Liklik Ailan i Kamap Bikpela Ples Balus

Wanpela man long Hong Kong i raitim dispela stori bilong Kirap!

TAIM balus i laik pundaun long bikpela ples balus Kai Tak long Hong Kong, wanpela pasindia i kirap nogut taim em i lukluk i go ausait long windo bilong balus. Em i tok: “Man! Ating balus i wok long rausim antena bilong televisen i stap long rup bilong ol haus!” Long Kaulun Siti, wanpela meri i sanap long rup bilong haus bilong em na em i wok long hangamapim ol laplap em i wasim pinis. Dispela meri i mekim wanpela pasin em i mas mekim planti taim​—⁠em i putim han long yau bilong em bilong pasim bikpela pairap bilong balus i flai klostu antap.

John em i wanpela pailot, na planti taim em i mas stiaim balus i go pundaun long dispela hap nogut. Em i tok: ‘Dispela hevi i stap, long wanem, em ples maunten. Sapos mipela stiaim balus i kam long hap bilong not-wes bilong pundaun, mipela bai hatwok tru long tanim balus, long wanem, ples balus bai klostu tumas. Na taim balus i flai antap, ol maunten i mekim na win nogut bilong antap i kam daun na pulim balus i go daun.’

Olsem na taim laspela balus i pundaun long ples balus Kai Tak, ol pasindia, na ol pailot, na ol manmeri bilong Kaulun Siti, bai ol i amamas. Na dispela de i kamap, long wanem, long Julai 1998, Hong Kong i kirap mekim wok long wanpela nupela ples balus.

Ples Balus Long Wanpela Ailan

Long 1983, planti tumas balus na pasindia i save go i kam long ples balus Kai Tak na i olsem ples balus i no inap moa long lukautim ol. Ol i no inap skruim dispela ples balus i go bikpela moa, olsem na ol i kirap painim narapela hap bilong wokim wanpela nupela ples balus. Tasol Hong Kong i sot long bikpela hap graun i stret olgeta inap long ol i ken wokim wanpela ples balus long en. Na ol man i no laik bai ol i wokim ples balus klostu long haus bilong ol. Orait, olsem wanem ol inap stretim dispela hevi? Ol i makim ailan Sek Lap Kok bilong kamap ples balus. Em wanpela liklik ailan i stap klostu long bikpela ailan Lantau i no gat planti man i sindaun long en. Em wanpela bikpela wok ol ensinia bai amamas long mekim.

Bilong wokim ples balus, ol i mas stretim graun bilong dispela liklik ailan i go stret olgeta na mekim wankain samting long wanpela ailan i stap klostu na i liklik moa. Na ol i mas kapsaitim dispela graun na wesan i go long solwara bilong kamapim hap graun moa inap olsem 9 na hap skwe kilomita. Bilong ol man long Hong Kong i ken go i kam long ples balus, ol i wokim rot bilong tren na bikpela rot bilong ol ka, longpela bilong en i olsem 34 kilomita. Tupela rot i save go antap na i go daun na brukim ol ailan na ol hap bilong solwara i no op tumas. Na rot i go namel long biktaun Kaulun na i brukim wara bilong Pasis Viktoria. Olsem na ol i mas wokim ol bris, na ol rot insait long graun, na ol rot i stap antap na i gat ol strongpela pos bilong en. Em wanpela bikpela wok tru, winim planti ol narapela wok ol i bin mekim bipo.

Ol Narapela Kain Bris

Planti tausen manmeri i save go long wanpela hap bilong Hong Kong ol i kolim New Territories. Ol i go bilong lukim wanpela samting i gat nem, em Bris Lantau. Dispela bris i skruim ailan Lantau i go long bikples Hong Kong. Em i wanpela bris ol i pasim ol bikpela strongpela rop waia long en bilong strongim, na dispela bris i skruim ailan Lantau i go long liklik ailan Ma Wan, na wanpela rot i stap antap long Ma Wan i gat ol strongpela pos bilong en, na wanpela bris i hangamap nating na longpela bilong en i olsem 1,377 mita, em i skruim ailan Ma Wan i go long namba 3 ailan, em Sing Yi. I no gat planti bris long olgeta hap i longpela olsem ol dispela bris i gat 2-pela rot bilong en, em narapela i stap antap long narapela. Ol ka tasol i save ran long rot antap, na long rot daunbilo i gat wanpela rot bilong ol tren na 2-pela rot bilong ol ka.

Sapos man i sanap longwe na em i lukim dispela bris i hangamap nating, em inap ting ol bikpela strongpela rop waia bilong en i no strong. Em inap ting ol ensinia i no bin wokim gut dispela bris o bris bai pundaun long wara. Tasol taim em i go klostu long bris, em bai save ol rop waia i strong tru. Braitpela bilong ol rop waia i winim wanpela mita, na planti waia moa yet i pulap insait long en, na sapos yumi skruim olgeta waia wantaim, longpela bilong en i olsem 160,000 kilomita, em planti waia tru inap long raunim graun olgeta inap 4-pela taim. Ol dispela rop waia i mas braitpela olsem, long wanem, ol i mas holim strong 95 hap bilong dispela bris, em hevi bilong wanpela i olsem 500 ton. Taim ol i wokim pinis ol strongpela rop waia, ol sip i bin karim ol dispela hevipela hap bilong bris i go long hap ol i wokim bris long en, na wanpela bikpela krein i rausim long ol sip.

Ol man i sindaun klostu long dispela hap, ol i kirap nogut long lukim ol i putim ol traipela samting olsem pos i go long ples bilong en, em ol bai pasim ol dispela strongpela rop waia long en. Bilong wokim ol pos i go antap tru, ol i save wokim ol samting olsem bokis na kapsaitim simen i go insait long en, na bihain ol i surikim bokis i go antap na kapsaitim sampela simen moa, i go i go olsem; ol i no gat wok long rausim ol bokis long olgeta taim na wokim gen. Ol wokman i bihainim dispela pasin na insait long 3-pela mun tasol, ol i wokim wanpela pos bilong bris em longpela bilong en i olsem 190 mita.

Hong Kong em ples bilong traipela win na ren. Olsem na ol i tingting: Ol strongpela win bai mekim wanem long ol man i laik brukim bris? Long 1940, wanpela bris bilong pastaim (Tacoma Narrows Bridge) long Wosington, Yunaitet Stets, em i bagarap taim strongpela win i sakim bris. Win i spit olsem 68 kilomita long wanpela aua, na win i mekim na bris i krungut nabaut olsem ol i bin wokim bris long mambu tasol. Tasol nau pasin bilong wokim bris i narapela kain. Ol i wokim ol dispela nupela bris long kain stail i gat strong na ol i traim strong bilong ol dispela bris na ol i sanap strong, maski strongpela win i gat spit olsem 300 kilomita long wanpela aua i sakim ol dispela bris.

Em 23 Minit Tasol Long Go Long Biktaun!

Ol man inap lusim nupela ples balus na kamap kwik long ailan Hong Kong, maski em i stap longwe moa, winim olpela ples balus Kai Tak inap 4-pela taim. Bilong wanem i olsem? Ol tren i lusim ples balus i spit tru, inap 135 kilomita long wanpela aua na i kamap long namel stret bilong Hong Kong. Pastaim, ol man i sindaun long tren ol bai lukim gut ol maunten ston bilong Lantau. Bihain, tren bai brukim 2-pela ailan moa bilong kamap long bikples, na bihain moa em bai ran klostu long nambis long Kwai Sung. Long bris ol sip i sua long en long Kwai Sung ol i save bungim planti traipela bokis ain bilong pulapim ol kago bilong ol sip, na dispela bris bilong putim ol bokis ain long en i bikpela tru, winim ol narapela kantri. Inap 5-pela kilomita longwe moa, tren bai kamap long Mong Kok, em wanpela taun i gat 170,000 manmeri i sindaun long en. Bihain tren bai ran i go i go na kamap long wanpela hap bilong ol turis, nem bilong en Sim Sa Sui. Nau tren bai ran i go long wanpela rot i go insait long solwara long hap bilong Pasis Viktoria. Em nau, tren i kamap long namel stret bilong Hong Kong. Dispela ran bilong tren em 23 minit tasol!

Wanpela Ples Balus Bilong Bihain

Long Disemba 1992, Sek Lap Kok em i wanpela ailan ston, bikpela bilong en i olsem 302 hekta. Long Jun 1995, dispela ailan i bikpela moa olsem 1,248 hekta, na em i olsem plua bilong nupela ples balus. Graun bilong Hong Kong tu i go bikpela liklik. Taim ol i mekim wok long 44,000 ton strongpela dainamait bilong stretim graun bilong ailan i go stret olgeta, planti sip i wok long kapsaitim wesan long en ol i bin pamim i kam antap long as bilong solwara. Long taim ol i wok strong moa bilong mekim dispela wok, long olgeta de ol i skruim hap graun moa long ailan, i winim 2-pela hekta. Ol i wok 31 mun bilong mekim dispela wok, na long olgeta wan wan sekon ol i bin rausim na putim long ples stret bilong en 10-pela ton graun na wesan. Taim ol man i pinisim wok bilong ol long stretim graun na mekim i go bikpela moa, ol narapela lain i kirap wokim ples balus.

Steve em i wanpela man i bin insait tru long dispela wok. Em i stori olsem: “Ol traipela balus bilong nau inap bagarapim rot long ples balus taim ol i pundaun sapos ol man i no bin wokim gut. Olsem na taim mipela i no kapsaitim kolta yet long rot bilong balus, mipela i bin mekim wok long ol traipela masin bilong mekim wesan i pas gut wantaim na kamap strong tru. Ol dispela masin i mekim bikpela wok, olsem na taim namba wan rot i pinis, i olsem ol masin i bin wokabaut inap 192,000 kilomita​—⁠em longwe rot inap long raunim graun olgeta inap 5-pela taim.

“Kampani bilong mipela i gat kontrak long wokim haus ol pasindia i save wet long en. Mipela i wokim na sanapim ol sparen bilong dispela haus; hevi bilong wan wan i olsem 150 ton. Mipela i mekim wok long wanpela traipela krein bilong apim ol sparen na putim ol i go long ol bikpela trak. Ol trak i ran isi isi bilong karim ol sparen i go long hap bilong wokim haus.”

Dispela haus i no olsem wanpela traipela bokis ol i wokim long simen, nogat. Ol i bin tingim gut ol pasindia na ol wokman long ples balus, olsem na ol i wokim haus inap long lait na win i ken kam insait. Na ol i wokim dispela ples balus na bai ol pasindia i no ken lusim taim. Ol pasindia inap sindaun long balus 30 minit bihain long ol i bin kamap long ples balus na putim switkes bilong ol. Bilong hariapim moa ol samting, wanpela tren i no gat draiva em i stap bilong kisim ol pasindia i go long wanem hap bilong ples balus ol i laik i go long en. Na insait long ples balus i gat ol rot i wokabaut, longpela bilong en sapos yumi bungim wantaim i olsem 3-pela kilomita. Dispela ol rot i bilong karim ol pasindia i go i kam, na ol i gutpela bilong helpim ol pasindia long kamap kwik long hap bilong ples balus ol i laik i go long en.

Steve i tok moa olsem: “Nupela ples balus i narapela kain tru long olpela ples balus Kai Tak. Long 1995, winim 27 milion pasindia i bin go i kam long ples balus Kai Tak! Nupela ples balus inap long lukautim 35 milion pasindia na 3 milion ton kago long olgeta yia. Tasol bihain dispela ples balus bai inap long lukautim 87 milion pasindia na 9 milion ton kago!”

Hong Kong i tromoi bikpela mani long dispela ples balus​—⁠inap 20 bilion dola, em olsem 3,300 dola bilong olgeta wan wan manmeri i sindaun long Hong Kong em ol inap olsem 6,300,000 manmeri. Ating ples balus Sek Lap Kok bai helpim Hong Kong long stap yet olsem wanpela kantri ol man i gat gutpela sindaun tru long en. Yumi mas wet tasol bilong save long dispela samting, tasol wanpela samting yumi ken save tru long en i olsem: Ol pasindia long balus i pundaun long Hong Kong, bai ol i no inap lusim tingting long en.

[Mep long pes 12]

(Bilong save ol dispela rait i stap we long pes, lukim buk o magasin)

Rot bilong ol tren bilong ples balus

Ples balus long Sek Lap Kok

Ailan Lantau

Bikrot Not Lantau

Bris Lantau

Bris Kap Sui Mun

Bris Sing Ma

Bikrot Wes Kaulun

Kaulun

Ples balus long Kai Tak

Ailan Hong Kong

[Piksa long pes 13]

Ol i wokim Bris Sing Ma

[Piksa Kredit Lain long pes 11]

Ofis Bilong Stretim Wok Bilong Wokim Nupela Ples Balus

[Piksa Kredit Lain long pes 13]

Ofis Bilong Stretim Wok Bilong Wokim Nupela Ples Balus