Helpim Ol Famili Long i Stap Oltaim Long Bihain
1 Wanpela saveman bilong mani i tokim wanpela lain sumatin: “Pasin bilong mangal long mani em i gutpela samting.” Na em i tok moa: ‘Yu inap mangal long mani na amamas long yu yet.’ Em pasin bilong dispela graun long kirapim ol man long tingim ol yet tasol na ol i ting em rot bilong kisim ol gutpela samting long bihain. Tasol tok bilong Jisas i narapela kain, em i tok, Kristen “i mas daunim laik bilong em yet . . . Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?” (Mt 16:24-26) Bilong i stap oltaim long bihain, man i mas givim bel tru long mekim laik bilong God—em nambawan bikpela samting bilong ol famili long nau. (Sng 143:10; 1 Ti 4:8) Dispela i stap long laspela sapta bilong buk Rot Bilong Kamapim Amamas Insait Long Famili. Dispela buk i save helpim ol man long kisim save long wanem samting i bikpela samting long i stap bilong ol na olsem wanem ol i ken mekim ol gutpela samting bilong helpim famili bilong ol. Taim yumi wok yet long autim gutnius long olgeta hap, yumi ken tok wanem bilong kirapim ol man bambai ol i ken kaunim buk Famili? Em hia sampela tok yumi ken mekim:
2 Long ol haus na long rot tu, yu ken traim long mekim wok long liklik nius “Amamas Wantaim Famili Bilong Yu” bilong kirapim ol toktok. Yu ken askim olsem:
◼ “I stap bilong nau i mekim na yumi tingting planti long kain kain samting, olsem na yu ting ol famili inap i stap amamas? [Larim man i bekim tok.] Dispela liklik nius i kamapim olsem ol inap. Yu laik kaunim?” Sapos em i kisim, yu ken stori moa olsem: “Yu amamas long dispela stori, olsem na ating yu bai amamas tu long dispela buk i kamapim gut ol tok long olsem wanem yumi ken kisim amamas insait long famili.” Soim em ol tok i stap insait long buk Famili. Stori long sampela gutpela sapta inap kirapim tingting bilong em. Opim long pes 2, na kaunim tok i go pas. Tilim buk long 50 toea. Tokim man olsem i gat planti samting moa yu laik stori long en, na askim em wanem taim yu inap kam bek lukim em.
3 Bilong stori moa long ol tok yu bin mekim long namba wan taim long olsem wanem ol famili inap i stap amamas, yu ken tok olsem:
◼ “Mi laik stori long wanpela samting i stap long buk yu bin kisim na mi ting yu bai amamas long en. Laspela sapta i stori long rot tru bilong ol famili i ken i stap amamas. [Kaunim laspela 8-pela lain bilong paragraf 9 long pes 185.] Yu ken save olsem, bilong famili i ken stap amamas yu mas mekim olgeta samting i stret long lo bilong God. Mipela i laik bai ol famili i stadi wantaim long Baibel bilong kisim save long laik bilong God na olsem wanem ol inap bihainim insait long famili. Mipela i save mekim wanpela Baibel-stadi kos wantaim ol man, i no gat pe, na insait long sampela mun tasol yupela inap pinisim dispela kos. Sapos yu laik, bai mi soim yu long pasin bilong mekim dispela stadi.” Taim yu go bek, bringim buklet God i Laik Yumi Mas Mekim Wanem? o buk Save, i kam—tingim wanem bilong tupela i stret moa long dispela man.
4 Taim yu toktok wantaim ol wanklas long skul o long ol yangpela long teritori, sapos yu kamapim dispela askim ol inap harim tok:
◼ “Yu ting em i bikpela samting ol papamama i mas toktok gut wantaim ol pikinini bilong ol? [Larim em i bekim tok.] Lukim tok dispela buk i mekim long dispela samting. [Kaunim olgeta tok bilong paragraf 3 long pes 146 long buk Famili.] Olgeta tok bilong sapta 12 bilong dispela buk i kamapim ol gutpela tok long olsem wanem yu inap i stap gut wantaim ol papamama bilong yu. Nem bilong dispela buk em Rot Bilong Kamapim Amamas Insait Long Famili. Sapos yu laik kisim wanpela bilong kaunim wantaim papamama bilong yu, mipela i save lusim dispela buk long 50 toea tasol.” Tokim em olsem yu bai kam bek bilong kisim tingting bilong em long ol samting em i kaunim.
5 Bilong skruim tok yu bin mekim long namba wan taim long wanpela yangpela, olsem papamama na pikinini i ken toktok gut wantaim, yu ken tok olsem:
◼ “Mi bin amamas long lukim yu gat laik tru long save bilong wanem em i bikpela samting long toktok gut wantaim insait long famili. Yu ting wanem samting em i bikpela samting ol papamama wantaim ol pikinini i mas toktok long en?” Larim em i bekim tok. Nau opim buk Famili long pes 185, na kaunim bekim i stap long paragraf 10. “Gutpela rot bilong kisim save long God em long mekim Baibel-stadi long olgeta wik.” Soim em buklet God i Laik Yumi Mas Mekim Wanem? Stori olsem, ol 16 stadi bilong buklet i kamapim ol bikpela tok bilong Baibel. Kaunim tok i stap long pes 2, na toktok wantaim em long stadi 1.
6 Sapos yu bungim wanpela papa o mama taim yu autim tok long ol haus, o ating long pak o long ples pilai, yu inap kirapim tingting bilong em taim yu tok olsem:
◼ “Mi save bai yu wanbel olsem em i hatwok long mekim bikpela long ol pikinini long nau. Yu ting wanem samting inap lukautim famili bilong yu long ol pasin nogut? [Larim man i bekim tok.] Sampela gutpela tok mi yet i bin laikim i stap long hia.” Kaunim paragraf 29 long pes 159 bilong buk Famili. Stori long olsem wanem dispela buk i givim stretpela tingting em inap tru long lukautim ol famili na bai ol pasin nogut i no ken bagarapim ol. Tokim em, em inap kisim buk long 50 toea tasol, na tokim em, yu bai redi tasol long bekim ol askim bilong em.
7 Taim yu go bek gen bilong lukim papa o mama i bin kisim buk “Famili,” yu ken stori moa olsem:
◼ “Taim yumi bung namba wan taim, mi kisim save olsem yu save tingim tru ol pikinini bilong yu na yu save wok strong long lukautim ol bambai pasin nogut i no ken bagarapim ol. Ating yu no kaunim yet, tasol buk mi lusim wantaim yu i kamapim wanpela bikpela samting tru em yu mas save long en. [Kaunim 9-pela laspela lain bilong paragraf 16 long pes 168.] Bilong kamap pren bilong God, yumi mas kisim save long em long rot bilong tok bilong em long Baibel. Yu laik bai mi soim yu olsem wanem mipela i save stadi long Baibel wantaim ol famili?”
8 Ol saveman bilong graun i no inap helpim ol famili long i stap amamas, tasol ol bai mekim na ol famili bai stap bel hevi yet. Yumi mas tilim buk Famili long planti hap bambai Tok Bilong God i ken helpim ol man long olgeta hap long i stap oltaim long bihain.—1 Ti 6:19.