Ripot Long Wok Bilong Kingdom
“Yu Ring Long Rong Namba”
LONG Johannesburg, Saut Afrika, Leslie na Caroline i senis senis long autim tok long rot bilong telefon long ol man i save sindaun long wanpela ples bilong ol man i bin pinis long wok. Dispela ples i gat ol sekiuriti. Ol i painim wan wan man tasol long haus na i no planti i laik harim ol tok Kristen ol i autim, olsem na taim wanpela meri i bekim tok long telefon, dispela i strongim bel bilong Caroline.
Caroline i askim em: “Yu Misis B—?”
Long gutpela pasin pren, dispela nek i tok: “Nogat, mi Misis G—. Yu ring long rong namba.”
Caroline i harim nek bilong em i olsem em i gat gutpela pasin, olsem na Caroline i tok: “Mi laik toksave long as na mi laik toktok long Misis B—.” Nau em i kirap toktok long ol gutpela samting bilong Kingdom bilong God bai kamap bihain. Ol i stretim tok pinis long Caroline bai kisim wanpela buklet God i Laik Yumi Mas Mekim Wanem? i go long em, na bihain Misis G—i askim: “Wanem lotu bilong yu?”
Caroline i tok: “Mipela ol Witnes Bilong Jehova.”
“Maski! Mi no laikim dispela lotu! Mi no ting mi laik lukim yu.”
Caroline i tok “Tasol Misis G—, inap 20 minit i go pinis, mi bin toktok wantaim yu long ol gutpela samting yumi ken wetim i kamap, na mi kamapim ol tok bilong Baibel long ol samting Kingdom bilong God bai mekim long ol man liklik taim bihain. Yu bin amamas long harim dispela tok—na tu, yu laikim tru—na yu laik kisim sampela save moa. Olsem wanem? Yu save gut tru long ol Witnes Bilong Jehova? Sapos yu gat sik, yu ting bai yu go lukim wanpela mekenik? Plis, larim mi yet i tokim yu long ol bilip bilong ol Witnes Bilong Jehova.”
Pastaim meri i no mekim wanpela tok, na bihain em i tok: “Ating yu tok stret. Yu ken kam. Tasol yu mas save bai yu no inap tru senisim tingting bilong mi!”
Caroline i bekim tok olsem: “Misis. G—, mi no inap senisim lotu bilong yu maski yu laik senis. Jehova tasol inap mekim dispela samting.”
Em i go bringim buklet na ol samting i wok gut, na Misis G—(Betty) i orait long Caroline i ken go bek narapela taim. Taim Caroline i go bek, Betty i tok, em i bin toktok wantaim ol meri i sindaun na kaikai wantaim em olsem em i bin stori wantaim ol Witnes Bilong Jehova. Ol no wanbel na ol i tromoi han nabaut na askim em: “Bilong wanem yu mekim olsem? Ol dispela man i no bilip long Jisas!”
Wantu Caroline i kirapim Betty long tingim gen ol bikpela tok bilong Kingdom bilong God ol i bin stori long en long pastaim.
Caroline i askim: “Husat bai stap King?”
Betty i bekim olsem: “Em Jisas tasol.”
Caroline i tok, “Em i stret.” Nau em i kirap stori olsem ol Witnes Bilong Jehova i bilip long Jisas em i Pikinini bilong God, tasol em i no wankain long God olsem hap bilong God Triwan.—Mak 13:32; Luk 22:42; Jon 14:28.
Caroline i go bek lukim em gen na bihain em i kisim save olsem, maski Betty i bilip strong long ol gutpela samting bai kamap na em i amamas, em i gat hevi long sik. Em i gat sik kensa na em i pret long dai. Em i tok: “Em bai gutpela tru sapos mi bin save long ol dispela samting long ol yia i go pinis na mi gat strongpela bilip long God olsem yupela.” Caroline i mekim gut bel bilong em na soim em ol skripsa i toktok long dai i kain olsem man i slip i dai tru na em bai kirap long taim bilong kirap bek long matmat. (Jon 11:11, 25) Dispela i bikpela samting tru long Betty, na nau em amamas long stadi long Baibel long olgeta wik. Bodi bilong em i wok long bagarap isi isi, dispela tasol i pasim em long go long ol miting long Haus Kingdom.
Caroline i tok: “Ol samting i kamapim klia olsem ol ensel i stiaim dispela wok. Dispela telefon namba bilong Betty em i ‘rong namba,’ na tu, yumi ken tingim olsem em i gat 89 krismas!”—KTH 14:6.