Jehova i Stretim Rot Bilong Mipela
MAMA i karim mi long 1924, klostu long Kam, em wanpela taun long provins Sug long kantri Swiselan. Papamama bilong mi i gat 13 pikinini—tenpela pikinini man na tripela pikinini meri. Mi namba wan pikinini man long famili. Tupela pikinini man i dai taim ol i yangpela yet. Papamama i lainim mipela ol pikinini long ol bilip bilong lotu Katolik, na mipela i go bikpela long wanpela fam long taim bilong bikpela hevi bilong mani.
Papa bilong mipela i no save giaman na em i gat gutpela pasin, tasol sampela taim em i kros nogut tru. Sampela taim em i paitim mama, long wanem, mama i bel nogut long em na i sutim tok nating long em. Em i no orait long papa i toktok wantaim ol meri i stap klostu long mipela, maski i no gat as na mama i mas ting olsem papa i no stap gut long em. Dispela hevi bilong tupela i mekim mi bel hevi tru.
Mama i save bihainim ol bilip kranki bilong ol tumbuna na bilong lotu. Taim sampela samting i kamap, maski em i liklik samting tasol, em i ting em i wanpela mak i kam long “ol taranguman i stap long klinpaia.” Mi nolaik tru long dispela pasin bilong bilip nating long tok bilong ol man. Tasol ol pris i strongim bilip bilong em long dispela samting, na ol i givim ol buk long em i strongim ol dispela bilip giaman.
Mi Gat Ol Askim
Kirap long taim mi manki yet, mi gat ol askim long God na wanem samting bai painim yumi ol manmeri long bihain. Mi wok strong long kisim stretpela save, tasol i gat planti tok i pait wantaim narapela tok! Mi kaunim ol buk bilong lotu Katolik i stori long ol santuman, ol mirakel, na ol kain tok olsem. Tasol mi no amamas long ol tok mi kaunim. Mi pilim olsem mi wokabaut long tudak.
Pris i stap long hap bilong mipela, em i tokim mi olsem mi no ken tingim tumas ol dispela askim bilong mi. Em i tok, sapos man i laik save gut long olgeta samting, dispela i makim em i gat pasin antap, na God i no laikim man i gat pasin antap. Wanpela bilip mi nolaik tru long en em olsem, ol i tok taim man i dai na em i no bin autim sin bilong em, God bai givim pen oltaim oltaim long em long bikpaia. Dispela i makim olsem klostu olgeta manmeri bilong graun bai kisim pen oltaim oltaim, olsem na planti taim mi tingting, ‘Olsem wanem dispela bilip i stret wantaim pasin bilong God long sori long man?’
Na tu, mi tingting planti long pasin bilong ol Katolik long autim sin bilong ol. Mi pret taim ol i tokim mipela long skul bilong misin Katolik, sapos man i tingting long ol samting i doti, dispela em i bikpela sin na em i mas autim dispela long pris. Mi tingting planti, ‘Mi autim olgeta rong bilong mi? O mi lusim tingting long sampela, na nau God i no orait long lusim ol sin bilong mi?’ Olsem na nau mi gat tupela tingting long pasin bilong God long marimari na lusim rong bilong man.
Inap 3-pela o 4-pela yia mi wok strong long rausim ol tingting i save mekim mi bel hevi tru. Mi tingting long lusim pasin bilong bilip long God. Tasol bihain mi tingting, ‘Sapos mi wok strong i stap, ating bai mi painim stretpela rot.’ Olsem na mi strongim bilip bilong mi long God, tasol mi gat tupela tingting long ol bilip bilong lotu bilong mi.
Ol bilip ol i lainim mi taim mi yangpela i mekim na mi ting Jisas i stori long Misin Katolik taim em i tokim aposel Pita: “Yu Pita, na bai mi wokim sios bilong mi antap long dispela ston.” (Matyu 16:18) Mi bilip olsem bihain sampela gutpela pasin bilong misin bai kamap strong, olsem na mi laik wok wantaim misin bilong mekim em i kamap gutpela.
Marit na Famili
Mi namba wan pikinini man long famili, olsem na mi wok long fam wantaim papa i go inap long taim namba tu pikinini man bilong famili inap kisim ples bilong mi. Nau mi go long skul bilong wok didiman bilong misin Katolik, na mi kisim namba long mekim dispela wok. Bihain mi kirap long painim poroman marit.
Long rot bilong wanpela susa bilong mi, mi bungim Maria. Mi harim olsem em i bin beten askim God long em i ken maritim wanpela man em inap kisim laip oltaim oltaim wantaim em. Long pepa bilong toksave long marit bilong mitupela, mipela i raitim tok olsem: “Pasin sori i pasim gut mipela wantaim na mipela bai wok long painim amamas, na mipela i lukluk long God. Mipela i wokabaut long rot bilong laip, na mipela i laik kisim amamas i stap oltaim oltaim.” Mipela i marit long Jun 26, 1958, long wanpela haus lotu long Far klostu long Surik.
Sindaun bilong famili bilong Maria na sindaun bilong famili bilong mi i wankain liklik. Famili bilong em i save givim bel tru long lotu. Ol i gat 7-pela pikinini, na em i namba wan pikinini bilong ol. Olgeta i wok strong long mekim wok bilong fam, na skul, na go long lotu, olsem na ol i gat liklik hap taim tasol long pilai wantaim. Taim mipela i marit nupela, inap wanpela o tupela yia samting, mipela i gat planti hevi. Mi gat planti askim long ol samting bilong lotu, olsem na Maria i ting em i no bin maritim gutpela man. Em i nolaik tru long skelim ol bilip bilong misin, o pasin bilong misin long helpim ol pait, na ol pait misin i mekim wantaim ol haiden, na pasin bilong misin long givim bikpela pen long ol man i no bihainim bilip bilong ol. Tasol mitupela wantaim i bilip long God, na mipela i bilip tru olsem sapos mipela i wok strong long mekim laik bilong em, em bai no inap lusim mipela.
Long yia 1959 mipela i rentim wanpela fam klostu long Hombek, long hap is bilong Swiselan. Mipela i stap long dispela ples inap 31 yia. Long Mas 6, 1960, Maria i karim namba wan pikinini man bilong mipela, Josef. Bihain Josef i kisim 6-pela brata na wanpela susa, Rachel. Maria i gat stretpela pasin, na em i laikim olgeta pikinini bilong mipela wantaim, na em i save bihainim gut tru ol stretpela lo i stap long bel bilong em. Em i wanpela gutpela blesing long famili bilong mipela.
Wok Long Painim Tok i Tru Bilong Baibel
Isi isi mipela i bel hevi moa, long wanem, mipela i no gat stretpela save long ol samting bilong lotu. Long yia 1969 samting, mipela i go long wanpela haiskul bilong misin Katolik bilong harim sampela tok, tasol taim mipela i kam bek long haus, tingting bilong mipela i paul moa yet. Ol man i mekim tok long skul i kamapim tingting bilong ol yet, na ol i no strongim tok bilong ol long Baibel. Long kirap bilong yia 1970 samting, mi tingim tok bilong Jisas: “Sapos yupela i askim Papa long wanpela samting long nem bilong mi, orait em bai i givim long yupela. . . . Yupela i mas askim, na bai yupela i kisim.”—Jon 16:23, 24.
Dispela tok i kam long Baibel i kirapim mi long beten planti taim olsem: “Papa, sapos lotu Katolik em i trupela lotu, plis kamapim klia dispela long mi. Tasol sapos em i lotu giaman, kamapim klia dispela tu long mi, na bai mi tokim olgeta man long dispela samting.” Mi beten planti taim, na mi tingim tok Jisas i mekim antap long maunten, em i tok olsem oltaim yupela i mas beten askim God long helpim yupela.—Matyu 7:7, 8.
Mi toktok wantaim Maria long ol senis i kamap long ol bilip bilong lotu Katolik long 1965 samting—olsem pasin bilong lotuim ol “santu,” na pasin bilong kaikai abus long Fraide, na kain tok olsem—na dispela i mekim na nau em i gat tupela tingting. Wanpela taim mipela i go long Misa long kirap bilong yia 1970 na em i beten: “O God, soim mipela long rot bilong kisim laip oltaim oltaim. Mipela i no save moa wanem rot em i stretpela rot. Mi bai mekim olgeta samting yu laik mi mas mekim, tasol soim stretpela rot long famili bilong mipela.” Mi no save long dispela beten bilong em, na em i no save long beten bilong mi i go inap long taim mipela i luksave olsem God i bin harim beten bilong mipela.
Painim Pinis Tok i Tru Bilong Baibel
Long wanpela Sande long moningtaim long kirap bilong 1970, mipela i kam bek long lotu na i stap long haus na wanpela man i paitim dua bilong mipela. Dispela man wantaim pikinini man bilong em i gat 10-pela krismas ol i sanap i stap, na em i tok em i wanpela Witnes Bilong Jehova. Mi tok mi amamas long toktok wantaim em long Baibel. Mi ting i no hatwok long mi long soim em olsem lotu bilong em i no stret, long wanem, mi bin harim ol stori long ol Witnes Bilong Jehova, na mi no ting ol i gat gutpela save.
Mipela i toktok inap tupela aua, tasol no gat wanpela gutpela samting i kamap, na i wankain long narapela Sande. Mi wet long toktok wantaim em long namba tri taim, tasol dispela Witnes i no kam. Maria i tok, ating man i luksave olsem em i hatwok nating. Mi amamas taim tupela wik bihain em i kam bek. Wantu mi tok: “Inap 35 yia mi bin tingting planti long bikpaia. Mi no inap bilip olsem God, em i Man bilong pasin sori, em inap givim bikpela pen long ol man.”
Dispela Witnes i tok: “Yu tok stret. Baibel i no tok bikpaia em i ples bilong kisim pen.” Em i soim mi olsem tok Sheol na Hades long tok ples Hibru na Grik, em planti taim ol i tanim olsem “bikpaia” long ol Baibel Katolik, em i makim matmat tasol. (Stat 37:35; Jop 14:13; Aposel 2:31) Na tu, em i kaunim ol skripsa i kamapim olsem taim man i dai i no gat tewel i stap laip, na pe bilong sin em dai, i no pen. (Esekiel 18:4; Rom 6:23) Nau mi inap luksave olsem, long laip olgeta bilong mi ol bilip giaman i bin pasim ai bilong mi. Nau mi kirap tingting—nogut sampela bilip moa bilong misin i no stret.
Mi no laik ol man i giamanim mi moa, olsem na mi baim wanpela buk dikseneri bilong Baibel Katolik na 5-pela buk i stori long ol pop bilong bipo. Ol bikman episkopal bilong lotu Katolik ol i orait long ol man i prinim ol dispela buk. Taim mi kaunim ol buk i stori long pasin bilong ol pop long bipo, mi kisim save olsem sampela bilong ol i man nogut tru! Na taim mi skelim dispela dikseneri bilong Baibel, mi lain olsem Baibel i no as bilong tok bilong God Triwan, bikpaia, klinpaia, na planti ol narapela bilip bilong misin.
Nau mi redi long stadi long Baibel wantaim ol Witnes. Pastaim Maria i sindaun wantaim mi long stadi, long wanem, em i ting em i gutpela pasin long mekim olsem, tasol i no longtaim na em i bilip long ol tok em i lainim. Fopela mun bihain mi lusim lotu Katolik, na mi toksave long pris olsem ol pikinini bilong mipela i no inap kam moa long ol klas i lainim ol long ol samting bilong lotu. Long Sande bihain, pris i tokim lain bilong em long lukaut long ol Witnes Bilong Jehova. Mi tokim pris olsem, mi redi long kamapim as bilong bilip bilong mi long rot bilong Baibel, tasol em i no laik toktok wantaim mi.
Bihain long dispela mipela i wok long kamap strong hariap. Mitupela meri bilong mi i kamapim olsem mipela i dediket long Jehova taim mipela kisim baptais long Disemba 13, 1970. Wanpela yia bihain, ol i kalabusim mi inap tupela mun, long wanem, mi laik bihainim lo Kristen na mi no laik insait long ami. (Aisaia 2:4) Em i hatwok tru long lusim meri bilong mi wantaim 8-pela pikinini, maski em i bilong liklik taim tasol. Ol pikinini i yangpela yet, ol i gat 4-pela mun i go inap long 12-pela krismas. Na tu, mipela i gat hap graun na ol animal bilong lukautim. Tasol Jehova i helpim ol, na ol inap mekim wok bilong ol, maski mi no stap wantaim ol.
Painim Kingdom Pastaim
No gat wanpela long famili i save lusim ol miting, long taim wanpela i gat sik long dispela taim tasol em i stap long haus. Na mipela i stretim ol wok bilong mipela bambai mipela inap go long olgeta bikpela kibung. I no longtaim na taim ol pikinini i pilai long haus, ol i mekim pilai long ol samting ol i lukim long ol miting Kristen. Olsem: Ol i makim wan wan long mekim tok, na ol i lain long mekim ol soim. Mipela i amamas tru, long wanem, olgeta wan wan i bihainim ol tok mipela i lainim ol long Baibel. Mi tingim yet wanpela kibung sekit taim ol i bin givim sampela askim long mi na meri bilong mi, na 8-pela pikinini bilong mipela ol i sindaun wantaim—kirap long namba wan pikinini i go long laspela pikinini—na ol putim gut yau.
Mekim bikpela long ol pikinini bilong mipela “na stretim gut ol . . . na skulim ol long tok bilong Bikpela,” i kamap nambawan bikpela samting long mipela. (Efesus 6:4) Mipela i pasim tok na rausim televisen, na planti taim mipela i singautim ol strongpela Kristen i kam long haus bilong mipela bambai ol ekspiriens bilong ol na pasin bilong ol long givim bel tru i ken helpim ol pikinini. Mipela i wok strong long abrusim pasin bilong tok nogut na skelim skelim ol narapela man. Sapos wanpela i popaia, mipela i toktok long dispela na skelim wanem samting tru i kirapim em long mekim rong. Mipela i wok strong long helpim ol pikinini long skelim ol samting long gutpela na stretpela tingting. Mipela i no skelim pasin bilong ol wantaim pasin bilong ol narapela yangpela. Na mipela i luksave olsem em i bikpela samting mipela i no ken isi tumas long ol pikinini na ol yet i mas pilim ol hevi em pasin bilong ol i kamapim.—Sindaun 29:21, NW.
Tasol taim mipela i mekim bikpela long ol pikinini, i gat ol hevi tu. Olsem: Wanpela taim ol wanskul i grisim ol long kisim nating loli long wanpela stua. Taim mipela i harim dispela, mipela i salim ol pikinini bilong mipela i go bek long stua, na ol i mas baim ol dispela loli na tok sori. Dispela i semim ol, tasol ol i lain long mekim stretpela pasin, olsem ol i no ken stil.
Mipela i no subim ol pikinini long autim tok wantaim mipela, tasol mipela i stap olsem gutpela piksa, na mipela yet i givim bel long mekim dispela wok. Ol pikinini i lukim olsem, ol miting na wok autim tok i go pas long ol wok mipela i mas mekim bilong lukautim hap graun bilong mipela. Jehova i blesim hatwok bilong mipela long mekim bikpela long 8-pela pikinini bilong mipela long rot em i makim.
Namba wan pikinini man bilong mipela, Josef, em i wanpela elda Kristen, na em wantaim meri bilong em ol i bin wok inap sampela yia long brens-ofis bilong ol Witnes Bilong Jehova long Swiselan. Thomas em i wanpela elda, na em wantaim meri bilong em ol i mekim wok painia, em nem bilong ol lain i save mekim wok bilong God long olgeta de. Daniel, em i hapman tru long kikim wilwil, tasol em i lusim dispela wok, na nau em i wanpela elda, na em wantaim meri bilong em i mekim wok painia long wanpela kongrigesen. Benno na meri bilong em ol i strongpela pablisa long hap bilong sentral Swiselan. Namba faiv pikinini man bilong mipela, Christian, em i wanpela elda long kongrigesen bilong mipela. Em i marit na em i gat tupela pikinini. Franz i mekim wok painia na wok elda long wanpela kongrigesen long Ben, na Urs, bipo em i wok long brens-ofis long Swiselan, tasol nau em i marit na em i mekim wok painia. Pikinini meri bilong mipela, Rachel, em i marit, na em wantaim man bilong em, ol tu i bin mekim wok painia inap sampela yia.
Mi bihainim gutpela pasin bilong ol pikinini bilong mi, na mi kirap mekim wok painia taim mi lusim wok mani long Jun 1990. Taim mi lukluk i go bek long laip bilong mi na famili bilong mi, mi ken tok stret, Jehova i bin stretim rot bilong mipela na blesim mipela na mipela ‘i no sot.’—Malakai 3:10.
Wanpela skripsa gutpela meri bilong mi i laikim tru, i olsem: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Na skripsa mi laikim, i olsem: “Yu mas amamas long Bikpela, na em bai i givim yu ol samting yu laikim tru.” (Song 37:4) Mitupela i pilim pinis truim bilong ol dispela gutpela tok. Mitupela i putim mak long litimapim nem bilong Jehova, God bilong mipela, inap oltaim oltaim, wantaim ol pikinini bilong mipela na famili bilong ol.—Stori bilong Josef Heggli.