Toktok Wantaim Ol Narapela Long Buk Rot Bilong Kamapim Amamas Insait Long Famili
1 Famili i olsem as bilong ol lain man, na ol famili i kamapim ol ples, ol taun, ol provins, na ol kantri. Long nau planti hevi i painim ol famili, winim olgeta taim bipo. Ol strongpela samting i wok long bagarapim i stap bilong ol famili. Yumi amamas tru long Jehova, em Man bilong kamapim famili, em i givim yumi ol lo bambai yumi ken stap amamas insait long famili! Ol man i bihainim ol dispela lo i no gat planti hevi insait long famili bilong ol na famili i wok gut wantaim. Long Septemba bai yumi amamas long toktok wantaim ol man long buk Rot Bilong Kamapim Amamas Insait Long Famili. Gutpela yumi ken kirap na toktok wantaim ol man long i stap bilong ol famili. Mekim gutpela pasin pren na tingim gut man na ting olsem em bai harim tok. Yu ken tok wanem?
2 Yu ken kirapim toktok long rot bilong wanpela askim kain olsem:
◼ “Yu bin lukim olsem planti famili i hatwok long karim ol hevi i save painim yumi? [Larim man i bekim tok.] Sampela ripot i soim olsem planti manmeri i kisim ol hevi insait long famili. Yu ting wanem samting tru inap helpim ol famili long stap strong na amamas? [Larim man i bekim tok.] God i kamapim ol famili, olsem na i stret yumi mas skelim ol lo em i bin kamapim, a? [Kaunim 2 Timoti 3:16, 17.] Ol kain gutpela tok bilong helpim yumi i stap long dispela buk, Rot Bilong Kamapim Amamas Insait Long Famili.” Nau yu ken askim man em i ting wanem hevi i bikpela hevi bilong ol famili, soim em sapta i stori long dispela hevi, na tilim buk long 50 toea.
3 Taim yu mekim gobek, ating yu ken kirapim Baibel-stadi sapos yu tok olsem:
◼ “Mi bin tingim ol tok yu bin mekim long i stap bilong ol famili, na mi bringim wanpela samting bilong yu em mi ting bai yu amamas long kaunim. [Soim em buklet Yumi Mas Mekim Wanem?, opim long pes 16, na kaunim 6-pela askim i stap antap.] Tru tumas, olgeta wan wan insait long famili i mas mekim hap wok bilong em bambai famili i ken i stap amamas. Sapos yu gat liklik hap taim, bai mi soim yu olsem wanem ol dispela tok inap helpim yu.” Nau yu ken kirapim stadi long Stadi 8. Tilim buklet long 40 toea na stretim rot bilong mekim narapela stadi gen long bihain.
4 Narapela rot bilong kirapim toktok em olsem: Kolim wanpela hevi. Ating yu ken tok olsem:
◼ “Maski olgeta manmeri i laik i stap bel isi na amamas, yumi lukim planti famili i hatwok long i stap olsem. Yu ting wanem samting inap helpim ol long i stap amamas tru? [Larim man i bekim tok.] Long bipo tru, Baibel i tokaut pinis long wanem kain hevi bai painim ol famili long nau. [Kaunim 2 Timoti 3:1-3.] Tasol Baibel i tokim ol famili tu long ol samting ol i mas mekim bilong stretim ol hevi na bai ol i stap amamas oltaim. Ol lo bilong Baibel i stap long dispela buk, Rot Bilong Kamapim Amamas Insait Long Famili.” Nau kaunim tok i stap long pes 2 na tilim buk long 50 toea.
5 Taim yu go bek, mekim wok long buklet “Yumi Mas Mekim Wanem?” bilong kirapim stadi. Yu inap tok olsem:
◼ “Mi bin amamas long lukim yu i laik tru long skelim ol lo Baibel i kamapim bilong helpim ol famili. Ol samting i bin kamap i soim yumi olsem, taim ol man i bihainim ol tok i stap long Baibel, dispela i bin helpim tru ol. Dispela paragraf i kamapim bilong wanem ol tok bilong Baibel inap helpim gut yumi.” Kaunim namba wan paragraf long Stadi 1 bilong buklet Yumi Mas Mekim Wanem? na kaunim tu Song 1:1-3 o Aisaia 48:17, 18. Sapos i gat rot, stori long ol narapela tok bilong dispela Stadi na tokim man olsem pe bilong buklet em 40 toea tasol. Tokim em olsem yu bai kam bek na bai yutupela i ken stori long Stadi 2.
6 Ol Buk na Magasin Samting Bilong Yumi: Sampela taim yu save pilim olsem yu laik givim nating ol buk na nius long wanpela man i tok em i no gat mani bilong baim? Tru, ating sampela man i no gat mani bilong kisim ol buk samting bilong yumi, tasol i no olgeta man i olsem. Olsem wanem? Yu bin lukim planti bilong ol man i tok ol i no gat mani, tasol bihain ol i save tromoi mani long ol samting i no bikpela samting tumas? Yumi no bihainim gutpela tingting sapos yumi givim nating ol buk na nius long ol man. Dispela i no inap helpim ol man long pilim tru olsem ol dispela buk inap helpim ol. I no gat as na yumi inap ting olsem yumi wok long salim ol dispela buk na nius samting, long wanem, yumi askim ol long liklik pe bilong helpim wok bilong prinim na baim posofis samting.
7 Taim yu soim buk “Famili” long wanpela man yu inap tok olsem:
◼ “Sapos yu laik kisim dispela buk, mipela i save lusim wantaim ol man long liklik pe em 50 toea tasol.” Sapos man i gat laik long kisim, tasol em i tok em i no gat mani, yumi ken tokim em olsem bai yumi kam bek long narapela taim, na ating yumi ken tilim wanpela liklik nius i stori long famili. Sapos yumi kirap na givim nating ol buk na magasin samting long ol man o yumi tilim long pe i no stret, dispela inap givim hevi long ol narapela pablisa i kam bihain long yumi. Sampela taim ol man i bin kirap nogut taim ol i harim olsem i gat liklik pe bilong ol buk na magasin, na ol i tok ol Witnes i bin kam bipo ol i givim nating long ol. Tru, taim yumi autim tok long ol wanblut o ol man yumi save long ol long narapela taim, ating yumi laik givim wanpela buk olsem presen long ol na yumi no askim ol long baim.
8 Yumi olgeta i ken wok strong long toktok wantaim ol man long bihainim ol tok bilong Baibel, dispela inap helpim ol famili long i stap amamas.—Sng 19:7-10.