Autim Tok Long Ol Haus
1 “Ol man husat i gat save long autim tok long kain kain rot bai wanbel long tok olsem pasin bilong autim tok long ol haus na yusim buk MILLENNIAL DAWN, em i nambawan rot long autim Tok i Tru long nau.” Dispela tok i bin stap long nius Zion’s Watch Tower bilong Julai 1, 1893, na i kamapim olsem pasin bilong autim tok long ol haus em i wanpela gutpela rot bilong autim tok long ol man. Long olgeta hap bilong graun ol Witnes Bilong Jehova i gat nem long mekim dispela wok. Long planti kantri em i hatwok long painim ol man long haus bilong ol, olsem na yu ting dispela pasin bilong autim tok long ol haus em i gutpela yet long mekim?
2 Baibel i As Bilong En na Em i Bikpela Samting: Autim tok long ol haus em wanpela wok em Baibel i as bilong en. Jisas i bin tokim 70 disaipel long go tupela tupela long ol haus bilong ol man. (Lu. 10:1, 5-7) Bihain liklik long indai bilong Jisas, Baibel i tok long ol disaipel bilong em: “Long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat.” (Ap. 5:42) Na tu, aposel Pol i bin givim bel long autim tok long ol haus.—Ap. 20:20.
3 Autim tok long ol haus em i stap yet olsem wanpela gutpela rot long autim gutnius long nau. Dispela wok i helpim yumi long “painimaut gut,” wanem ol man i laik harim tok na yumi mekim long stretpela rot. (Mt. 10:11) Ol man i save stap isi taim ol i stap long haus bilong ol yet. Taim yumi lukim pes stret bilong ol man na toktok wantaim ol—yumi harim nek bilong ol, lukim gut pes bilong ol, skelim sindaun bilong ol—dispela i mekim na yumi inap luksave long laik na tingting bilong ol. Na dispela i save opim rot long toktok gut wantaim ol.
4 Senisim Sediul Bilong Yu: Aposel Pol i redi long senisim sampela samting bilong em yet “bilong mekim gutnius bilong Jisas i kamap strong.” (1 Ko. 9:23) Ating yumi inap senisim sediul bilong yumi liklik na bai yumi ken autim tok long taim planti manmeri moa i stap long haus, olsem long apinun, long ol wiken, na long ol pablik holide. Wokim lista bilong ol man i no stap long haus, na traim painim ol long narapela de bilong wik o long narapela taim bilong de.
5 Ol pablisa i gat sik o lapun samting ol tu inap autim tok long ol haus. Ating yumi ken kisim ol i go long teritori i no hatwok tumas long wokabaut long en. Na yumi larim ol i wokabaut isi isi. Wanpela sista i gat sik sotwin olsem na em inap go long wanpela haus tasol insait long 30 minit. Tasol em i bin amamas tru taim ol bratasista i tingim em na kisim em i go wantaim ol long autim tok!
6 Ol pablisa i bungim yet planti ol man i gat gutpela bel taim ol i autim tok long ol haus. Wanpela pablisa i paitim dua na man bilong haus i tok: “Kam insait. Mi save long yu husat. Mi wok long beten i stap na askim God long salim wanpela man bilong helpim mi, na nau mi harim yu paitim dua. God i harim beten bilong mi na em i salim yu i kam.” Ol samting i wok long kamap i kamapim klia olsem Jehova i save blesim dispela wok bilong autim tok. (Mt. 11:19) Yu mas tingting strong long makim taim bilong insait long wok bilong autim tok long ol haus long olgeta taim.
[Askim Bilong Stadi]
1. Wanem askim i save kamap long pasin bilong autim tok long ol haus? Wanem samting i mekim na dispela askim i kamap?
2. Wanem ol skripsa i kamapim olsem autim tok long ol haus em wanpela wok Baibel i as bilong en?
3. Bilong wanem pasin bilong autim tok long ol haus em i gutpela samting?
4. Yumi ken mekim wanem bilong painim sampela man moa taim yumi autim tok long ol haus?
5. Yumi ken mekim wanem bilong helpim ol bratasista i gat sik o lapun samting long insait long wok autim tok long ol haus?
6. Bilong wanem yumi mas makim taim bilong autim tok long ol haus long olgeta taim?