Yusim Gut Taim Bilong Yu Long Autim Tok
Long sevis yia bilong 2014, ol Witnes Bilong Jehova i bin lusim olsem 1,945,487,604 aua long autim tok—dispela i kamapim klia tingting bilong yumi olsem yumi laik wok strong long mekim wok bilong Jehova! (Sng. 110:3; 1 Kor. 15:58) “Taim i sot pinis,” olsem na yumi mas yusim gut taim bilong yumi long autim tok long planti man moa.—1 Kor. 7:29.
Bilong yusim gut taim bilong yumi long autim tok, yumi mas redi long mekim sampela senis. Olsem: Sapos long olgeta taim yu save lusim wanpela aua samting long mekim wanpela hap wok bilong autim tok tasol yu no save toktok wantaim wanpela man, yu ting yu inap senisim dispela bambai yu inap bungim planti man na toktok wantaim ol? Sindaun bilong ol man long olgeta hap i no wankain. Ol tok hia bai helpim yu long yusim gut taim bilong yu, na bai yu no westim nating taim bilong yu, olsem yu tromoi han na “paitim nating win.”—1 Kor. 9:26.
Autim Tok Long Ol Haus: Insait long planti yia pinis, ol pablisa i save go pastaim long autim tok long ol haus long ol moning na bihain ol i go mekim ol gobek samting. Tasol planti man i save wok long ol moning, olsem na yu ting yu inap traim long mekim wok autim tok long ol apinun taim planti man i stap long haus na malolo samting? Sampela taim, taim yumi autim tok long rot o long ol ples wok long san, dispela i save kamapim gutpela samting.
Autim Tok Long Ol Pablik Ples: Yupela i mas putim ol tebol o troli bilong ol litresa long ol hap long teritori bilong kongrigesen we planti manmeri i save go kam long en. (Lukim Wok Kingdom bilong Julai 2013, p. 5) Sapos kongrigesen i bin makim wanpela hap we ol man i save i go kam long en bilong putim tebol o troli bilong ol litresa bilong autim tok tasol dispela hap i no gutpela tumas, orait Kongrigesen Sevis Komiti bai skelim na toksave long yupela i mas senisim ples na putim long narapela hap we planti man moa i save go i kam long en.
Ol Gobek na Baibel Stadi: Ating long sediul bilong yu, yu makim haptaim bilong mekim wanpela hap wok bilong autim tok, tasol planti taim gutpela samting i no kamap so yu ting yu inap yusim dispela haptaim long mekim ol gobek na Baibel stadi? Olsem: Sapos Sarere moning em i gutpela taim bilong autim tok long ol haus, yu ting yu inap mekim ol Baibel stadi long apinun o nait samting? Taim yu laik mekim ol gobek, yu ting yu inap mekim bikpela wok moa sapos yu stretim tok wantaim ol narapela pablisa na yupela i ken mekim ol gobek o Baibel stadi i stap long wankain hap long seim taim?
Tru, yumi save kisim amamas taim yumi yusim gut taim bilong yumi long autim tok, tasol taim wok bilong yumi i kamapim gutpela samting yumi save kisim bikpela amamas moa. Sapos yu lukim olsem wanpela hap wok bilong autim tok yu save mekim long wanpela haptaim i no kamapim gutpela samting, orait traim narapela hap wok bilong autim tok. Beten long Jehova, em “Bosman bilong bungim kaikai,” long stiaim yu na bai yu inap yusim gut taim bilong yu long autim tok!—Mat. 9:38.