I Stap Bilong Mi Long Biktaun Hong Kong

Hong Kong em i wanpela kantri i gat planti milion manmeri long en. Namba bilong ol manmeri inap olsem 5.8 milion samting na graun bilong en i bikpela olsem 1,070 skwea kilomita na i gat 5,421 manmeri long wanpela skwea kilomita samting. Ol man i sindaun long 10 pesen tasol bilong graun olgeta long Hong Kong, olsem na 54,000 manmeri i sindaun long wanpela skwea kilomita tasol! Tasol ol man long dispela hap ol i lain pinis long stap long kain biktaun i gat planti man. I gat planti pairap bilong ol ka na no gat gutpela win na wara.

MI KIRAP long krai bilong klok bilong mi long 7:30 long moningtaim. Mi lusim bet na kwiktaim mi waswas na senis. Mi stap long wanpela liklik haus wantaim 3-pela liklik susa na papamama bilong mi, na mipela olgeta i wok mani. Sampela i mas wet i stap taim wanpela i waswas na i no gat bikpela hap taim. Mi hariap kisim liklik kaikai, na kalap long wilwil na mi go long stesen bilong kisim tren. Wok bilong de olgeta i kirap olsem. Mi wanpela bilong ol man i wok insait long biktaun Hong Kong i gat planti milion man i stap long en.

Orait, tren i kisim mi i go na mipela abrusim ol traipela longpela haus slip i gat planti manmeri i stap long en. Bihain mi kisim bas bilong i go long hapsait bilong wara. Mipela wantaim planti lain bas i go insait long wanpela longpela rot insait long graun. Bel bilong mi i stap isi taim mipela kamap long Ailan Hong Kong. Ofis bilong mi i stap insait tru namel long ol bikpela kampani. Sapos i no gat planti ka samting, wanpela aua bihain bai mi kamap long Hong Kong; tasol sapos i gat planti ka samting, bai mi winim wanpela aua hap samting na bihain bai mi kamap. Long 9:30 samting mi kamap long ofis. Tasol i no gat taim bilong sindaun na malolo liklik, wantu telefon i ring. Long de olgeta dispela samting i kamap​—telefon i no save malolo long ring. Mi kisim liklik malolo tasol long belo.

Maski i gat planti haus kaikai i stap, em i hatwok long painim ples sindaun long en. I olsem olgeta man i kaikai long wankain taim na ples na long wankain tebol! Nau mi sindaun kaikai wantaim ol narapela lain man. Tasol ol dispela samting i save kamap oltaim long Hong Kong​—em pasin bilong dispela ples i gat planti milion man long en. Kaikai i swit tru na mi hariap long kaikai na nau em taim bilong i go bek long ples wok.

Taim bilong mi long pinis wok em 5:30 long apinun, tasol planti taim mi no lusim ples wok long dispela taim stret. Olsem na taim mi lukluk long klok em olsem 6:15 long apinun. Sampela taim em winim 7 klok na mi lusim ples wok. Orait nau mi mas painim rot gen bilong i go bek long haus.

Pastaim mi kisim bas na bihain mi kisim tren. Taim em i kamap long stesen bilong mi, mi go painim wilwil bilong mi. Long rot mi kikim wilwil i kam na mi tingim dispela liklik taun bilong mipela i kamap traipela biktaun i gat planti man tru long en. Ol liklik haus kunai samting bilong ol ples kanaka i pinis na i gat ol traipela haus i go antap tru inap olsem 20 i go 30 plua samting. I no gat moa ol liklik rot bilong bus olsem bipo, nau ol i wokim bikpela bikpela haiwe rot na ol bris bilong brukim wara na ol ka i go i kam. Long bipo ol man i stap isi tru na ol i no hariap hariap long wok samting, tasol dispela kain sindaun i pinis.

Haus bilong mi em i liklik na em inap olsem 28 skwea mita. Em inap long mipela 6-pela i stap, tasol mi no gat rum slip bilong mi yet. Olsem na mi slip long rum bilong sindaun. Mi amamas long papamama i gat rum slip, na 3-pela susa bilong mi ol i slip wantaim long liklik rum slip bilong ol.

Bipo mipela olgeta i slip long wanpela rum tasol long kain bikpela haus em gavman i wokim na ol famili i kisim wan wan rum, tasol nau i orait liklik. Mi tingim planti tausen man ol i stap long distrik Mong Kok na ol i baim ol liklik rum slip, inap long putim wanpela matres na sampela liklik samting tasol bilong ol, na no gat hap bilong putim sia na tebol samting.

Long 9 klok, olgeta i kamap pinis long haus na mipela sindaun long kisim kaikai bilong apinun. Bihain wanpela i kirapim televisen, na mi no inap kaunim buk o mekim stadi samting. Olsem na mi wet inap long olgeta i slip pinis na long 11 klok samting mi wanpela i stap long rum na nau mi mekim ol samting mi laik mekim na i no gat pairap. Long biknait samting mi slip.

Taim mi lusim skul mi kirap mekim wok mani; em 12-pela yia i go pinis. Wanpela taim bihain mi laik marit, tasol nau mi gat planti wok tumas na mi no gat taim long save gut long wanpela meri bilong maritim em. Na i hatwok tru long painim haus. Mipela i mas lain long dispela kain sindaun, tasol mi ting em i no gutpela. Tasol mi save tingting, long ol narapela hap bilong graun i gat planti milion manmeri ol i no gat haus, o paua, o paip wara, o gutpela toilet samting. Tru tumas yumi laikim nupela taim i mas kamap na bai yumi ken kisim gutpela sindaun.​—Wanpela man, em Kin Keung, i salim dispela stori.