Nupela Rot Bilong Autim Tok Long Ol Pablik Ples
1. Ol i kirapim ol kongrigesen long mekim wanem?
1 Ol kongrigesen em ol i gat ol hap long teritori we planti man i save stap long en, ol i mas stretim rot long autim tok long ol pablik ples, long rot bilong yusim ol tebol na self samting bilong putim ol buk samting. Sapos yupela i mekim dispela kain wok autim tok, orait wanpela pablisa i ken sanap o sindaun klostu long tebol. Tasol tupela pablisa i mas stap klostu long wanpela tebol. Ol bratasista husat i mekim dispela wok ol i mas smail, lukluk long ol man na toktok gut wantaim ol. Sapos wanpela man i laik lukim ol samting i stap long tebol, wanpela pablisa i ken stori wantaim em, em i ken tok, “Sampela taim yu laik save, Baibel i tok wanem long dispela samting?” Wanpela o tupela narapela pablisa i ken autim tok—long kain kain taim na ples—klostu na ol inap lukluk long pablisa i stap long hap i gat tebol bilong buk.
2. Stori long ekspiriens i kamapim gutpela samting i kamap long nupela rot bilong autim tok long ol pablik ples wantaim tebol i gat ol buk samting.
2 Planti nupela Baibel stadi i bin kirap long dispela rot. Wanpela sumatin long kolis i laik raitim wanpela stori long ol Witnes Bilong Jehova na em i laik mekim wok painimaut long ol, tasol em i no inap painim Haus Kingdom. Tasol long wik bihain em i lukim wanpela tebol long hap bilong kolis. Ol Witnes i kirapim Baibel stadi long em, na nau em i wanpela baptais pablisa na em yet i insait long dispela nupela rot bilong autim tok.
3. Sampela pablisa i gat wanem tingting long nupela rot bilong autim tok long ol pablik ples?
3 Wanpela sista i amamas long insait long wok bilong autim tok long ol pablik ples i tok: “Sampela i save kam na sanap bilong kisim ol nupela magasin. Na sampela i no bin harim long ol Witnes Bilong Jehova bipo. Mi lukim olsem long dispela rot, yumi inap bungim planti man.” Narapela sista i tok: “Em i narapela kain rot bilong autim, long wanem, ol man bai kam long yu, na maski ol i no laik harim tok ol i laik save long wok yumi mekim.
4. Bilong wanem i gutpela long putim tebol long seim hap na seim taim long olgeta wik?
4 Em i gutpela long putim tebol long seim hap, seim de, na long seim taim long olgeta wik. Long dispela rot, ol man inap lain long yumi na sapos ol laik kisim buk samting o ol i gat askim ol bai i kam tasol long yumi. Olsem wanem? Kongrigesen bilong yupela i stretim rot pinis long autim tok long ol pablik ples? Sapos olsem, ating yu ken insait long dispela gutpela wok i save kamapim planti gutpela samting, na “tokaut long Kingdom bilong God long olgeta hap.”—Luk 9:60.