Mi Amamas Tru Long Mekim Laik Bilong God

Stori bilong Bill Yaremchuk

Mi gretiuet olsem wanpela misineri long klas namba 8 bilong Wastaua Baibel Skul Bilong Gileat, long South Lansing, New York, Amerika. Sampela wik bihain long dispela, long Mas 1947, mi stap long sip bilong go long ples mi bai mekim wok misineri long en​—long Singapo.

OL I bin makim Dave Farmer long mekim wok misineri wantaim mi. Em i bin gretiuet long klas namba 7 bilong Skul Gileat, na em tu i bilong Kanada. Long San Francisco, California, mipela i kalap long sip Marine Adder, bipo em i wanpela sip bilong ami.

Namba wan hap we sip i stop long en long Esia em Hong Kong. Ol samting mipela i lukim i nogut tru. Ol samting nogut Wol Woa 2 i bin kamapim i stap ples klia long olgeta hap​—ol manmeri i slip nabaut arere long ol rot, ol i hangre nogut tru na i luk olsem ol bai i dai. Mipela i go bek hariap long sip na sip i go long Manila, em biktaun bilong Filipins.

Long dispela hap tu mipela i lukim ol samting nogut bilong woa. Ol balus bilong pait i bin bomim ol sip, na ol mas bilong ol sip i slip nabaut long pasis. Planti man i stap rabis. Mipela i bungim sampela Witnes Bilong Jehova na ol i kisim mipela i go long Haus Kingdom bilong ol. Ol i amamas maski ol i karim ol bikpela hevi.

Orait nau mipela i go long Batavia (nau Jakarta) long Indonesia. Pait i stap insait long dispela kantri na sampela lain i pait klostu long pasis, olsem na ol i no larim mipela i lusim sip. Taim sip i lusim dispela hap bilong go long Singapo, mi tingting planti long wanem samting bai wetim mipela long Singapo. Ol liklik buk bilong ol turis i stori long ol naispela hap bilong Esia, tasol sori tru, nau ples i bagarap stret.

Insait long sampela de, mi no tingting planti moa. Ol samting i kamap bihain i soim klia olsem mitupela Dave i mekim wanpela wok God i orait long en.

Mipela i Kisim Tok Orait Long Stap

Inap wanpela mun bihain long mipela i bin lusim San Francisco, sip bilong mipela i sua long ailan St. John, em ples we ol sip i mas wet inap long ol i kisim tok orait long kam long pasis. Lain imigresen i kam long sip bilong stretim ol pepa bilong ol pasindia, na ol i putim stem long paspot bilong mipela, stem i gat rait “Orait Long Kam Insait Long Kantri.” Long de bihain long moningtaim, sip i sua long bris. Taim wanpela ofisa bilong sip i sekim pinis pepa bilong mipela, mipela i lusim sip.

Long de bihain, mipela i go bek long bris bilong tok gutbai long ol narapela misineri mipela i bin raun wantaim ol long sip. Ol bai stap yet long sip na go long India na Silon (nau Sri Lanka). Taim kepten bilong sip i lukim mipela, em i kam daun long bris na pesim mipela. Em i kros na bikmaus na tok olsem i no stret long mipela i bin lusim sip. Taim mipela i bin raun yet long solwara, bikman bilong imigresen, Mista Haxworth, em i bin tokim kepten olsem em i no ken larim mipela i lusim sip taim sip i sua long Singapo. Mipela i no bin save long dispela samting, na dispela ofisa husat i larim mipela i lusim sip, em tu i no bin save.

Taim ol i kisim mipela i go long Mista Haxworth, em i hatim stret mipela. Em i singaut bikmaus na tok olsem ol i no bin givim tok orait long mipela long kam insait long Singapo. Mipela i no bin save long dispela samting, olsem na mipela i soim long em paspot bilong mipela i gat stem “Orait Long Kam Insait Long Kantri.” Em i kros na rausim paspot long han bilong mipela na droim lain antap long dispela tok. Tasol gutpela tru, sip i go pinis! Mista Haxworth i holim paspot bilong mipela inap wanpela yia olgeta, tasol bihain em i givim bek paspot long mipela i gat stem “Orait Long Kam Insait Long Kantri.”

Wok Autim Tok i Karim Kaikai Long Singapo

Taim mipela i kamap long Singapo long Epril 1947, wanpela man nem bilong em Joshua, em tasol i wanpela Witnes long Singapo. Em i mekim wok painia, olsem autim tok bilong God fultaim, i go inap long taim em i dai long 1972 samting. I no longtaim na sampela husat i bin kisim save long ol tok i tru bilong Baibel, ol i kirap autim ol dispela tok long ol narapela man. God i harim beten bilong mipela na i salim sampela wokman moa bilong autim tok.​—Matyu 9:​37, 38.

Long 1949, taim Mista Haxworth i go holide longpela taim long Inglan, sikspela misineri i gretiuet long namba 11 klas bilong Skul Gileat ol i kam long Singapo. Dave, husat i bin mekim wok misineri wantaim mi inap planti yia pinis, em i sik na em i mas lusim Singapo. Em i go sindaun long Australia we em i mekim wok bilong God i go inap long taim em i dai long 1973. Wanpela bilong ol dispela sikspela nupela misineri em Aileen Franks, na long 1956 mitupela i marit.

Insait long ol yia i kam na i go, mipela i bin stadi long Baibel wantaim planti manmeri na ol i kamap Witnes, na ol pikinini bilong ol tu. Long nau tu, sampela bilong ol i mekim wok autim tok fultaim long sampela narapela kantri. Wanpela gutpela ekspiriens bilong mipela em Lester na Joanie Haynes, tupela marit bilong Amerika i sindaun long Singapo. Mipela i kirapim Baibel stadi wantaim ol long 1954 samting. Ol i kamap strong hariap long bilip na kisim baptais taim ol i go bek long Amerika. Bihain, wok autim tok bilong Lester na Joanie i karim gutpela kaikai. Ol i helpim planti man long kamap Witnes, na tripela pikinini bilong ol tu.

Joanie i raitim pas na tok: “Taim mi tingting i go bek long dispela yia mipela i bin stap long Singapo, dispela i bin senisim tru laip bilong mipela. Sapos yupela i no bin lainim mipela, ating mipela bai i raun raun yet long olgeta hap bilong graun. Mi amamas tru long yupela i bin lainim Les long tok i tru, long wanem, kirap long taim em i stat long stadi, tisa bilong em i bin kirapim em long laikim tru Jehova na ol bratasista Kristen bilong yumi. Em i holim yet dispela pasin.”

Famili i Wok Wantaim Long Singapo

Long 1962, bikpela senis i kamap long laip bilong mipela. Dokta em mipela i save go lukim i tokim Aileen olsem em i gat bel. Mipela i laik mekim yet wok misineri, tasol olsem wanem mipela inap mekim dispela wok na mekim bikpela long pikinini? Nathan H. Knorr, husat i lukautim wok bilong ol Witnes Bilong Jehova long olgeta hap long dispela taim, em i raitim pas long mipela na i strongim mi long mekim wok mani bambai mipela i ken stap long Singapo. Tasol dispela i hatwok tru.

Klostu olgeta man bilong ol narapela kantri husat i stap long Singapo, ol i kisim wok olsem maneja bilong ol kampani bilong ol narapela kantri. Mi no gat save long mekim wok bisnis, long wanem, mi bin kirap autim tok fultaim long taim mi lusim skul inap 23 yia i go pinis. Olsem na mi baim wanpela lain long London long wokim CV bilong mi long ol wok mi bin mekim olsem wanpela wokman bilong lotu long narapela kantri. Ol i salim CV bilong mi i go long planti bikpela kampani i stap long Singapo.

Ol kampani i salim ol dispela bekim long mi, “Sori tru, mipela i no gat wok bilong givim long man i gat kain save olsem yu.” Ol i ting mi gat bikpela save tumas! Ol mun i kam na i go, na bebi bilong mipela, Judy, i kamap. Brata Knorr i visitim Singapo long dispela taim, na em i go lukim Judy na mama bilong em long haus sik. Em i tokim mipela olsem, “Yupela i ken stap long haus misineri i go inap long taim Bill i painim wok mani.”

Sampela mun bihain, mi kisim wok mani long wanpela bikpela kampani bilong balus. Pe mi kisim i liklik tru. Tupela yia bihain, wanpela kampani bilong balus bilong Amerika i givim wok mani long mi na i dabolim pe bilong mi. Bihain, mi gat nem insait long ol kampani bilong balus, na mi inap lusim bikpela hap taim moa long stap wantaim famili na mekim wok autim tok.

Wok bilong Jehova i stap namba wan samting long laip bilong mipela. Dispela i mekim na mi kisim planti gutpela wok insait long oganaisesen. Aileen i kirap gen long autim tok fultaim. Wok bilong autim tok bilong Kingdom i kamap bikpela long Singapo. Long 1965 samting, mipela i baim wanpela haus i gat tupela plua na em i kamap Haus Kingdom. Fopela kongrigesen i bung long dispela hap.

Ol i Tambuim Wok Bilong Mipela!

Bihain, pasin birua i laik kamap. Long Janueri 14, 1972, mipela i go​—olsem mipela i save mekim oltaim​—long miting bilong mipela long Haus Kingdom. Tasol long geit bilong Haus Kingdom i gat sen na lok, na wanpela pepa i tok Singapo Kongrigesen Bilong Ol Witnes Bilong Jehova i no rejista moa. Gavman i tambuim wok bilong mipela!a

Maski ol i pasim Haus Kingdom, dispela i no stopim mipela long lotuim Jehova, tasol mi tingting, ‘God i laik bai famili bilong mi i mekim wanem?’ Mi tingting olsem sapos gavman i rausim mipela, mipela bai i no inap kam bek na visitim ol pren bilong mipela long Singapo. Olsem na mi askim maneja bilong kampani mi wok long en sapos mi inap wok long Kuala Lumpur, Malesia. Long dispela rot ating famili bilong mipela inap i go i kam long Singapo na no gat hevi. Mi kirap nogut taim maneja i tok mi inap kisim wok olsem maneja bilong ofis bilong kampani long Kuala Lumpur, em dispela bai dabolim pe bilong mi na mi bai kisim ol narapela gutpela samting tu.

Orait nau mi tingting, ‘God i laik bai mipela i lusim Singapo na ol brata bilong mipela?’ Mipela famili i kamapim dispela samting long Jehova long rot bilong beten. Mipela i tingting olsem Jehova i bin bringim mipela i kam long dispela ples. Olsem na mi wokim disisen​—mipela bai stap. Maneja i kirap nogut tru taim mi tok nogat long gutpela wok mani em i laik givim long mi.

Em i hatwok tru long i stap na wok aninit long tambu, long wanem, oltaim mipela i mas tingting olsem ol polis inap arestim na kalabusim mipela. Sampela taim mipela i pilim tru tok bilong Song 34:​7, olsem: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.”

Nupela Ples Wok

Bihain, long 1993, taim mipela i bin stap inap 46 yia long Singapo, ol i askim mipela long go long Nu Silan, we mipela inap mekim wok bilong God na mipela i no gat planti wari na hevi. Tru, mipela i bel hevi long lusim ol gutpela pren bilong mipela long Singapo, em mipela i laikim tumas ol. Tasol mipela i amamas long save olsem ol i gat strongpela bilip. Dispela i helpim ol long karim hevi bilong ol traim i wok long painim ol.​—1 Korin 3:​12-​14.

Mitupela Aileen i bin stap pinis inap 14 yia long Nu Silan, na maski mipela i lapun, mipela i amamas yet long mekim wok olsem ol painia salim. Tupela brata bilong mi​—Mike i gat 94 krismas, na Peter i gat 90 krismas​—ol i stap yet na mekim wok bilong Jehova long Kanada.

Long 1998, pikinini meri bilong mipela Judy, i go bek long Esia na mekim wok long dispela hap inap sampela yia. Long wanpela pas em i raitim long mipela, em i tok: “Long olgeta de mi tenkyu tru long Jehova long gutpela wok mi inap mekim long hia! Na tu, tenkyu long yutupela long gutpela skul yupela i bin givim na pasin bilong yupela long daunim laik bilong yupela yet em dispela i opim rot long mi ken mekim dispela wok.” Long 2003, em i kam bek long Nu Silan bilong helpim mitupela Aileen.b

Mipela i tenkyu long Jehova long mipela inap bihainim singaut bilong Bikpela taim em i laik kisim sampela wokman moa long bungim kaikai. Dispela i bin givim bikpela amamas tru long mipela. Na taim “pasin bilong dispela graun” i pinis, olsem Baibel i tok em bai pinis, mipela bai lukim truim bilong gutpela tok promis bilong God: “Man i bihainim tok bilong God, em bai i stap oltaim.”​—1 Jon 2:17.

[Ol Futnot]

[Piksa long pes 29]

Joshua tasol em wanpela Witnes i stap long Singapo taim mipela i kam long 1947

[Piksa long pes 29]

Wantaim Dave Farmer long Hong Kong, taim mipela i laik go long Singapo, long 1947

[Piksa long pes 29]

Mi wantaim Aileen, 1958

[Piksa long pes 31]

Mipela wantaim pikinini meri bilong mipela, Judy

[Kredit Lain]

Kimroy Photography

[Piksa Kredit Lain long pes 28]

Kimroy Photography