‘Sik Bilong Tingting i Go Bikpela Tru’

Wanpela stori long nius bilong wanpela lain, (Canadian Society for International Health) i tok: “Maski ol man i bin painim ol nupela rot na marasin samting bilong stretim ol kain kain sik, sik bilong tingting em i go bikpela long olgeta hap bilong graun.”​—⁠Nius Synergy.

Wanpela ripot i tok olsem, long olgeta 4-pela 4-pela manmeri long graun, wanpela i save kisim sik bilong tingting, na bel, na pasin bilong ol i paul tru. Narapela ripot i tok olsem, long olgeta 3-pela 3-pela sikman i go lukim dokta, wanpela i save go lukim ol dokta, long wanem, em i gat sik bilong bel hevi o wanpela i tingting planti long sampela samting na dispela i givim hevi long em. Na ol saveman i tok, namba bilong ol man i gat ol dispela kain sik i go bikpela.

Bilong wanem ol lain i gat sik long tingting i go bikpela? Ripot bilong wanpela dipatmen long Yunivesiti Havat (Department of Social Medicine) i tok, ol kain sik olsem bel hevi, sik bilong tingting ol i kolim skitsofrenia, na sik longlong, ol i kamap planti moa, long wanem, “planti manmeri moa i stap inap long ol i lapun tru.” Tasol i no dispela as tasol na ol dispela sik i kamap planti moa. Hevi bilong mani na sindaun bilong ol man long nau i gat hatwok long en, ol tu i as bilong en.

Ol inap stretim dispela hevi olsem wanem? Ol saveman i tok, bikpela samting yumi mas tingim long planti samting bilong lukautim skin na i no ken sik tumas, em sik bilong tingting, long wanem, dispela sik em ‘laspela samting ol i save tingim bilong helpim skin bilong ol man long kamap gutpela moa.’