Autim Tok Long Ples Bung
TAIM aposel Pol i stap long taun Atens, long olgeta de em i save go long ples bung bilong autim gutnius bilong Jisas Krais. Em i save mekim olsem long olgeta de. (Aposel 17:17) Pol i makim ples bung, long wanem, planti manmeri bilong Atens i save lusim bikpela haptaim bilong ol long dispela hap.
Klostu 2,000 yia bihain, lain bilong Jehova i yusim yet ples bung long autim tok bilong Kingdom Bilong God. Bilong wanem? Long wanem, ol inap bungim planti manmeri long dispela hap. Long nau, ples bung inap makim tu ol stua samting. Sampela Witnes i save kisim tok orait long wanpela maneja o papa bilong stua, na bihain ol i save sanapim wanpela liklik stol na putim ol buk bilong Baibel bambai ol man i ken lukim.
Olsem: Long wanpela bikpela haus supamaket long New Jersey long Amerika, ol i bin sanapim wanpela stol na ol i lainim gut ol buk na nius samting aninit long dispela het tok: “Rot Bilong Strongim Famili Bilong Yu.” Na wanem gutpela samting i bin kamap? Insait long wanpela de tasol, ol i bin tilim 153 buk long 6-pela tok ples.
Wanpela meri husat i bin kam long buk stol, em i putim gut yau long wanpela Witnes i stori gut long tok bilong ol dispela buk. Dispela meri i wanbel olsem em i bikpela samting long bihainim laik bilong God long laip bilong yumi na insait long famili tu. Em i kisim ol dispela buk: Kisim Skul Long Bikpela Tisa, Rot Bilong Famili i Ken Stap Amamas, na Sampela Askim Bilong Ol Yangpela—Ol Gutpela Bekim.
Klostu long apinun, wanpela man i wokabaut abrusim dispela stol bilong i go insait long stua i stap klostu. Buk Askim Bilong Ol Yangpela i pulim ai bilong em. Taim sista husat i sanap insait long stol i lukim olsem dispela man i laikim dispela buk, em i askim em, “Yu laikim wanpela bilong ol dispela buk?” Em i meknais long het olsem yes na em i poinim pinga long buk Askim Bilong Ol Yangpela. Dispela man i putim pinis han long kisim dispela buk taim sista i givim long em. Em i tok em i gat 3-pela pikinini man. Tupela i toktok i go na em i tok olsem long wanpela taim long olgeta wik, em wantaim ol pikinini i save sindaun na toktok. Tupela bikpela pikinini bilong em, ol i gat 14 na 16 krismas samting. Em i opim buk na lukim ol tok insait na em i tok em bai yusim ol tok bilong dispela buk long taim famili i sindaun na toktok. Dispela pablisa i soim em narapela buk, Rot Bilong Famili i Ken Stap Amamas, na tokim em olsem em wantaim meri bilong em inap painim sampela gutpela tok bilong helpim tupela taim ol i mekim ol disisen insait long famili. Man ya i amamas long tok pablisa i kamapim na em i givim mani olsem kontribiusen, na em i tok orait long wanpela Witnes i ken i kam lukim ol.
Ol dispela Witnes i pilim olsem wanem taim ol i autim tok long bikpela haus supamaket? Wanpela sista i tok: “Mi amamas tru long dispela pasin bilong autim tok. Mi bin kisim gutpela ekspiriens!” Narapela sista i tok: “Jehova i tok olsem wok bilong autim gutnius i mas i go inap long olgeta hap bilong graun. Tete long Paramus, New Jersey, dispela gutnius i mekim sampela samting long ol manmeri bilong kain kain tokples. Mi amamas long mi tu i bin insait long autim tok long dispela haus supamaket. Olgeta lain husat i bin insait long dispela wok, ol i bin amamas tru. Long pinis bilong de, i no gat wanpela bilong mipela i laik lusim dispela hap na i go.”
Olsem wanem? Yu inap painim ol narapela rot bilong autim gutnius? Tru, autim tok long ol haus em namba wan rot yumi save yusim bilong autim tok. (Aposel 20:20) Tasol olsem wanem? Yu inap autim tok long ol ples bung o long ol bikpela haus supamaket samting?