Ripot Long Wok Bilong Kingdom
“Long Olgeta De Em i Go Long Ples Bung”
APOSEL Pol i autim tok bilong Kingdom long olgeta taim rot i op long mekim. Bilong painim ol man i gat gutpela bel, em i go “long haus lotu bilong ol Juda na em i toktok wantaim ol Juda . . . na long olgeta de em i go long ples bung na i toktok wantaim ol manmeri i kam i stap long dispela hap.”—Aposel 17:17.
Kirap long taim bilong ol aposel na i kam inap long nau, pasin bilong givim bel tru long wok olsem Pol i bin mekim, dispela i olsem mak bilong ol man i save lotu tru long Jehova. (Matyu 28:19, 20) Long nau tu, ol Witnes Bilong Jehova i save mekim wok long kain kain rot taim ol i wok strong long helpim ol man i gat gutpela bel long kisim stretpela save long tok i tru. (1 Timoti 2:3, 4) Wanpela stori i kam long Ostrelia na i stap daunbilo em i kamapim dispela samting.
Inap 5-pela de long olgeta wan wan wik, Sid na Harold i save senis senis long lukautim wanpela samting ol i sanapim na i gat ol buk bilong Baibel long en. Ol i mekim olsem long wanpela ples bilong kisim tren long Sidni. Inap 5-pela yia nau ol i bin autim gutnius bilong Kingdom bilong God long dispela rot. Sid i gat 95 krismas, na em i tok: “Taim mi gat 87 krismas, mi no inap draivim ka moa. Dispela i mekim na mi bel hevi, long wanem, mi save amamas long autim tok long ol man. Long wanpela de long wanpela ples ol i kolim Eko Poin long Katumba, em long dispela hap planti turis i save raun long en, mi lukim wanpela man i salim ol piksa em i bin droim. Mi lukim gut ol piksa na mi tingting, ‘Mi gat ol naispela piksa i stap long paus bilong mi bilong autim, ol i winim ol dispela piksa na pe bilong ol i daunbilo tru!’ Orait mi pasim tok olsem bai mi wokim wanpela samting bilong putim ol buk long en, na mi sanapim long hap planti man i go i kam long en, na bai mi tilim ol buk bilong Baibel ol Witnes Bilong Jehova i save wokim em ol buk i gat ol naispela piksa long en.
“Fopela yia i go pinis, mi kisim dispela samting bilong putim ol buk long en i go long Sidni, na Harold i kirap long wok wantaim mi. Mipela i senis senis long lukautim ol buk na mipela wok wantaim kongrigesen bilong mipela.” Harold, nau em i gat 83 krismas, em i tok: “Planti manmeri i no save stap long haus long Mande i go inap long Fraide, olsem na taim mipela i autim tok bilong Kingdom long dispela rot mipela i stap stret long hap ol man i stap long en. Gutpela samting i save kamap long dispela wok. Mipela i save tilim planti buk tru winim namba bilong ol buk ol narapela pablisa i save tilim long dispela kantri.”
Sid i tok: “Maski insait long sampela yia mipela i bin mekim dispela wok long 4-pela o 5-pela narapela narapela ples, kwiktaim ol man i save long mipela. Sampela man i save kam long mipela long kisim buk. Sampela i gat ol askim em ol i laik mipela i bekim. Na sampela i laik toktok tasol wantaim mipela inap sampela minit.” Sid i lap liklik na i tok: “Long dispela taim tasol ol gobek bilong mi i save kam long mi.”
Harold i tok: “Planti man i laik tru long kisim save long Baibel. Ol man i bin kisim ol buk long mipela na mipela i bekim ol askim bilong ol long rot bilong Baibel, dispela i mekim na long wanpela mun 4-pela man i kirap stadi long Baibel wantaim ol Witnes. Kain samting olsem i save strongim mipela tru.”
Olsem Sid na Harold—na olsem aposel Pol—ol Witnes Bilong Jehova long olgeta hap ol i painim kain kain rot bilong autim bikpela tok bilong ol. Olsem na wok bilong autim “gutnius” long “olgeta hap bilong graun” i kamap yet.—Matyu 24:14.