Autim Tok Long Rot Bilong Yusim Tebol i Gat Ol Buk Samting Long En

Wok bilong autim tok long rot bilong yusim tebol o troli bilong ol litresa i bin kamapim gutpela samting na i kirapim ol man i gat gutpela bel long kam long tok i tru. (Jon 6:44) Olsem na mipela i kirapim ol elda long stretim gut wok bilong autim tok long ol pablik ples insait long ol teritori bilong kongrigesen we planti man i save wokabaut i go i kam long en. Wok bilong yusim tebol o troli bilong putim ol litresa, dispela i no olsem wanpela liklik ofis bilong salim buk samting, olsem na i no gat wok long kisim tok orait long man i bosim dispela hap. Tasol sapos lo bilong ples i tok long kisim tok orait pastaim, i gutpela long mekim olsem. Husat inap insait long dispela wok? Ol pablisa husat i save skelim gut ol samting, ol i gat ol gutpela pasin na pasin rispek, na pasin bilong toktok gut wantaim ol man. Dispela tok hia i kamapim ol samting em ol pablisa i mas mekim na ol samting ol i no ken mekim, na dispela bai helpim ol long mekim gut dispela wok.

Ol Samting Yumi i Mas Mekim:

Mekim pasin pren, tok amamas long man, na toktok gut wantaim ol manmeri i wokabaut i go i kam. Sampela pablisa i save smail gut na tok moning o gude long ol man i go i kam. Sapos man i wokabaut i go na lukluk long ol samting long tebol, yu ken tok, “Sapos yu laikim wanpela yu ken kisim.”
Sanap klostu long hap we inap long yu lukluk long tebol o troli bilong ol litresa. Long sampela hap, ol pablisa i save stori gut wantaim ol man taim ol i sanap longwe liklik long tebol o troli. Sampela i pilim olsem dispela pasin i mekim na ol man i go i kam ol i pret liklik long sanap, olsem na ol i sanap longwe liklik moa na wet inap man i kam stop long tebol o troli bilong lukluk long ol litresa. Taim man i kam klostu long tebol, go toktok wantaim em, ating yu ken askim em, “Sampela taim yu bin tingim tu dispela askim?”
Yusim Baibel olgeta taim, sapos inap.
Stori long wok bilong mekim Baibel stadi long man husat i kisim wanpela buk em yumi save stadi wantaim man long en, olsem buk Baibel i Tok. Tokim man olsem yu laik soim em long vidio Wai na i Gutpela Long Stadi Long Baibel? long fon samting.
Gutpela long kisim nem, atres, na fon namba bilong man i laik harim tok. Sapos man i no stap long teritori bilong yupela, orait pulapim fom Plis Go Lukim (S-43-MP), na givim hariap long kuskus bilong kongrigesen.