Wok Strong Long Autim Gutnius
1 Ol Kristen bilong pastaim i bin tingim tru wok bilong autim tok. Luk i tok: “Long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat.” (Ap 5:42) No gat wanpela samting i bin pasim ol, maski ol man i mekim nogut long ol! (Ap 8:4) Long olgeta de ol i bin tokim ol narapela long tok i tru.
2 Olsem wanem long yumi? Askim yu yet: ‘Mi tingim olsem taim i sot pinis? Mi tingting long wok yet long autim gutnius na mi strong long mekim?’
3 Ol Gutpela Piksa Long Nau: Wanpela sista, em i gat sik polio na em i mas slip insait long masin bilong wetlewa. Em i no inap i go long Haus Kingdom o long kibung. Tasol long olgeta taim em i wok long autim gutnius. Insait long 37 yia taim em i stap insait long dispela masin, em i helpim 17 manmeri long kisim tok i tru! Em i mekim olsem wanem? Maski em i no inap go autim tok long ol haus, long olgeta de em i bin painim rot bilong autim tok long ol man i kam long haus bilong em.
4 Ol brata bilong yumi long Bosnia i stap long ples bilong pait na ol samting bilong ol i lus. Tasol oltaim ol i wok yet long autim tok long ol narapela. Long Sarayevo ol pablisa i bin toktok wantaim ol narapela long gutnius winim 20 aua (averes) long olgeta mun na olgeta wan wan i mekim 2-pela Baibel-stadi (averes). Maski i gat bikpela hevi long hap bilong ol, ol i strong long autim tok na skulim ol man.
5 Ol yangpela tu i givim bel long autim tok. Long Ruanda, ol soldia i putim wanpela famili Witnes long wanpela rum na ol soldia i redi long kilim ol i dai. Famili i askim ol sapos ol i ken beten pastaim. Ol soldia i orait long ol, na liklik pikinini meri Deborah i beten strong olsem: “O Jehova, long dispela wik mitupela papa i bin tilim 5-pela nius. Olsem wanem mipela inap go bek lukim ol na helpim ol long kisim save long rot bilong laip?” Deborah i gat strongpela bilip na em i laikim tumas wok autim tok, na ol soldia i no kilim i dai olgeta long famili.
6 Long nau, yumi gat wok long painim rot bilong autim tok long ol narapela na painim ol man em ‘bel bilong ol i gutpela bilong kisim laip i stap gut oltaim.’ (Ap 13:48) Ol elda i save stretim rot bilong ol grup i ken autim tok long ol taim i stret long hap bilong yupela, ating long moning, long belo bek, o long apinun long 5 klok samting. Ol tok insait long Wok Kingdom na ol tok long Miting Bilong Wok, na kibung sekit, na kibung distrik i save kamapim ol gutpela tok long taim stret na i strongim yumi long insait long kain kain rot bilong autim tok bilong Kingdom. Na tu, ol wasman sekit na distrik i save lainim ol pablisa long mekim wok magasin long rot, na long hap i gat ol stua, na tokim ol long ol narapela rot bilong autim tok long ol hap yumi painim ol man. Ol dispela samting i kamapim klia, yumi mas wok strong long autim gutnius!
7 Ol aposel bilong Jisas i bin tokaut strong: “Mitupela i no inap pasim maus. Mitupela i mas autim tok long olgeta samting mitupela i bin lukim na harim.” Olsem wanem ol i bin wok yet long autim tok maski ol i kisim hevi? Ol i bin askim Jehova long helpim ol, na em i bin mekim olsem, na “Holi Spirit i pulap long ol, na ol i autim tok bilong God. Ol i tokaut strong na ol i no pret.” (Ap 4:20, 29, 31) I no olgeta bai kisim ol gutpela ekspiriens long wok autim tok, tasol sapos yumi laik tru long autim gutnius na yumi strong long mekim olsem long olgeta de, Jehova bai helpim yumi.