Wok Strong Long Autim Tok Long Ol Haus
1 Long Israel bipo ol i save mekim ofa long olgeta de. (Kis 29:38-42) Paia bilong kukim ofa long alta em i no save dai, na Jehova i amamas long “gutpela smel” bilong smok i go antap. (Kis 29:18) Long nau yumi “givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hi 13:15) Yumi no givim ofa long Jehova olsem Lo i makim, nogat; tasol oltaim maus bilong yumi i mas litimapim nem bilong em, na long dispela rot yumi lotu long em.—Ais 43:21; Ap 5:42.
2 Krais Jisas i nambawan Witnes tru i winim olgeta narapela man, na em i lainim yumi long pasin bilong lotu tru long God—oltaim maus bilong yumi i mas litimapim nem bilong Em, olsem ofa. Jisas i lainim ol disaipel bilong em olsem taim i sot pinis na ol i mas taitim bun na autim tok. Em i save, nambawan rot bilong helpim man long kisim save long tok bilong Kingdom, em long rot bilong i go long ol haus na toktok wantaim ol man. (Mt 10:7, 12) Ol aposel i bihainim tok em Jisas i givim long ol, em tok em i kisim long God, na ol i autim tok long ol haus.—Ap 20:20.
3 Long nau tu i wankain. Ol Kristen tru ol i disaipel bilong Jisas, olsem na ol i bihainim pasin bilong em na ol i autim tok bilong Kingdom long olgeta haus. Maski man i sutim tok long yumi na mekim nogut long yumi i mekim dispela wok, long rot bilong autim tok long ol haus, sampela milion manmeri ol i bin kisim save long tok i tru, na long olgeta yia, planti handet tausen nupela disaipel ol i kam insait long “bikpela lain.” Dispela i kamapim klia olsem, long rot bilong autim tok long ol haus, Jehova i wok long kamapim laik bilong em. Olsem na yumi wok strong long autim tok i go yet.
4 Olsem Wanem Wok Autim Tok Long Ol Haus i Save Helpim Ol Man: “God i save mekim wankain pasin long olgeta manmeri . . . Em i save laikim ol manmeri i aninit long em na i mekim stretpela pasin.” (Ap 10:34, 35) Yumi go long olgeta wan wan haus, na dispela i kamapim klia olsem yumi mekim wankain pasin long olgeta manmeri—olgeta i gat rot long harim tok bilong Kingdom. Na ol man i laik harim tok, yumi go bek na helpim ol.
5 Klostu olgeta pablisa, ol yangpela na lapun na ol nupela pablisa tu, ol i ken insait long wok bilong autim tok long ol haus. Long dispela rot olgeta wan wan inap “autim bilip bilong [ol] na God i kisim bek [ol].” (Ro 10:10) Pasin bilong autim tok long ol haus wantaim ol brata sista bilong yumi, dispela i helpim yumi long pas gut wantaim na i stap wanbel, na narapela i laikim tru narapela. Na tu, dispela i givim rot long yumi ken kamapim pasin bilong sanap strong na karim hevi long taim man i no givim bel long harim tok o em i bel nogut long wok bilong yumi. Yumi kamapim bilip bilong yumi “long ai bilong olgeta manmeri,” na dispela i helpim ol man i gat gutpela bel long save, oganaisesen bilong yumi i bin wokim rot bilong yumi ken skulim ol man long ol tok bilong Baibel na dispela i ken helpim ol tu. (1 Ko 4:9) Olgeta samting i kamap long nau i kamapim klia olsem Jehova i blesim wok bilong autim tok long ol haus na long dispela rot em i bungim bikpela lain manmeri i kam long “haus” bilong em na bai ol i ken lotu tru long em.—Ais 2:2-4.
6 Nau long dispela taim, winim olgeta taim bipo, ol man i mas harim tok bilong Kingdom. Yumi no ken lusim dispela wok—yumi mas autim tok long ol haus i go inap long taim Jehova i tok em inap. (Ais 6:11) Sapos yumi mekim olsem, bai yumi kisim bikpela amamas, long wanem, yumi insait long wanpela bikpela wok bilong helpim ol man, em wok bilong autim tok long ol haus nau long dispela taim bilong pinis.
[Ol Askim]
1. Long nau yumi givim ofa long Jehova olsem wanem?
2. Jisas i save, wanem samting i nambawan rot bilong helpim ol man long kisim save long tok bilong Kingdom?
3. Wanem samting i kamapim klia olsem Jehova i blesim wok bilong autim tok?
4. Olsem wanem wok bilong autim tok long ol haus i kamapim klia olsem yumi mekim wankain pasin long olgeta manmeri?
5. Olsem wanem wok bilong autim tok long ol haus inap helpim ol man na yumi tu?
6. Bilong wanem yumi no ken lusim wok bilong autim tok long ol haus?