Ol Yangpela i Laik Save . . .

Mi Mas Mekim Wanem Sapos Pren i Mekim Rong?

Sherrie i gat 14 krismas em i tok: “Gutpela pren bilong mi em i lusim bilip Kristen. Mi bel hevi long dispela samting. Mi bin wok strong long helpim em!”a

OLSEM wanem? Wanpela pren bilong yu i bin mekim rong o em i kirap bihainim wanpela pasin i no stret? Johnny i tok: “Mi laikim tru Chris. Em i gutpela pren bilong mi. Wanpela taim em i ranawe. Mi kirap nogut long dispela na mi pilim olsem mi mas painim em. Mi draivim ka na raun long nait olgeta bilong painim em.”

Baibel i tokaut olsem long taim bilong las de, ol bikpela hevi bai painim ol man​—⁠ol yangpela na ol lapun. (2 Timoti 3:​1-5) Olsem na yumi no ken kirap nogut sapos sampela yangpela Kristen i pundaun. Tasol taim hevi i painim wanpela gutpela pren bilong yu, ating yu bel hevi, o bel sori, o kros samting, a? Yu laik helpim pren bilong yu. Tasol olsem wanem yu ken helpim em?

‘Mi Inap Helpim Em’

Baibel i tok: “Brata i go long man bilong mekim sin na i helpim em long lusim rot nogut na i kam bek long God, orait dispela brata bai i kisim bek spirit bilong man bilong mekim sin, na bai em i no i dai. Long dispela pasin God bai i lusim planti sin tru.” (Jems 5:20) Tasol olsem wanem? Yu ting em wok bilong yu? Ating nogat. Papamama bilong pren bilong yu i mas helpim em​—⁠em wok bilong ol. (Efesus 6:⁠4) Na long Galesia 6:1 Baibel i tok: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit, yupela i mas mekim pasin isi long dispela man na helpim em long stretim pasin bilong em.” Ol elda Kristen i save gut long dispela wok. Olsem na ol inap helpim gut wanpela man i mekim sin, winim ol samting yu inap mekim.

Yu mas save, yu yangpela na yu sot yet long sampela save. (Skelim wantaim Hibru 5:14.) Bihainim pasin daun na tingim​—⁠i no gutpela sapos yu traim long mekim wanpela samting yu no inap mekim. (Sindaun 11:⁠2) Tingim yangpela Rebekah. Em i laik helpim wanpela yangpela man em wanblut bilong em, na em i save kisim ol drak. Rebekah i tok: ‘Wanpela samting i bin putim hevi long mi em olsem: Wanblut i tokim mi long hevi bilong em, long papamama bilong em, nogat. Mi traim long helpim em, tasol mi no inap, olsem na mi bel hevi. Taim mi save mi no inap mekim wanpela samting, dispela i bin helpim mi. Mi save mi no inap stap olsem man bilong kisim em bek.’ Rebekah i bin strongim wanblut long kisim helpim long sampela man ol inap long helpim em.

Wankain samting i bin kamap long yangpela Matthew, tasol taim pren i kamapim hevi long em, Matthew i save, em i no inap mekim wanpela samting. Em i stori long wanpela pren i gat hevi olsem: “Taim em i gat hevi, em i save kam long mi, tasol mi save tokim em long go long papamama bilong em. Mi save i no wok bilong mi long karim hevi bilong em.”

Samting Yu Inap Mekim

I no olsem yu no inap mekim wanpela samting bilong helpim pren bilong yu. Tasol yu mas tingim sampela samting olsem: Ating pren i laik kamapim bel bilong em long yu. Na tru, yu laik sambai long pren na putim yau long hevi bilong em. (Sindaun 18:24; 21:13) O ating pren i kirap bihainim wanpela pasin i no stret. Yu mas kamapim tingting bilong yu long em na tokim em, maski yu laikim em, yu no inap laikim pasin em i mekim.

O ating wanpela pren i tokim yu em i bin mekim wanpela bikpela rong. Ating em i askim yu long tok promis olsem yu no ken tokim narapela long dispela rong. Tasol Baibel i tok: “Nogut sin bilong sampela man i pas long yu. Yu mas lukaut long yu yet bai yu stap klin tru long ai bilong God.” (1 Timoti 5:22) Sapos pren bilong yu i gat bikpela sik na em i mas kisim marasin samting, bai yu strong long kisim em i go long dokta, a? I wankain sapos em i bin mekim bikpela rong, em i mas kisim sampela tok bilong spirit bilong helpim em. Sapos yu haitim rong bilong em, dispela inap bagarapim em long spirit na bagarapim kongrigesen tu. Olsem na em wok bilong yu long mekim wanpela samting bambai ol elda i ken save long dispela hevi.​—⁠Skelim wantaim Wok Pris 5:⁠1.

Yangpela Caroline i no pret long tokaut long wanpela pren i save tok giaman long papamama bilong em. Caroline i tok: “Mi givim tupela wik long em bilong i go lukim ol elda. Mi tokim em, sapos em i no mekim olsem, bai mi go lukim ol. I no isi long mi mekim olsem.” Johnny, em bipo yumi stori long em, em tu i no man bilong pret. Em i stori long pren bilong em olsem: “Mi kirap nogut long lukim pren bilong mi i sindaun nating wantaim wanpela yangpela meri. Na ol narapela yangpela tu i stap wantaim em na ol i dring na smok.” Johnny i askim pren bilong em long kam ausait long haus. Taim em i mekim olsem Johnny i strong long tokim em long go lukim ol elda na askim ol long helpim em.

Ating pren bilong yu i amamas o em i no amamas long ol samting yu laik mekim bilong helpim em. Baibel i tok, taim ol brata bilong yangpela Josep i mekim rong, Josep “i save tokim papa long ol pasin nogut ol brata i save mekim.” Dispela samting em i mekim i no helpim em na ol brata bilong em i laikim em moa, nogat. Ol i “bel nogut tru long Josep.”​—⁠Stat 37:​2-4.

Mekim Olsem i No Gat Hevi

Sapos yu mekim long pren bilong yu olsem em i no bin mekim wanpela rong, dispela i no inap helpim em; wok bilong yu i lus nating. Long 1 Korin 15:​33, aposel Pol i tokim ol Kristen olsem ol i no ken poromanim ol man nogut. Sapos yu poromanim kain man olsem, em inap pulim yu long bihainim pasin bilong em!

Wanpela pren bilong yangpela Mollie, em Sally, em i hait na raun wantaim ol yangpela man. Sori tru, hevi i mas painim Mollie pastaim na em i kisim gutpela tingting olsem pasin bilong Sally i no stret. Sally em i yangpela tumas long marit, na em i save raun wantaim ol boipren i no Kristen. Tasol Mollie i no tingim dispela samting Sally i save mekim na em i prenim yet Sally. Wanem samting i kamap? Mollie i tok: “Bihain, Sally em i pasim tok wantaim wanpela yangpela man i no Kristen na mi go raun wantaim em.” Tasol gutpela tru Mollie i kisim helpim long ol elda paslain long hevi i go bikpela moa.

Lynn i save prenim yangpela meri Beth na bilong tupela i ken pren yet, Lynn i bin mekim sampela samting i no stret. Lynn i tok: “Mi ting mi inap helpim em, tasol nogat. Mi bin go wantaim em long ol disko. Mi save dispela samting mi mekim i no stret, tasol mi no laik em i bel hevi sapos mi no go. Bihain ol hevi bilong Beth i wok long bagarapim mi. Mi no kamapim dispela hevi long wanpela, mi ting hevi bai pinis, tasol nogat; hevi i go bikpela moa.” Sori tumas, bikpela hevi i mas kamap pastaim na Lynn i kisim save. Yangpela man i save raun wantaim Beth, em i kilim i dai Beth.

Ating yu pilim olsem pasin bilong sambai long pren i gutpela pasin. Tasol olsem wanem sapos pren bilong yu i pundaun insait long liklik raunwara i tantanim nabaut na klostu em i dring wara? Bai yu kalap insait long wara tu? Dispela i no ken helpim em, yutupela wantaim bai dai. Gutpela sapos yu tromoi wanpela samting em i ken holim. I wankain long pasin bilong helpim pren, yu ken helpim em, tasol yu no ken insait tumas long hevi bilong em.​—⁠Jut 22, 23.

Sapos pren bilong yu i raus long kongrigesen, yu no ken prenim em moa​—⁠em bikpela samting. Baibel i tok: “[Yu] no ken i stap wantaim em.” (1 Korin 5:11) Tru, yu laikim em yet, tasol yu no inap helpim em sapos yu bihainim em na mekim pasin nogut. Yu mas stap gut long Jehova, em rot bilong helpim em. (Song 18:25) Sapos yu bihainim tok na yu no brukim wanpela lo bilong Jehova, ating dispela inap helpim pren bilong yu long tingim rong bilong em na tanim bel. Na bikpela samting em olsem: Jehova i amamas sapos yumi stap gut long em.​—⁠Sindaun 27:11.

Bikpela Wok Tumas

Tasol maski yu wok strong long helpim pren bilong yu, planti taim yu no inap. Rebekah i stori long pren bilong em olsem: “Mi bin traim traim long helpim em, tasol em i no larim mi i mekim olsem. Mi bin raitim pas long em tu, tasol em i no bekim.” Inap sampela mun Caroline i bin wok long helpim wanpela pren i save mekim sampela samting i no stret, tasol dispela i bin “putim hevi” long Caroline.

Yumi mas save, “yumi olgeta wan wan bai yumi mas tokim God long as bilong olgeta pasin yumi bin mekim.” (Rom 14:12) I stret yumi mekim sampela samting bilong helpim wanpela i gat hevi samting, tasol yumi no ken karim olgeta hevi bilong em​—⁠em wok bilong em yet long ai bilong God. “Olgeta man wan wan bai i karim hevi bilong pasin ol yet i mekim.” (Galesia 6:⁠5) Wanem wanem rot pren bilong yu i laik bihainim, em samting bilong em​—⁠em i no wok bilong yu.

Tasol i hatwok long lukim wanpela pren i bagarapim i stap bilong em, a? Yangpela Mike i lusim wanpela pren bilong em, em i tok: “Mi bel hevi stret. Mi bin pas gut wantaim Mark na papamama bilong em. Inap sotpela taim bel bilong mi i no stap isi.”

Taim pasin pren bilong yu wantaim narapela i pinis, bel bilong yu bai bagarap. Tasol i gutpela yu kamapim bel bilong yu long wanpela man yu ting em inap helpim yu. (Sindaun 12:25) Rebekah i tok: “Papamama i helpim mi long daunim bel hevi bilong mi.” Na long rot bilong beten yu ken kamapim bel bilong yu long God Jehova. (Song 62:⁠8) Caroline i stori olsem: “Mi bin beten long Jehova na mekim wok autim tok, dispela i bin helpim mi tru. Na mi bin prenim ol narapela insait long kongrigesen, na mi mekim moa yet long ol meri i lapun liklik. Bihain mi save, God bai kotim yumi olgeta long pasin yumi yet i mekim, olsem na mi no ken tingim i stap bilong narapela, mi mas tingim i stap bilong mi yet.” Sapos yu mekim olgeta dispela samting, bai yu helpim yu yet. Na ating pasin bilong yu bai helpim pren bilong yu tu.

[Ol Futnot]

[Piksa long pes 16]

Strongim pren long kisim helpim