Ol Yangpela i Laik Save . . .

Bilong Wanem Pren Bilong Mi i Bagarapim Bel Bilong Mi?

“Bipo mi gat sampela pren . . . Tasol bihain ol i kirap na prenim narapela meri, na sapos mi go klostu long ol, ol bai pasim maus na stap. . . . Ol i no laik mi mekim ol samting wantaim ol. Dispela samting i bagarapim tru bel bilong mi.”​​—⁠Karen.a

DISPELA samting inap kamap long ol gutpela pren tru. Long wanpela de ol i pas gut wantaim; narapela de ol i no laik toktok moa long narapela. Nora i gat 17 krismas, em i tok: “Pren em wanpela man o meri yu inap bilip tru long en, na yu ken i go long en bilong em i ken helpim yu, maski wanem samting i kamap.” Tasol sampela taim nambawan pren bilong yu i mekim pasin olsem nambawan birua bilong yu.

Taim Pasin Pren i Laik Bagarap

Wanem samting inap mekim na pasin bilong stap gutpela pren bilong narapela i pinis? Long Sandra hevi i kamap taim em i larim pren bilong em, Megan, i mekim wok long wanpela siot bilong em. Sandra i tok: “Taim Megan i kisim dispela siot i kam bek long mi, siot i doti na liklik hap long han bilong siot i bruk. Na em i no stori liklik long dispela samting, i olsem em i ting bai mi no luksave long dispela samting.” Sandra i gat wanem tingting long dispela pasin bilong Megan? Em i tok: “Mi no amamas liklik long em, mi pilim olsem em i ting ol samting bilong mi i samting nating, . . . na tu, em i no wari liklik long bagarapim bel bilong mi.”

Hevi inap kamap tu sapos wanpela gutpela pren i mekim sampela tok i semim yu. Dispela i bin kamap long Cindy taim em i tokim sampela wanskul olsem em i no bin ritim yet wanpela buk bilong wokim ripot long en. Wantu pren bilong em Kate i krosim em. Cindy i tok: “Em i semim mi long ai bilong ol pren bilong mipela. Mi kros tru long em. Bihain long dispela, pasin bilong mipela long stap pren i senis.”

Sampela taim hevi i kamap taim wanpela pren i kirap poromanim sampela nupela pren. Bonnie i gat 13 krismas, em i tok: “Mi bin i gat wanpela gutpela pren, tasol bihain em i pas wantaim sampela nupela pren na em i givim baksait long mi.” O ating yu luksave olsem wanpela i poromanim yu, tasol i no olsem em i laikim yu tru, i gat narapela as na em i prenim yu. Joe i gat 13 krismas, em i tok: “Mi na Bobby i stap gutpela pren, mi bin ting olsem em i laikim mi tru, tasol bihain mi painimaut em i laikim mi, long wanem, long rot bilong wok papa bilong mi inap kisim ol tiket i no gat pe bilong go lukim spot o musik.” Nau Joe i gat wanem tingting? Em i tok: “Mi no inap bilip moa long Bobby!”

Sampela taim wanpela pren bai kamapim sampela tok yu no laik bai ol narapela i save long en. Olsem: Allison i bin stori long pren bilong em Sara long hevi bilong wanpela wanwok bilong em. Long de bihain, taim dispela wanwok i stap Sara i kamapim dispela tok Allison i bin mekim. Allison i tok: “Mi no ting Sara i gat dispela pasin bilong tokaut long ol samting. Mi belhat stret.” Wankain samting i bin kamap long Rachel, em i gat 16 krismas. Em i bin stori long gutpela pren bilong em long wanpela samting em i no laik bai ol narapela i save long en, tasol bihain dispela pren i kamapim dispela samting long ol narapela. Rachel i tok: “Mi sem tru na mi no inap bilip moa long em. Mi tingting olsem, ‘Mi no inap stori gen long em long ol samting bilong mi.’ ”

Pasin bilong stap pren bilong narapela, em inap strongim bel bilong man, na dispela i kamap moa yet sapos narapela i tingim narapela, na bilip long em. Tasol maski tupela i stap gutpela pren tru, sampela taim hevi i save kamap. Baibel i tok stret, olsem: “Sampela pren i tingting long bagarapim pren bilong ol.” (Sindaun 18:​24, NW ) Maski i gat wanem as na yutupela i no stap pren moa, bel i save bagarap stret taim yu pilim olsem wanpela pren i bin mekim nogut long yu. Bilong wanem dispela samting i save kamap?

Bilong Wanem Ol i No Stap Pren Moa

Maski ol man i bikpela pinis o ol i yangpela, sampela taim hevi i save kamap namel long ol pren. Tru tumas, i olsem disaipel Jems i tok: ‘Planti taim yumi save popaia. Sapos wanpela man i no save mekim sampela tok i no stret, orait em i gutpela man tru, na em inap long bosim gut olgeta hap bilong bodi bilong en.’ (Jems 3:2; 1 Jon 1:⁠8) Olgeta manmeri i save popaia, olsem na sampela taim wanpela pren bai mekim sampela tok o sampela pasin i bagarapim bel bilong yu. Ating yu inap tingim wanpela taim bipo na yu bin bagarapim bel bilong dispela pren bilong yu. (Saveman 7:22) Lisa i gat 20 krismas, em i tok: “Yumi olgeta i no stap gutpela olgeta, olsem na sampela taim yumi save mekim sampela pasin i bagarapim bel bilong narapela.”

Tru yumi no gutpela olgeta, tasol i gat ol narapela samting tu em inap kamapim hevi namel long tupela pren. Tingim, taim yu wok long go bikpela, tingting na laik bilong yu i save senis na i wankain long ol pren bilong yu. Olsem na tupela pren em pastaim ol i gat wankain tingting long planti samting, tasol ating isi isi tingting bilong tupela i senis na bihain ol i gat narapela narapela tingting. Wanpela yangpela i gat 15 krismas i bel hevi taim em i stori long gutpela pren bilong em: “Mipela i no save toktok tumas long telefon olsem bipo, na nau taim mipela i toktok, mipela i no wanbel long planti samting.”

Tru tumas, sampela taim tingting i senis na isi isi tupela i no stap pren moa. Tasol bilong wanem sampela manmeri i save bagarapim bel bilong pren bilong ol? Planti taim pasin bilong bel nogut i as bilong en. Sampela taim i olsem: Ating wanpela pren i kirap na bel nogut long yu, long wanem, yu gat bikpela save o yu bin mekim gut sampela wok. (Skelim wantaim Stat 37:4; 1 Samuel 18:​7-9.) Olsem Baibel i tok, “sapos man i mangal na bel nogut oltaim long ol arapela man, dispela pasin i olsem sik nogut i wok long bagarapim ol bun bilong en.” (Sindaun 14:30) Pasin bilong bel nogut long narapela i save kamapim tingting nogut na kros. Maski i gat wanem as na hevi i kamap, bai yu inap mekim wanem sapos wanpela pren i bagarapim bel bilong yu?

Kamap Pren Gen

Rachel i tok: “Pastaim bai mi skelim pasin em i wok long mekim long mi bilong kisim save em i laik bagarapim bel bilong mi o nogat.” Taim wanpela pren bilong yu i mekim sampela tok o pasin na yu pilim olsem dispela i mekim nogut long yu, no ken larim tingting nogut i kamap long bel long dispela taim i kirapim yu long mekim sampela samting. Nogat. Stap isi na tingting gut long ol samting i bin kamap. (Sindaun 14:29) Olsem wanem? Sapos yu kros hariap long ol samting i bin daunim yu, yu ting dispela bai stretim dispela hevi? Taim yu skelim pinis ol samting, ating bai yu tingting long bihainim tok i stap long Song 4:​4: “Yupela i [ken kros, tasol yupela i mas] lusim pasin bilong mekim sin. Taim yupela i slip long bet, yupela i mas tingting gut long dispela tok, na pasim maus.” Taim yu mekim olsem, ating yu inap larim ‘pasin bilong laikim ol narapela i karamapim planti sin.’​—⁠1 Pita 4:⁠8.

Tasol bai yu mekim wanem sapos yu no inap lusim tingting long pasin kranki bilong pren bilong yu? Sapos olsem, i gutpela sapos yu go toktok wantaim dispela pren bilong yu. Frank i gat 13 krismas, em i tok: “Bung wantaim dispela pren tasol, na toktok gut long ol samting i bin kamap. Sapos yu no mekim olsem, bai yu bel nogut i stap.” Susan i gat 16 krismas, i gat wankain tingting: “I gutpela long tokim ol olsem yu bin bilip long ol, na samting ol i mekim i bagarapim bel bilong yu.” Jacqueline tu i save stretim ol hevi long pasin bilong toktok gut wantaim narapela. Em i tok: “Mi laik kamapim olgeta tingting bilong mi long dispela hevi, planti taim narapela bai tokaut stret long ol samting na rot i op long stretim hevi wantu.”

Tasol yu mas was gut, nogut yu belhat na go toktok wantaim dispela pren bilong yu. Baibel i tok: “Man bilong belhat kwik i save mekim ol arapela man i kros. Tasol man bilong bel isi i save daunim kros bilong ol man, na ol i stap wanbel gen.” (Sindaun 15:18) Olsem na wet inap bel i kol pinis, na nau yu ken i go na stretim dispela hevi. Lisa i tok: “Pastaim bai yu belhat, tasol i gutpela long wet i stap inap long bel i kol. Taim yu no pilim bikpela belhat moa, go na sindaun wantaim em na toktok wantaim em long pasin isi.”

Em nau, bikpela samting hia em “pasin isi.” Tingim, yu no laik kros na bikmaus long pren bilong yu. Nogat. Yu laik stretim dispela hevi, na sapos rot i op, stap pren gen wantaim em. (Song 34:14) Olsem na kamapim bel bilong yu. Lisa i tok: “Yu inap tok olsem, ‘Mi pren bilong yu, na yu pren bilong mi​—⁠tasol mi laik save, i gat wanem as na dispela hevi i kamap.’ Taim yu save long as bilong dispela samting, i no hatwok long karim hevi bilong en.”

Pasin bilong bekim rong, olsem tok baksait long dispela pren o kirapim ol narapela long bel nogut long em, dispela i no stret. Aposel Pol i raitim pas long ol Kristen i stap long Rom na em i tok: “Yupela i no ken bekim pasin nogut long ol. Nogat.” (Rom 12:17) Maski yu bel hevi tru, pasin bilong bekim rong bai kamapim bikpela hevi moa. Nora i tok: “Pasin bilong bekim rong i no gutpela, long wanem, bai yu no inap stap pren gen.” Na em i tok moa olsem, tasol taim yu wok strong long kamap wanbel gen “bel bilong yu bai stap isi.”

Tasol bai yu mekim wanem sapos pren bilong yu i no laik stretim dispela hevi? Sapos olsem, yu mas tingim dispela: I gat kain kain pasin bilong i stap pren. Judith McCleese, em wanpela meri bilong givim tok bilong helpim ol famili, i tok: “I no olsem bai yu pas gut tru wantaim olgeta pren bilong yu, sampela pren bai yu pas moa yet wantaim ol, na sampela narapela bai i no tumas.” Tasol yu ken amamas, long wanem, yu yet i bin wok strong long kamap wanbel gen. Aposel Pol i tok: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”​—⁠Rom 12:⁠18.

Hevi i save kamap namel long olgeta pren​—⁠namel long gutpela pren tu. Sapos yu inap karim dispela hevi na yu no tingting nogut long ol narapela, na yu no bel hevi tumas, i olsem yu wok long kisim tingting bilong man i bikpela pinis. Tru sampela i gat pasin bilong “bagarapim narapela,” tasol Baibel i tok, “i gat pren em i stap klostu tru long yumi, winim brata bilong yumi.”​—⁠Sindaun 18:⁠24, NW.

[Futnot]

[Ol Piksa long pes 15]

Ating yupela inap kamap pren gen sapos yupela i toktok gut long samting i bin kamap