Ol Yangpela i Laik Save . . .

Mi Ken Mekim Wanem na Pren Bilong Mi i No Strong Long Bosim Mi?

Hollie i tok: “Pren bilong mi i ting mi samting bilong em tasol. Em i no larim mi i stap wanpis wanpela taim.”

WANPELA savetok i olsem: “Sampela man i gat narakain pren na tupela i pas gut na i wanbel. Pasin bilong tupela i winim pasin namel long tupela brata.” (Sindaun 18:24) Sapos yu gat wanpela pren i gat wankain bilip olsem yu, na yupela i save lap long wankain samting, o yupela i laikim wankain ol samting, em nau, bai yupela i laik stap wantaim. Wanpela yangpela, nem bilong em Caroline, i tok: “Mi save pas gut wantaim sampela pren long kongrigesen Kristen, long wanem, mipela i save mekim sampela wok wantaim.” Caroline em i wanpela Witnes Bilong Jehova, na em i makim wanpela mun bilong mekim wok autim tok inap 60 aua. Ol pren bilong em i stretim ol wok bilong ol bambai ol i ken helpim em long mekim dispela wok!

Pasin bilong pas gut wantaim narapela em inap kamapim ol gutpela samting, tasol sampela taim yu inap ting yu pas tumas wantaim pren bilong yu. Olsem Hollie, em pastaim yumi kamapim tok bilong em, em i pilim olsem wanpela pren i strong long bosim em. Na i no Hollie tasol i gat dispela kain tingting. Hollie i tok: “Dispela i save kamap long ol narapela yangpela tu. Olgeta taim ol i save stap wantaim i go inap long taim bikpela kros i kamap namel long ol. Em nau, narapela i no save toktok wantaim narapela inap sampela wik.”

Em i hatwok long tokim wanpela pren olsem, yu ting em i save bosim yu tumas na sampela taim yu gat laik long stap wanpis. Ating yu pret, nogut dispela bai bagarapim bel bilong pren bilong yu. Na tu, ating yu pret dispela inap bagarapim pasin pren bilong yutupela. Tasol taim narapela i larim narapela long stap wanpis sampela taim, ating dispela bai helpim pasin pren bilong yupela.

Olsem: Long wanpela pak long Sidni, Ostrelia, i gat wanpela bikpela diwai ol man i mas banisim long sen. Bilong wanem? Long wanem, planti manmeri i wokabaut i go i kam, na isi isi ol i mekim graun i kamap strong na bagarapim ol rop bilong diwai. Sapos ol i no banisim diwai, em bai dai. Wankain samting inap kamap namel long ol pren. Sapos olgeta taim ol i stap wantaim, dispela inap bagarapim pasin pren bilong ol. King Solomon i tok: “Yu no ken i go long haus bilong wantok bilong yu oltaim. Nogut em i les long yu na em i no laikim yu moa.”​—⁠Sindaun 25:⁠17.

Yu Mas i Gat Taim Bilong Stap Wanpis

Bilong wanem Solomon i tok olsem? Wanpela samting i olsem: Yumi olgeta i mas i gat taim bilong yumi yet na taim bilong i stap wanpis. Sampela taim Krais Jisas tu i laik stap wanpis. Tru, em i pas gut wantaim ol disaipel bilong em, tasol sampela taim “em wanpela i go . . . bilong em i ken beten.” (Matyu 14:23; Mak 1:35) Aisak i pret long God, na sampela taim em tu i stap wanpis. (Stat 24:63) Yu tu i mas i gat taim bilong yu yet bilong mekim homwok, na ol wok bilong haus, na stadi long Baibel. Na sapos ol pren bilong yu i no tingim gut dispela samting, yu inap bel hevi tru long pasin bilong ol.

Olsem na taim yu laik stap wanpis yu no ken pret long tokim pren bilong yu. Kristen i gat pasin sori “em i no save tingting tumas long em yet,” olsem na gutpela pren bai pilim tingting bilong yu. (1 Korin 13:​4, 5; Sindaun 17:17) Wanpela yangpela i tok: “Taim ol laspela tes bilong mi i wok long kamap klostu, ol pren bilong mi i helpim mi na ol i pilim tingting bilong mi. Mi no sem long askim ol long lusim mi taim mi mas stadi. Mi no hatwok long toktok stret wantaim ol pren bilong mi; ol i save yumi olgeta i gat ol wok yumi mas mekim.”

Tru, Lo Bilong Krais i mekim na yu yet i mas mekim wankain pasin long ol pren bilong yu. (Matyu 7:12) Wanpela yangpela, nem bilong em Tamara, i tok: “Mi gat planti wok na dispela i helpim mi long save olsem pren bilong mi tu i mas i gat taim bilong em yet bilong mekim ol samting.” Na taim Tamara i mas mekim sampela wok bilong haus, ol pren i no hariapim em long mekim wok o tokim em long lusim wok na mekim bihain. Nogat. Tamara i tok: “Planti taim ol i save helpim mi long mekim wok bambai bihain mipela inap mekim ol samting wantaim.” Ol gutpela pren olsem ol i gutpela samting tru​—⁠na taim ol i stap wantaim, dispela taim i no lus nating!

“Givim Bel”

I gat narapela as na i no gutpela long pas wantaim pren bilong yu long olgeta taim. Taim yumi givim taim na tingting bilong yumi olgeta long wanpela pren tasol, ating nau yumi no tingting long pas gut wantaim ol narapela​—⁠olsem papamama na ol bratasusa na ol narapela Kristen. Na tu, dispela inap mekim na yumi no kisim tingting bilong man i bikpela pinis na kamap strong long ol samting bilong spirit. Baibel i tok: “Ol i save wokim samting long ain bilong sapim ain. Olsem tasol, wanpela man i save helpim tingting bilong narapela man i kamap gutpela.” (Sindaun 27:17) Yumi save, sapos yu poromanim wanpela pren tasol, em i no inap “helpim tingting” bilong yu tumas​—⁠na sapos em i wanlain bilong yu em bai hatwok moa long mekim olsem.

Olsem na Baibel i no helpim pasin bilong poromanim sampela tasol. Baibel i strongim yumi long “givim bel” long ol narapela manmeri. (2 Korin 6:13) Buk Moods and Feelings i tok: “Maski yu pas gut wantaim wanpela pren, em i bikpela samting long makim taim bilong go lukim ol narapela pren tu.”

Sampela taim em i hatwok long bihainim dispela tok. Wanpela yangpela Kristen, nem bilong em Michael, em i tok: “Bipo mitupela Troy i save mekim olgeta samting wantaim, long kongrigesen na long taim mipela i raun tu. Mipela i pas gut wantaim. Bihain wanpela narapela yangpela Witnes i kam long kongrigesen. Mi wantaim em i gat laik long mekim wok bilong God long olgeta de, olsem na mipela i poroman wantaim.” Wanem samting i kamap? Michael i tok: “Troy i no toktok moa wantaim mi, na maski mi wok strong bilong stap wanbel wantaim em, em i no laik, na nau mi no toktok moa wantaim em. Mipela i stap olsem inap wanpela yia.” Michael i stori long pasin pren bilong em wantaim Troy olsem: Troy i “bel nogut” na ting mi mas pren wantaim em wanpela tasol.

Tasol taim tupela pren i gat stretpela tingting long pasin pren bilong ol, narapela i no ting narapela i olsem hap kago bilong em. Olsem na sapos pren bilong yu i no laik yu poromanim ol narapela, yu mas toktok gut wantaim em. Ating yu mas strongim bel bilong pren bilong yu na tokim em olsem, pasin pren bilong yutupela em i bikpela samting long yu. Na tokim em olsem, bai yupela i mekim yet ol samting wantaim.

Tru, ating pren bilong yu i no inap senisim tingting bilong em hariap long dispela samting. Zaneta i gat 16 krismas, em i bel nogut liklik taim gutpela pren bilong em i kirap poromanim ol narapela tu. Tasol Zaneta i tok, “em i beten na stadi long Baibel” na dispela i helpim em long daunim dispela tingting. Olsem na em inap pas yet wantaim pren bilong em. Pren bilong Michael, em Troy, em tu i daunim bel nogut bilong em long Michael na nau ol i pren gut wantaim. Ating pren bilong yu bai mekim olsem tu. Tru tumas, pasin bilong pren wantaim ol narapela tu, dispela bai helpim olgeta wantaim. Debbie i gat 17 krismas i tok, taim ol pren bilong em i kisim ol nupela pren, “planti i kamap pren bilong mi tu.”

Tasol olsem wanem, sapos pren bilong yu i no laik yu poromanim ol narapela? Ating i no gat narapela rot, yupela i mas bruk na bihainim laik bilong yupela wan wan. Tasol paslain long yu ting pasin pren bilong yupela i pinis nau, gutpela sapos yu kisim tingting bilong papamama long dispela samting, long wanem, papamama i save pret long God ol i gutpela pren tru bilong yu. Na ating ol i gat sampela gutpela tingting i ken helpim yu long pas gut wantaim pren bilong yu, na sampela taim yu ken stap wanpis tu na pren i no ken bel hevi long dispela.

Raun Wantaim Ol Gutpela Pren

Tasol wanpela tok lukaut i olsem: Taim yu laik givim bel long ol narapela, i no olsem yu ken poromanim olgeta kain man. Wanpela buk i stori long pasin pren i tok: “Pasin bilong yu i save kamap wankain olsem pasin bilong ol manmeri yu save raun wantaim ol. Sampela taim dispela inap kamap na yu yet i no save long dispela samting. Tingting na pasin bilong yu inap kamap wankain olsem bilong ol wanlain bilong yu, maski yu yet i gat wanem kain tingting long ol samting. Long dispela rot, ating ol wanlain i bosim yu.” Sampela tausen yia i go pinis Baibel i bin kamapim wankain tingting, em i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”​—⁠Sindaun 13:⁠20.

Taim yu go long skul o mekim wok mani, ating yu mas stap wantaim ol manmeri i no laik lotuim Jehova. Tasol taim yu makim ol poroman yu laik pas gut wantaim ol, tingim dispela tok bilong Baibel: “Sapos yumi poroman wantaim ol man nogut, bai ol i bagarapim gutpela pasin bilong yumi.”​—⁠1 Korin 15:⁠33.

Na tingim, God Jehova, em Man bilong wokim yumi, na em i mas i stap namba wan pren bilong yumi, winim ol man. Debbie, em bipo yumi bin stori long em, em i gat planti gutpela pren. Tasol em i tok, “Olgeta taim Jehova i mas i stap namba wan.” Gutpela man Abraham bilong bipo i mekim olsem, na Jehova i kolim em “pren bilong mi.” (Aisaia 41:⁠8) Na tingim dispela: Jehova i no bel nogut taim yu givim hap taim bilong yu long ol pren bilong yu, em ol i save laikim Jehova tu. Nogat. Em i strongim yu long mekim olsem. Em i gutpela Pren tru, a?

[Piksa long pes 18]

Ol gutpela pren i save sampela taim narapela narapela i laik stap wanpis