Olsem Wanem Bai Ol i Harim?
1. Bilong wanem sampela taim i hatwok long autim tok? Bilong wanem yumi strong yet long mekim?
1 De bilong Jehova i kam klostu tru, olsem na em i bikpela samting long helpim planti manmeri long kisim stretpela save long God na ol samting em i tingting pinis long kamapim bilong helpim ol man. (Jo. 17:3; 2 Pi. 3:9, 10) Sampela taim i hatwok long mekim dispela wok, long wanem, planti man i no laik harim tok o ating ol i tok bilas long yumi long wok autim tok yumi mekim. (2 Pi. 3:3, 4) Maski i olsem, i gat as na yumi bilip olsem i gat sampela man long hap bilong yumi em ol bai i orait long gutnius taim ol i harim. Olsem wanem ol dispela manmeri bai harim gutnius sapos i no gat wanpela i autim tok long ol?—Ro. 10:14, 15.
2. Olsem wanem gutpela piksa bilong Pol i strongim yumi?
2 Taim Ol Man i Birua: Yumi no ken larim dispela i pasim yumi, long wanem, yumi tingim ol man em ol i gat gutpela bel na ol i laik harim gutnius bilong Kingdom. Ol Filipai, ol i namba wan lain long hap bilong Yurop long harim aposel Pol i autim gutnius. Ol man i sutim tok giaman long em na Sailas, na ol i paitim tupela long kanda na putim ol long kalabus. (Ap. 16:16-24) Tasol dispela pen na hevi i no mekim Pol i pret na surik, nogat. Taim em i go long Tesalonaika, em narapela taun em i raun long en olsem misineri, God i “strongim bel bilong [em], na [em] i no surik.” (1 Te. 2:2) Tru tumas, gutpela piksa bilong Pol i kamapim klia as na yumi “no ken les” long autim tok.—Ga. 6:9.
3. Wanem samting inap mekim na ol manmeri em pastaim ol i no laik putim yau, ol i senisim tingting bilong ol na putim yau?
3 Planti manmeri em inap planti yia ol i no bin amamas long harim tok, ol i senisim tingting bilong ol na putim yau. Ating samting i mekim na ol i senisim tingting em hevi bilong mani, sik, wanpela long famili i dai, na stori bilong ol samting nogut i wok long kamap long graun. (1 Ko. 7:31) Sampela em papamama bilong ol i bin birua long tok i tru, ol i kamap bikpela man o meri na ol i redi long putim yau long tok yumi autim. Wok autim tok bilong yumi i givim rot long ol kain manmeri olsem long “singaut long nem bilong Jehova” taim rot i op yet i stap.—Ro. 10:13, NW.
4. Wanem samting i strongim yumi long autim tok na “i no lusim wok”?
4 “I No Lusim Wok”: Pasin bilong yumi long laikim tru God na ol narapela manmeri, dispela bai kirapim yumi na yumi “no lusim wok bilong autim gutnius” na kamapim disaipel, wankain olsem ol aposel i bin mekim long taim bilong ol. (Ap. 5:42) Planti manmeri long nau, ol i “bel nogut na i wari long olgeta dispela pasin nogut” i wok long kamap. (Ese. 9:4) Tru tumas, taim ol i harim gutnius, dispela i save givim nupela strong long ol na i mekim ol i wetim gutpela samting i kamap bihain! Maski planti man i no laik harim ol tok yumi autim, Baibel i mekim gut bel bilong yumi olsem Jehova i amamas long wok bilong yumi.—Hi. 13:15, 16.