‘Mi Stap! Yu Salim Mi’
EM STORI BILONG WILFRED JOHN
Ol soldia bilong Bema i ran i kam long tupela arere bilong wara na ol i redi long pait. Ol i redim pinis naip bilong ol na ol i makim mipela long gan bilong ol. Ol i ran i kam insait long wara na ol i raunim mipela aninit long bris.
MI WANTAIM poroman bilong mi i pret nogut tru. Bilong wanem dispela samting i painim mipela? Maski mipela i no save long tok ples bilong ol, mipela i save gut long wanpela samting—mipela i kalabus pinis. Mipela i pasim taul tasol, na ol i bringim mipela long wanpela polis-tesin klostu na wanpela plisman i save long tok Inglis i sutim sutim planti askim long mipela.
Dispela i kamap long 1941 long taim bilong Namba 2 Pait, na ol i ting mipela i man bilong helpim ol birua. Taim mipela i stori pinis long plisman long wok autim tok bilong ol Kristen mipela i bin mekim, em i tokim mipela, gutpela tru mipela i stap laip yet, long wanem, ol soldia i save sutim ol man i helpim pait, na ol i no givim askim long ol pastaim. Mipela i tok tenkyu long Jehova na mipela i bihainim tok bilong dispela plisman em i tok, no ken raun klostu long ol bris.
Olsem wanem dispela kain hevi i bin painim mi long Bema (nau ol i kolim Myanma)? Orait, mi laik stori long dispela samting na long ol samting i painim mi long bipo.
Mi Tingim Gut Samting Mi Laik Mekim
Long 1917 mama i karim mi long Wels na taim mi gat 6-pela krismas papamama i kisim mi na liklik brata bilong mi i go long Nu Silan na mi go bikpela long fam bilong papa bilong mi. Wanpela de em i baim sampela buk long sekenhen stua. Tupela buk long tok Inglis (Studies in the Scriptures), em Sosaiti Was Taua i bin wokim, i stap wantaim ol dispela buk. Mama bilong mi i laikim tru dispela tupela buk. Olsem Yunis, em mama bilong Timoti i bin mekim, mama i skulim mi long laikim tumas wok bilong Kingdom bilong Jehova taim mi stap yangpela.—2 Timoti 1:5.
Long 1937 tupela rot i op: mi inap kisim na lukautim fam bilong papa bilong mi o mekim wankain tok long Jehova olsem profet Aisaia i bin mekim: ‘Mi stap! Yu salim mi.’ (Aisaia 6:8) Long dispela taim mi yangpela, mi gat strong na no gat wanpela samting i pasim mi. Mi save pinis long mekim wok long fam na mi amamas long dispela wok. Tasol mi no gat save long mekim wok autim tok long olgeta de olsem wok painia. Bai mi mekim wanem—wok long fam o wok painia?
Sampela brata bilong brens-ofis bilong Ostrelia i strongim mi tru. Ol i bin kam long hap mi stap long en long Nu Silan na ol i kirapim mi long mekim wok bilong God taim mi stap yangpela yet. (Saveman 12:1) Mi toktok wantaim papamama bilong mi, na ol i wanbel long mi bihainim gutpela tingting na putim wok bilong God i stap nambawan. Mi bin tingting tu long tok Jisas i mekim long maunten: “Tasol namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—Matyu 6:33.
Mi tingim pinis samting mi bai mekim! Ol i singautim mi long wok long brens-ofis bilong Ostrelia long Sidni, long wanem, i no gat brens bilong ol Witnes Bilong Jehova long Nu Silan. Olsem na long 1937 mi kalap long sip i go long Ostrelia bilong mekim wok bilong Jehova olsem wanpela painia samting.
Mi tingting, ‘Bai ol i makim mi long mekim wanem wok?’ Tasol em i no bikpela samting, long wanem mi gat tingting olsem: ‘Jehova mi stap. Maski wanem wok yu givim long mi, bai mi mekim.’ Tupela yia mi helpim ol long wokim ol pikap. Bipo ol Witnes Bilong Jehova i mekim wok long pikap taim ol i autim tok bilong Baibel. Ol i lainim mi gut long wok long ples bilong salim ol buk na nius i go long ol narapela hap.
Mi Go Long Singapo
Long 1939 ol i salim mi i go long Singapo bilong wok long ples bilong salim ol buk na nius bilong Sosaiti. Dispela dipatmen i ples bilong kisim ol buk samting i kam long Ostrelia na Inglan na Amerika na mipela salim ol i go long planti kantri long hap bilong Esia.
Long Singapo planti man bilong Esia na Yurop i stap, na ol i gat kain kain tok ples. Planti man i save long tok ples Malai, na bilong mekim wok autim tok long ol haus mipela i mas lain long dispela tok ples. Mipela i gat ol kat bilong autim tok long ol narapela narapela tok ples. Ol i gat sampela sotpela tok bilong Kingdom long en.
Pastaim mi lain long ol tok i stap long kat bilong autim tok long tok ples Malai na bihain isi isi mi lain long sampela tok moa. Mipela i gat ol buk na nius bilong Baibel long tok ples Bengali, Gujarati, Hindi, Malayalam, Tamil na Urdu em ol tok ples bilong ol man bilong India. Em i nupela samting long mi long bungim ol manmeri bilong planti narapela tok ples.
Mi tingim yet toksave mi harim long Septemba 1939 taim ol i tokaut long pait i kamap long Yurop. Mipela i laik save, ‘Pait bai kamap bikpela na i kamap long hap bilong Isten Esia tu?’ Mi ting, dispela pait bai bringim mipela stret long Armagedon. Mi amamas, long wanem, mi mekim gutpela wok long taim mi stap yangpela yet.
Mi wok long ples bilong salim ol buk, na mi mekim bikpela wok long autim tok na long ol miting bilong kongrigesen. Mi lukautim ol Baibel-stadi na sampela i harim na ol i laik kisim baptais long wara. Mipela kisim ol i go long wanpela nambis klostu na mipela baptaisim ol long pasis bilong Singapo. Mipela i pasim tok long kamapim wanpela kibung na mipela i singautim ol nupela long kam. Mipela i amamas tru, long wanem, 25 i bin kam long dispela kibung, em mipela i ting em laspela kibung paslain long Armagedon.
Pait i mekim na i hatwok long salim tok long narapela brens-ofis bilong Sosaiti. Wanpela taim mipela kisim wanpela liklik toksave olsem tripela painia bilong Jemani bai kam long sip. Mipela i no save long nem bilong sip, na mipela i no save bai ol i go long wanen hap. Sampela wik bihain ol i kamap na ol i stap tenpela aua wantaim mipela. Mipela i no save long tok ples bilong ol, tasol mipela kisim save olsem ol bai go long Sanghai.
Wok Bilong Mi Long Sanghai
Wanpela yia bihain ol i salim mi tu long Sanghai. Mi save long namba bilong pos-ofis bokis bilong Sosaiti tasol nem bilong rot nogat. Ol wokman bilong pos-ofis i givim planti askim long mi na taim mi soim ol pepa bilong mi long ol na ol i save long mi ol i tokim mi long atres bilong Sosaiti. Tasol wanpela Saina i stap long dispela haus i tokim mi brens-ofis i stap nau long narapela hap na em i no save long atres bilong en.
Mi tingting planti, ‘Bai mi mekim wanem nau?’ Long bel mi beten na askim God long helpim mi. Taim mi apim het mi lukim tripela man ol i longpela liklik long ol narapela manmeri na ol i luk narapela kain liklik. Ol i luk wankain olsem ol tripela Jeman ol i bin stap inap sampela aua wantaim mipela long Singapo. Wantu mi kirap na pasim rot bilong ol.
Mi amamas na mi tok, “Yes, ol pren.” Ol i sanap na lukluk strong long mi. Mi tok moa: “Yupela inap tingim mi?—Singapo—Ol Witnes Bilong Jehova.”
Liklik taim i lus na ol i tok: “Ja!” “Ja!” “Ja!” Wantu ol i holim mi na aiwara bilong amamas i kamap long ai bilong mi. Planti milion manmeri i stap long dispela biktaun, olsem wanem na tripela i kam long dispela hap long dispela taim stret? Mi tok: “Tenkyu Jehova.” Long dispela taim ol Witnes Bilong Jehova i stap long Sanghai, em mi, na tripela famili Saina, na tripela Jeman tasol.
Hong Kong na Bihain Bema
Mi wok inap sampela mun long Sanghai na bihain ol i salim mi i go long Hong Kong. Ol i makim wanpela painia bilong Ostrelia long kam na poromanim mi. Tasol em i no kam, olsem na i no gat narapela Witnes moa long Hong Kong, mi wanpela tasol. Mi mas tingim gen dispela tok mi bin mekim long Jehova, ‘Mi stap! Yu salim mi.’
Planti taim mi autim tok long ol Saina i save long tok Inglis. Tasol i hatwok liklik long go insait long haus bilong ol, long wanem, ol wokboi bilong ol i was long dua ol i save long tok Saina tasol. Olsem na mi lain liklik long tupela tok ples ol Saina i mekim wok long en. Em i gutpela! Taim mi go lukim ol wokboi long dua, mi mekim sampela tok long tok ples Saina na soim ol long liklik kat i gat nem bilong mi, na planti taim ol i orait long mi go insait.
Wanpela taim mi go long wanpela skul na mi bihainim dispela pasin bambai mi ken toktok wantaim het-tisa bilong skul. Wanpela tisa i kam bungim mi na mi bihainim em i go long sampela klasrum na ol pikinini i lukluk long mi olsem mi wanpela bikman na mi ting nau bai em i bringim mi i go long het-tisa. Tisa i paitim na opim wanpela dua na em i surik na makim olsem mi mas go insait. Mi kirap nogut, em i bin bringim mi long toilet! Ating ol i paul long tok Saina bilong mi. Bihain het-tisa i tokim mi, ol i bin ting mi wanpela inspekta bilong skelim ol paip na toilet.
Mi mekim dispela wok inap fopela mun na bihain polis bilong Hong Kong i tokim mi ol i tambuim wok autim tok bilong mipela na mi no ken autim tok moa. Sapos mi mekim bai ol i rausim mi. Olsem na mi mas i go long narapela hap na bai mi gat rot yet long autim tok. Taim mi stap long Hong Kong mi tilim 462 buk na mi bin helpim tupela long mekim wok autim tok.
Mi lusim Hong Kong na ol i salim mi i go long Bema. Mi mekim wok painia, na long Rangun (nau ol i kolim Yangon) mi helpim ol brata long ples bilong salim ol buk. Mi amamas tru long taim mipela i autim tok long ol taun na ples i stap long rot i kirap long Rangun i go long Mandalai na i go moa long Lasio long boda bilong Saina. Mi wantaim poroman bilong mi long mekim wok painia mipela i autim tok long ol manmeri i save long tok Inglis na mipela i kisim sampela handet sabskripsen bilong nius Consolation (nau long tok Pisin ol i kolim Kirap!). Bihain, dispela bikrot i kirap long Rangun i go long Mandalai i kisim nem olsem Bema Rot. Long dispela rot ol Amerika i salim ol kago na samting bilong pait i go long Saina.
Taim mipela wokabaut long bikpela das mipela i laik waswas. Olsem na dispela hevi pastaim mi stori long en, i painim mipela taim mipela i waswas aninit long wanpela bris. Bihain liklik, wok bilong ol ami na sik i mekim na mipela mas go bek long Rangun. Mi stap long Bema inap long 1943, em taim ol samting bilong pait i go bikpela na mi mas i go bek long Ostrelia.
Mi Stap Gen Long Ostrelia
Taim mi no stap long Ostrelia ol i bin tambuim wok bilong ol Witnes Bilong Jehova long Ostrelia. Tasol i no longtaim na ol i rausim dispela tambu na ol i singautim mi gen long wok long brens-ofis. Long 1947 mi maritim Beti Mos, em i wok long brens-ofis long Ostrelia. Papamama bilong Beti i mekim wok painia na ol i bin kirapim em na brata bilong em Bil long mekim wok painia. Beti i bin kirap long mekim wok painia taim em i winim 14 krismas, stret long de em i pinisim skul. Mi ting mitupela inap wok gut wantaim, long wanem, em tu i gat dispela tingting long Jehova, ‘Mi stap! Yu salim mi.’
Taim mipela i marit pinis inap wanpela yia, ol i singautim mi long mekim wok sekit, olsem go raun na lukim ol kongrigesen bilong ol Witnes Bilong Jehova. Mekim wok long hap bilong bus bilong Ostrelia i hatwok. Planti taim bikpela ren i givim hevi long mipela taim mipela i raun, na ol rot i no gat kolta i wel. Long taim bilong san ples i hat nogut tru (43° C). Taim mipela i stap long haus sel mipela pilim i hat tru long taim bilong san na mipela i kol nogut tru long taim bilong kol.
Mi amamas tru long mekim wok wasman distrik taim i gat tupela distrik long Ostrelia. Donal Meklen i lukautim wanpela distrik na mi lukautim narapela. Na bihain mipela i senis. Mi amamas tru long kaunim stori long ol kongrigesen i stap nau long dispela hap bipo mipela i bin wok long en. Tru tumas, ol tok bilong Baibel mipela i bin planim i karim kaikai!
Kam Bek Long Hap Bilong Mipela
Long 1961 mi amamas tru long go long Skul Gileat long namba wan klas ol i kamapim long Bruklin, Nu Yok. Ol i bin askim mi pastaim long go long dispela skul, tasol mi save sik, olsem na mi no inap i go. Taim mi skul 10-pela mun pinis ol i askim mi long go long Nu Silan.
Kirap long Janueri 1962 mitupela Beti i stap hia long Nu Silan. Planti man i kolim dispela hap olsem gutpela bis bilong Pasifik. Mipela i bin amamas long mekim wok sekit na wok distrik. Kirap long Epril 1979, inap 14-pela yia nau, mipela i wok long brens-ofis bilong Nu Silan.
Mitupela Beti i winim pinis 75 krismas na mitupela wantaim i mekim wok bilong Kingdom olsem wok painia samting inap 116 yia. Beti i kirap long wok painia long Janueri 1933, na mi long Epril 1937. Mipela kisim bikpela amamas taim mipela lukim ol pikinini na ol tumbuna pikinini bilong spirit i bihainim wankain pasin olsem mipela na ol i tingim tok bilong Saveman 12:1: “Long taim yupela i yangpela yet, yupela i mas tingim [Jehova]. Nogut yupela i lusim tingting long em.”
Mipela i amamas tru, long wanem mipela i bin mekim wok bilong autim tok long Kingdom bilong God na kamapim ol disaipel klostu long olgeta yia mipela i stap laip, olsem Jisas i tokim yumi long mekim! (Matyu 24:14; 28:19, 20) Mipela i amamas tru, long wanem mipela i bin bihainim singaut bilong God olsem bipo profet Aisaia i bin mekim: ‘Mi stap! Yu salim mi.’