Baibel i Tok Wanem?

Ol Kristen i Mas Ting Olsem Wanem Long Misa?

OL STRONGPELA Katolik i wanbel wantaim tok bilong Pop John Paul Namba 2. Nius The New York Times i tok: ‘Pop i tok gen olsem sapos wanpela Katolik i no go long Misa, long tingting bilong misin dispela em i wanpela sin.’ Misa em i wanem samting? Misin na Baibel i gat wankain tingting long dispela samting?

Long wanpela buk (Things Catholics Are Asked About), wanpela pris bilong Misin Katolik, em Martin J. Scott, em i stori long Misa olsem: ‘Misa em i Bodi na Blut bilong Krais em i givim olsem ofa, tasol i no gat blut long en. Long Golgota blut bilong Krais i kapsait, taim em i dai olsem ofa. Misa em i wankain olsem ofa Krais i givim long diwai kros. Dispela i no wanpela tok piksa, o tok giaman samting.’ Dispela pris i tok tu olsem: ‘Misa i bringim Pikinini bilong God i kam daun long ol alta bilong yumi, na givim Em olsem ofa long God Papa.’

Tok Bilong Baibel i As Bilong Misa?

Ol Katolik i gat gutpela bel, ol i bilip olsem tok bilong Baibel em i as bilong Misa. Bilong strongim dispela tingting, ol i kamapim tok Jisas i bin mekim long Laspela Kaikai. Taim em i tilim bret na wain long ol aposel bilong em, Jisas i stori long bret olsem: “Dispela em i bodi bilong mi.” Na taim em i stori long wain, em i tok: “Dispela em i blut bilong mi.” (Matyu 26:​26-​28) Ol Katolik i bilip olsem taim Jisas i mekim dispela tok, em i tanim bret na wain i kamap bodi na blut bilong em. Tasol wanpela buk (New Catholic Encyclopedia bilong 1967) i tok: ‘Taim Jisas i tok “Dispela em i bodi bilong mi” o “Dispela em i blut bilong mi,” yumi no ken ting olsem Jisas i tok bret na wain i makim bodi na blut tru bilong em. Yumi ken skelim wantaim sampela narapela tok piksa long Baibel. Olsem: “Taim bilong kisim kaikai, em las de bilong dispela graun” (Matyu 13:39) o “mi yet mi diwai wain tru” (Jon 15:⁠1), ol dispela tok i makim tasol wanpela samting.’ Olsem na dispela buk dikseneri i tok, tok bilong Matyu 26:​26-​28 i no makim olsem taim ol i mekim Laspela Kaikai, bret na wain i tanim i kamap bodi na blut tru bilong Jisas.

Ating wanpela man inap tingim tok Jisas i bin mekim long wanpela taim. Em i tok: “Mi dispela bret i gat laip na i lusim heven na i kam daun. . . . Man i save kaikai bodi bilong mi na dringim blut bilong mi, em i gat laip i stap gut oltaim oltaim.” (Jon 6:​51, 54) Sampela man i harim dispela tok bilong Jisas, ol i ting em i tok long bodi na blut tru bilong em na ol i kirap nogut tru. (Jon 6:60) Tasol yumi ken kamapim askim olsem: Long dispela taim Jisas i bin tanim bodi bilong em i kamap bret? Nogat tru! Em i mekim tok piksa. Em i tok, em i kain olsem bret, long wanem, long rot bilong ofa bilong em ol manmeri bai kisim laip. Jon 6:​35, 40 i kamapim klia olsem taim Krais Jisas i tokim yumi long kaikai bodi bilong em na long dringim blut bilong em, em olsem yumi mas bilip long em.

Misa em i wanpela bikpela pasin bilong Misin Katolik, olsem na ating ol man i ting tok bilong Baibel i as bilong en. Tasol nogat. Wanpela buk (The Catholic Encyclopedia bilong 1913) i stori long as bilong dispela olsem: ‘As tru bilong dispela bilip bilong mipela em wanpela tok bilong bipo. Long pastaim tru ol i bin tok, Ofa bilong Misa em i rot bilong askim God long helpim yumi.’ Em nau, as bilong Misa bilong Misin Katolik em tok bilong ol man bilong bipo, tok bilong Baibel, nogat.

Maski ol man i gat gutpela bel taim ol i mekim sampela pasin bilong lotu, tasol sapos dispela pasin i pait wantaim tok bilong Baibel, God i no orait long en. Jisas i krosim ol bikman bilong lotu long taim bilong em. Em i tok: “Yupela i save daunim tok bilong God na litimapim pasin yupela i bin kisim long ol tumbuna.” (Matyu 15:⁠6) Jisas i ting Tok Bilong God em i bikpela samting, olsem na i gutpela sapos yumi skelim tok bilong Baibel wantaim dispela bilip long Misa.

Hamas Taim Jisas i Givim Em Yet Olsem Ofa?

Misin Katolik i lainim ol man olsem long olgeta wan wan taim ol i mekim Misa, Jisas i givim em yet olsem ofa, tasol ol i tok, em i no dai tru na blut bilong em i no kapsait. Olsem wanem? Baibel i wanbel long dispela tingting? Tingim tok bilong Hibru 10:​12, 14: “Krais em i mekim wanpela ofa tasol bilong tekewe sin, na dispela ofa em inap long i stap olgeta taim. Em i mekim olsem pinis, orait em i sindaun long han sut bilong God. Ol dispela manmeri em i mekim ol i kamap ol lain manmeri bilong God stret, em i mekim ol i kamap gutpela olgeta long wanpela ofa tasol, na ol bai i stap olsem inap oltaim oltaim.”

Tasol wanpela Katolik i gat gutpela bel inap tok olsem: ‘Olsem wanem? Ating Jisas i mas givim em yet olsem ofa inap planti taim, a? Yumi olgeta i save mekim sin planti taim.’ Bekim bilong Baibel i stap long Hibru 9:​25, 26: “Em [Krais] i no mekim [ofa] planti taim. Nogat. . . . Nau em i klostu long taim bilong las de, na Krais i kamap long graun wanpela taim tasol, bilong givim em yet long God olsem ofa bilong tekewe ol sin.” Skelim gut dispela tok: Krais “i no mekim [ofa] planti taim.” Long Rom 5:​19, aposel Pol i kamapim as bilong dispela samting. Em i tok: “Wanpela man [Adam] i bin sakim tok, na long dispela pasin bilong em planti manmeri i kamap manmeri bilong mekim sin. Olsem tasol, wanpela man [Jisas] i bihainim tok, na long dispela pasin bilong em planti manmeri bai i kamap stretpela manmeri.” Adam i sakim tok wanpela taim tasol na long dispela as yumi olgeta i dai. Jisas i givim em yet olsem ofa wanpela taim tasol, na long dispela as God i ken lusim tingting long rong bilong yumi long nau sapos yumi bilip long ofa bilong em, na yumi ken kisim laip oltaim long bihain.

Olsem wanem? Em i bikpela samting sapos Jisas i dai olsem ofa inap wanpela taim o planti taim? Sapos yumi pilim tru bikpela pe bilong ofa bilong Jisas, orait, bai yumi kisim stretpela tingting long dispela samting. Ofa bilong Jisas em i nambawan gutpela presen yumi manmeri i kisim​—⁠em i dia tumas na i gutpela olgeta, olsem na Jisas i no gat wok long givim gen dispela presen long yumi.

I stret yumi tingim ofa bilong Jisas. Tasol pasin bilong tingim wanpela samting na pasin bilong mekim gen dispela samting, tupela i no wankain. Olsem: Taim tupela marit i tingim de ol i bin marit na ol i mekim sampela samting bilong tingim dispela de, ol i no save marit gen long dispela de. Long olgeta yia, ol Witnes Bilong Jehova i save tingim de Jisas i bin i dai long en, olsem Jisas i bin tokim ol long mekim​—⁠bilong ‘tingim em,’ i no bilong givim bodi bilong em olsem ofa. (Luk 22:19) Na tu, oltaim ol dispela Kristen i wok strong long pas gut wantaim God Jehova long rot bilong Krais Jisas bambai pasin, na bilip, na i stap bilong ol i stret wantaim tok bilong Baibel.

Bilong mekim olsem, planti ol i mas senisim tingting bilong ol. Tasol ol Witnes i amamas long save olsem sapos ol i bihainim Tok Bilong God na ol i no bihainim tok bilong man, ol bai kisim blesing. Na sapos ol i bilip long blut bilong Jisas em i bin kapsaitim inap wanpela taim olsem ofa klostu 2 tausen yia i go pinis, dispela bai rausim olgeta sin bilong ol.​—⁠1 Jon 1:​8, 9.

[Piksa long pes 26]

Sen Jails i Wokim Misa

[Kredit Lain]

Erich Lessing/Art Resource, Nu Yok