Krais Jisas Em i Husat?

Long dispela taim bilong yia long planti kantri long olgeta hap, ol man i save mekim Krismas. Planti handet milion manmeri ol i bilip olsem mama i karim Krais Jisas long Disemba 25, inap 2,000 yia i go pinis. I gat kain kain piksa na imis ol i makim Jisas olsem bebi i slip long bokis kaikai bilong ol bulmakau. Tasol olsem yumi save, em i go bikpela na em i bin stap long graun inap 33 na hap yia.

OLSEM WANEM? Sampela taim yu tingting long skin bilong Jisas i bin luk olsem wanem taim em i bikpela pinis? Wanem kala bilong skin bilong em? Em i gat ol bikpela masol na gutpela skin, o skin bilong em i no strong na em i luk olsem em i sik, olsem insait long planti handet yia ol man bilong wokim piksa ol i bin makim skin bilong Jisas? Em i save sev o em i gat mausgras? Em i gat longpela gras?

Na olsem wanem? Jisas i gat wanpela raunpela lait antap long het bilong em bilong makim olsem em i holi olsem sampela man bilong wokim piksa ol i save penim? O yu ting em i no gat sampela mak olsem, na em i luk wankain olsem ol narapela man?

Long bipo i kam inap nau ol saveman na ol man bilong wokim piksa, ol i kamapim narapela narapela tingting long skin bilong Jisas. Na ol stori bilong ol man i bin lukim Jisas i givim save long yumi, na long taim bilong ol aposel ol man bilong raitim Baibel ol i bin stap wantaim Jisas na ol i bin raitim ol dispela stori.

Tasol ol askim i bikpela moa long ol askim long skin bilong Jisas i olsem: Krais Jisas i husat tru? Em i gat wanem wok bilong kamapim laik bilong God? Em i mekim pinis dispela wok? Nau em i gat wanem namba, na em i stap we? Em i gat bikpela namba inap long em bai senisim i stap bilong ol man, na bilong planti ol daiman tu?

Orait, pastaim yumi ken skelim ol tok i stori long skin bilong Jisas. Em i bin luk olsem wanem?