Tilim Buk Famili i Ken Stap Amamas Long Ol Man i Gat Kain Kain Krismas
1 Wanpela mangi i gat 11 krismas long Amerika i laikim dispela buk Rot Bilong Famili i Ken Stap Amamas. Em i raitim pas i tok: “Mi amamas tru long en, na mi laik kirapim ol narapela famili long ritim dispela buk, long wanem, em i gutpela buk. Em i . . . helpim famili bilong mi long i stap bel isi na stap amamas.” Ekspiriens bilong dispela yangpela i mas kirapim yumi long tilim buk Famili i Ken Stap Amamas long ol man i gat kain kain krismas. Em hia sampela tok yu inap yusim long taim yu autim tok long Septemba.
2 Taim yu bungim wanpela yangpela, yu ken tok:
◼ “Planti ol yangpela i gat wankain krismas olsem yu ol i gat laik long marit. Tasol yu inap painim we ol tok i stori long dispela samting na yu inap bilip tru long en? [Larim man i bekim tok.] Planti taim ol yangpela i save tok ol i no save sapos ol i redi long marit o nogat. Lukim tok dispela buk i mekim long dispela samting.” Opim buk Famili i Ken Stap Amamas long pes 14, na ritim paragraf 3. Orait bihain soim em ol wan wan liklik het tok long dispela sapta. Tilim buk long em, na stretim rot bilong i go bek lukim em.
3 Taim yu toktok wantaim wanpela papa o mama, yu ken tok:
◼ “Mipela i wok long toktok wantaim ol papamama long sampela gutpela tok i bin helpim ol papamama long pasin bilong mekim bikpela long ol pikinini. Ol dispela tok i stap insait long dispela buk Rot Bilong Famili i Ken Stap Amamas.” Opim buk long pes 55. Ritim paragraf 10, na bihain ritim Lo 6:6, 7, long paragraf 11. Orait nau soim ol sentens i stap long rait italik long paragraf 12 i go 16. Yu ken tok moa: “Dispela i bin helpim planti manmeri long mekim gut wok bilong ol olsem papamama. Sapos yu laik ritim, mi bai amamas long lusim dispela buk wantaim yu.”
4 Taim yu toktok wantaim wanpela man i lapun liklik, yu ken tok:
◼ “Bihain long mi ritim dispela sotpela tok, mi laik yu tokim mi long yu gat wanem tingting long en.” Opim buk Famili i Ken Stap Amamas long pes 169, na ritim namba wan na namba tu sentens long paragraf 17. Orait nau askim man bilong haus long tingting bilong en. Yu ken wet long em i kamapim bekim, na skelim sapos yu laik ritim sampela tok moa bilong buk paslain long yu tilim buk.
5 Taim yu go bek lukim ol man em yu tilim buk Famili i Ken Stap Amamas long ol, yu mas i gat tingting long kirapim Baibel stadi wantaim ol. Yu ken kirap long stadi 8 bilong buklet Yumi Mas Mekim Wanem? o sapta 15 bilong buk Save. Long rot bilong dispela wok yumi ken givim bel long helpim ol man i gat kain kain krismas long mekim famili i stap amamas.