Mekim Gutpela Wok Long Taim Bilong Yu
1 Ol aua olgeta wan wan man i lusim bilong mekim wok long en long olgeta wik, em i wankain. Hap taim yumi makim bilong autim gutnius em i bikpela samting, long wanem, yumi lusim dispela taim long wok bilong helpim ol man long abrusim bagarap. (Ro 1:16) Yumi kamapim klia amamas bilong yumi long dispela hap taim yumi lusim long autim tok, taim yumi mekim ol dispela samting: redi gut long autim tok long ol taim yumi makim pinis, kam long bung bilong autim tok long taim stret, na lusim ples bung kwiktaim bilong i go long teritori. Yumi laik mekim wok autim tok na yumi no laik lusim nating taim. Jehova i skulim yumi olsem “olgeta samting . . . i save kamap long taim bilong em yet,” olsem na yumi mas mekim gutpela wok long taim yumi bin makim bilong autim tok.—Sav 3:1.
2 Skelim Gut Taim Bilong Yu: Yumi kisim planti blesing taim yumi wok strong long bihainim sedyul i makim taim bilong autim tok long olgeta wik. Sapos yumi lusim planti aua long wok autim tok, orait yumi inap kisim planti gutpela samting. Olsem wanem? Sapos yumi mekim sampela liklik senis long sedyul bilong yumi, yumi inap lusim sampela aua moa long wok autim tok? Olsem: Long Sarere taim yumi tilim nius pinis, yumi inap lusim sampela hap taim moa long mekim sampela gobek? Sapos yumi autim tok long Sande, inap yumi lusim sampela taim tu bilong mekim ol gobek o mekim wanpela Baibel-stadi? Olsem wanem? Taim yumi pinis long autim tok long ol haus yumi inap skruim hap taim bilong mekim wok autim tok long rot? Long ol dispela rot o sampela rot moa, yumi inap long mekim wok bilong yumi i kamap gutpela moa.
3 Taim yumi mekim wok autim tok, sapos yumi no was gut yumi inap lusim nating dispela taim. Tru, long taim bilong bikpela san na ren yumi ken malolo liklik bilong kisim nupela strong bilong helpim yumi long wok i go. Tasol yumi mas bihainim stretpela tingting, long wanem, i no olsem long olgeta taim yumi mas kisim malolo.
4 Inap sampela yia nau i hatwok moa long painim ol man long haus. Bilong winim dispela hevi, planti pablisa i mekim wok autim tok long ol haus long narapela narapela taim bilong de. Olsem wanem? Bai yu inap traim long autim tok long bikmoning tru, o long apinun tru, o long taim tudak i kamap pinis, sapos i no gat hevi long ol raskol long hap bilong yu?
5 I gutpela sapos yumi no stori stori wantaim ol narapela pablisa taim yumi autim tok long rot. Narapela i mas sanap longwe long narapela na go long ol man na kirapim tok wantaim ol. Olsem bai yumi mekim gutpela wok long taim bilong yumi na bai yumi kisim bikpela amamas long wok bilong yumi.
6 Painim Rot Long Autim Tok: Taim wanpela meri i tok em i no laik harim tok, wanpela Witnes i askim em olsem i gat narapela man i stap long haus na Witnes i ken toktok wantaim em. Dispela i opim rot long Witnes i toktok wantaim man bilong haus, em i sik inap planti yia pinis na planti taim em i slip tasol long bet. Tok bilong Baibel long ol samting bai kamap bihain i kirapim gen laik bilong em long i stap laip. I no longtaim na em i lusim bet, na em i go long ol miting long Haus Kingdom, na autim nupela bilip bilong em long ol narapela!
7 Wanpela yangpela sista i bihainim wanpela tok i kirapim ol brata sista long mekim wok autim tok wanpela aua paslain long Buk-Stadi. Long namba wan haus, em i bungim wanpela yangpela meri i gat 13 krismas, meri i putim gut yau long ol tok na kisim buk samting. Long de bihain sista i go long skul na em i lukim dispela yangpela meri. I no longtaim bihain, sista i askim dispela meri, i orait long em i ken stadi wantaim em long Baibel, na meri i orait long stadi.
8 Mekim Gutpela Wok Long Hap Taim: Taim yumi autim tok long olgeta taim dispela i helpim yumi long kisim pasin bilong toktok gut wantaim ol man long gutnius. Olsem wanem? Taim yu autim tok long ol haus, yu inap mekim pasin bilong kirapim tok i kamap gutpela moa na mekim wok long ol gutpela kirap bilong tok? Yu inap mekim wok tisa bilong yu i kamap gutpela moa taim yu lukautim wanpela Baibel-stadi? Taim yu mekim olsem, yu inap mekim gutpela wok long dispela hap taim bilong yu na wok autim tok bilong yu bai kamap gutpela moa.—1 Ti 4:16.
9 “Taim i sotpela nau” olsem na yumi mas wok strong long mekim ol wok Kristen. (1 Ko 7:29) Hap taim yumi makim bilong autim tok i mas i stap olsem bikpela samting tru. Yumi mas wok strong long insait long wok bilong autim tok. Taim em i wanpela gutpela samting Jehova i givim long yumi. Oltaim yumi mas mekim gutpela wok long en.
[Blok long pes 4]
Tingim Ol Dispela Tok:
◼ Kam long bung bilong autim tok long taim stret.
◼ Sapos inap, grup bilong autim tok i mas liklik.
◼ No ken pulim taim bilong i go long teritori.
◼ Autim tok taim planti man i stap long haus.
◼ Sampela taim yu wanpela i ken autim tok, tasol no ken mekim long ol hap i gat ol man nogut long en.
◼ Mekim ol gobek i stap klostu long teritori yupela autim tok long en.
◼ Sapos yumi wet long ol narapela i stap yet long wanpela haus, orait autim tok long sampela man long rot.
◼ Sapos inap, autim tok inap sampela aua.
This article is repeated in km 8/04