I Gat As na Ol i No Inap Lukim Ol Sta
ATING yumi olgeta i bin lukluk i go antap long skai i tudak na kirap nogut long ol sta i pulap long en na ol i lait gutpela tru maski ol i stap longwe moa yet, a? Tasol isi isi dispela gutpela samting i wok long pinis na yumi no inap lukim moa ol sta. Bilong wanem? Ol lait bilong graun i wok long pasim lait bilong ol sta.
Strongpela lait bilong ol lait bilong rot, haus, bisnis, bikpela haus, na ples kikbal samting i mekim na skai i no tudak tumas. Bikpela hap lait i save sut i go antap na yumi no inap lukim moa planti sta. Olsem wanem? Em wanpela bikpela hevi? Tingim noten Yurop. Long taim skai i klin tru na i tudak, ai bilong man inap lukim olsem 2,000 sta. Tasol ol man i sindaun klostu long wanpela taun ol inap lukim 200 sta tasol, na namel long wanpela biktaun i gat planti lait, ol man inap lukim 20 sta tasol. Sampela saveman bilong glasim ol sta samting ol i tingting planti, nogut ol man i no mekim wanpela samting bilong stretim dispela hevi na inap 25 yia bihain ol man bai no inap lukim wanpela sta long noten Yurop.
Tru, yumi mas i gat sampela lait—em bikpela samting. Lait i mekim na planti pasin raskol i no save kamap, na papa bilong ol haus i pilim olsem ol i stap gutpela. Tasol sapos i gat planti lait, ol man i no stap bel isi na ol i no inap slip gut. Na dispela i no hevi bilong ol man tasol, nogat. Lait inap paulim ol pisin i save flai i go long ol narapela hap na ol binatang, na ol i no save ol i stap we. Na wok bilong ol liklik diwai plaua samting inap paul tu.
Tasol ol inap mekim wanem bilong stretim hevi? Wanpela gutpela rot em long pasim wanpela kain hat samting long ol lait i stap ausait, na slipim ol lait i go daun liklik na strong bilong lait bai sut i go daun. Na i gutpela sapos ol sekyuriti-lait i gat liklik masin bilong kirapim na mekim dai lait; nogut dispela kain lait i wok long olgeta taim. Bilong stretim dispela hevi long wanpela hap bilong Frans ol i mekim olsem: Long rot ol i putim ol lait i wok long ges sodiam na lait bilong ol i sut i go daun stret. Na ol i putim hat long ol narapela kain lait bilong rot na lait bilong ol i sut i go daun. Ol i putim nupela kolta long ol rot na dispela blakpela kolta i pulim strong bilong ol lait i kam daun. Na bihain long 11 klok nait, ol i mekim i dai ol lait bilong ol bikpela haus.
Dispela i mekim na ol lait i no sut i go antap, na bikpela hap bilong ol narapela lait i no sut i go nabaut. Na taim lait i wok olsem, bikpela hap paua i no lus nating—em i go daun inap 30 pesen.
Tasol bilong kamapim ol dispela samting ol i mas lusim bikpela hap taim na mani—em ol samting i sot long nau. Olsem na i gutpela tru long save, klostu nau Kingdom o gavman bilong God long han bilong Pikinini bilong em, Krais Jisas, bai rausim olgeta samting i save bagarapim skai na graun! Na ol man i stap aninit long dispela gavman bai lukim gen ol gutpela sta antap, em han bilong God yet i bin wokim.—Song 19:1, 2; KTH 11:18.