Wok Yet Long Autim Tok

¹ Ating sampela taim yumi pilim olsem yumi autim tok planti taim long ol teritori bilong yumi tasol planti man i no harim tok. Maski i olsem, i gat as na yumi mas givim bel yet long autim tok.​—⁠Mt. 28:​19, 20.

² Olgeta Lain Manmeri i Ken Harim: Jisas i bin tok profet olsem wok bilong autim tok bilong Kingdom em i wanpela bikpela hap bilong mak i soim olsem pasin bilong “dispela graun i laik pinis” na ol bai mekim dispela wok bilong “olgeta lain manmeri i ken harim.” (Mt. 24:​3, 14) Taim ol manmeri i lukim olsem yumi insait long wok bilong autim gutnius bilong Kingdom, long dispela rot i olsem yumi autim tok long ol. Taim yumi lusim teritori yumi autim tok long en, ating sampela manmeri long dispela ples bai toktok yet inap sampela aua o sampela de long wok yumi mekim, maski ol i no bin putim yau long tok yumi autim. Taim yumi tingim tru as na yumi autim tok, dispela bai helpim yumi long wok strong yet long mekim dispela wok. Yumi mekim Jehova i amamas taim yumi insait long dispela wok i truim tok profet bilong Baibel na yumi tokim ol man long bagarap bai kamap klostu.​—⁠2 Te. 1:​6-9.

³ Yumi No Ken Les Kwik: I gat planti samting i pulim taim bilong ol manmeri, olsem na yumi no ken les kwik taim yumi laik kirapim laik bilong man long harim tok. Ol Witnes i bin go lukim wanpela meri long olgeta wik inap wanpela yia olgeta na bihain dispela meri i singautim ol i go insait long haus bilong em na ol i toktok long Baibel. Em i laikim tru tok ol i kamapim na em i orait long stadi long Baibel, em i kirap go long ol miting, na i no longtaim na em i tokaut olsem em i laik kisim baptais.

⁴ Ol samting i kamap long dispela graun i wok long senis hariap tru, na tingting bilong ol man tu i wok long senis. Planti man em pastaim ol i no laik harim tok, ating nau ol bai i gat laik long harim gutpela tok yumi autim. Sapos wanpela man tasol i amamas long harim tok bilong Kingdom, orait pasin bilong yumi long i no les kwik i karim gutpela kaikai.

⁵ Long olgeta hap, planti man moa i “bel nogut na i wari long olgeta dispela pasin nogut” i wok long kamap. (Ese. 9:⁠4) Wok bilong yumi long autim tok i karim kaikai, na dispela i soim olsem ol man i gat gutpela bel ol i wok long harim tok bilong Kingdom. (Ais. 2:​2, 3) Olsem na yumi mas wok yet long autim tok na no ken les long “bringim gutpela tok” long ol man.​—⁠Ais. 52:7; Ap. 5:⁠42.