Ripot Long Wok Bilong Kingdom
Givim Wara Long Pikinini Kaikai Bilong Tok i Tru Long Sili
LONG ples wesan long noten Sili, sampela yia i mas lus na bihain ren i save kam daun. Tasol taim ren i kam daun, dispela hap graun i drai olgeta em i save senis na ol plaua i gat kain kain kala i kamap na i karamapim olgeta hap bilong wesan. Naispela kala bilong ol dispela plaua i save pulim ol turis long olgeta hap bilong graun long kam lukim.
Tasol i gat narapela samting i gutpela moa i wok long kamap long ol manmeri bilong Sili. Wara, olsem tok i tru bilong Baibel, em i ran i go long olgeta hap bilong dispela kantri, na planti manmeri i gat gutpela bel ol i wok long kamap disaipel bilong Jisas Krais. Wanpela samting ol i mekim wok long en bilong givim dispela wara long ol man, em long rot bilong telefon. Ol stori i stap daunbilo i stori long ol gutpela samting i bin kamap taim ol i mekim wok long dispela rot bilong autim tok.
• Karina em wanpela meri i save autim tok long olgeta de, na ol i askim em long mekim soim long wanpela kibung sekit long pasin bilong autim tok long telefon. Tasol bipo Karina i no bin mekim wok autim tok long rot bilong telefon. Orait wanpela elda na meri bilong em i laik strongim bel bilong Karina long mekim soim long kibung, na ol i stori long Karina long sampela tok em i ken mekim long taim em i autim tok long rot bilong telefon. Na tu, ol i tokim em long beten long Jehova i ken soim rot long em long mekim dispela soim. Em i mekim olsem, na bihain em i traim na autim tok long rot bilong telefon.
Karina i painim namba bilong telefon bilong wanpela ples klostu. Wanpela meri i save wok long ofis bilong telefon i bekim, na Karina i stori long wanem as na em i ring. Dispela meri i save wok long telefon i harim gut tok, na Karina i stretim tok long toktok wantaim em gen long 3-pela de bihain. Karina i mekim gobek long rot bilong telefon na em i kirapim Baibel-stadi long dispela meri long buklet God i Laik Yumi Mas Mekim Wanem? Kirap long dispela taim tupela i mekim gutpela stadi tru, na Karina i salim sampela buk na nius i go long dispela meri bilong bekim ol askim bilong em.
• Wanpela man i bin popaia na ringim namba bilong Bernarda na em i kirap autim tok long dispela man. Bernarda i no kros, em i tokim dispela man olsem em i wanpela Witnes Bilong Jehova, na em i tok em i laik helpim em. Tupela i toktok wantaim, na dispela man i putim yau taim Bernarda i stori gut long em olsem liklik taim Kingdom bilong God bai pinisim pasin nogut. Dispela man i givim namba bilong telefon bilong em long Bernarda, na em i mekim ol gobek long dispela man long rot bilong telefon. Wanpela taim em i toktok wantaim dispela man na em i kaunim wanpela hap bilong buk Save i Bringim Man Long Laip Oltaim. Man i laik save olsem wanem em i ken kisim wanpela buk olsem, na Bernarda i salim wanpela buk Save na wanpela Baibel i go long em. Em i stretim rot na bai wanpela brata long dispela hap i ken i go lukim em, na long nau dispela brata i save wok yet long givim “wara” long dispela “diwai” i wok long kamap gut.
Em nau, long dispela graun i drai long ol samting bilong spirit, ol pikinini kaikai i hait i stap long graun na ol i wet long wara, olsem tok i tru, em i ken mekim ol i kru. Planti tausen man nek bilong ol i drai ol i wok yet long kru na “kamap” na ol i kamap ol gutpela wokman bilong God Jehova.—Aisaia 44:3, 4.