Ripot Long Wok Bilong Kingdom
Strong Bilong Jehova i Winim Strong Bilong Ol Birua
LONGTAIM pinis Satan na ol spirit nogut i bin mekim wok long lotu giaman na olkain wok marila bilong pasim wok bilong autim tok bilong Kingdom. Baibel i stori long dispela wok nogut bilong Satan long 2 Korin 4:4, em i tok: “Satan, em giaman god bilong dispela graun, em i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol.”
Tasol strong bilong God Jehova i winim strong bilong Satan. Ol birua bilong Jehova i no inap pasim em long kamapim laik bilong em, em i laik “kisim bek olgeta manmeri, bai ol i ken save long as bilong tok tru.” (1 Timoti 2:4) Stori hia bilong sampela ol i autim tok bilong Kingdom long Ostrelia i kamapim klia dispela samting.
◻ Wanpela meri i lusim lotu inap 20 yia na bihain em i kirap gen long kaunim Baibel. Dispela i mekim na em i gat planti askim, olsem na em i beten askim God long helpim em long painim bekim bilong ol dispela askim. Em i laik painim tok i tru, tasol em i save, sapos em i go bek gen long lotu bilong em bilong bipo, dispela i no inap helpim em. Olsem na em i go long wanpela stua i gat ol olpela buk na em i askim ol long sampela buk bilong lotu.
Papa bilong stua i tingim wanpela buk bilong lotu i stap long haus bilong em, i no long stua. Nem bilong dispela buk, Yu Inap i Stap Oltaim Long Paradais Long Graun, em buk bilong ol Witnes Bilong Jehova. Meri i kisim dispela buk na kirap kwik long kaunim. Em i kisim save long bekim bilong planti askim bilong em long Baibel. Em i painim painim namba bilong telefon bilong ol Witnes Bilong Jehova long buk bilong telefon. Painim pinis, orait em i telefon long ol, na em i kirap long stadi long Baibel.
◻ Wanpela yangpela meri i putim toksave long niuspepa olsem em i gat wanpela samting bilong sakim ol spirit nogut ol man i ken baim. Toksave i tok, dispela samting ‘em i olpela tru na i gat bikpela strong.’ Wanpela Witnes Bilong Jehova i lukim dispela toksave na em i lukim namba bilong telefon i stap. Em i laik tokim dispela yangpela meri long as bilong strong bilong dispela samting, olsem na em i telefon long em. Em i toktok wantaim yangpela meri long ol tok bilong Baibel long wok bilong ol spirit nogut. Yangpela meri i tok, asde tasol em i bin beten askim God long helpim em, long wanem, em i gat hevi long ol spirit nogut. Witnes i tok, em bai telefon na toktok gen wantaim em.
Taim Witnes i telefon, yangpela meri i no i stap long haus, tasol mama bilong em i holim telefon na em i tokim Witnes: “Mi no save wanem tok yu bin givim long pikinini meri bilong mi, tasol ol samting i kamap i olsem mirakel!” Em i stori olsem taim Witnes i telefon pinis long namba wan taim, nau yangpela meri i tromoi olgeta piksa na buk i samting bilong Satan, na em i kirap long kaunim Baibel.
Bihain liklik, Witnes i stretim tok long i go lukim dispela yangpela meri. Wantu tasol em i orait long ol Witnes Bilong Jehova i stadi wantaim em na lainim em long ol tok bilong Baibel. Na em i kirap long i go long ol miting Kristen bilong ol. Em narapela taim Jehova i bin daunim ol spirit nogut na larim lait bilong tok i tru bilong Baibel i go insait long bel bilong man.