Mi Amamas Long Mekim Wok Bilong God
EM STORI BILONG JOSHUA THONGOANA
Long 1942 mi bin kaunim nius bilong ol Sevende na ol Witnes tu, na ol i gat narapela narapela tok, na mi stap namel long tupela tingting olsem ol Israel i bin mekim.—1 King 18:21.
OL SEVENDE i bin salim nius bilong ol i kam long mi, na mi amamas long bekim ol askim bilong ol, na ol i tok ol bai givim gutpela pepa olsem setifiket long mi sapos mi bekim stret ol askim. Ol i postim nius (Voice of Prophecy) bilong ol long Keiptaun long Saut Afrika na i kam long mi, na ol Witnes i mekim olsem long nius bilong ol, na mi laik save, narapela i orait long tok bilong narapela o nogat, na sapos nogat, husat i tok tru?
Olsem na mi salim pas i go long tupela. Mi askim ol Witnes: “Yupela ting olsem wanem long bilip bilong dispela lain ol i gat dispela nius (Voice of Prophecy)?” Tupela i bekim pas long mi, na ol Witnes i tok, dispela nius (Voice of Prophecy) i save stori long God Triwan na long Krais bai kam bek long graun, tasol dispela tok i no stret wantaim tok bilong Baibel, na ol i kolim sampela tok bilong Baibel bilong kamapim long ples klia olsem ol dispela bilip i no stret wantaim tok bilong Baibel.—Jon 14:19, 28.
Tasol lain bilong dispela nius (Voice of Prophecy) i tok, ol i no bilip long tok bilong ol Witnes, na em tasol. Ol i no mekim narapela tok. Ol i no tok, bilong wanem ol i no bilip long ol dispela tok. Olsem na nau mi ting tok bilong ol Witnes i tru, na mi bilip long tok bilong ol tasol, na inap 50 yia pinis mi bung wantaim ol Witnes. Mi amamas tru long mi bin tingting long harim tok bilong ol long dispela taim bipo!
Lotu Bilong Mi Bipo
Mama i bin karim mi long Makanye long taun Pitasbek long Saut Afrika long yia 1912 na Misin Angliken i bosim lotu bilong ol man long dispela hap, olsem na mi kamap Angliken. Taim mi gat 10-pela krismas mipela famili i go sindaun long hap em Misin Luteran i bosim, olsem na papamama i bihainim dispela lotu. Bihain mi winim mak bilong mekim Komyunio, na ol i givim liklik bret na wain long mi na mi kaikai na dring. Tasol mi pilim olsem mi sot long ol gutpela save bilong ol samting bilong spirit na bilong God.
Mi skul inap 8-pela yia, na nau papa i salim mi long bikpela skul long Kilneton, na long 1935 mi winim pepa setifiket bilong kamap tisa. Mi maritim wanpela tisa meri, nem bilong em Karolin, na bihain em i karim pikinini meri, na mipela givim nem Damaris long em. Bihain mi kamap nambawan tisa long Skul Sehlale long ples Mamatsa. Misin bilong Lotu Dats Rifom i bosim dispela skul, olsem na mipela i bihainim dispela lotu, long wanem, ol narapela i bihainim, tasol mi pilim olsem mi sot yet long ol samting bilong spirit dispela lotu i no inapim dispela laik long bel bilong mi.
Senis i Kamap
Long wanpela Sande long 1942 mipela lain long ol singsing bilong lotu, na wanpela yangpela man waitskin i kam sanap long dua, na em i gat 3-pela buk (Creation na Vindication na Preparation) bilong Sosaiti Was Taua. Mi baim ol dispela buk long 3 siling, na mi ting ol i ken bilasim laibreri bilong mi. Man hia em wanpela Witnes Bilong Jehova, na nem bilong em Tene Bisdenhot. Bihain Tene i kam bek gen na em i gat pikap na em i pilaim sampela tok bilong Jas Ratefot, na wanpela (Snare and Racket) mi laikim tru, tasol Karolin nogat, na susa bilong mi Prisila, em tu nogat. Tene i kam bek namba 3 taim, na em i givim pikap long mi na bai mi ken pilaim ol dispela tok na ol pren bilong mi i ken harim.
Wanpela taim mi kaunim wanpela buk (Creation) mi bin kisim long Tene, na mi kaunim wanpela sapta em het-tok bilong en, “Ol Daiman i Stap We?” Mi laik save long ol amamas ol i kisim long heven. Tasol buk i tok, ol i no stap amamas long heven, nogat; ol i dai pinis na ol man i planim ol long matmat na ol i no gat tingting o save moa long wanpela samting, na buk i kolim ol tok bilong Baibel, olsem Saveman 9:5, 10 bilong strongim dispela tok. Na narapela sapta bilong buk i stori long “Ol Man i Dai Pinis Bai Kirap Bek,” na ol i kamapim tok bilong Jon 5:28, 29 i makim olsem ol i slip na wetim dispela taim i kamap na bai ol i kirap bek. Mi pilim dispela tok i stret na mi amamas long en.
Olsem na long 1942 mi lusim nius (Voice of Prophecy) bilong narapela lain na mi kirap autim tok mi kisim long ol buk bilong Sosaiti Was Taua. Pren bilong mi, em Juda Letswalo, em i laikim dispela tok bilong Baibel mi autim long em. Juda i bin stap wanskul bilong mi long Kilneton.
Mitupela Juda i kikim wilwil inap 51 kilomita bilong i go long wanpela kibung bilong ol Witnes long Pitasbek. Bihain ol pren bilong Pitasbek i kam long Mamatsa bilong helpim mi long autim tok bilong Kingdom long ol man. Narapela kibung i kamap long Pitasbek long Disemba 1944 na mi kisim baptais bilong makim olsem mi dediket pinis long Jehova.
Famili na Ol Narapela i Harim
Karolin na Prisila na Damaris i stap insait yet long Misin Dats Rifom. Karolin i karim namba 2 pikinini, em man, na mipela ting pikinini i gutpela, no gat sik samting, na mipela givim nem Samuel long em. Tasol wantu hevi i kamap. Sik i painim em na em i dai. Ol pren bilong Karolin long lotu i tokim Karolin, God i laik bai Samuel i mas i stap long heven, olsem na God i kisim em i go. Karolin i bel hevi tru long dispela samting na em i tok: “Bilong wanem God i kisim pikinini bilong yumi?”
Ol Witnes long Pitasbek i harim dispela hevi i painim mipela, na ol i kam bilong helpim mitupela Karolin long sampela tok bilong Baibel. Bihain Karolin i tok: “Ol tok bilong Baibel long as bilong dai na long ol i stap olsem wanem, na long ol bai kirap bek, ol dispela tok i klia long mi na i mekim gut bel bilong mi. Mi laik i stap long nupela taim na kisim bek pikinini bilong mi taim em i kirap bek.”
Karolin i lusim dispela lotu em i bin stap insait long en, na long 1946 em wantaim Prisila na Juda ol i kisim baptais. Juda i go long Mamalola bilong autim tok na mekim wok painia, na em i mekim yet wok painia inap long nau.
Mi wanpela i stap bilong lukautim kongrigesen Boini. Bihain wanpela Witnes, nem bilong em Gresli Matlatsi, i kam i stap. Bihain em i maritim Prisila. Long olgeta wik mi o Gresli i mekim pablik-tok long tok ples Sepedi, em tok ples bilong ol Afrika long dispela hap. Sosaiti i askim mi long tanim ol tok bilong sampela buk samting i go long tok Sepedi na bai Sosaiti i ken wokim ol buk samting long dispela tok ples. Mi amamas long mekim olsem, long wanem, mi laik bai ol dispela buk i ken helpim ol dispela man.
Mipela baim wanpela bikpela pikap i gat spika, em bilong pilaim pablik-tok long en na bai planti man i ken harim ol tok bilong Baibel. Mipela karim raun long wilka, na donki bilong wanpela man i pulim, olsem na ol man i kolim mipela olsem “Lain Bilong Lotu Donki.”
Liklik kongrigesen bilong mipela i wok long i go bikpela. Tupela bikpela susa bilong mi wantaim tupela man bilong ol, ol i kamap Witnes, na ol i stap strong i go inap long taim ol i dai. Planti brata sista bilong kongrigesen Boini i kamap painia, na sampela i stap yet olsem. Ol i senisim nem bilong kongrigesen na ol i kolim Mpokodiba. Narapela kongrigesen i kamap, na nau i gat tupela i stap long dispela hap, na ol pablisa i winim 70. Ol i autim tok long ol ples i stap long dispela bikpela hap.
Nupela Wok
Long 1949 mi lusim wok tisa na mi kamap painia. Mi autim tok long ol blakskin i wok long ol fam bilong ol waitskin long Velwete long hap bilong Transval. Ol waitskin i strong long tupela kain skin i mas i stap narapela narapela, na long ol blakskin i mas daun long ol waitskin na ol i mas save ol i no gutpela olsem ol waitskin, na ol waitskin i olsem bikpela man bilong ol. Olsem na taim mi raun autim tok bilong Baibel long ol blakskin, ol waitskin i ting mi kirapim ol blakskin long kamap bikhet long ol. Na sampela waitskin i tok, mi wanpela komyunis na ol i laik kilim mi i dai.
Mi toksave long brens-ofis bilong Sosaiti, na ol i salim mi i go long Dawelskluf. Meri bilong mi i lusim wok tisa na em i kirap wok painia wantaim mi. Wanpela taim long apinun long 1950 mipela i kam bek long haus bilong mipela, na wanpela pas i stap, em Sosaiti i salim i kam. Pas i tok mi ken lain long mekim wok olsem wasman bilong raun. Mi lain pinis olsem, na inap 3-pela yia mitupela meri i raun lukim ol kongrigesen long Saut Afrika. Long 1953 Sosaiti i salim mi i go long Lesoto, em i stap insait tru long Saut Afrika.
Autim Tok Long Lesoto na Botswana
Sampela man long Lesoto i tok, ol man bilong dispela hap ol i save mekim sampela pasin bilong ples long man bilong narapela hap na ol i kilim em i dai. Mitupela meri i tingting planti long dispela samting, tasol ol brata i mekim pasin sori long mipela na helpim gut mipela, olsem na mipela i no pret moa.
Mi helpim ol kongrigesen long hap bilong ol maunten Malute, na mi larim meri i stap long ples daun na em i stap mekim wok painia, na mi kisim balus na go long ol dispela kongrigesen. Ol pren i save wokabaut wantaim mi na bringim mi i go long ol narapela narapela kongrigesen na bai mi no lus insait long ol dispela maunten.
Wanpela taim mi laik go long wanpela kongrigesen, na hos i mas bringim mi, na mi mas brukim Wara Orans. Mi no save gut long raun long hos o long subim wara, tasol ol i tok, hos i save stap isi, tasol sampela taim wara i tait na hos i save tromoi man i go long wara. Orait, mi wantaim hos i go insait long wara, na wara i daun moa na i kam antap inap long baksait bilong hos, na mi pret na mi lusim rop bilong stiaim hos na mi holimpas gras bilong hos. Mi wantaim hos i kam kamap long narapela hapsait bilong wara, na nau mi amamas na bel bilong mi i stap isi gen!
Tasol long nait mi no slip gut, long wanem, skin bilong mi i pen. Mi bin sindaun longpela taim long hos, na dispela samting i bin mekim na nau skin bilong mi i pen. Tasol ol pren i amamas long mi kam helpim ol, olsem na mi no tingim tumas pen bilong skin. Taim mi kirap mekim wok sekit long Lesoto i gat 113 pablisa i stap, tasol long nau i gat 1,649.
Long 1956 ol i salim mitupela i go long Botswana. Em i bikpela kantri, na ol kongrigesen i stap longwe longwe, na mipela mas i go longwe long lukim ol brata. Mipela i save raun long tren o long trak i no gat sia, na mipela mas sindaun daunbilo wantaim ol kago bilong mipela. Taim mipela kamap pinis long ol brata, planti taim das i karamapim mipela na skin i les. Tasol ol brata i mekim gut long mipela, olsem na mipela i save amamas.
Long dispela taim gavman i tambuim ol buk bilong Sosaiti long Botswana, olsem na taim mipela i raun long ol haus na autim tok, mipela no ken kamapim long ples klia ol buk. Wanpela taim mipela i autim tok long ples Mapasalala na ol polis i holim mipela. Mipela i kaunim Baibel long ol long Matyu 28:19, 20 na mipela i tok, dispela i makim wok bilong mipela. Sampela i harim, tasol bikman i tok, ol i mas paitim ol Witnes. Wanpela pasto i tok, mas sori long mipela, olsem na bikman i lusim mipela i go.
Ol man i bin mekim nogut long mipela, na gavman i putim tambu long ol buk na nius samting bilong mipela, tasol wok bilong Kingdom i go bikpela. Taim mi bin go long Botswana pastaim, i gat 154 pablisa tasol i stap. Tripela yia bihain gavman i tekewe tambu long ol Witnes, na i gat 192 pablisa i stap. Tasol long nau i gat 777 Witnes Bilong Jehova i stap, na ol i save autim tok bilong Kingdom long dispela hap.
Skul na Tanim Tok
Ol i makim mi bilong skulim ol elda Kristen long Skul Bilong Wok Kingdom, na bihain moa mi mekim wok tisa long Skul Bilong Wok Painia. Na sampela taim mitupela meri i bin wok tu long brens-ofis bilong Saut Afrika. Mi bin tanim tok, na Karolin i wok long haus kuk.
Long 1969 wasman bilong brens, em Frans Muler, i tok: “Brata Tongoana, mi laik toktok wantaim yutupela long ofis bilong mi.” Em i tok, ol i bin makim mitupela long i go wantaim sampela moa long kibung “Gutaim Long Graun” em bai kamap long Landon. Mipela i amamas long gutpela pasin sori ol brata i mekim long mipela long Inglan na Skotlan, na mipela i pilim tru olsem mipela i insait long wanpela bikpela lain brata i stap long olgeta hap.
Inap 40 yia pinis Karolin i bin i stap gutpela poroman bilong mi long wok bilong autim tok bilong Kingdom. Planti amamas na sampela hevi tu i bin painim mipela. Tupela pikinini i bin dai, tasol Damaris i stap gutpela Witnes, na em i bin tanim tok long brens-ofis long Saut Afrika.
Mipela i no strong moa inap long mekim wok bilong raun, na inap sampela yia mipela i mekim wok painia salim long taun Seseko klostu long Pitasbek, na mi stap wasman siaman insait long kongrigesen. Mi pilim tru tok bilong Baibel i tok: “Yu [Jehova] stap klostu long mi na mi save amamas moa yet.” Tru tumas, mi bin kisim bikpela amamas long mekim wok bilong Jehova long Saut Afrika.—Song 16:11.
[Piksa long pes 26]
Autim tok long Sesego long Saut Afrika