Ol Yangpela i Laik Save . . .

Olsem Wanem Mi Inap Karim Hevi Bilong Pasin i No Stret?

Arnulfo, em i gat 15 krismas na em i save slip long rot, em i tok: “Ol man i save mekim gutpela pasin long ol man i gat mani, tasol mipela ol lain i no gat kaikai o ples slip, ol i mekim nabaut long mipela olsem mipela i animal samting. Mi tingim wanpela samting tasol bai painim mi bihain, em olsem: Bai mi dai na i no gat wanpela man i tingim dispela.”

I GAT planti pasin i no stret long dispela graun. Ripot bilong lain UNICEF (United Nations Children’s Fund) i tok: “Insait long 10-pela yia i go pinis, winim 2 milion pikinini i dai long ol pait, na skin bilong 4 milion pikinini i bagarap, na pait i mekim na papamama bilong wan milion pikinini i dai o ol pikinini i no stap moa wantaim famili bilong ol.” Na tu, planti manmeri bilong graun ol i hangre na i stap rabis, na planti bilong ol i sindaun klostu long ol maniman i gat planti samting bilong skin. Long ol kantri i stap rabis, planti yangpela olsem Arnulfo ol i no inap skul.

Pasin i no stret bai bagarapim tru bel bilong yu, taim man em yu ting em i laikim yu na lukautim yu, em i mekim pasin nogut long yu. Tingim Susana i gat 17 krismas. Mama bilong em i lusim em na tupela liklik brata bilong em. Susana i tok: “Planti yia i go pinis, na mama bilong mi em i no bin askim mi long kam na stap wantaim em, maski em i sindaun long taun mi sindaun long en. Em i no bin tokim mi olsem, ‘Mi laikim yu tru,’ na dispela i bin mekim na mi kros i kam inap long nau.” Taim narapela i mekim pasin nogut olsem long yu, ating yu hatwok long bosim kros bilong yu. Ol i bin mekim pasin sem long wanpela meri taim em i pikinini yet, na em i tok: “Dispela i mekim na mi tingting nogut long God tu.”

Bel bilong yu bai bagarap na bai yu kros taim man i mekim pasin nogut long yu. Baibel i tok: “Sapos man i gat gutpela tingting, tasol em i pulim mani samting bilong arapela man, orait em i kamap olsem longlong man tasol.” (Saveman 7:⁠7) Taim yu karim hevi bilong pasin i no stret long olgeta de, dispela inap mekim na yu bel hevi tu. (Skelim wantaim Song 43:⁠2.) Olsem na ating yu gat bikpela laik long pasin i no stret i mas pinis. Wanpela yangpela meri bilong Sentral Amerika, em i tok: “Taim mi gat 13 krismas, mi insait long wanpela lain sumatin i laik helpim ol yangpela. Mi laik mekim sampela samting bilong senisim ol samting bilong graun bambai ol pikinini i no ken hangre. . . . Bihain mi insait long lain i pait long gan samting.” Tasol ol i no bin kamapim stretpela pasin, na ol wansoldia bilong em ol i bin mekim pasin nogut tru long em.

Kain stori olsem i kirapim yumi long tingim olsem planti ol i no inap mekim i stap bilong ol i kamap gutpela. Orait, tasol olsem wanem ol man inap karim hevi bilong pasin i no stret?a Yu ken mekim wanem taim yu bel nogut na kros?

Lusim Pasin Bilong Bel Nogut na Kros

Ating long sampela taim, yu mas kirapim yu yet long tingim olsem yumi stap long “taim bilong las de” bilong dispela taim nogut. Baibel i bin tok profet olsem ol man bilong nau, ol ‘bai tok kros long ol arapela, ol bai no stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin.’ (2 Timoti 3:​1-4) Planti ol “i no save sem moa long pasin ol i save mekim.” (Efesus 4:​19) Olsem na pasin i no stret em wanpela samting i save painim planti man. Baibel i tok: “Yu no ken kirap nogut taim yu lukim gavman i putim hevi long ol rabisman, na i no stretim gut kot bilong ol na i no larim ol i sindaun gut.”​—⁠Saveman 5:⁠8.

I gat as tru na Baibel i tok, yu no ken larim pasin bilong bel nogut i bosim tingting bilong yu. Baibel i tok: “Yupela i mas rausim olgeta pasin bilong bel nogut na kros na belhat.” (Efesus 4:​31) Bilong wanem? Long wanem, taim yu bel nogut na kros i stap, dispela bai bagarapim skin bilong yu yet. (Skelim wantaim Sindaun 14:30; Efesus 4:​26, 27.) Na dispela samting bai painim yu, sapos yu ‘kros long Bikpela.’ (Sindaun 19:⁠3) Pasin bilong kros long God bai mekim na yu no inap pas gut wantaim dispela Man em inap helpim yu tru. Baibel i tok, Jehova “i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—⁠2 Stori 16:⁠9.

Na tu, Baibel i tok long Jehova olsem: “Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:⁠4) Pasin bikhet bilong Adam tupela Iv i kamapim pasin i no stret. (Saveman 7:​29) Ol man i bin “daunim ol arapela manmeri na mekim nogut long ol,” God i no save mekim olsem, nogat. (Saveman 8:⁠9) Na tingim tu olsem “dispela graun olgeta em i stap aninit long strong bilong Satan.” (1 Jon 5:​19) Satan i as bilong ol pasin i no stret, Jehova nogat.

Pasin i No Stret Bai Pinis

Tasol gutpela tru pasin i no stret bai i pinis. Tingim dispela na em inap helpim yu long karim dispela hevi. Yu ken tingim samting i bin painim Asap, em wanpela man i bin stap long taim bilong ol man i bin raitim Baibel. Pasin i no stret i kamap long olgeta hap, maski em i sindaun namel long ol man i tok ol i lotu long Jehova. Ol dispela man nogut i no kisim strafe long pasin nogut ol i bin mekim long ol narapela, na i olsem ol i no gat ol hevi na ol i kisim ol gutpela samting bilong skin! Asap i tok: “Mi lukim ol man nogut i kamap maniman na mi mangal long ol samting bilong ol dispela bikhetman.” Inap liklik taim Asap i lusim stretpela tingting, na em i tingting tasol long ol gutpela samting ol man nogut i kisim.​—⁠Song 73:​1-12.

Bihain, Asap i kisim save long wanpela bikpela samting. Em i stori long ol man nogut olsem: “Yu [God] mekim ol i wokabaut long rot i wel moa yet, na yu mekim ol i pundaun na ol i bagarap olgeta.” (Song 73:​16-​19) Em nau, Asap i kisim save olsem, bihain ol man bai kisim strafe long ol pasin nogut ol i mekim. Pasin nogut bilong ol i mekim na planti ol i kalabus, o mani bilong ol i pinis olgeta, o bos i rausim ol long wok, o rausim namba bilong ol. Na bihain, ol man nogut bai “i bagarap olgeta” taim God i givim strafe long ol manmeri nogut.​—⁠Song 10:​15, 17, 18; 37:​9-​11.

Yu save olsem klostu nau God bai pinisim pasin nogut, na dispela inap helpim yu long bosim kros na bel hevi bilong yu. Baibel i tok: “Sapos ol i mekim pasin nogut long yupela, orait yupela i no ken bekim pasin nogut long ol. Nogat. Oltaim yupela i mas tingting long mekim pasin i gutpela long ai bilong olgeta man. Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ”​​—⁠Rom 12:​17-​19; skelim wantaim 1 Pita 2:​23.

Kisim Helpim

Tasol ating bel bilong yu i bagarap stret, olsem yu kisim bek tingting long ol samting nogut ol man i bin mekim long yu bipo. Ripot bilong lain UNICEF i tok, “ol pikinini i save lukim man i mekim nogut long ol narapela o em i mekim nogut long pikinini yet, ol samting ol dispela pikinini i save bilip na tingting long en bai senis, na ol i no bilip moa long narapela man. Dispela samting i save painim ol pikinini em pren o man ol i save long em, ol i bin mekim pasin nogut long ol.”

I no gat rot bilong stretim kwik kain hevi olsem. Tasol sapos yu tingting nogut o yu kisim bek tingting long ol samting nogut ol man i bin mekim long yu, ating yu mas kisim helpim. (Skelim wantaim Song 119:133.) Pastaim yu ken ritim ol nius i stori long hevi olsem hevi bilong yu. Nius Kirap! i bin kamapim planti stori i givim gutpela tingting long ol man na meri em narapela i bin reipim em, o stilim ol samting bilong em, o mekim pasin nogut long em taim em i liklik yet. Sapos yu kamapim ol wari na tingting bilong yu long man i gat gutpela tingting na em i save putim gut yau, dispela inap helpim yu tru. (Sindaun 12:25) Ating yu ken kamapim wari bilong yu long papamama.

Tasol olsem wanem sapos papamama i no stap bilong helpim yu? Orait, askim kongrigesen Kristen long helpim yu. Namel long ol Witnes Bilong Jehova, ol elda bilong kongrigesen i save helpim ol man i gat hevi. (Aisaia 32:​1, 2) Ol bai putim gut yau long tok bilong yu, na tu, ol inap givim sampela gutpela tingting long yu. Na yu no ken lusim tingting olsem ol narapela strongpela Kristen tu i ken kamap olsem “brata o susa o mama” bilong yu. (Mak 10:​29, 30) Yu tingim yet Susana, em mama bilong em i bin lusim em? Susana na tupela brata bilong em ol i bin kisim helpim long kongrigesen Kristen. Wanpela brata Kristen i tingim na helpim famili bilong Susana, olsem na Susana i save kolim em olsem waspapa bilong em. Susana i tok, kain helpim olsem “i bin helpim mipela long kisim tingting bilong man i bikpela pinis, na long sanap strong long tok i tru.”

Ol saveman i tok, pasin bilong mekim ol gutpela wok long olgeta de inap helpim man i karim hevi. Pasin bilong go long skul na mekim ol wok bilong haus i ken helpim yu long rausim ol tingting i save bagarapim bel bilong yu. Tasol taim yu mekim ol wok bilong spirit, olsem yu go long ol miting Kristen na autim gutnius, dispela bai helpim yu tru.​—⁠Skelim wantaim Filipai 3:​16.

Pasin i no stret bai pinis taim Kingdom bilong God i kam na i kamapim laik bilong God long olgeta hap. (Daniel 2:​44; Matyu 6:​9, 10) Taim yu wet long dispela samting i kamap, mekim ol samting yu inap mekim bilong karim dispela hevi. Strongim yu yet long rot bilong tok promis bilong Baibel olsem King bilong Kingdom bilong God, em Krais Jisas, em bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”​—⁠Song 72:​12, 13.

[Futnot]

[Rait long pes 11]

“Dispela i mekim na mi tingting nogut long God tu”

[Piksa long pes 12]

Ol narapela Kristen i ken helpim yu long karim hevi bilong ol pasin i no stret