Jisas i Bin Luk Olsem Wanem?

PLANTI samting i bin stiaim tok ol saveman i bin mekim long skin bilong Jisas. Dispela i mekim na ol piksa ol man i bin wokim long Jisas i narapela narapela kain tru.

Tupela samting i bin stiaim tingting bilong ol man bilong wokim piksa, em pasin bilong kantri na kain taim ol i bin wokim piksa bilong Jisas. Na bilip bilong ol man bilong wokim piksa na bilip bilong ol man i bin makim ol long wokim piksa, dispela tu i stiaim ol long wokim narapela narapela kain piksa bilong Jisas.

Insait long planti handet yia, ol man i gat nem long wokim piksa, olsem Maikelangelo, Rembrant, na Rubens, ol i bin bilasim tru skin bilong Krais taim ol i wokim piksa bilong em. Ol i bilasim em long sampela kain mak o long samting i narapela kain. Ol piksa bilong ol i bin stiaim tingting bilong planti man long skin bilong Jisas i luk olsem wanem. Tasol wanem samting i as bilong tingting bilong ol?

Tok Bilong Ol Saveman

King Konstantin bilong Rom em i bin stap long yia 280 i go inap 337 C.E. samting. Paslain long dispela taim, planti piksa bilong Jisas ol i wokim em i olsem wanpela yangpela “Gutpela Wasman Bilong Sipsip” i gat sotpela gras o longpela gras. Tasol wanpela buk (Art Through the Ages) i stori long dispela, olsem: ‘Yumi inap painim dispela kain stori bilong Gutpela Wasman Bilong Sipsip long stori bilong ol haiden Grik bilong bipo na long ol piksa bilong ol Isip, tasol long ol dispela piksa yumi stori long en antap, em i olsem gutpela wasman bilong ol Kristen.’

Bihain dispela tingting bilong ol haiden i kamap strong moa long ol piksa. Buk i tok moa: ‘Ol piksa ol man i wokim long Jisas, ol i wokim olsem ol god bilong ol kantri long hap bilong Mediterenian, olsem god Hilios (Apolo), em god bilong san [raunpela lait i stap antap long het bilong em, bihain ol i putim long ol piksa bilong Jisas na bihain long ol piksa bilong ol “santu”] o Sol Inviktus (Strongpela San).’ Long wanpela haus matmat ol i painim aninit long haus lotu bilong Sen Pita long Rom, i gat piksa i makim Jisas i olsem god Apolo ‘na em i sindaun long karis ol hos i pulim na em i raun long skai.’

Tasol dispela tingting bilong ol man olsem Jisas i yangpela man, i no stap longpela taim. Long buk bilong em (Christian Iconography), Adolphe Didron i tok: ‘Bipo ol piksa bilong Jisas i makim em i yangpela man, tasol taim ol yia i go i go na Lotu Kristen i wok long kamap olpela, ol piksa bilong Jisas i senis na i makim em olsem man i no yangpela moa.’

Stori bilong skin bilong Jisas i stap long wanpela rait bilong yia 1250 samting em man bilong raitim i giaman na mekim olsem em i wanpela pas bilong Publius Lentulus, em wanpela bikman bilong Rom. Rait i tok, ‘gras bilong Jisas i olsem kala bilong pinat i mau na malumalum na gras i stret i kam inap long yau bilong em. Tasol kirap long yau na i go daun long baksait bilong em, gras i tanim tanim na kala i braun na i lait moa. Em i komim gras i go long tupela hap namel long het, na kala bilong mausgras i wankain olsem bilong gras bilong em, mausgras i no longpela tasol aninit long maus em i go daun long tupela hap. Ai bilong em i blu liklik na i lait.’ Dispela tok giaman i bin stiaim tingting bilong planti man bilong wokim piksa. Wanpela buk (New Catholic Encyclopedia) i tok, ‘long bipo i kam inap nau, taim ol man i wokim piksa bilong Krais, ol i bihainim laik na tingting bilong ol yet na ol i wokim.’

Na wankain long ol lain man na ol lotu, ol i gat narapela narapela tingting long skin bilong Jisas. Long ol piksa bilong lotu ol i bin wokim long ol kantri ol misineri i wok long en, olsem Afrika, Not na Sentral na Saut Amerika, na Esia, Krais i gat longpela gras olsem ol man long hap bilong Wes ol i save makim long em. Tasol dispela buk i tok, sampela taim long ol piksa bilong Jisas, ol i wokim skin bilong em olsem skin bilong ol asples bilong ol dispela kantri ol misineri i wok long en.

Ol Talatala tu i gat ol man bilong wokim piksa, na ol i gat tingting bilong ol yet long skin bilong Krais. Long buk bilong em (Christ and the Apostles​—⁠The Changing Forms of Religious Imagery), F. M. Godfrey i tok: ‘Long piksa Rembrant i bin wokim, Krais i luk olsem taranguman na dispela i kamapim tingting bilong Lotu Talatala long Krais, olsem Krais i bel hevi, na bun nating, na pes drai, na em i daunim olgeta laik bilong skin.’ Godfrey i tok, dispela i kamap ples klia long ‘piksa Rembrant i bin wokim long Krais olsem skin bilong em i no pat liklik, na em i daunim olgeta laik bilong em, na em i olsem man nating i no gat namba, na ol man i mas sori long em, na em i no amamas.’

Tasol nau bai yumi kisim save olsem, skin bilong Krais i no olsem ol piksa bilong ol lotu i holim nating nem Kristen ol i save wokim. Long ol piksa bilong ol, skin bilong Krais i no gat strong, na raunpela lait i stap antap long het bilong em, na em i gat pasin olsem bilong meri, na em i no amamas, na gras bilong em i longpela. Tasol ol dispela piksa bilong Jisas ol i narapela kain olgeta long Jisas em Baibel i stori long em.

Baibel na Skin Bilong Jisas

Olsem “Pikinini Sipsip Bilong God,” Jisas i gutpela olgeta, olsem na yumi ken ting em i gat naispela skin. (Jon 1:​29; Hibru 7:​26) Na Jisas i no inap pes drai long olgeta taim olsem ol i save makim long planti piksa ol man i save laikim. Tru, planti samting bilong mekim em i bel hevi i painim em, tasol pasin tru bilong Jisas i wankain stret olsem pasin bilong Papa bilong em, “em i as bilong pasin tru bilong amamas.”​—⁠1 Timoti 1:​11; Luk 10:21; Hibru 1:⁠3.

Olsem wanem? Gras bilong Jisas i longpela? Ol Promisman tasol i no ken katim gras bilong ol o dring wain, na Jisas i no wanpela Promisman. Olsem na ating em i save katim gut gras bilong em, olsem ol man Juda i save mekim. (Namba 6:​2-7) Na taim em i stap wantaim ol narapela em i dring liklik wain, na dispela i strongim tingting olsem Jisas em i man bilong amamas. (Luk 7:​34) Long rot bilong mirakel em i wokim wain long wanpela kaikai bilong marit long ples Kana, long Galili. (Jon 2:​1-​11) Na em i gat mausgras, olsem wanpela tok profet i tok taim em i stori long ol hevi Jisas bai karim.​—⁠Aisaia 50:⁠6.

Olsem wanem long kala bilong skin na pes bilong Jisas? Ating skin na pes i olsem bilong ol Semait. Em i kisim skin na pes long mama bilong em, Maria, em i bilong lain Juda. Ol tumbuna bilong Maria em ol Juda, long lain bilong ol Hibru. Olsem na ating kala bilong skin na pes bilong Jisas i olsem bilong ol Juda.

Taim Jisas i stap wantaim ol aposel bilong em, skin bilong em i no mekim olsem em i narapela kain, long wanem, taim Judas i kamapim em long ol birua, em i mas givim kis long Jisas bambai ol i ken luksave long Jisas. Olsem na Jisas inap raun namel long ol man na ol i no luksave long em. Na dispela samting i bin kamap, long wanem, long wanpela taim em i lusim Galili na wokabaut i go long Jerusalem na ol man i no luksave long em.​—⁠Mak 14:44; Jon 7:​10, 11.

Tasol sampela man i tok, skin bilong Jisas i no strong. Bilong wanem ol i tok olsem? Long wanem, narapela man i mas helpim em long karim diwai pos bilong em. Na em i dai paslain long tupela narapela man ol i bin hangamapim wantaim em long diwai pos.​—⁠Luk 23:26; Jon 19:17, 32, 33.

Jisas i Gat Strongpela Skin

Maski ol man i bilip olsem Jisas i no gat strongpela skin o em i gat pasin olsem bilong meri, Baibel i no tok olsem, nogat. Baibel i tok, em i “kamap bikpela, na save bilong en i kamap gutpela tru. Na God i laikim em tru na ol man tu i laikim em.” (Luk 2:​52) Inap 30 yia samting, em i mekim wok kamda. Dispela i no wok bilong man i no gat strongpela skin, na long taim bilong Jisas, ol i no gat ol masin bilong nau bilong helpim ol long mekim wok. (Mak 6:⁠3) Na em i rausim long tempel ol bulmakau, sipsip, na ol man bilong senisim mani, na em i kapsaitim tebol bilong ol dispela man. (Jon 2:​14, 15) Dispela tu i kamapim klia olsem em i man i gat strongpela skin.

Long laspela 3 na hap yia Jisas i stap long graun, em i wokabaut inap planti handet kilomita bilong mekim wok autim tok. Tasol ol disaipel i no tokim em long “malolo liklik,” nogat. Jisas i tokim ol disaipel, em sampela bilong ol i strongpela man bilong kisim pis, olsem: “Goan, yumi tasol i go long wanpela hap i no gat man, na bai yupela i ken malolo liklik.”​—⁠Mak 6:​31.

Tru tumas, olsem wanpela buk (Cyclopædia), em M’Clintock na Strong ol i raitim, i tok: ‘Olgeta fopela Gutnius i kamapim klia olsem skin bilong Jisas i strong na em i no gat sik.’ Orait, bilong wanem narapela man i mas helpim em long karim diwai pos bilong em, na bilong wanem em i dai paslain long ol narapela man ol i bin hangamap wantaim em?

Wanpela samting i olsem: Jisas i bel hevi tru. Klostu long taim Jisas bai dai, em i tok: “Mi mas kisim wanpela kain baptais. Nau mi no kisim yet, na bel bilong mi em i hevi tru.” (Luk 12:50) Long laspela nait bilong em long graun, Jisas i bel hevi “nogut tru.” Baibel i tok: “Jisas i pilim hevi nogut tru, na em i beten strong moa. Na tuhat bilong en i kamap olsem blut na i pundaun long graun.” (Luk 22:44) Jisas i save ol manmeri inap kisim laip oltaim sapos em i stap gut long God i go inap long taim em i dai. Dispela em i wanpela bikpela hevi bilong karim! (Matyu 20:​18, 19, 28) Na em i save tu olsem lain bilong God yet bai kilim em i dai olsem wanpela man nogut. Olsem na em i tingting planti, nogut dispela i bagarapim nem bilong Papa bilong em.​—⁠Galesia 3:​13; Song 40:​6, 7; Aposel 8:​32.

Bihain long Judas i kamapim em long ol birua, ol man i mekim kain kain pasin nogut tru long em. Long giaman kot ol i mekim taim em i biknait pinis, ol bikman bilong gavman ol i tok bilas long em, na ol i spet long em, na ol i brukim han bilong ol na paitim em. Bilong mekim kot bilong nait i olsem stretpela kot, ol i wokim narapela kot long moningtaim. Long dispela kot Pailat i sutim planti askim long Jisas, na bihain Herot i mekim wankain samting, na Herot wantaim ol soldia bilong em ol i tok bilas long Jisas, na bihain Pailat i sutim gen planti askim long em. Bihain, Pailat i tokim ol man long wipim em. Na ol i gat narapela kain pasin bilong wipim man. Wanpela buk (The Journal of the American Medical Association) i stori long pasin bilong ol Rom long wipim man, olsem:

“Ol i save paitim man long hap let ol i pasim wantaim long wanpela arere bilong en, . . . Na long ol dispela hap let i gat ol liklik bal ain o ol liklik hap bun bilong sipsip i sap tru. . . . Taim ol soldia bilong Rom i paitim paitim baksait bilong man long dispela samting, ol liklik bal ain i bagarapim skin, na ol hap let na hap bun bilong sipsip i katkatim skin i go insait. Ol i paitim paitim em na katim skin nogut tru i go insait inap long mit i pas long bun, na nau ol hap mit i bruk bruk na blut i kapsait.”

Tru tumas, dispela i mekim na strong bilong Jisas i wok long pinis, olsem na em bai hatwok tru long karim hevipela diwai pos. Wanpela buk (The Journal of the American Medical Association) i tok: “Ol Juda na ol Rom i bagarapim skin na tingting bilong Jisas, na em i no bin kaikai, dring wara, na slip, dispela tu i mekim na em i no gat strong. Olsem na taim ol i no bin nilim yet Jisas long diwai pos, em i stap nogut tru na ating klostu em i dai.”

Skin Bilong Em i Bikpela Samting?

Ol lotu i holim nating nem Kristen i laikim ol samting i pulim ai, olsem stori giaman bilong Lentulus, na ol man i gat nem long wokim gut ol piksa, na ol windo i gat kala kala na ol piksa bilong lotu i stap long en. Asbisop bilong Turin, em i lukautim Laplap Bilong Turin em ol man i gat narapela narapela tingting long en, em i tok: ‘Piksa bilong Krais Jisas i stap long dispela laplap i gat bikpela strong long kirapim bel na tingting bilong man, na yumi mas lukautim gut dispela samting.’

Tasol Baibel i no stori long ol samting bilong skin bilong Jisas bilong ‘kirapim bel na tingting’ bilong ol man. Bilong wanem? Long wanem, dispela bai pulim tingting bilong ol man na bai ol i no tingim samting i helpim ol long kisim laip oltaim​—⁠em save i kam long Baibel. (Jon 17:⁠3) Jisas yet​—⁠em i stap olsem piksa yumi ken bihainim​—⁠em i no save ting skin bilong man i bikpela samting. (Matyu 22:16; skelim wantaim Galesia 2:⁠6.) Taim ol man i kamapim planti tok long skin bilong Jisas, dispela i no stret, long wanem, ol fopela Gutnius i no mekim olsem. Na olsem narapela stori bihain long dispela bai kamapim, Jisas i no stap moa olsem man bilong graun.a

[Futnot]

[Ol Piksa long pes 7]

Long ol piksa bilong Krais bilong ol lotu i holim nating nem Kristen, skin bilong Krais i no strong na em i wait nogut tru, tasol ol stori bilong Baibel long Jisas i no strongim dispela tingting

[Kredit Lain]

Jisas i Autim Tok Long Solwara Galili em piksa Gustave Doré i wokim