Laip Stori

Mi Pilim Tru Gutpela Pasin Sori Bilong Jehova

Stori bilong Fay King

Papamama bilong mi ol i gutpela manmeri, tasol olsem planti narapela man, ol i no laikim ol lotu. Mama i save tok: “I gat God i stap, sapos nogat, orait husat i wokim ol plaua na ol diwai?” Tasol tingting bilong em long ol samting bilong lotu i go inap tasol long dispela mak.

PAPA bilong mi i dai long 1939 taim mi gat 11-pela krismas, na mi stap wantaim mama long Stockport, long hap saut bilong Manchester, Inglan. Oltaim mi bin i gat laik long kisim sampela save moa long Man Bilong Wokim mi na mi rispektim Baibel, maski mi no save long wanpela samting bilong en. Olsem na mi wokim tingting long go long Sios Bilong Inglan na painimaut wanem kain save mi inap kisim.

Ol pasin bilong mekim lotu i no kirapim tingting bilong mi, tasol taim ol i ritim ol tok bilong ol Gutnius, ol tok bilong Jisas i mekim na mi bilip olsem tok bilong Baibel em i tru. Nau taim mi tingim bek dispela samting, mi kirap nogut long mi yet mi no bin ritim Baibel. Na bihain tu, taim wanpela pren bilong mipela i givim mi wanpela “Nupela Testamen,” mi no bin ritim liklik.

Taim Woa Bilong Korea i kirap long 1950, dispela i kirapim tru tingting bilong mi. Ating dispela pait bai go bikpela olsem Wol Woa 2 o olsem wanem? Sapos pait i go bikpela, olsem wanem bai mi inap bihainim tok bilong Jisas long laikim ol birua bilong mi? Tasol bai mi inap stap tasol na lukim ol man i kam pait long kantri bilong mi na mi no mekim wanpela samting bilong pasim ol? Sapos mi mekim olsem, i olsem mi bai sakim wok mi mas mekim. Maski tingting bilong mi paul, mi bilip tru olsem ol bekim bilong olgeta askim bilong mi i stap long Baibel, tasol mi no save long olsem wanem o long wanem hap mi inap painim ol dispela bekim.

Painim Tok i Tru Long Australia

Long 1954, mitupela mama i tingting long go sindaun long Australia, em ples susa bilong mi, Jean, i stap long en. Sampela yia bihain, Jean i tokim mi olsem em i bin askim ol Witnes Bilong Jehova long kam lukim mi, long wanem, em i save mi laik kisim save long ol tok bilong Baibel na mi save go long lotu. Em i laik save long mi gat wanem tingting long ol Witnes. Em i tokim mi olsem: “Mi no save sapos ol tok bilong ol i stret o nogat, tasol ol i gat bekim bilong ol askim, em samting ol narapela lotu i no gat.”

Bill na Linda Schneider, em tupela marit i kam lukim mi, ol i gutpela manmeri. Krismas bilong ol i klostu 70 na ol i bin stap Witnes inap planti yia pinis. Ol i bin wok long redio-stesin bilong ol Witnes Bilong Jehova long Adelaide, na taim gavman i tambuim wok autim tok long Australia long taim bilong Wol Woa 2, ol i kirap autim tok fultaim. Bill na Linda i helpim mi gut tru, tasol mi wok yet long skelim ol narapela narapela lotu.

Wanpela wanwok bilong mi i kisim mi go long wanpela miting bilong evanjelis Billy Graham, na bihain long dispela, sampela bilong mipela i bung wantaim wanpela pasto husat i tokim mipela long kamapim ol askim. Mi kamapim dispela askim mi wok yet long tingting planti long en: “Olsem wanem man inap stap Kristen na laikim ol birua sapos em i go long pait na kilim ol i dai?” Olgeta lain i bung ol i kirap toktok​—⁠i luk olsem ol tu i bin tingting planti long dispela samting! Bihain liklik pasto i tok: “Mi no save long bekim bilong dispela askim. Mi wok yet long tingting long en.”

Mi stadi yet long Baibel wantaim Bill na Linda, na long Septemba 1958, mi kisim baptais. Mi laik bihainim gutpela pasin bilong tupela tisa bilong mi, olsem na long Ogas 1959, mi kirap mekim wok painia oltaim, em wok bilong autim tok fultaim. Bihain long 8-pela mun, ol i singautim mi long mekim wok olsem painia salim. Mi amamas tru long harim olsem susa bilong mi, Jean, em tu i bin stadi gut na kisim baptais!

Wanpela Rot i Op

Mi wok wantaim wanpela kongrigesen long Sydney na mi lukautim sampela Baibel-stadi. Wanpela taim mi bungim wanpela pasto bilong Sios Bilong Inglan i ritaia pinis na mi askim em long lotu i tok wanem long pinis bilong dispela graun. Maski em i tokim mi olsem em i bin skulim ol man long bilip bilong lotu inap 50 yia, mi kirap nogut tru long bekim bilong em: “Mi mas lusim sampela haptaim moa long painimaut gut long dispela samting, long wanem, mi no save gut long ol tok bilong Baibel olsem ol Witnes Bilong Jehova.”

Bihain liklik, ol i singautim ol volantia long go mekim wok autim tok long Pakistan. Mi tu i putim aplikesen, na mi no save olsem ol i salim ol singel brata na ol marit tasol long i go long dispela hap, ol singel sista, nogat. Tasol i luk olsem ol i salim aplikesen bilong mi i go long hetkota long Brooklyn, long wanem, i no longtaim mi kisim wanpela pas i tokim mi olsem ol i sot long wokman long Bombay (nau ol i kolim Mumbai), India, na mi inap go sapos mi laik. Em long 1962. Mi go na stap long Bombay inap 18 mun na bihain mi go long Allahabad.

Mi givim bel tru long lainim tok ples Hindi. Dispela tok ples bilong India i no hatwok long lainim, long wanem, pasin bilong kolim tok i stret wantaim pasin bilong raitim tok. Tasol sampela taim mi bel hevi taim ol man bilong haus i tokim mi long mekim tok Inglis na no ken hatwok long mekim tok ples bilong ol! Tasol dispela nupela kantri i gat ol gutpela samting i kirapim tingting na i gat hatwok bilong en, na mi amamas long bung wantaim ol wanlain Witnes bilong Australia.

Taim mi yangpela mi bin tingting long marit, tasol kirap long taim mi kisim baptais, mi bisi long mekim wok bilong Jehova na mi no tingting moa long marit. Tasol nau mi pilim olsem mi laikim wanpela poroman. Mi no laik lusim asainmen bilong mi, olsem na mi beten na tokim Jehova long dispela samting, na bihain mi no tingting tumas long en.

Wanpela Gutpela Blesing

Edwin Skinner i bin lukautim wok bilong India brens long dispela taim. Em i bin go long klas namba 8 bilong Wastaua Baibel Skul Bilong Gileat long 1946 wantaim planti ol narapela gutpela brata, olsem Harold King na Stanley Jones, em ol i bin salim tupela i go mekim wok long Saina.a Long 1958, ol i putim Harold na Stanley i stap wanpis long rum kalabus, long wanem, ol i mekim wok autim tok long Shanghai. Taim Harold i lusim kalabus long 1963, Edwin i salim pas long em. Harold i raun long Amerika na Briten na taim em i go bek long Hong Kong em i bekim pas bilong Edwin, na em i tok em i laik marit. Em i tokim Edwin olsem taim em i stap long kalabus, em i bin beten long Jehova na tokim em long dispela samting, na em i askim Edwin sapos em i save long wanpela Witnes husat inap kamap gutpela meri marit.

Long India planti taim famili i save makim poroman bilong maritim, na olgeta taim ol i save askim Edwin long makim poroman bilong narapela i ken maritim, tasol em i no laik mekim olsem. Olsem na em i givim pas bilong Harold long Ruth McKay​—⁠man bilong Ruth, Homer, em i wasman raun. Bihain, Ruth i salim pas long mi na tokim mi olsem wanpela misineri husat i bin stap planti yia pinis long tok i tru em i painim wanpela meri bilong maritim, na em i askim mi sapos mi amamas long salim pas long dispela misineri. Em i no tokim mi long dispela brata em i husat, o mekim sampela tok moa long em.

I no gat man i save long mi bin beten bilong kisim wanpela poroman, Jehova tasol i save, na pastaim mi laik sakim dispela tingting bilong Ruth. Tasol taim mi wok long tingim tingim dispela samting, mi pilim moa yet olsem taim yumi beten long Jehova, em i no save mekim ol samting olsem yumi ting em bai mekim. Olsem na mi bekim pas bilong Ruth na tokim em olsem em i ken askim Harold long salim pas long mi, tasol dispela i no ken makim olsem mi mas maritim em. Namba tu pas bilong Harold King i kam long mi.

Ol piksa na stori bilong Harold i bin kamap long planti niuspepa na magasin bihain long em i bin lusim kalabus long Saina. Long dispela taim, planti man long olgeta hap i save long stori bilong em, tasol mi pilim tru pasin bilong em long i stap gut long wok bilong God. Olsem na mipela i salim pas i go i kam inap 5-pela mun, na bihain mi go long Hong Kong. Mipela i marit long Oktoba 5, 1965.

Mitupela wantaim i laik marit na mekim yet fultaim sevis, na taim mitupela i wok long i go lapun, mipela i gat bikpela laik moa long stap gut wantaim poroman. Mi laikim tru Harold, na taim mi lukim gutpela pasin em i save mekim long ol narapela na pasin em i mekim taim ol hevi i kamap long wok autim tok bilong mipela, dispela i kirapim mi long rispek tru long em. Inap 27 yia olgeta mitupela i marit na stap amamas wantaim, na mitupela i kisim planti blesing long han bilong Jehova.

Ol Saina ol i lain bilong wok, na mi laikim ol tru. Long Hong Kong, ol i save mekim tok Kantonis, em wanpela tok ples Saina i gat planti kain kain pasin bilong apim na daunim nek, winim tok Mandarin, olsem na em i hatwok tru long lainim. Taim mitupela Harold i marit, mitupela i bin stap pastaim long haus misineri long brens-ofis bilong ol Witnes Bilong Jehova, na bihain mitupela i mekim wok long ol narapela narapela hap bilong Hong Kong. Yes, mipela i stap amamas tru, tasol long 1976 mi kisim sik na dispela i givim bikpela hevi long mitupela.

Karim Hevi Bilong Sik

Mi lusim blut inap sampela mun, na mak bilong blut bilong mi i go daun olgeta. Mi mas kisim operesen, tasol ol dokta long haus sik i tokim mi olsem ol i no inap mekim operesen sapos ol i no givim blut long mi, nogut mi bai dai. Wanpela taim ol dokta i wok long toktok long sik bilong mi, na ol nes i laik kirapim mi long senisim tingting, na ol i tok mi no ken lusim nating laip bilong mi. Long dispela de ol bai mekim 12-pela operesen, 10-pela i bilong rausim bel, tasol mi lukim olsem i no gat wanpela i mekim tok bilong pasim ol dispela meri i laik kilim i dai ol pikinini bilong ol.

Bihain, Harold i raitim wanpela pas bilong tokaut olsem haus sik i no inap kisim asua sapos mi dai, na nau ol dokta i wanbel long mekim operesen. Ol i kisim mi go long rum bilong mekim operesen na ol i redim ol marasin samting bilong givim mi paslain long ol dokta i katim mi. Tasol taim olgeta samting i redi pinis, dokta bilong mekim tingting i dai em i no laik givim marasin long mi, na ol i pinisim mi long haus sik.

Mipela i go lukim wanpela praivet dokta bilong ol meri. Em i lukim olsem sik bilong mi i bikpela tru, olsem na em i orait long mekim operesen long liklik pe​​—⁠mipela i no ken tokim wanpela man long hamas mipela i baim em. Em i mekim gut operesen​​—⁠na em i no yusim blut. Long dispela taim, mitupela Harold i lukim klia gutpela pasin sori bilong Jehova na pasin bilong em long lukautim mipela.

Long 1992, Harold i kisim bikpela sik. Mitupela i go stap long brens-ofis na ol i lukautim gut mitupela. Gutpela man bilong mi i pinisim wok bilong em long graun long 1993 taim em i gat 81 krismas.

Go Bek Long Inglan

Mi amamas long stap memba bilong famili Betel long Hong Kong, tasol ples i hat nogut tru na dispela i givim hatwok moa long mi. Mi kirap nogut long kisim wanpela pas i kam long hetkota long Brooklyn i tok ol i tingim helt bilong mi, olsem na ol i askim mi sapos mi laik i go long wanpela brens i gat planti samting moa bilong helpim ol lain i gat sik. Olsem na long yia 2000, mi go bek long Inglan na wok wantaim famili Betel long London. Dispela i wanpela gutpela samting tru! Famili Betel long London i amamas long mi stap wantaim ol, na mi amamas tru long ol narapela narapela wok bilong mi, wanpela em long lukautim laibreri bilong famili Betel na 2,000 buk i stap long en.

Na tu, mi save bung wantaim kongrigesen bilong tok Saina long London, tasol long hia ol samting i senis. Long nau, wan wan man tasol i save kam long Hong Kong, planti ol i kam long bikples Saina. Ol i mekim tok Mandarin, na dispela i save givim narapela hatwok long wok autim tok. Long olgeta hap bilong kantri, i gat ripot bilong ol gutpela Baibel-stadi ol i mekim wantaim ol sumatin i kam long Saina. Ol i lain bilong wok strong na ol i amamas long tok i tru bilong Baibel ol i lainim. Wok bilong helpim ol i givim bikpela amamas long mi.

Long nupela hap mi stap long en, planti taim mi save tingim gen laip bilong mi i gat amamas long en na mi kirap nogut yet long gutpela pasin sori bilong Jehova. Dispela pasin bilong em i insait long olgeta samting em i tingting pinis long mekim, na pasin bilong em long lukautim ol wokman bilong em i stap ples klia tru. I gat as tru na mi ken tenkyu tru long olgeta samting em i mekim bilong lukautim mi.​​—⁠1 Pita 5:​6, 7.

[Futnot]

[Piksa long pes 24]

Mi mekim wok long India

[Ol Piksa long pes 25]

Harold King long 1963 na em i mekim wok long Saina long 1950 samting

[Ol Piksa long pes 26]

Taim mitupela i marit long Hong Kong, Oktoba 5, 1965

[Piksa long pes 26]

Mipela wantaim ol memba bilong famili Betel long Hong Kong, ol Liang long namel, na ol Gannaway long han sut