis long lotu Kristen tru, ‘God i wasim ol pinis na long nem bilong Bikpela Jisas Krais, God i mekim ol i kamap stretpela manmeri long ai bilong em.’​—⁠1 Korin 6:​9-11.

[Piksa long pes 7]

Baibel inap soim yu long olsem wanem i stap bilong yu i ken kamap gutpela