‘Jehova i Bin Mekim Gut Long Mi’

Em stori bilong Karl F. Klein

MAN i save long Jehova na em i mekim wok bilong Jehova, em i kisim planti blesing! Mi tingim ol samting i bin painim mi na mi laik mekim tok wankain olsem bilong Devit, em i tok: “Bai mi singim song bilong litimapim nem bilong [Jehova]. Long wanem, em i bin mekim gut tru long mi.” (Sam 13:6) Tru tumas, Jehova i bin mekim gut long mi! Mi kisim wok long namba wan ofis bilong ol Witnes Bilong Jehova na mi lukim lain i wok long Betel i go bikpela. Pastaim mipela inap olsem 150. Tasol nau mipela inap olsem 3,000 samting. Em bikpela blesing!

Na taim mi no save yet long tok i tru, God i bin mekim gut long mi. Mama bilong mi i gutpela meri, em i gat pasin daun na em i no save tingim em yet, oltaim em i wok long helpim ol narapela man. Na em i save kolim ol tok bilong Baibel long mipela bilong stretim mipela na givim tingting long mipela. Orait, nau mi laik stori liklik long taim mi stap manki yet.

Mipela i Kirap Bihainim Tok i Tru

Long kirap bilong yia 1917 mi harim sampela tok i tru bilong Baibel long namba wan taim. Mi lukim wanpela pepa i singautim ol man i go harim wanpela tok long bikpaia o hel. Mi laik harim dispela tok, long wanem planti taim mi save mekim pasin i kranki na mi tingting planti, nogut mi go long bikpaia taim mi dai. Mi soim dispela pepa long mama bilong mi na em i tok, ‘Sapos yu go harim dispela tok, dispela samting i no ken nogutim yu na ating em bai helpim yu.’ Mi wantaim wanpela liklik brata bilong mi, nem bilong em Ted, mitupela i go harim dispela tok. Ol Witnes Bilong Jehova i putim dispela tok. Man bilong mekim tok em i kamapim planti tok bilong Baibel na ol stretpela tingting na em i helpim mipela long save, Baibel i no lainim ol man olsem i gat wanpela ples olsem bikpaia o hel. Ol tok mi harim i stret long tingting bilong mi na taim mi kamap pinis long haus, mi tokim mama: “Mama, i no gat bikpaia! Mi save pinis!” Em i tok, “Yu tok stret. Graun hia em i ples bilong karim pen.” Em i tok olsem, long wanem em yet i karim planti pen na hevi.

Ol i tok bai i gat narapela tok long wik antap, long Sande, long apinun, tasol no gat wanpela man i kam toktok wantaim mitupela manki. Long dispela taim mipela i gat 11-pela na 10-pela krismas. Long Sande antap, long moningtaim, mitupela i go long Sande-Skul na long lotu, na bihain mipela i mekim sampela pilai wantaim ol narapela manki. Tasol ol samting i kamap nogut. Mi tingim gutpela samting i bin painim mi long wik bipo na mi tokim skin bilong mi yet: “Karl, ating God i laik kirapim tingting bilong yu na bai yu no i stap painim sampela amamas, yu go harim narapela gutpela tok bilong Baibel.” Olsem na mitupela Ted i go long miting gen na dispela taim sampela brata i toktok wantaim mipela. Ol i tok, gutpela sapos mipela i kam harim tok gen long Sande antap. Mipela i tok, bai mipela i kam na kirap long dispela taim i kam inap long nau mitupela i no lusim ol miting Kristen. Planti taim Jehova i stretim mi taim mi mekim sampela samting i no stret mi mekim. I gat tupela rot tasol i stap na mi mas lain olsem yumi no inap bihainim dispela tupela rot wantaim.

Olgeta dispela samting i bin painim mi taim mi stap long Blu Ailan, em wanpela hap bilong biktaun Sikago long Ilinoi. (Mama i karim mi long hap bilong Jemani na taim mi pikinini yet planti taim mi gat sik, na taim mi gat 5-pela krismas papamama i lusim Jemani na kisim mipela ol pikinini i kam long Amerika, na mipela i sindaun long dispela biktaun.) Long olgeta Trinde ol Witnes i save bung long dispela hap na lainim tok bilong wanpela buk, nem bilong en Tabernacle Shadows. Kwiktaim mi kirap long bung wantaim ol na mi laikim tru ol tok mi lainim. Man bilong lukautim dispela bung em i wokim wanpela samting olsem liklik piksa bilong haus lotu sel bilong ol Isrel, na taim mipela i stadi em i save mekim wok long dispela bilong kamapim gut as bilong ol tok mipela i lainim. Tasol pastaim mi no save mi mas tingim wanem rot mi laik bihainim na mi save go long ol dispela miting na long lotu Metodis tu. Mi insait long misin Metodis.

Mi manki tasol na papamama i no gat mani, olsem na ol brata i save givim nating ol buk samting long mi. Mi amamas tru long kisim save long ol tok i tru olsem yumi no gat tewel, na God i no God Triwan, na ol tok i tru long taim Krais bai i stap King inap 1,000 yia, na ol narapela tok i tru! Kwiktaim mi kirap tilim ol nius, olsem Bible Students Monthly na Kingdom News, long ol man. Mi amamas long mekim dispela wok. Long kirap bilong yia 1918 mi save mi mas dediket long God na mi kisim baptais. Papamama i no pasim mi, long wanem mama i laikim ol tok mi lainim na papa, bipo em i stap pasto bilong misin Metodis inap 20 yia, nau em i save go raun na wan wan taim tasol em i stap long haus.

Bai Mi Stap Gut long Ol Brata?

Long dispela taim bipo ol i save tok, ‵Sapos yu laik holimpas tok i tru, long olgeta yia yu mas kaunim olgeta 7-pela buk ol i kolim Studies in the Scriptures. Mi laik holimpas tok i tru, olsem na mi bihainim tok na long olgeta yia mi kaunim dispela 7-pela buk. Mi mekim olsem i go i go inap long taim mi go i stap long Betel. Mi mas kaunim 10-pela pes long olgeta de, tasol mi amamas long mekim, long wanem mi laik tru long kisim save.

Mi baptais long 1918 na liklik taim bihain traim i painim mi, bai mi stap gut long ol brata o nogat. Long dispela taim Namba Wan Pait Bilong Olgeta Hap em i stap. Sampela brata i gat bikpela wok insait long oganaisesen bilong Jehova ol i kalabus. I no stret ol i kalabus, tasol ol i no laik insait long pait na gavman i putim ol long kalabus. Tasol sampela brata i gat bikpela wok ol i no pilim olsem ol Kristen i mas i stap namel tasol. Sampela ol i kros na ol i lusim lain bilong Jehova (em Ol Sumatin Bilong Baibel) na ol i kamapim lain bilong ol yet. Ol i kolim nem bilong ol olsem Ol Man Bilong Sanap Strong. Ol i tokim mi, sapos mi stap wantaim ol brata bai mi no inap insait long “liklik lain sipsip” bilong Krais. (Luk 12:32) Long dispela taim mama bilong mi i no dediket yet, tasol em i helpim mi long tingim gut ol samting mi mas mekim. Mi no laik lusim ol dispela brata ol i bin lainim mi long planti samting. Olsem na mi stap gut long ol. Em bikpela traim tru. Bihain mi lukim planti kain traim olsem i kamap. Taim sampela popaia i kamap, ol man i no givim bel tru long God, ol i sutim tok na lusim lain bilong God.—Lukim Sam 119:165.

Kibung bilong 1922 (long Sida Poin) em i strongim mi long mekim wok bilong Jehova. Long dispela kibung J. F. Rutherford (long dispela taim em i stap presiden bilong Sosaiti Was Taua) em i mekim wanpela tok i kirapim tru tingting bilong mipela, em i tok: “Autim tok, autim tok, autim tok, long King na kingdom bilong em.” Taim mi harim tok i tru long pastaim mi bin mekim sampela wok bilong autim tok, tasol long dispela kibung long namba wan taim mi go long ol haus na autim tok. Mipela i go tilim ol buk na nius bilong Baibel long ol man. Mi pilim olsem dispela wok i hatwok long mi!

Olsem na mi no mekim moa dispela wok i go inap long taim bilong kibung bilong 1924 (long Kolombas, Ohaio). Bihain long dispela taim, mi save go long ol haus na autim tok. Olsem na long kongrigesen bilong mipela i gat wanpela man i save autim tok olsem long olgeta taim. Nau mi save, dispela wok i olsem rot bilong autim gutpela tok bilong Kingdom na em i save strongim tru bilip bilong man i mekim, na helpim em long kamapim ol gutpela pasin bilong spirit bilong God. (Galesia 5:22, 23) Tru tumas, sapos yumi wok strong long autim tok, dispela samting i save helpim yumi long planti rot.

“Long Ples Betel Bai Mi Stap!”

Bipo ol i save bihainim narapela kain pasin bilong makim ol elda samting insait long kongrigesen. Olsem na taim mi yangpela yet kongrigesen i vot na givim wok elda long mi. Mi save lukautim wanpela buk-stadi na mi save stretim tok wantaim sampela brata long Sikago na ol i kam mekim pablik-tok long hap bilong mipela. Mi save putim toksave long dispela samting long niuspepa na mipela save givim pepa long ol man bilong singautim ol i kam harim ol dispela pablik-tok. Mi go long kibung long Kolombas, Ohaio, long 1924 na bihain rot i op na mi putim aplikesen bilong i go wok long Betel. Longtaim pinis mi tingting long mekim wok long Betel, tasol sampela samting i kamap insait long famili na mi pilim olsem i no laik bilong Jehova long mi wok long Betel. Tasol liklik taim bihain, olsem long Mas 23, 1925, ol i singautim mi i go long Betel.

Mi amamas tru, olsem na taim mi raitim pas i go long papamama, mi kisim tok bilong wanpela singsing planti man i laikim long dispela taim (“Dixie”) na mi senisim tok bilong en liklik, na mi raitim tok olsem: “Long ples Betel bai mi stap! Na long ples Betel bai mi dai! “ Mi stap 59 yia pinis long Betel na mi pilim yet dispela amamas bilong i stap na mekim wok long Betel. Mi laik stori liklik long pasin Jehova i mekim long mi. Taim mi laik tru long kisim wanpela samting, olsem kisim wok long Betel samting, na mi pilim olsem Jehova i no laik bai mi kisim na mi lusim tingting long en, em nau, long dispela taim bai mi kisim. Mi tingim dispela samting na mi tingim traim i painim Ebraham—Ebraham i redi long lusim samting em i “laikim tumas,” olsem pikinini bilong em, o nogat.—Jenesis 22:2.

Taim mi kirap mekim wok long Betel, pastaim mi wok long faktori long 18 Concord Street, Bruklin. Mi stretim ol piksa na rait samting bilong putim long ol buk na nius. Tasol bihain ol i givim wok long mi long masin bilong wokim ol buk na nius. Long dispela taim Sosaiti i gat dispela wanpela masin tasol. Mipela i save wokim milion milion nius long en, na taim mipela wokim ol magasin, long dispela taim mipela i save wokim 30 tausen 30 tausen. Nau ol i save wokim 11 milion 150 tausen Wastaua na 9 milion 8 handet tausen Kirap!

Taim mi manki yet mi bin lain long wokim musik long vaiolin (violin). Olsem na taim mi go long Betel mi insait long ben bilong ol. Ol i save praktis tupela taim long wik long apinun, na long Sande long moningtaim ol i wokim musik long redio-stesen bilong Sosaiti (WBBR). Tasol ol i sot long man bilong wokim musik long selo (cello), olsem na mi lain long dispela.a Long 1927 Sosaiti i singautim tenpela long lain bilong mipela na long olgeta de mipela i wokim musik long redio-stesen bilong Sosaiti long Staten Ailan. Mi kisim gutpela wok long wokim musik na mi holim dispela wok inap planti yia.

“Karl, Lukaut”

Mi laikim tru musik! Na mi amamas mi inap wokim musik long olgeta de. Taim mi mekim wok long Staten Ailan, mi kisim save gut long Brata Rutherford, em presiden bilong Sosaiti Was Taua long dispela taim. Tripela o fopela de long wik em i save kam i stap long Staten Ailan, long wanem i no gat planti buk na nius samting!

Planti Taim mi kalapim lo na Brata Rutherford i mas krosim mi, tasol em i kamap olsem gutpela papa bilong mi. Wanpela taim em i givim strongpela tok long mi na mi bel nogut long dispela. Bihain em i lukim mi na em i amamas na em i tok: “Yes, Karl.” Tasol mi no bekim gut tok long em, long wanem mi bel nogut yet.Olsem na em i tok: “Karl lukaut! Seten i laik kalabusim yu!” Mi sem na mi tok: Nogat samting, Brata Rutherford.” Tasol em i save mi bel nogut long en na em i tok gen: Em i orait, tasol yu mas lukaut. Seten i laik kalabusim yu.” Na em i tok stret! Sapos yumi bel nogut long brata, olsem wanpela brata i mekim wok bilong em na em i givim sampela tok long yumi, orait yumi opim dua long Seten.—Efesas 4:25-27.

Wanpela taim ol brata i popaia na ol i tokim Brata Rutherford mi bin toknogutim em. Em i no kros, em i tok: “Karl i save mekim planti toktok na sampela taim em i tok nating tasol.” Brata Rutherford i makim gutpela pasin yumi ken bihainim sapos yumi harim tok olsem wanpela brata o sista i bin toknogutim yumi! Brata Rutherford i mekim pasin sori na em i bihainim gutpela tingting. Planti taim em i marimari long mi sapos i gat sampela samting na em inap mekim. Na taim em i no tingting gut na em i mekim mi i bel hevi, em i save tok sori.b Ol tok em i mekim taim em i beten long moningtaim, dispela tu i pulim mi long laikim tumas em. Em i gat strongpela nek, tasol taim em i beten i olsem wanpela liklik manki i toktok wantaim papa bilong em. Dispela i makim em i stap klostu long Jehova! Wanpela man i gat dispela kain strong bilong spirit em i go pas long mipela, na dispela samting i strongim bilip bilong mi na mi pilim olsem i stret kain man olsem i mas kisim wok insait long oganaisesen bilong Jehova.

Go Bek long Bruklin

Ben i stap long Staten Ailan inap tupela yia hap tasol. Bihain mipela i go bek long Bruklin long nupela redio-stesen ol i bin wokim. Mi wok wantaim ben inap 10-pela yia na bihain dispela wok i pinis na mi wok gen long faktori. Pastaim mi wok long hap bilong putim karamap long ol buk, na bihain mi wok long ol masin bilong prinim ol buk. Tasol bihain liklik ol i putim mi long Dipatmen Bilong Lukautim Wok Autim Tok na mi save lukautim 1,250 painia spesel. Mi makim ples ol i mas i go na autim tok long en, na mi bekim ol pas bilong ol, na mekim ol kain wok olsem. Na long olgeta mun mi lukim ripot bilong ol kongrigesen na bungim ol namba na raitim ripot bilong wok autim tok bilong Amerika na bilong sampela kantri moa. Mi kisim gutpela blesing tru! Na mi kisim bikpela amamas long wok wantaim Brata T. J. Sullivan, em i wasman bilong dispela dipatmen. Taim mi wok long dispela dipatmen mi lukim lain pablisa i go bikpela. Pastaim i gat 100,000 pablisa long olgeta hap bilong graun, na mi lukim dispela lain i go bikpela inap long 375,000 pablisa. Na nau lain pablisa i go bikpela inap 7-pela taim na i gat 2 milion 600 tausen samting pablisa!

Kirap long taim Brata N. H. Knorr i stap presiden ol brata i wok long helpim ol Witnes bambai olgeta wan wan inap i go long ol haus na autim tok. Mi amamas long dispela samting. Na ol brata i lain long mekim ol pablik-tok. Na mi amamas tru taim ol i kamapim Skul Giliat bilong lainim ol misineri, long wanem brata bilong mi, Ted, em i insait long namba wan klas bilong dispela Skul. Em i bin i go wantaim mi na harim pablik-tok long namba wan taim na em i bin mekim wok painia kirap long yia 1931.

Nupela Wok

Long kirap bilong yia 1950, Brata Knorr i singautim mi wantaim wanpela brata i go long ofis bilong em. Em i tok: ‘Yupela i laik wok long Dipatmen Bilong Raitim Ol Buk?’ Mi tok, ol i givim wanem wanem wok long mi, mi no ken tingim, mi bai mekim tasol. Tasol em i stretim mi na em i tok, taim ol brata i laik givim wanpela wok long mi i gutpela moa, mi mas tingim gut dispela wok na amamas long kisim. Tasol mi gat sik na mi tok olsem. Oltaim mi mas tingim wanem kain kaikai mi inap kisim na mi mas eksasais, long wanem skin bilong mi i no strong. Mi amamas tru long kisim dispela wok. Nau bai mi inap skelim ol tok bilong Baibel samting long olgeta de na raitim ol tok bilong ol buk na nius. Tasol mi save, dispela wok i hatwok. Wanpela taim Brata Knorr i stori long Dipatmen Bilong Raitim Ol Buk na em i tokim mi: “Long dispela dipatmen ol i mekim bikpela wok na i gat hatwok.”

Long 1951 mipela sampela bilong Betel long Bruklin, mipela i go long “Klinpela Lotu” kibung long London. Mipela kisim gutpela kaikai bilong spirit. Bihain mipela i go long kibung long Paris na mipela i go lukim sampela brens-ofis bilong Sosaiti. Mipela i go long brens-ofis bilong Wiesbaden long Jemani. Long dispela brens-ofis mi bungim Sista Gretel Naggert long namba wan taim. Twelpela yia bihain em i maritim mi na kamap Sista Klein. Mi stap singel na mekim wok long Betel inap 38 yia na mi pilim olsem sapos mi maritim Sista Gretel na mi gat poroman, em i gutpela. Na tru tumas, taim mi marit pinis mi wanbel wantaim Solomon, em i tok: “Sapos yu maritim [gutpela] meri, dispela i gutpela tru. Dispela i soim olsem, God i amamas na i belgut long yu.” (Provep 18:22) Yes, Jehova i mekim gut long mi—em i givim dispela gutpela meri long mi. Gretel i bin helpim mi gut.

Brata Knorr—Bikbrata Bilong Mi

Brata Rutherford i olsem gutpela papa bilong mi. Tasol mitupela Brata Knorr i wankain krismas na em i olsem bikbrata bilong mi. Sampela taim bikbrata i les long popaia bilong liklik brata. Tasol Gretel i mekim gutpela tok long dispela samting, em i tok, ‘Smatpela man bilong bisnis na man bilong musik i save driman driman, tupela i no inap i stap wanbel long olgeta taim!’ Tasol nogut yu ting mi toknogutim Brata Knorr. Nogat.Mi laik tru long harim em i mekim tok. Wanpela taim em i tok mi olsem tewel bilong em, long wanem em i go we we long mekim pablik-tok, mi save bihainim em i go. Na em tu i save laikim musik olsem mi. Em i kirapim gen pasin bilong mekim singsing long ol miting bilong kongrigesen. Em i tingim tru wok bilong wokim ol buk singsing—Efesas 5:18-20

Mi lukim pasin bilong Brata Knorr na mi save i stret Jehova i makim dispela man bilong lukautim wok bilong Em long graun. Brata Knorr i save gut long pasin bilong stretim ol wok, na em i save mipela i mas i gat gutpela skul. Olsem na em i kirapim ol Skul Bilong Wok Autim Tok long ol kongrigesen, na Skul Giliat bilong ol misineri, na Skul bilong ol elda, na Skul bilong ol brata sista i kam nupela long Betel.

Mi tingim ol dispela samting na mi tingim wanpela tok brata i lukautim brens long Englan em i mekim. Em i tok, taim Brata Knorr i makim wanpela brata bilong mekim wanpela wok insait long oganaisesen bilong Jehova, em i no save tingim pasin bilong dispela brata, em i laikim pasin bilong em o nogat. Em i save skelim gut dispela brata, em inap mekim dispela wok o nogat. Sapos em i tingim pasin bilong ol man em i no ken givim ol wok long mi, olsem ol wok long kibung na dispela wok long musik na long raitim ol buk samting. Long dispela samting Brata Knorr i bihainim gut pasin bilong Krais Jisas. Olsem wanem em i bihainim gut pasin bilong Jisas? Orait, Jisas i laikim tumas wanem disaipel? Em i laikim tumas Jon. Tasol em i givim “ol ki bilong kingdom” long Pita. Maski Pita i save kirap tasol na mekim ol samting, em i no tingting gut pastaim, tasol Jisas i givim dispela wok long em.—Matyu 16:18, 19; Jon 21:20.

Mi save popaia na mi mekim kain kain pasin kranki, tasol Jehova i bin mekim gut long mi! Mi mekim wok bilong em long Betel klostu 50 yia na em i mekim gut tru long mi, winim olgeta taim bipo. Em i givim bikpela wok moa long mi. Long Novemba 1974 ol i singautim mi bilong kamap wanpela bilong Lain Bilong Bosim Ol Witnes. Pastaim mi pilim olsem mi no inap long dispela bikpela wok, tasol ol brata i strongim bel bilong mi na mi kisim. Ol i tokim mi, ol i no singautim mi tasol, ol i singautim 7-pela olgeta bambai Lain Bilong Bosim Ol Witnes i go bikpela na i gat 18 i stap long en.

Brata i strongim tru mi na mi kisim dispela wok, em Brata Frederick W. Franz. Long 1977 taim Brata Knorr i dai, Brata Franz i kamap presiden bilong Sosaiti. Taim mi kam nupela long Betel na i kam inap long nau mi save laikim Brata Franz, long wanem em i gat bikpela save long ol tok bilong Baibel na em i save pren gut wantaim ol narapela man. Taim mi nupela long Betel mi save go wantaim em long ol miting long tok Jeman, na bihain mipela mekim planti wok wantaim. Wanpela taim mi wantaim brata bilong mi na meri bilong em, mipela i go wantaim Brata Franz na lukim ol brata i stap long Dominikan Ripablik, ol i hatwok long mekim wok bilong Jehova, long wanem gavman i tambuim dispela wok. Ol i amamas tru mipela i go lukim ol maski mipela inap kisim hevi long han bilong nambawan gavman, Trujillo. Mi pilim tru sori Kristen bilong ol.

Bihain mi wantaim meri bilong mi na sampela brata moa, olsem Brata Schroeder, mipela i go wantaim Brata Franz na lukim ol ples Baibel i stori long en, na mipela i go long sampela kantri long Saut Amerika. Mipela i go long Bolivia, em Gretel i bin mekim wok misineri long dispela kantri inap 9-pela yia. Taim mipela raun wantaim Brata Franz, em i save givim wok long mipela. Mipela tu i mas mekim sampela tok long pletfom. Long dispela taim nau mipela i bin raun wantaim em long Yurop na Sentral Amerika. Ol samting Brata Franz i mekim i bin helpim mi long tingting gut. Taim mipela i go lukim ol ples Baibel i stori long en, polis i holim wanpela brata, long wanem em i kisim poto long ples i tambu long kisim poto. Mipela lusim nating bikpela hap taim, long wanem mipela mas wetim brata i stretim dispela samting pastaim. Mi belhat, tasol Brata Franz i tok: ‘Dispela samting i lainim em.’ Na em i stret. Tru tumas, mi wok wantaim Brata Franz na poroman wantaim em na dispela samting tu i olsem wanpela rot bilong Jehova i mekim gut long mi.

I Gat Hevi

Jehova i bin mekim gut long mi long ol wok ol i makim mi bilong mekim. Taim wok i kamap gutpela, planti taim i no long as bilong ol samting mi bin mekim. (Lukim Sam 127:1; 1 Korin 3:7.) Na mi lukim dispela samting tu insait long oganaisesen. Olsem:. Inap 40 yia bipo Sosaiti i baim wanpela haus long Willow Street bilong putim ol ka. Sapos ol i no bin baim dispela bai ol i no inap wokim rot insait long graun long nau bilong ol brata i ken wokabaut i go i kam long haus Towers na ol narapela haus bilong Betel. Taim mipela i sot long ol rum slip, rot op na mipela baim dispela bikpela haus pasendia ol i kolim Towers Hotel. Na taim mipela i sot long ol ofis, rot i op na mipela baim bikpela haus ol i kolim Squibb. Ol dispela haus i stap klostu long haus Betel na ol brata inap wokabaut long lek i go i kam. Ol kain samting olsem i bin kamap long ol narapela kantri tu bilong helpim wok bilong oganaisesen bilong Jehova.

Skin bilong mi i no strong na sampela taim mi kirap tasol na mekim wanpela samting na mi no tingting gut pastaim, olsem na sampela hevi i bin painim mi. Taim mi stap 9-pela yia pinis long Betel, tingting bilong mi i bagarap na mi save stap bel hevi oltaim. Tasol tok bilong Sam 103 na tok bilong Pol long Rom 7:15-25 i strongim mi. Mi bin kisim sampela narapela bagarap tu, olsem: Bun long skru bilong lek i bagarap na wanpela taim sampela bun long baksait i bruk. Popaia bilong mi yet na bilong ol narapela man i bin mekim na sampela hevi i painim mi. Tasol Jehova i helpim mi na mi save, sapos Jehova i larim wanpela hevi i painim mi, mi inap karim dispela hevi, olsem 1 Korin 10:13 i tok. Na mi lain long givim samting long narapela man na no ken tingim tumas laip bilong mi yet. Na mi lain long ‘wetim Jehova’ na i stap olsem ‘man i liklik tru’ namel long ol narapela man.—Maika 7:7; Luk 9:48.

Na planti taim mi pilim olsem Devit taim Nebal i mekim nogut long em. (1 Samuel 25:2-34) Devit i tenkyu tru long Jehova na Abigel, long wanem ol i pasim em na em i no kilim i dai Nebal na ol wanhaus bilong em na mekim bikpela rong. Yes, Jehova i bin helpim mi na pasim mi long mekim bikpela rong. Em i bin mekim olsem long rot bilong ol ensel, na long rot bilong mekim gut long mi, na long rot bilong ol strongpela brata na planti gutpela sista Kristen ol i kain olsem Abigel. Mi tenkyu long Jehova, long wanem taim mi no strong long spirit i no gat samting i traim mi, na taim traim i painim mi, mi stap strong long spirit na mi inap sanap strong. Olsem: Laik nogut na rot bilong bihainim dispela laik nogut i no kamap wantaim. Jehova i save long bel bilong mi. Em i save mi no laik mekim pasin nogut, mi laik wokabaut stret. Olsem na mi tenkyu tru long Jehova, long wanem ‘em i no kaunim olgeta sin bilong mi.’—Sam 130:3.

Jehova i bin givim gutpela kaikai bilong spirit long mi na long ol narapela. Long dispela rot tu em i bin mekim gut tru long mi. (Matyu 24:45-47) Oltaim lait bilong tok i tru i wok long kamap strongpela moa. God i save givim lait long ol stretpela manmeri. (Sam 97:11) Mi laik kolim sampela gutpela tok i tru lain bilong Jehova i bin kisim save long en kirap long taim mi kisim save long tok i tru long pastaim. Ol i kisim save olsem: I gat lain bilong God na lain bilong Seten; wok bilong stretim bek nem bilong Jehova i nambawan bikpela wok, winim wok bilong helpim ol man long kisim laip; ol tok profet long lain Isrel bai go bek long ples bilong ol, ol dispela tok i makim lain Isrel bilong spirit; Kristen i mas autim tok na mekim gutpela pasin tu wantaim, em bikpela samting; maski yumi sinman na yumi save popaia, tasol yumi inap mekim gut bel bilong God bilong yumi, em nem bilong Em i stap long yumi ol Witnes Bilong Jehova.—1 Pita 2:2; Provep 27:11; Aisaia 43:10-12.

Olsem wanem? I gat as na mi mas singim song bilong litimapim nem bilong Jehova? Tru tumas mi mas mekim, long wanem em i bin mekim gut tru long mi!

[Ol Futnot]

[Piksa long pes 23]

Ben bilong WBBR long 1926, K.F. Klein na C.W. Barber tupela i stap

[Piksa long pes 24]

J.F.Rutherford—em i olsem papa bilong mi

[Piksa long pes 25]

Piksa bilong mi wantaim meri bilong mi, Gretel—em wanpela rot Jehova i bin mekim gut long mi

[Piksa long pes 26]

N.H. Knorr—em i olsem bikbrata bilong mi

[Piksa long pes 27]

F.W. Franz—em i pren tru bilong mi na em i helpim mi long tingting gut

[Rait long pes 29 b]

“Yupela i Mas Holimpas Sori Bilong God”

Ol nupela Kristen na Kristen i no strong ol inap pundaun. Yumi olgeta inap pundaun. Olsem na yumi mas was gut. Yumi mas strongim bilip bilong yumi yet na helpim ol narapela tu long strongim bilip bilong ol. Yumi ken mekim olsem wanem? Dispela Jut i makim wanpela rot bilong mekim, em i tok: “Tasol yupela ol brata tru, oltaim yupela i mas strongim bel bilong yupela yet long holipela bilip bilong yupela. Na oltaim yupela i mas prea long strong bilong Holi Spirit. Yupela i mas holimpas sori bilong God. Oltaim yupela i mas wetim Bikpela bilong yumi Jisas Krais, bai em i kamapim sori bilong en long ples klia, na yupela bai i kisim tru laip i stap gut oltaim oltaim.”—Jut 20, 21.