Bipo i Stap Bilong Mi i No Gat As Bilong En
TINGIM bel hevi bilong mi taim tupela man i gat strongpela skin i kirapim mi long slip long moning tru taim ol i wok long painim wanpela samting long rum slip bilong mi. Mama bilong mi i sanap klostu, pes bilong em i luk olsem em i sik, na em i no inap mekim wanpela samting, i olsem skin bilong em i no gat strong. Tupela man ya em polis.
Mi save long samting ol i wok long painim. Maski mi mekim olsem mi no pret, bel bilong mi i guria. Nau mi save, klostu polis bai holim mipela ol bikhetmanki bilong wanpela lain bilong stil long Nu Jesi, Amerika. Polis i no tok isi long mi taim ol i tokim mi long kirap na putim klos bilong mi. Ol i kisim mi i go long polis-tesin bilong givim askim long mi.
Olsem wanem dispela kain hevi i bin painim mi? Em i kirap taim mi yangpela tru, na taim mi kisim 15 krismas, mi wanpela raskolman pinis. Long 1960 samting, planti yangpela i ting em stail tru long kamap wanpela bikhetman maski i no gat as long mekim olsem, na mi tu i gat wankain tingting. Olsem na taim mi gat 16 krismas, ol i rausim mi long haiskul na mi save raun nating na pilai snuka long wanpela haus snuka. Long dispela ples mi bin prenim wanpela lain bikhetmanki i save stil. Mi insait long lain bilong ol na mipela stilim sampela samting. Dispela i kirapim mi long laik tru long stil, na olgeta taim mipela stil, mi save amamas tru.
Em nau, inap 9-pela mun mipela brukim ol haus na stil. Taim mipela olgeta i stil, mipela save brukim ol ofis, em planti bilong ol i gat bikpela hap mani i stap long en. Planti taim mipela stil na i no gat wanpela man i holim mipela, olsem na mipela i mekim moa yet; mipela i no pret. Orait, nau mipela pasim tok long brukim wanpela beng na stil.
Em namba wan taim ol samting i no wok gut. Mipela i no hatwok long go insait long beng, tasol mipela i no amamas tumas, long wanem, mipela inap brukim tasol ol kabot ol beng-tela i save putim mani long en. Tasol nau bikpela hevi i painim mipela, long wanem, polis i singautim nambawan lain polis, em FBI (Federal Bureau of Investigation) long painim mipela. I no longtaim tumas na FBI i holim mipela olgeta.
Ol Samting Pasin Nogut i Kamapim
Kot i tokaut olsem mi bin brukim haus na stil inap 78 taim, na mi sem nogut tru taim kot i tokaut long wan wan pasin stil mi bin mekim. Dispela na ol samting niuspepa i kamapim i bin bagarapim tru bel bilong papamama bilong mi. Papamama i sem pipia long pasin bilong mi, tasol long dispela taim mi no tingim ol samting pasin bilong mi i mekim long ol. Kot i tok mi mas go long wanpela skul koreksonal, olsem wanpela kain kalabus, inap long taim mi kisim 21 krismas samting. Tasol wanpela loya i gat bikpela save em i helpim mi, olsem na ol i salim mi long wanpela kain skul bilong stretim ol manki.
Tru mi no kalabus, tasol kot i tok mi no ken bung moa wantaim ol asples o ol dispela manki bipo mi bin prenim. Bilong helpim mi long mekim olsem mi bin go long wanpela skul long Nuwark. Dispela skul i no bilong gavman, em i wanpela kain skul i save helpim ol yangpela i gat hevi olsem mi. Na kot i tok, long olgeta wik mi mas kisim helpim long wanpela dokta bilong skelim tingting. Papamama bilong mi i bihainim tok bilong kot, maski dispela i givim hevi long ol, long wanem, ol i mas tromoi bikpela mani bilong helpim mi olsem.
Wok Long Stretim Pasin
Ol nius i bin stori planti long ol samting i bin kamap long kot bilong mipela, olsem na ating dispela i mekim na niuspepa bilong ples i kamapim wanpela stori i gat het-tok olsem: “Ol i No Givim Kanda.” Dispela stori i sutim tok long kot olsem kot i no givim strongpela strafe long mipela. Taim mi kaunim dispela stori, em namba wan taim wanpela tok i bin sutim bel bilong mi. Olsem na mi katim dispela stori na holim i stap, na mi tok promis long mi yet olsem, bihain bai mi wok long stretim ol dispela samting mi bin mekim long papamama, olsem ol i sem na bel hevi long pasin bilong mi, na ol i bin tromoi bikpela mani bilong helpim mi.
Mi ting sapos mi go bek long olpela haiskul bilong mi na pinisim skul, em wanpela rot bilong helpim papamama long save olsem mi inap senisim pasin bilong mi. Em nau, mi kirap na stadi i go i go, bipo mi no bin stadi olsem. Taim wanpela yia i pinis, mi sanap wantaim plisman i save was long mi long ai bilong jas i bin kotim mi. Taim jas i lukim bikpela mak mi kisim long skul, em i no pes drai moa, em i lap. Nau rot i op bilong mi ken i go bek long olpela haiskul bilong mi, na mi bin mekim olsem na pinis long dispela skul long yia bihain.
I Stap Bilong Mi i No Gat As Yet
Long 1966 planti wanklas bilong mi i insait long ami na ol i go pait long Vietnam. Tasol mi bin go long wanpela bikpela skul (Concord College) long Wes Vejinia. Ol wanskul i lainim mi long kisim drak, na long insait long ol bikpela bung bilong tokaut olsem olgeta kantri i mas kamapim pasin sekan, na planti samting moa, em ol samting i mekim na mi ting ol gutpela pasin na lo bilong bipo i no stret. Mi wok long painim wanpela samting, tasol mi no save em wanem samting. Taim skul i malolo, mi no bin go bek long ples, mi raun nating long hap bilong saut na brukim ol maunten Blu Ris na kamap long Florida.
Bipo mi no bin raun tumas, olsem na mi amamas long lukim planti kain kain nupela ples. Tasol amamas bilong mi i pinis taim polis i holim mi na putim mi long rum gat bilong Detona Bis. Ol i mekim olsem long wanem mi go nabaut nabaut na mi no sindaun gut long wanpela hap. Mi sem long salim toksave long papamama, tasol polis yet i salim toksave long ol. Papa i stretim tok long baim kot gen maski i bikpela mani; em i no laik mi kalabus.
Mi no bin go bek long bikpela skul. Nau mi gat bikpela laik long raun na lukim ol ples, olsem na mi holim wanpela switkes na raun. Mi trip nabaut i go i kam long olgeta hap bilong nambis long hap is bilong Amerika. Mi mekim ol liklik wok mani bilong lukautim mi long ol samting bilong skin. Papamama i no save gut mi stap we, tasol wan wan taim mi go lukim ol. Mi kirap nogut, long wanem, olgeta taim ol i amamas long lukim mi, tasol mi no inap sindaun gut long wanpela hap.
Mi no bin go bek long bikpela skul, olsem na nau gavman i no orait moa long mi no ken insait long ami. Mi save liklik taim bihain ol bai singautim mi i go insait long ami. Man! Taim mi tingim ol strongpela lo bilong ami na mi no inap raun moa olsem wanpela man i stap fri, mi tingting planti. Olsem na mi pasim tok long bel long kisim sip na go long narapela kantri. Taim mi tingting long mekim olsem, wanpela nupela wok i kamap. Olsem wanem? Dispela bai opim rot na i stap bilong mi i gat gutpela as bilong en?
Raun Long Solwara
Wanpela olpela pren bilong famili em kepten bilong wanpela sip bilong karim kago bilong Amerika. Em i tokim mi long wanpela nupela skul bilong ol ensinia bilong sip. Mi amamas long insait long dispela skul na mi skul inap tupela yia. Mi save dispela skul bai helpim mi long tupela rot: Mi no ken insait long ami sapos mi skul, na mi inap winim namba bilong kamap wanpela ensinia. Long 1969 mi winim skul na kisim setifiket. Long San Fransisko mi kisim wok olsem namba 3 ensinia long wanpela sip. Kago bilong sip em ol samting bilong pait na kwiktaim mipela i kisim i go long Vietnam. Mi no amamas tumas long raun bilong dispela sip na taim sip i kamap long Singapo mi lusim.
Long Singapo mi kisim wok long wanpela sip ol i kolim ranawe sip, long wanem, dispela sip i save kisim ol boskru i no insait long wanpela yunion na ol i wet long bris bilong kisim wok. Wok bilong dispela sip em long ran i go i kam long nambis bilong Vietnam, kirap long Kam Ran Be long hap saut i go inap long Da Nang long hap bilong not, klostu long hap i no gat pait. Long dispela hap mipela inap harim pairap bilong ol bom—ol bom i no malolo. Mi save kisim bikpela mani long wok bilong sip, long wanem, ol bos bilong sip i save mipela inap kisim bagarap long dispela wok. Na sapos birua i sut long sip, ol i givim sampela mani moa long mipela. Olsem na mi bin kisim inap olsem 35,000 dola long olgeta yia. Tasol maski mi gat mani, mi pilim yet mi stap olsem tripman na i stap bilong mi i no gat as bilong en—mi laik save, wanem samting bai painim mi?
Mi Harim Sampela Gutpela Samting
Bihain long wanpela taim ol birua i sutim sip na pretim mipela nogut tru, man i wok wantaim mi long lukautim masin i wok long kamapim smok bilong hatwara, em Albert, em i tokim mi, klostu nau God bai kamapim bel isi long graun. Mi putim yau long tok bilong em, long wanem, em i narapela kain tok. Taim sip i go bek gen long Singapo, Albert i tokim mi, bipo em i wanpela Witnes Bilong Jehova tasol nau em i stap nating. Mitupela i wok long painim ol Witnes long Singapo. I no gat wanpela man i save long ol, tasol long nait paslain long sip bilong mipela i laik lusim Singapo, Albert i painim nius Wastaua long wanpela hotel. Nius i gat atres long en, tasol mipela i no gat taim bilong i go painim dispela ples, long wanem, long moningtaim sip i laik i go long Sasebo, Japan, na sip bai draidok inap tupela wik.
Long hia mipela baim ol boskru na Albert i lusim sip. Tasol wanpela wik bihain mi kirap nogut long kisim wanpela telegram long Albert. Telegram i tok, ol Witnes Bilong Jehova bai wokim wanpela kibung long Sasebo long Sarere Sande. Mi pasim tok long bel long go long kibung na kisim save long en.
Em Ogas 8, 1970—mi no inap lusim tingting long dispela de. Mi kisim teksi bilong kamap long ples kibung na taim mi lusim, mi sanap namel long planti handet handet Japan, em ol i bilas gut. Klostu olgeta i no inap tok Inglis, tasol i olsem olgeta i laik sekanim mi. Mi no bin lukim dispela kain pasin bipo, na maski mi no save long wanpela tok Japan, mi ting mi mas go long kibung long de bihain—mi laik save, wankain samting bai painim mi gen o nogat—tru tumas, wankain samting i bin painim mi gen!
Mipela kisim nupela boskru na wanpela wik bihain sip i lusim Japan na go long Singapo. Namba wan samting mi mekim taim mi kamap long Singapo, mi kisim teksi na go long dispela atres i stap long nius Wastaua. Wanpela meri i gat gutpela pasin pren i kam long dua bilong haus na askim mi, em inap mekim wanpela samting bilong helpim mi o nogat. Mi soim nius Wastaua i gat dispela atres i stap long en na wantu em i askim mi long kam insait long haus. Nau mi bungim man bilong em na mi kisim save olsem tupela i misineri bilong Ostrelia—em Norman na Gladys Bellotti. Mi stori long tupela olsem wanem mi kisim atres bilong tupela. Tupela i mekim gut tru long mi na ol i bekim planti askim bilong mi. Taim mi lusim tupela, mi holim wanpela paus ol buk na nius bilong Baibel i pulap long en. Insait long sampela mun taim sip i ran i go i kam long nambis bilong Vietnam, mi kaunim planti bilong ol dispela buk, na buk Tok i Tru i Bringim Man Long Laip Oltaim, em wanpela bilong ol.
Nau em namba wan taim mi pilim olsem i stap bilong mi i gat as bilong en. Taim mipela go bek long Singapo mi lusim sip.
Amamas i No Painim Mi Long Ples
Na em namba wan taim mi gat bikpela laik long go bek long papamama. Olsem na sampela wik bihain mi kamap long haus bilong ol na mi amamas tru—mi gat bikpela laik long tokim ol long ol Witnes Bilong Jehova. Papamama i no amamas, na dispela i gat as—pasin bilong mi i no gutpela. Mi bin stap long ples inap sampela wik tasol na wanpela taim mi belhat na bagarapim wanpela ples disko. Taim mi kisim bek tingting, mi slip pinis long rum gat.
Nau mi bilip olsem i no gat rot na mi inap senisim pasin bilong mi na bosim gut belhat bilong mi. Mi ting bai mi stap olsem wanpela bikhetman em i no inap mekim gut wanpela samting. Mi pilim olsem mi no inap i stap wantaim papamama—mi mas lusim ol. Olsem na sampela de bihain mi baim tiket bilong kalap long wanpela sip bilong Nowe em bai karim kago i go long Inglan.
Inglan na Skul Bilong Pilai
Mi amamas long stap long Inglan, tasol mi hatwok long painim wok. Olsem na mi ting long traim long insait long wanpela kain skul i save lainim ol man long mekim pilai. Mi kirap nogut taim wanpela skul (The London School of Dramatic Art) i orait long kisim mi. Taim mi stap tupela yia long Landon, mi bin dring planti, go long ol pati, na kisim kain kain drak.
Wantu mi laik go lukim gen papamama long Amerika. Tasol ol i kirap nogut tru taim mi kamap. Mi pasim wanpela longpela blakpela laplap olsem kolsiot, na long arere arere klostu long nek i gat het bilong laion ol i bin wokim long gol, na wanpela sen gol i hangamap long het bilong tupela laion. Na mi pasim retpela saket na blakpela trausis i gat bilas ol i bin wokim long skin bilong bulmakau. Su bilong mi i kam antap long skru bilong lek na lek bilong trausis i stap insait long su. Papamama i lukim bilas bilong mi na ol i no amamas, na mi pilim olsem klos bilong mi i no stail bilong ol man bilong dispela hap papamama i sindaun long en! Olsem na mi go bek long Inglan, na long 1972 mi winim skul bilong pilai na kisim setifiket. Em narapela mak mi winim pinis. Tasol askim i stap yet: Bai mi mekim wanem nau? Mi pilim olsem i stap bilong mi i mas i gat as bilong en.
Pasin Bilong Trip Nabaut i Wok Long Pinis
Liklik taim bihain long mi bin go bek long Inglan mi pilim olsem mi no moa trip nabaut, long wanem, mi prenim wanpela meri Ostrelia i sindaun klostu long mi, nem bilong em Caroline. Em i wanpela tisa na pasin bilong em i narapela kain tru long pasin bilong mi. Em i save bihainim gut lo na sindaun gut. Inap tupela yia mitupela i pren, tasol mitupela i no gat tingting long marit. Caroline i lusim Inglan na em i go long Amerika inap 3-pela mun. Mitupela i pren gut, olsem na mi stretim rot bilong em i ken stap sampela wik wantaim papamama bilong mi. Ating taim papamama i lukim Caroline, ol i bin ting, olsem wanem wanpela gutpela meri olsem i ken kamap pren bilong mi.
Liklik taim bihain long Caroline i go long Amerika mi tokim ol pren bilong mi bai mi go bek long ples. Ol i wokim bikpela pati bilong tok gutbai long mi. Tasol mi no go bek long Amerika, mi go long Saut Kensington, Landon, na rentim wanpela haus, na mi telefon long brens-ofis bilong ol Witnes Bilong Jehova long Landon. Nau mi save mi mas mekim wanem long i stap bilong mi. Insait long dispela wik mi bin telefon, tupela marit i gat gutpela pasin i kam lukim mi na wantu ol i stretim tok bilong stadi Baibel wantaim mi. Bipo mi bin kaunim sampela buk bilong ol Witnes, olsem na mi gat bikpela laik long kisim save. Mi laik stadi tupela taim long olgeta wik. Bob i save mi amamas tru long stadi, olsem na em i singautim mi i go long Haus Kingdom, na i no longtaim tumas na mi go long olgeta miting.
Taim mi kisim save olsem ol Witnes Bilong Jehova i no smok, wantu mi lusim smok. Tasol olsem wanem long klos bilong mi? Mi no laik stap narapela kain moa, olsem na mi baim wanpela siot, nektai, saket, na trausis. I no longtaim na mi winim mak na mi inap autim tok long ol haus. Maski mi pret pastaim, bihain mi amamas long mekim dispela wok.
Mi ting, taim Caroline i kam bek, em bai kirap nogut. Tru tumas, taim em i lukim mi, em i kirap nogut tru! Em i hatwok long save olsem wanem mi inap senisim pasin na bilas na planti samting moa bilong mi insait long liklik hap taim tasol. Mi stori long em olsem wanem ol Baibel-stadi bilong mi i bin helpim mi, na mi askim em long stadi long Baibel. Pastaim em i tingting planti; bihain em i orait long stadi, tasol em i laik mi stadi wantaim em. Mi amamas em i givim bel long stadi, na i no longtaim na em i amamas long tok i tru bilong Baibel.
Sampela mun bihain, Caroline i laik go bek long Ostrelia, na long Sidni em i kirap gen na stadi long Baibel. Mi bin stap long Landon inap long taim mi kisim baptais—mi baptais 7-pela mun bihain. Nau mi laik go bek gen long Amerika na lukim papamama. Tasol dispela taim mi laik mekim stret olgeta samting!
Mi Go Bek Gen Long Ples
Tingting bilong papamama i paul olgeta, ol i laik save mi mekim wanem nau—nau mi bilas gut! Tasol mi amamas long pilim olsem nau mi no narapela kain long ol. Papamama i tingting planti na tingting bilong ol i gat as, long wanem, mi senis olgeta. Ol i no mekim wanpela tok bilong skrapim bel bilong mi, ol i isi long mi na mekim gut long mi—em pasin tru bilong tupela. Long ol mun bihain, mi amamas long stadi Baibel wantaim ol. Na mi kirapim Baibel-stadi wantaim tupela susa bilong mi. Wokabaut bilong mi i senis olgeta na ating dispela i kirapim ol long stadi. Man! Dispela taim mi kam bek long ples, ol gutpela samting i painim mi!
Long Ogas 1973, mi go long Ostrelia bilong painim Caroline, na mi amamas long lukim em i baptais wantaim 1,200 manmeri long wanpela kibung intenesenel bilong ol Witnes Bilong Jehova long 1973. Wanpela wik bihain long kibung, mitupela i marit long Kanbera, em nambawan biktaun bilong Ostrelia. Long dispela biktaun mi bin mekim wok autim tok long olgeta de inap 20 yia nau, na inap 14 yia mi bin mekim wok elda insait long kongrigesen.
Mi amamas meri bilong mi i bin wok gut wantaim mi na mipela i mekim bikpela long 3-pela pikinini—em Toby, Amber, na Jonathan. Sampela taim hevi i kamap insait long famili olsem i save painim planti famili, tasol mi inap mekim yet wok autim tok long olgeta de olsem wanpela painia, na lukautim famili bilong mipela long ol samting bilong skin.
Papamama bilong mi long Amerika, ol i wokboi bilong Jehova i dediket long em, na maski tupela i winim pinis 80 krismas, ol i wok yet long autim tok bilong Kingdom. Papa em i wanpela wokman bilong kongrigesen. Tupela susa bilong mi, ol tu i givim bel long wok bilong Jehova.
Mi save tenkyu tru long God Jehova, long wanem, planti yia mi bin stap olsem tripman na i stap bilong mi i no gat as bilong en, tasol nau nogat! Jehova i bin helpim mi long save long gutpela rot bilong mekim wok long i stap bilong mi, na em i mekim gut long mi na mi kisim wanpela gutpela famili i stap wanbel.—Em stori bilong David Zug Partrick.
[Piksa long pes 21]
David wantaim meri bilong em, Caroline