Ol Pikinini Bai Kisim Gutpela Sindaun Bihain
BIHAIN long Namba 2 Pait na i kam inap long nau, ol gavman i bin wokim na sainim kain kain kontrak bilong lukautim ol manmeri i no insait long ami long taim bilong pait. Sampela kontrak i tok, ol pikinini i mas kisim klos na marasin na kaikai. Ol kontrak i tok promis long lukautim ol pikinini na bai ol man i no mekim pasin sem long ol, na givim bikpela pen long ol, na paitim ol. Na ol i pasim tok olsem i tambu long ol pikinini i no winim yet 15 krismas long go insait long ami.
Ripot bilong wanpela lain bilong Yunaitet Nesen (United Nations Children’s Fund) i litimapim ol dispela lo na i tok, ol i “bikpela samting.” Na ripot i tok moa: “Ol man bilong politik em ol i save i gat lo ol inap kotim ol long en sapos ol i no bihainim, ol bai tingim ol dispela lo taim ol i laik mekim wanpela samting.”—Ripot The State of the World’s Children 1996.
Tasol ol man bilong politik i save, planti lain bilong graun i no gat save na laik long bosim ol man long rot bilong ol dispela lo. Olsem na ripot i tok, ‘ol i no tingim ol dispela lo, olsem na i no hatwok long ting ol dispela lo i samting nating tasol.’
Na mani tu i insait long dispela samting. Long 1993, i gat pait long 79 kantri. Inap 65 bilong ol dispela kantri em ol kantri i stap rabis. Ol dispela kantri i stap rabis i bin kisim we ol samting bilong pait? Planti samting i kam long ol kantri i gat planti wok bisnis long en. Na husat 5-pela kantri i stap olsem nambawan bilong salim ol samting bilong pait i go long ol kantri i stap rabis? Em 5-pela kantri i stap memba bilong Yunaitet Nesen Sekyuriti Kaunsil.
Ol Man Bilong Tingim Hevi
Tasol i gat sampela i save tingim tru hevi bilong ol pikinini long taim bilong pait. Sampela man na lain i save mekim gutpela wok bilong helpim ol pikinini em pait i mekim nogut long ol. Olsem: Ol Witnes Bilong Jehova i no save insait long pait na ol i bin helpim ol kain pikinini olsem. Tasol bilong pinisim tru ol pasin bilong mekim nogut long ol pikinini long taim bilong pait, pait i mas pinis olgeta. Tasol i olsem dispela samting i no inap kamap. Kirap long bipo yet na i kam inap nau i gat pasin birua na pait, olsem na planti man i ting ol man i no inap tru long kamapim gutaim long olgeta hap bilong graun. Long dispela samting, tingting bilong ol i stret.
Na ol man i ting God bai i no kirap na pinisim ol pasin nogut bilong dispela graun o bringim bel isi bilong i stap oltaim long graun. Long dispela samting, tingting bilong ol i no stret.
Man bilong wokim yumi, God Jehova, em i save tingim tru ol samting i save kamap long graun. Long Baibel, Jehova i tok: “Mi laik askim yupela, yupela i ting mi save amamas taim wanpela man nogut i dai, a? Nogat tru. Mi save amamas long taim man i lusim sin bilong en na i stap gut.” Na God i tok moa olsem: “Mi no save amamas long taim wanpela man o meri o pikinini i dai.”—Esekiel 18:23, 32.
Tingim dispela samting: Man bilong wokim yumi em i God bilong sori, na sapos em i laik ol man nogut i tanim bel na i stap amamas, yumi ken save, em i laik ol pikinini i stap laip na amamas tu! Tasol gutpela God bilong yumi i no ken larim ol man nogut i stap oltaim. Baibel i tok promis olsem: “Ol man nogut bai i bagarap olgeta. I no longtaim na bai ol man nogut i lus olgeta.”—Song 37:9, 10.
Krais Jisas i bihainim stret pasin bilong Papa bilong em long heven, na Jisas i laikim ol pikinini, na em i stori long ol olsem: “Kingdom bilong heven em i bilong kain man olsem ol dispela pikinini.” (Matyu 19:14) Ol pikinini i save dai long ol pait na ol i kamap olsem ofa long ol god bilong pait, dispela i samting nogut tru long God Jehova na Pikinini bilong em, Krais Jisas.—Skelim wantaim Lo 18:10, 12.
God i Tok Promis Long Gutpela Sindaun Bihain
Insait long planti handet yia God i bin larim ol pait na pen na hevi i kamap bambai tok i tru em profet Jeremaia i bin tokaut long en i ken i stap ples klia inap long olgeta taim bihain, olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Baibel i tok promis olsem klostu nau Jehova bai “mekim i dai pait long olgeta hap graun,” na dispela bai kamapim ples klia olsem em i King tru bilong heven na graun. (Song 46:9) Na Baibel i tok profet olsem “[ol manmeri] bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”—Aisaia 2:4.
Tasol olsem wanem long ol man em pait i bin kilim ol i dai? Ol i ken wetim gutpela samting bai kamap? Jisas i tok promis olsem ol daiman bai kirap bek long graun i no gat pait long en, em i tok: “Taim i laik kamap na olgeta manmeri i stap long matmat ol bai . . . kam ausait.” (Jon 5:28, 29) Na Pol i mekim wankain tok olsem: “God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15.
Ol tok promis bilong God bai kamap tru. Em i gat strong na laik tru long mekim ol samting em i tingting pinis long mekim. (Aisaia 55:11) Taim Jehova i tok em bai pinisim pait, em i tok tru. Taim em i tok promis long kirapim bek ol man i dai pinis, em bai mekim olsem. Olsem ensel Gabriel i tok, “i no gat wanpela samting God i no inap mekim.”—Luk 1:37.
[Piksa long pes 10]
Taim i no gat pait moa, ol pikinini bai amamas long gutpela i stap bilong ol