Autim Tok Long Ol Haus—Bilong Wanem i Bikpela Samting Long Nau?
‘Long olgeta de, ol i save go long tempel na long ol haus na skulim ol manmeri. Ol i no lusim wok bilong autim gutnius long Jisas em dispela man God i bin promis long salim i kam.’—AP. 5:42.
1, 2. (a) Ol Witnes Bilong Jehova i gat nem long autim tok long wanem rot? (b) Bai yumi skelim wanem samting long dispela stadi?
LONG klostu olgeta kantri ol man i save lukim dispela samting. Tupela man o meri i werim gutpela klos ol i go long wanpela haus na ol i laik autim sotpela tok bilong Baibel. Ol i autim tok bilong Kingdom Bilong God long man bilong haus. Sapos dispela man i laik harim, ating ol i tilim sampela nius bilong Baibel long em na tokim em olsem ol i laik stadi long Baibel wantaim em, no gat pe. Bihain long dispela ol i go long narapela haus. Sapos yu insait long dispela wok, ating yu save olsem taim yu no kirap toktok yet, planti man i luksave pinis olsem yu wanpela Witnes Bilong Jehova. Tru tumas, wok bilong autim tok long ol haus em wanpela mak bilong yumi.
2 Yumi save bihainim kain kain rot bilong mekim wok Jisas i bin givim yumi long autim tok na kamapim ol disaipel. (Mt. 28:19, 20) Yumi save autim tok long ples maket, long rot, na long ol narapela pablik ples. (Ap. 17:17) Yumi save autim tok long planti man long rot bilong telefon na pas. Yumi save autim ol tok i tru bilong Baibel long ol man yumi save bungim taim yumi mekim ol samting bilong wan wan de. Yumi gat Web-sait tu, em dispela i opim rot long ol man i ken kisim save long Baibel long 300 samting tok ples.a Olgeta dispela rot i save kamapim gutpela kaikai. Tasol long planti hap, nambawan rot bilong yumi long autim gutnius em long rot bilong autim tok long ol haus. Wanem samting i as bilong dispela pasin bilong autim tok? Olsem wanem lain bilong God long olgeta hap i bin kirap bihainim dispela pasin long taim bilong yumi? Na bilong wanem em i bikpela samting long nau?
Pasin Ol Aposel i Bihainim
3. Jisas i givim wanem tok long ol aposel long wok bilong autim tok? Tok bilong em i kamapim klia ol i mas autim tok olsem wanem?
3 Baibel i as bilong dispela pasin bilong autim tok long ol haus. Taim Jisas i salim ol disaipel long autim tok, em i tokim ol: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” Olsem wanem ol i ken painim ol gutpela na stretpela man? Jisas i tokim ol long go long haus bilong ol man, em i tok: “Sapos yupela i go insait long wanpela haus, orait yupela i mas tokim ol manmeri bilong haus olsem, ‘God i ken mekim gut long yupela.’ Na sapos ol manmeri bilong dispela haus i amamas long kisim yupela, orait gutpela tok bilong yupela i ken i stap long ol.” Olsem wanem? Ol i mas wet long man i singautim ol i kam long haus bilong em? Lukim tok Jisas i mekim: “Sapos wanpela man i no laik kisim yupela i go long haus bilong en, na i no laik harim tok bilong yupela, orait taim yupela i lusim dispela haus o dispela taun yupela i mas rausim pipia graun i stap long lek bilong yupela.” (Mt. 10:11-14) Ol dispela tok i kamapim klia olsem taim ol aposel ‘i wokabaut i go long ol ples nabaut na i autim gutnius,’ ol yet i mas i go long haus bilong ol man.—Lu. 9:6.
4. Wanem hap bilong Baibel i kolim stret pasin bilong autim tok long ol haus?
4 Baibel i tok ol aposel i bin autim tok long ol haus. Olsem, Aposel 5:42 i tok long ol: ‘Long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius long Jisas em i dispela man God i bin promis long salim i kam.’ Inap 20 yia bihain, aposel Pol i tokim ol elda bilong kongrigesen long Efesus olsem: “Mi no surik long autim olkain gutpela tok inap long helpim yupela. Na long ol bung bilong ol manmeri na long olgeta haus bilong yupela tu, mi bin skulim yupela.” Olsem wanem? Pol i bin go lukim ol dispela elda paslain long ol i kamap bilipman? Ating olsem, long wanem, em i skulim ol long ol i mas ‘tanim bel i go long God, na bilip long Bikpela Jisas.’ (Ap. 20:20, 21) Wanpela buk (Robertson’s Word Pictures in the New Testemant) i tok long Aposel 20:20 olsem: “Yumi mas tingim olsem dispela nambawan gutpela lain bilong autim tok, ol i bin autim tok long ol haus.”
Bikpela Lain Grasopa Long Nau
5. Tok profet bilong Joel i stori olsem wanem long wok autim tok?
5 Wok autim tok ol i bin mekim long taim bilong ol aposel i piksa long bikpela wok autim tok i kamap long taim bilong yumi. Profet Joel i tok, wok autim tok bilong ol Kristen God i bin makim i olsem bikpela bagarap em bikpela lain binatang, na ol grasopa tu, i save kamapim. (Jol. 1:4) Ol grasopa i wokabaut olsem wanpela lain ami, ol i winim ol samting i laik pasim ol, ol i go insait long ol haus, na pinisim olgeta samting i stap long rot bilong ol. (Ritim Joel 2:2, 7-9.) Dispela i makim stret pasin bilong lain bilong God long nau long wok strong na no ken les long autim tok long olgeta hap! Nambawan rot ol Kristen God i bin makim na ol “arapela sipsip” i save bihainim bilong truim dispela tok profet, em long rot bilong autim tok long ol haus. (Jo. 10:16) Olsem wanem yumi ol Witnes Bilong Jehova i bin kirap bihainim dispela pasin bilong ol aposel long autim tok?
6. Long 1922, wanem ol tok i kamap bilong strongim ol bratasista long autim tok long ol haus? Sampela i mekim wanem?
6 Kirap long 1919 na i kam, ol i bin kamapim klia olsem em wok bilong olgeta wan wan Kristen long autim tok. Olsem, wanpela stori (Service Essential) long Watch Tower bilong Ogas 15, 1922, i kirapim ol Kristen God i bin makim long tingim olsem em i bikpela samting long “givim bel long tilim ol buk na nius long ol man na toktok wantaim ol long haus bilong ol, na tokim ol olsem kingdom bilong heven i kam klostu pinis.” Long Bulletin (nau Wok Kingdom Bilong Yumi) ol i kamapim ol tok ol brata i ken mekim long taim ol i autim tok. Tasol maski i olsem, pastaim namba bilong ol lain i autim tok long ol haus i liklik. Sampela i surik long mekim dispela wok. Ol i kamapim kain kain eskius, tasol as tru bilong dispela hevi em sampela i ting wok bilong autim tok long ol haus em wanpela wok nating i daunim ol. Taim oganaisesen i toktok moa long wok autim tok, planti bilong ol dispela man ol i no bung moa wantaim oganaisesen bilong Jehova.
7. Long 1952 samting, wanem samting i kamap ples klia?
7 Long ol yia i kamap bihain long dispela, planti bratasista moa i insait long wok autim tok. Tasol ol samting i kamapim klia olsem ol bratasista i mas kisim skul long pasin bilong autim tok long ol haus. Tingim samting i bin kamap long Amerika. Long 1952 samting, inap 28 pesen bilong ol Witnes long dispela kantri i tilim ol liklik nius tasol o sanap long rot na holim ol nius. Winim 40 pesen i larim sampela mun i go na ol i no autim tok liklik. Ol brata inap mekim wanem bilong helpim olgeta Kristen i dediket pinis long autim tok long ol haus?
8, 9. Wanem program i kirap long 1953? Dispela i kamapim wanem ol samting?
8 Long wanpela kibung intenesenel i kamap long New York City long 1953, ol i mekim planti tok long wok bilong autim tok long ol haus. Brata Nathan H. Knorr i tokaut olsem nambawan wok bilong olgeta wasman Kristen em bilong helpim olgeta Witnes long autim tok long ol haus long olgeta mun. Em i tok: “Olgeta i mas save long autim gutnius long ol haus.” Ol i kirapim wanpela program long olgeta hap bilong skulim ol bratasista bilong ol i ken mekim olsem. Ol lain husat i no autim tok yet long ol haus i kisim skul long pasin bilong kirapim tok wantaim ol man long ol haus, toktok gut wantaim ol long Baibel, na bekim ol askim bilong ol.
9 Dispela program i kamapim planti gutpela samting. Insait long 10-pela yia, namba bilong ol pablisa long olgeta hap i go antap inap 100 pesen, namba bilong ol gobek inap 126 pesen, na namba bilong ol Baibel stadi inap 150 pesen. Long nau, klostu 7 milion pablisa bilong Kingdom i autim gutnius long olgeta hap bilong graun. Dispela samting i kamapim klia olsem Jehova i blesim ol hatwok lain bilong em i mekim bilong autim tok long ol haus.—Ais. 60:22.
Putim Mak Bilong Abrusim Bagarap
10, 11. (a) Esekiel i lukim wanem driman, olsem i stap long Esekiel sapta 9? (b) Olsem wanem dispela driman i kamap tru long taim bilong yumi?
10 Driman em profet Esekiel i kisim i kamapim klia olsem wok bilong autim tok long ol haus em i bikpela samting. Long dispela driman, Esekiel i lukim 6-pela man i holim bainat na namba 7 man i pasim gutpela laplap na i holim ol samting bilong rait. Dispela namba 7 man i kisim tok bilong “go long olgeta hap bilong taun Jerusalem na putim mak long pes bilong olgeta manmeri i bel nogut na i wari long olgeta dispela pasin nogut ol wantok i save mekim insait long taun.” Bihain long dispela wok bilong putim mak, dispela 6-pela man i holim bainat i mas kilim i dai olgeta man i no gat mak.—Ritim Esekiel 9:1-6.
11 Yumi save olsem long dispela tok profet, man i “pasim gutpela laplap” i makim lain remnan bilong ol Kristen God i bin makim. Long rot bilong autim tok na wok bilong kamapim ol disaipel, lain remnan i putim mak long ol man i kamap “ol arapela sipsip” bilong Krais. (Jo. 10:16) Dispela mak em i wanem samting? Em samting i kamapim klia—i olsem i stap long pes bilong ol—olsem ol dispela sipsip ol i disaipel bilong Jisas Krais i dediket na baptais pinis na ol i kisim pasin bilong Krais na kamap nupela man. (Ef. 4:20-24) Ol dispela man i olsem sipsip ol i kamap wanpela lain sipsip wantaim ol Kristen God i bin makim, na ol i helpim ol long mekim bikpela wok long putim mak long ol narapela man.—KTH 22:17.
12. Olsem wanem driman bilong Esekiel long wok bilong putim mak long pes bilong ol man i kamapim klia olsem wok bilong painim ol sipsip i bikpela samting?
12 Driman bilong Esekiel i kamapim klia wanpela as na wok bilong yumi long painim ol man i “bel nogut na i wari” i bikpela samting tru. Laip bilong ol man inap lus. Klostu nau, lain bilong Jehova long heven, em 6-pela man i gat bainat i makim ol, ol bai bagarapim ol man i no gat mak. Aposel Pol i stori long dispela kot na i tok olsem Bikpela Jisas bai kam wantaim “olgeta strongpela ensel bilong en” na “mekim save long ol man i no laik save long God na i no bihainim gutnius bilong Jisas, Bikpela bilong yumi.” (2 Te. 1:7, 8) God bai skelim ol manmeri long ol samting ol i mekim taim ol i harim gutnius. Olsem na wok bilong autim tok bilong God i mas i go strong inap long pinis. (KTH 14:6, 7) Dispela i givim bikpela wok long olgeta wokman bilong Jehova i dediket pinis.—Ritim Esekiel 3:17-19.
13. (a) Aposel Pol i pilim olsem em i mas mekim wanem wok? Bilong wanem em i pilim olsem? (b) Yu pilim olsem yu gat wanem wok bilong mekim long ol manmeri long teritori bilong yu?
13 Aposel Pol i pilim olsem wok bilong autim gutnius long ol narapela em i wanpela wok em i mas mekim. Em i tok: “God i givim mi wok bilong helpim ol Grik na ol man i no Grik tu, na ol saveman na ol man i no gat save tu. Olsem na bel bilong mi i kirap long autim gutnius long yupela ol manmeri bilong Rom tu.” (Ro. 1:14, 15) Pol i amamas tru long pasin marimari God i bin mekim long em, na em i pilim olsem em i mas traim long helpim ol narapela long kisim gutpela samting long dispela pasin marimari bilong God, olsem em yet i bin kisim. (1 Ti. 1:12-16) I olsem em i gat dinau long olgeta man em i bungim, em wanpela dinau em inap bekim tasol long rot bilong autim gutnius long ol dispela man. Olsem wanem? Yu pilim olsem yu gat dispela kain dinau long ol manmeri long teritori bilong yu?—Ritim Aposel 20:26, 27.
14. Wanem nambawan as na yumi save autim tok long rot samting na long ol haus?
14 Wok bilong helpim ol man long abrusim bagarap i bikpela samting, tasol i gat wanpela bikpela as moa na yumi mas autim tok long ol haus. Long tok profet i stap long Malakai 1:11, Jehova i tok: “Ol manmeri bilong olgeta kantri ol i save givim biknem long mi. Na . . . ol man i save mekim ofa bilong kamapim smok i gat gutpela smel na givim ol arapela kain gutpela ofa long mi. Dispela olgeta manmeri i save litimapim nem bilong mi.” Bilong truim dispela tok profet, ol wokman bilong Jehova i dediket pinis ol i litimapim nem bilong em long olgeta hap, taim ol i mekim wok autim tok long pasin daun. (Sng. 109:30; Mt. 24:14) Pasin bilong “givim biknem” long Jehova em i nambawan as na yumi save autim tok long rot samting na long ol haus.—Hi. 13:15.
Ol Bikpela Samting Bai Kamap
15. (a) Olsem wanem ol Israel i mekim bikpela wok moa taim ol i wokabaut raunim Jeriko long de namba 7? (b) Dispela i makim wanem samting long wok autim tok bilong yumi?
15 Wanem ol samting bilong wok autim tok bai kamap yet? Buk Josua i stori long taim ol Israel i raunim Jeriko, na dispela i olsem piksa long samting bai kamap. Paslain liklik long God i bagarapim Jeriko, lain Israel i kisim tok long raunim dispela taun wanpela taim long 6-pela narapela narapela de. Tasol long de namba 7, ol i mas mekim bikpela wok moa. Jehova i tokim Josua: “Yu wantaim ol soldia i mas wokabaut raunim taun 7-pela taim olgeta. Na ol pris i mas winim biugel . . . na yupela olgeta i mas singaut bikpela moa. Na banis bilong dispela taun bai i bruk.” (Jos. 6:2-5) Na olsem tasol, ating wok autim tok yumi mekim bai i go bikpela moa. Tru tumas, taim pasin bilong dispela graun i pinis, bai yumi lukim pinis bikpela wok bilong autim tok long nem bilong God na Kingdom, winim olgeta taim bipo.
16, 17. (a) Paslain long “bikpela hevi” i pinis, ol man bai save long wanem samting? (b) Stadi i kamap bihain long dispela bai skelim wanem samting?
16 Ating wanpela taim bai kamap we tok yumi autim i olsem ‘bikpela singaut moa.’ Long Buk Kamapim Tok Hait, ol strongpela tok bilong strafe bilong God i olsem ol ‘hap ais em hevi bilong wan wan em inap 50 kilogram samting.’b Na Kamapim Tok Hait 16:21 i tok olsem dispela ‘bagarap i nogut tru.’ Yumi no save yet bai yumi mekim bikpela wok bilong autim tok long strafe bilong God taim yumi autim tok long ol haus o nogat. Tasol yumi ken save tru olsem taim “bikpela hevi” i no pinis yet, olgeta man bai save long nem bilong Jehova, winim olgeta taim bipo.—KTH 7:14; Ese. 38:23.
17 Taim yumi wet long ol bikpela samting bai kamap bihain, gutpela sapos yumi givim bel long autim gutnius bilong Kingdom. Taim yumi mekim dispela wok, wanem ol hatwok i save painim yumi long wok bilong autim tok long ol haus, na olsem wanem yumi ken winim ol dispela hatwok? Stadi i kamap bihain long dispela bai skelim ol dispela askim.
[Ol Futnot]
a Web-sait atres em www.watchtower.org.
b Long tok Grik bilong pastaim, tok ol i raitim hia inap makim talen bilong ol Grik. Sapos olsem, hevi bilong olgeta wan wan ren ais em 20 kilogram samting.
Bai Yu Bekim Olsem Wanem?
• Baibel i tok wanem bilong kamapim as bilong wok bilong autim tok long ol haus?
• Long taim bilong yumi, olsem wanem ol i kamapim klia olsem wok bilong autim tok long ol haus i bikpela samting?
• Bilong wanem ol wokman bilong Jehova i dediket pinis i gat wok long autim tok?
• Wanem ol bikpela samting bai kamap bihain?
[Piksa long pes 4]
Olsem aposel Pol, yu pilim olsem yu gat wok long autim tok long ol narapela?
[Piksa long pes 5]
Brata Knorr, 1953