Stori Bilong Wanpela Man

Jehova i Save Mekim Gut Long Ol Man i Stap Gut Long Em

EM STORI BILONG VERNON DUNCOMBE

Mi pinisim liklik kaikai bilong mi long nait na mi laitim wanpela smok olsem mi save mekim long olgeta taim. Mi askim meri bilong mi, Aileen, olsem: “Wanem samting i kamap long miting nau long nait?”

EM I tingting pastaim na em i tok: “Ol i ritim wanpela pas i kolim nem bilong ol brata ol i makim bilong mekim sampela wok, na ol i kolim nem bilong yu tu. Yu bai lukautim ol maikrofon samting. Na laspela sentens bilong pas i tok: ‘Sapos sampela bilong ol dispela brata i save smok, ol i mas raitim pas long Sosaiti na tok olsem ol i no inap mekim dispela wok.’ ”a Mi tokim em, “Tru, a? Ol i tok olsem, a?”

Mi mekim i dai smok long liklik plet bilong putim pipia bilong smok. Na mi tok: “Mi no save bilong wanem ol i makim mi long mekim dispela wok. Tasol mi no bin sakim yet wanpela wok, na bai mi no kirap mekim olsem long nau.” Mi pasim tok long bel long mi bai no kisim wanpela smok gen. Dispela samting i mekim bikpela samting long i stap bilong mi olsem wanpela Kristen na man bilong pilai musik. Mi laik stori long ol samting i bin painim mi na i kirapim mi long lusim smok.

I Stap Bilong Famili

Mama i karim mi long Toronto, Kanada, long Septemba 21, 1914. Mi namba wan pikinini bilong Vernon na Lila, em tupela i gat gutpela pasin sori na ol i save wok strong long lukautim famili bilong ol i gat 4-pela pikinini man na 2-pela pikinini meri. Bihain long mi, mama i karim Yorke, Orlando, Douglas, Aileen, na Coral. Taim mi gat 9-pela krismas tasol, mama i givim vailin long mi na stretim rot long mi ken i go long wanpela skul (Harris School of Music) bilong lain long pilai musik. Mipela i no gat planti mani, tasol papamama i painim rot bilong baim skul-fi na PMV samting. Bihain mi stadi long ol lo samting bilong musik long wanpela skul (Royal Conservatory of Music) long Toronto, na taim mi gat 12-pela krismas mi go long wanpela resis bilong pilai musik long wanpela haus musik (Massey Hall) i gat nem. Mi winim dispela resis na ol i givim mi wanpela gutpela vailin em paus bilong en ol i wokim long skin bilong pukpuk.

Bihain, mi lain tu long pilai piano na wanpela kain bikpela vailin. Planti taim mipela lain bilong pilai musik i pilai long ol liklik pati long Fraide na Sarere apinun, na long ol danis i kamap long skul. Long wanpela danis olsem mi bungim Aileen long namba wan taim. Long laspela yia bilong mi long haiskul, mi pilai wantaim planti lain bilong pilai musik long olgeta hap bilong biktaun. Bihain long gretuesen bilong skul, ol i singautim mi long insait long wanpela lain bilong pilai musik (Ferde Mowry Orchestra), na dispela em i wanpela gutpela wok mani i go inap long 1943.

Kisim Save Long Jehova

Namba wan taim papamama bilong mi ol i harim tok i tru bilong Baibel em paslain liklik long Namba Wan Pait i kirap. Long dispela taim papa i wok long bilasim ol windo bilong wanpela bikpela stua long Toronto. Long rum kaikai, em i harim toktok bilong tupela narapela wokman em ol i Sumatin Bilong Baibel (em nem bilong ol Witnes Bilong Jehova long dispela taim), na long apinun taim em i kam bek long haus em i tokim mama long ol samting em i bin harim. Sampela yia bihain, long 1927, ol Sumatin Bilong Baibel i mekim bikpela kibung long Toronto long haus Kolisem i stap long wanpela so-graun (Canadian National Exhibition Grounds). Haus bilong mipela i stap klostu long dua i stap long hap wes bilong so-graun, na inap 25 manmeri i kam long Ohaio, Amerika, ol i slip long haus bilong mipela.

Bihain, wanpela Sumatin Bilong Baibel, Ada Bletsoe, em i kam lukim mama planti taim na givim ol nupela nius samting long em. Wanpela taim Ada i tok: “Misis Duncombe, inap sampela mun nau mi bin givim ol nius samting long yu. Olsem wanem? Yu save ritim ol dispela nius?” Maski mama i wok long mekim bikpela long 6-pela pikinini, kirap long dispela taim em i pasim tok long bel long ritim ol nius, na em i no bin lusim dispela pasin. Tasol mi no tingim tumas ol dispela nius. Mi wok strong bilong winim skul, na mi givim bel tru long ol samting bilong musik.

Long Jun 1935, mitupela Aileen i marit long haus lotu bilong ol Angliken. Mi bin lusim lotu Yunaitet Sios taim mi gat 13 krismas na mi no kamap memba bilong wanpela lotu, olsem na long pepa bilong rejistaim marit mi raitim olsem mi wanpela Witnes Bilong Jehova, maski mi no wanpela Witnes long dispela taim.

Mipela i wetim taim mipela bai kamapim famili long bihain, na mipela i gat laik long kamap gutpela papamama. Olsem na mitupela i kirap ritim Nupela Testamen wantaim. Maski mipela i gat laik long mekim dispela gutpela samting, ol narapela samting i kamap na i pasim rot bilong mipela. Bihain liklik mipela i traim gen long ritim Baibel wantaim, tasol wankain hevi i kamap. Long Krismas long 1935, mipela i kisim buk The Harp of God olsem wanpela presen. Meri bilong mi em i tok: “Man! Mama bilong yu em i salim narapela kain Krismas presen long yumi.” Tasol taim mi go pinis long wok, em i kirap ritim dispela buk na em i laikim tok em i ritim. Inap sampela taim, mi no save long dispela samting. Laik bilong mipela long kamapim famili i no kamap. Meri bilong mi em i karim pikinini meri long Februeri 1, 1937, tasol pikinini i dai. Mipela i bel hevi tru!

Long dispela taim, famili bilong mi ol i givim bel long wok autim tok, na mi kisim save olsem papa tasol long famili bilong mipela em i no bin tilim wanpela sabskripsen bilong nius Consolation (nau ol i kolim Kirap!). Ol i bin makim sabskripsen olsem samting bilong tilim long dispela mun. Maski mi no bin ritim yet wanpela nius samting bilong Sosaiti, mi sori long papa na mi tokim em: “Papa, yu raitim sabskripsen pepa bilong mi na bai yu wankain olsem ol narapela.” Taim bilong san i kamap na lain bilong pilai musik i lusim biktaun na mipela i go pilai long wanpela ples ol man i save go na malolo long en. Mi kisim nius Consolation long rot bilong pos-ofis. Mun Oktoba samting i kamap, na mipela lain bilong pilai musik i go bek long Toronto. Mi wok long kisim nius long nupela hap mipela i sindaun long en, tasol mi no bin rausim wanpela nius long karamap bilong en.

Long wanpela holide bilong Krismas, mi lukluk long ol nius i hip i stap na mi ting mi bin baim ol dispela nius, olsem na mi mas ritim sampela bilong ol bilong save ol i stori long wanem samting. Namba wan nius mi opim i mekim na mi kirap nogut. Nius i kamapim long ples klia pasin giaman bilong ol bikman long mekim wok politik na paulim mani long dispela taim. Mi kirap toktok wantaim ol narapela man bilong pilai musik long ol samting mi kisim save long en. Tasol ol i tok olsem tok bilong mi i no tru, olsem na mi mas wok long ritim ol nius bambai mi ken strongim tok bilong mi. Olsem na mi kirap autim tok long Jehova, maski mi no save long dispela. Na kirap long dispela taim, mi no bin lusim pasin bilong ritim ol gutpela buk bilong Baibel em “wokboi i gat gutpela tingting” i wokim.​—⁠Matyu 24:⁠45.

Long Mande i go inap Fraide mi mekim wok mani bilong mi, tasol i no longtaim na long olgeta Sande mitupela Aileen i go long ol miting. Taim mipela i kamap long miting long wanpela Sande long 1938, tupela sista i lapun liklik ol i tok gude long mipela na narapela i tok: “Brata, yu pasim tok pinis long bel long mekim laik bilong Jehova? Armagedon i klostu pinis!” Mi save olsem Jehova em wanpela tasol em i God tru, na mi bilip olsem dispela em i oganaisesen bilong em. Mi laik insait long en, olsem na long Oktoba 15, 1938, mi kisim baptais. Aileen i kisim baptais 6-pela mun bihain. Mi amamas long tok olsem olgeta bilong famili bilong mi ol i dediket pinis long Jehova.

Mi kisim bikpela amamas tru taim mi bung wantaim lain bilong God! I no longtaim na mi pilim olsem ol i famili bilong mi. Taim mi no inap i go long miting, long olgeta taim mi gat laik long save long ol samting i kamap long ol miting. Dispela apinun mi stori long en long kirap bilong dispela stori i bin senisim tru ol samting bilong wok bilong mi long Jehova.

Bikpela Senis Long i Stap Bilong Mipela

Narapela bikpela senis i kamap long mipela long Me 1, 1943. Long Septemba 1942, em namba wan taim bilong mipela long go long wanpela bikpela kibung (New World Theocratic Assembly) long Klivlan, Ohaio. Long taim bilong bikpela pait bilong olgeta hap, em wanpela pait i olsem i no gat pinis bilong en, mipela i harim Brata Knorr, em presiden bilong Sosaiti Was Taua long dispela taim, em i mekim wanpela pablik-tok i kirapim tingting bilong mipela, nem bilong en “Gutaim Bai Stap o Nogat?” Mipela inap tingim gut pasin bilong em long stori long Kamapim Tok Hait sapta 17, bilong kamapim olsem bihain long pait, taim bilong bel isi bai kamap na insait long dispela hap taim ol bai mekim bikpela wok bilong autim tok.

Wanpela tok bilong Brata Knorr i bin kirapim tru mipela, nem bilong en “Jepta na Tok Promis Bilong Em.” Em i singautim planti man moa long mekim wok painia! Mi lukluk long Aileen na em i lukluk long mi, na long wankain taim (wantaim planti narapela long dispela taim) mipela i tok: “Dispela i makim mipela!” Wantu tasol mipela i kirap stretim ol samting bilong mekim dispela wok i bikpela samting tru.

Kirap long Julai 4, 1940, gavman i bin tambuim wok bilong ol Witnes Bilong Jehova long Kanada. Taim mipela i kirap mekim wok painia long Me 1, 1943, gavman i tambuim yet mipela long autim tok long Jehova na long tilim ol buk samting bilong Sosaiti. Taim mipela i mekim wok Kristen, mipela i kisim tasol Baibel King James bilong mipela yet. Inap sampela de bihain long mipela i kamap long namba wan ples bilong mipela long mekim wok painia long Pari Saun, Onterio, brens-ofis i salim wanpela painia, Stewart Mann, bilong wok wantaim mipela. Em i helpim gut mipela! Brata Mann i gat gutpela pasin na em i man bilong lap. Em i lainim mipela long planti samting na mipela i stap amamas wantaim. Mipela i stadi long Baibel wantaim planti man taim Sosaiti i salim mipela i go long taun Hamilton. I no longtaim na ol i singautim mi long wok long ami, maski krismas bilong mi i abrusim mak. Mi no laik go long ami, olsem na ol polis i holim mi long Disemba 31, 1943. Taim mipela i kot pinis, ol i salim mi i go long wanpela kain kalabus, na mi stap long dispela hap i go inap long Ogas 1945.

Taim mi lusim kalabus, wantu ol i salim mitupela Aileen long mekim wok painia long Konwal, Onterio. Bihain liklik, Dipatmen Bilong Lo bilong Sosaiti i salim mipela i go long Kwibek bilong helpim ol brata i kot. Dispela i kamap taim Duplessis i bosim provins Kwibek, na ol i birua tru long ol Witnes Bilong Jehova. Inap planti de long olgeta wik, mi go long narapela narapela kot bilong helpim ol brata. Em i wanpela bikpela taim tru na taim bilong strongim bilip.

Bihain long kibung bilong Klivlan long 1946, ol i makim mi na meri bilong mi long mekim wok sekit na wok distrik, na mipela i mekim dispela wok long olgeta hap bilong Kanada. Ol samting i wok long kamap insait long sotpela hap taim tasol. Long 1948 ol i singautim mipela long klas namba 11 bilong Wastaua Baibel Skul Bilong Gileat. Brata Albert Schroeder na Maxwell Friend ol i tisa bilong mipela, na long klas bilong mipela i gat 108 sumatin na 40 bilong ol em ol Kristen God i bin makim. Em i gutpela samting tru long skul wantaim planti wokman bilong Jehova bilong longtaim!

Long wanpela de Brata Knorr i kam long Bruklin bilong lukim mipela. Long tok bilong em, em i singautim 25 volantia long lainim tok ples Japan. Olgeta 108 i redi long mekim olsem! Em wok bilong presiden yet long makim husat bai lain long dispela tok ples. Mi ting Jehova i stiaim dispela wok bilong makim ol, long wanem, wok bilong ol i kamap gutpela. Planti bilong ol dispela 25 volantia ol i makim na ol i go kirapim wok long Japan, ol i mekim yet wok bilong ol. Tru, ol i lapun, tasol ol i stap yet long Japan. Ol i salim sampela, olsem Lloyd na Melba Barry, i go wok long narapela hap. Lloyd em i wanpela bilong Lain Bilong Bosim Ol Witnes i go inap long taim em i dai long yia i go pinis. Mipela i amamas wantaim olgeta dispela brata sista long gutpela samting Jehova i bin givim long ol.

De bilong gretuesen i kamap, na ol i makim mipela long i go long Jameka. Tasol planti kot i no pinis yet i stap long Kwibek, olsem na ol i tokim mipela long go bek long Kanada.

Planti Musik Moa!

Maski mi bin lusim musik bilong mekim wok painia, i luk olsem musik i no lusim mi. Long yia bihain, presiden bilong Sosaiti, em Nathan Knorr, na kuskus bilong em, Milton Henschel, ol i kam long wanpela stediam (Maple Leaf Gardens) long Toronto. Brata Knorr i mekim wanpela pablik-tok (“It Is Later Than You Think!”) i kirapim tingting bilong olgeta. Em namba wan taim ol i askim mi long lukautim lain bilong pilai musik long kibung. Mipela i senisim liklik musik bilong sampela singsing em planti ol i laikim long buk singsing Kingdom Service Song Book (1944). Ol brata i laikim dispela musik. Taim program i pinis long Sarere apinun, mipela i mekim traim long musik mipela i laik pilai long Sande. Mi lukim Brata Henschel i wokabaut i kam long mipela, na mi tokim lain bilong pilai musik long wet pastaim bambai mi ken go lukim brata hia. Em i askim mi olsem: “I gat hamas man bilong pilai musik long dispela lain?” Mi tokim em: “Taim olgeta i kam, ol inap olsem 35.” Em i tok: “Orait, long yia antap long taim bilong san, namba bilong yupela bai dabol long Nu Yok.”

Tasol paslain long taim bilong san, ol i singautim mi long i go long Bruklin. Pastaim Aileen i no inap kam wantaim mi. Nupela haus long 124 Kolambia Haits i no redi yet, olsem na ol i makim mi long slip long olpela haus Betel long wanpela liklik rum wantaim tupela brata em God i bin makim long spirit holi. Em lapun Brata Payne na Karl Klein, na em namba wan taim bilong mi long bungim Brata Klein. Yu ting mipela i pas pas long rum? Yes, mipela i stap olsem. Tasol mipela i stap gut wantaim. Tupela brata i lapun liklik ol i no les kwik long mi na ol i isi long mi. Mi traim long stap isi bambai mi no ken pasim rot bilong tupela long mekim ol samting! Dispela samting i lainim mi gut long ol samting spirit bilong God inap kamapim. Mi kisim planti gutpela samting taim mi poromanim na wok wantaim Brata Klein! Long olgeta taim em i mekim gutpela pasin na em i helpim mi. Mipela i wok gut wantaim na pren gut wantaim winim 50 yia.

Mi kisim gutpela wok long helpim wok bilong pilai musik long ol kibung bilong Yanki Stediam long 1950, 1953, 1955, na 1958. Na tu, long 1963 mi helpim Al Kavelin long lukautim lain bilong pilai musik long kibung i kamap long wanpela stediam (Rose Bowl) long Pasadena, Kalifonia. Long 1953 long kibung long Yanki Stediam, mipela i pilai musik paslain long pablik-tok bilong Sande. Erich Frost i singautim wanpela meri bilong singsing, em Edith Shemionik (bihain Weigand), long mekim singsing Erich yet i bin wokim “Kirap, Yupela Witnes!” wantaim lain bilong pilai musik. Bihain mipela i amamas tru long harim long namba wan taim gutpela nek bilong ol brata sista bilong mipela long Afrika. Misineri Harry Arnott i bin kisim wanpela kaset i kam long Noten Rodisia (nau Sambia) bilong mipela i ken harim. Olgeta long stediam i harim singsing bilong ol.

Mipela i Putim Musik Bilong Buk Singsing Bilong 1966 Long Plet Singsing

Olsem wanem? Yu inap tingim buk singsing “Singing and Accompanying Yourselves With Music in Your Hearts” i gat pinkpela karamap? Taim wok bilong redim buk i laik pinis, Brata Knorr i tok: “Mipela bai putim sampela singsing long plet singsing. Mi laik bai yu bungim wanpela liklik lain bilong pilai musik, i gat sampela man bilong pilai vailin na tupela bilong winim wanpela kain mambu ol i kolim flut. Mi no laik wanpela i winim biugel!” Haus Kingdom long Betel bai kamap olsem ples bilong putim musik long plet, tasol mipela i tingting planti long sampela samting bilong en. Wanem samting bai kamap taim ol banis, na plua ol i wokim long tail, na ol sia em bun bilong ol i ain, i senisim krai bilong musik? Husat inap helpim mipela long stretim dispela hevi? Wanpela i tok: “Tommy Mitchell! Em i save wok long wanpela redio-stesin (ABC Network Studios).” Mipela i ringim Brata Mitchell, na em i amamas long helpim mipela.

Namba wan Sarere bilong putim musik long plet singsing i kamap, na taim ol i kolim nem bilong ol brata bilong pilai musik, wanpela brata i karim paus bilong biugel. Mi tingim tok Brata Knorr i bin mekim: “Mi no laik wanpela i winim biugel!” Mi inap mekim wanem nau? Mi lukim brata i rausim biugel long paus bilong en, na stretim gut pinis, na nau em i kirap traim biugel. Dispela brata em Tom Mitchell, na krai bilong biugel i gutpela tru. Em i mekim na krai bilong biugel i olsem krai bilong vailin! Mi tingting, ‘dispela brata i mas wok wantaim mipela!’ Brata Knorr i no gat tok long dispela.

Long dispela lain bilong pilai musik, mipela i gat ol brata sista i gat gutpela save long pilai musik, na tu, ol i gat gutpela pasin sori. Olgeta i gat gutpela tingting long wok bilong ol! I hatwok long putim musik long plet singsing, tasol ol i no toktok planti long dispela samting. Taim wok i pinis, mipela i krai taim narapela i lusim narapela, na strongpela pasin pren i stap namel long ol brata sista i bin insait long dispela wok. Mipela olgeta i amamas long gutpela wok mipela inap mekim, na mipela i tenkyu long Jehova long mipela i pinisim dispela wok.

Sampela Narapela Gutpela Wok

Inap planti yia mi bin mekim wok bilong God long olgeta de, na mi mekim yet dispela wok. Mipela i bin mekim wok sekit na wok distrik inap 28 yia​—⁠mipela i bin amamas long mekim ol dispela wok. Bihain, mipela i bin lukautim Haus Kibung long Noval, Onterio, inap 5-pela yia. Long olgeta Sarere Sande i gat kibung sekit, na tu, i gat ol kibung distrik bilong ol narapela tok ples, olsem na mitupela Aileen i gat planti wok bilong mekim. Long 1979 na 1980, lain bilong wokim piksa bilong haus na ol ensinia ol i mekim wok long Haus Kibung bilong wokim piksa bilong nupela brens-ofis bilong Sosaiti long Halton Hils. Bihain long wok bilong mipela long Haus Kibung, ol i singautim mipela long mekim wok bilong musik long Bruklin, kirap long 1982 i go inap 1984.

Gutpela meri bilong mi em i dai long Jun 17, 1994, inap 7-pela de bihain long mipela i bin marit inap 59 yia. Mitupela i bin mekim wok painia wantaim inap 51 yia.

Taim mi tingting long ol samting i bin painim mi, mi tingim olsem wanem Baibel i bin stiaim wokabaut bilong mi. Long sampela taim mi save mekim wok long Baibel bilong Aileen, na mi amamas long lukim ol skripsa i bin kirapim bel bilong em​—⁠sampela ves olgeta, o sampela tok, o wanpela tok em i bin makim long pensil samting. Olsem Aileen, sampela skripsa i bikpela samting long mi tu. Wanpela hap olsem em Song 137, em i kamapim wanpela gutpela beten long Jehova: “Sapos mi lusim tingting long yu, mobeta mi no inap paitim gita gen. Jerusalem, sapos mi lusim tingting long yu, na sapos mi no makim yu i stap nambawan samting mi save amamas long en, orait mobeta nek bilong mi i bagarap na bai mi no inap mekim song gen.” (Song 137:​5, 6) Tru, mi laikim tru musik, tasol nambawan bikpela amamas mi kisim em i kam long pasin bilong stap gut long wok bilong Jehova, em dispela man i bin givim mi gutpela laip i gat as bilong en.

[Futnot]

[Piksa long pes 28]

Mitupela Aileen long 1947

[Piksa long pes 30]

Mipela i putim musik long plet singsing