Gutpela Rot Bilong Daunim Pasin i No Stret

1-2. (a) Planti man i save mekim wanem taim ol i lukim pasin i no stret? (b) Yumi bai stori long wanem samting long dispela atikol?

YUMI stap long graun i pulap long pasin i no stret. I gat planti risen na ol man i mekim pasin i no stret long ol narapela, ating bikos ol i stap rabis, ol i man o meri, ol i bilong narapela ples, o ol i gat narapela skin kala. Na planti manmeri i karim pen na hevi bikos ol bisnisman i gat planti mani i mekim gridi pasin o ol lida bilong gavman i mekim pasin korapsen. Ol dispela kain pasin i no stret i putim hevi long yumi na long ol narapela tu.

² Yumi no kirap nogut olsem planti i belhat long lukim pasin i no stret i go bikpela tru long nau. Yumi olgeta i laik stap long graun we yumi pilim seif na ol narapela i mekim pasin i fea long yumi. Sampela i traim long kamapim ol senis long ples ol i stap long en. Ol i mekim olsem long rot bilong sainim ol petisen, joinim ol protes, na sapotim ol lida bilong politik em ol i tok promis long daunim pasin i no stret. Tasol yumi ol Kristen i kisim save olsem yumi “no bilong dispela graun” na yumi mas wet long Kingdom Bilong God long pinisim olgeta kain pasin i no stret. (Jon 17:16) Maski i olsem, yumi save bel hevi na belhat taim yumi lukim pasin i no stret. Yumi inap tingting olsem: ‘Mi mas mekim wanem taim mi lukim ol man i mekim pasin i no stret? I gat sampela samting mi ken mekim bilong daunim pasin i no stret long nau?’ Bilong bekim ol dispela askim, pastaim yumi bai stori long hau Jehova na Jisas i pilim taim ol i lukim pasin i no stret.

JEHOVA NA JISAS I HEITIM PASIN I NO STRET

3. Wai na yumi save belhat taim yumi lukim pasin i no stret? (Aisaia 5:7)

³ Baibel i stori long as na yumi save belhat taim yumi lukim pasin i no stret. Em i tok Jehova i wokim yumi olsem em yet na em i save “laikim stretpela pasin na em i no save mekim wansait pasin.” (Sng. 33:5; Stt. 1:26) Em i save mekim stretpela pasin tasol, na em i no laik bai ol man i mekim pasin i no stret! (Lo 32:​3, 4; Mai. 6:8; Sek. 7:9) Olsem, long taim bilong profet Aisaia, Jehova i “harim krai” bilong planti Israel em ol wanlain bilong ol i mekim pasin i no stret long ol. (Ritim Aisaia 5:7.) Jehova i stretim dispela hevi long rot bilong panisim ol man em ol i wok long sakim Lo bilong em na mekim pasin i no stret long ol narapela.—Ais. 5:​5, 13.

4. Wanem wanpela stori long Ol Gutnius i kamapim klia olsem Jisas i heitim pasin i no stret? (Lukim tu piksa.)

⁴ Wankain long Jehova, Jisas tu i save laikim stretpela pasin na em i heitim pasin i no stret. Taim em i mekim wok autim tok hia long graun, wanpela taim em i lukim wanpela man em han bilong em i nogut. Olsem na Jisas i sori long em na i helpim em, tasol ol hetman bilong lotu i belhat taim ol i lukim Jisas i mekim olsem. Ol i tingting strong long bihainim tingting bilong ol yet long lo bilong Sabat na ol i no tingting long helpim dispela man i karim hevi. Jisas i pilim olsem wanem long pasin ol hetman bilong lotu i mekim? Em i “lukim olsem bel bilong ol i pas na em i bel hevi tru.”—Mak 3:​1-6.

5. Taim yumi belhat long lukim ol man i mekim pasin i no stret, yumi mas tingim wanem samting?

⁵ Jehova na Jisas i save belhat taim ol i lukim pasin i no stret, so i stret long yumi tu i pilim wankain olsem. (Efe. 4:26 na stadi nout “Be wrathful” long Study Bible.) Tasol yumi mas tingim olsem maski i stret long yumi belhat taim yumi lukim ol man i mekim pasin i no stret, belhat bilong yumi i no inap pinisim dispela hevi. Sapos yumi belhat inap longpela taim o yumi no bosim belhat bilong yumi, dispela inap bagarapim bel na tingting bilong yumi na mekim yumi sik. (Sng. 37:​1, 8; Jems 1:20) So yumi mas mekim wanem taim yumi lukim ol man i mekim pasin i no stret? Yumi ken kisim skul long eksampel bilong Jisas.

JISAS I MEKIM WANEM TAIM EM I LUKIM PASIN I NO STRET?

6. Taim Jisas i stap long graun, ol man i bin mekim wanem ol pasin i no stret? (Lukim tu piksa.)

⁶ Taim Jisas i stap long graun, em i lukim planti man i karim hevi long pasin i no stret. Em i lukim olsem ol hetman bilong lotu i daunim tru ol man nating. (Mat. 23:​2-4) Em i save tu olsem Gavman Rom i save mekim hatpela pasin long ol manmeri. Olsem na planti Juda i no laik stap aninit long wok bos bilong ol Rom. Sampela i kamapim ol grup olsem ol Selot em ol i agensim Gavman Rom. Maski i olsem, Jisas i no kamapim o sapotim kain ol grup olsem em ol i laik kamapim senis. Taim em i harim olsem ol manmeri i laik mekim em i kamap king, em i lusim ol na i go long wanpela maunten.—Jon 6:15.

7-8. Wai na Jisas i no traim long pinisim pasin i no stret taim em i stap long graun? (Jon 18:36)

⁷ Taim Jisas i stap long graun, em i no traim long wok bung wantaim ol gavman bilong dispela taim long pinisim pasin i no stret. Wai na em i no mekim olsem? Bikos em i save olsem ol man i no gat rait na save long bosim ol yet. (Sng. 146:3; Jer. 10:23) Na tu, ol i no inap long pinisim as tru bilong pasin i no stret, em Satan na sin i stap long yumi. Dispela graun i stap aninit long wok bos bilong Satan dispela Devil, em i wanpela spirit husat i save kilim i dai ol man na em i kirapim planti manmeri long mekim pasin i no stret. (Jon 8:44; Efe. 2:2) Na tu, sin i stap long yumi i mekim na i hatwok tru long ol man i mekim pasin i fea long olgeta taim, maski ol i laik tru long mekim olsem.—Ekl. 7:20.

⁸ Jisas i save olsem Kingdom Bilong God tasol bai pinisim as tru bilong pasin i no stret, em Satan na sin i stap long yumi. Em as na em i yusim taim na strong bilong em long “autim gutnius bilong Kingdom Bilong God.” (Luk 8:1) Em i tokim “ol man i nek drai na hangre long stretpela pasin” olsem pasin korapsen na pasin i no stret bai pinis olgeta long bihain. (Mat. 5:6 na stadi nout long Study Bible; Luk 18:​7, 8) Tasol dispela samting i no inap kamap long rot bilong ol senis ol man i mekim, nogat, em bai kamap long rot bilong wok bos bilong gavman bilong God i stap long heven we “i no bilong dispela graun.”—Ritim Jon 18:36.

BIHAINIM PASIN BILONG JISAS TAIM YU LUKIM PASIN I NO STRET

9. Wai na yu bilip tru olsem Kingdom Bilong God tasol bai pinisim tru olgeta pasin i no stret?

⁹ Long nau yumi lukim pasin i no stret i go bikpela tru winim long taim Jisas i bin stap long graun. Tasol wankain long taim bilong Jisas, Satan na ol man i no gutpela olgeta i stap aninit long wok bos bilong em, ol i as bilong pasin i no stret long dispela “taim bilong las de.” (2 Tim. 3:​1-5, 13; Rev. 12:12) Olsem Jisas, yumi save olsem Kingdom Bilong God tasol bai pinisim as tru bilong pasin i no stret, em Satan na olgeta pasin nogut. Yumi sapotim dispela Kingdom, olsem na yumi no save insait long ol protes mats samting na ol senis em ol man i laik kamapim bilong daunim pasin i no stret. Tingim ekspiriens bilong wanpela sista nem bilong em Stacy.a Paslain long em i lainim tok i tru, oltaim Stacy i save joinim ol protes mats samting. Tasol em i stat long kisim tupela tingting long samting em i mekim. Em i tok: “Taim mi insait long ol protes, mi save askim mi yet olsem mi mekim rait samting o nogat. Nau mi sapotim Kingdom Bilong God, na mi save tru olsem mi mekim samting i stret. Mi save olsem Jehova bai helpim gut olgeta man em ol i karim hevi bilong pasin i no stret winim helpim mi inap givim long ol.”—Sng. 72:​1, 4. 

10. Olsem Matyu 5:​43-48 i kamapim, wai na yumi no save insait long ol grup em ol i laik kamapim ol senis long graun? (Lukim tu piksa.)

¹⁰ Planti taim ol man i insait long ol grup i laik kamapim ol senis long graun, ol i save belhat, brukim ol lo, na pait long ol narapela, na dispela i no stret wantaim ol pasin na ol tok em Jisas i skulim yumi long en. (Efe. 4:31) Wanpela brata nem bilong em Jeffrey i tok: “Mi save olsem maski ol man i traim long mekim ol protes i no gat pasin vailens long en, hariap tru ol samting inap senis na pasin vailens na pasin stil inap kamap.” Tasol Jisas i skulim yumi olsem yumi mas laikim olgeta manmeri na mekim olsem tu long ol man em ol i no wanbel long tok yumi autim o ol i mekim nogut long yumi. (Ritim Matyu 5:​43-48.) Yumi ol Kristen i wok strong long bihainim eksampel bilong Jisas na ol samting em i skulim yumi long en.

11. Wai na sampela taim yumi inap pilim hatwok long bihainim eksampel bilong Jisas?

¹¹ Yumi save olsem Kingdom Bilong God tasol bai pinisim tru pasin i no stret, tasol yumi inap pilim hatwok long bihainim eksampel bilong Jisas taim ol narapela i mekim pasin i no stret long yumi. Skelim samting i bin kamap long Janiya, em ol narapela i mekim pasin i no stret long em bikos long skin kala bilong em. Em i tok: “Mi belhat nogut tru. Na tu, mi bel hevi na mi laik bai ol i kisim hevi long pasin ol i mekim. So mi tingting long sapotim wanpela grup em ol i save protes long daunim pasin bilong birua na mekim nogut long ol man bilong narapela skin kala. Mi pilim olsem dispela em gutpela rot bilong mi long soim belhat bilong mi.” Tasol i no longtaim, Janiya i luksave olsem em i mas mekim sampela senis. Em i tok: “Mi wok long larim ol narapela i stiaim tingting bilong mi na kirapim mi long trastim ol man na i no Jehova. Mi wokim disisen long no ken bung moa wantaim dispela grup.” Maski i stret long yumi belhat long lukim pasin i no stret long nau, yumi mas was gut nogut yumi larim belhat bilong yumi i mekim na yumi insait long wok politik o ol protes samting long kamapim senis.—Jon 15:19.

12. Bilong wanem yumi mas skelim gut ol infomesen yumi kisim?

¹² Wanem samting i ken helpim yumi long bosim belhat bilong yumi taim yumi lukim pasin i no stret? Planti i luksave olsem i gutpela long ol i skelim gut ol samting ol i ritim, harim, na watsim. Ol man i yusim sosel midia long ripotim ol stori, tasol sampela taim ol i senisim ol stori bilong kirapim tingting bilong ol man na dispela i mekim na ol man i strong long kamapim ol senis bilong stretim ol hevi. Planti taim ol niuslain i save kamapim tingting bilong ol yet long ol stori ol i autim. Maski sapos yumi harim wanpela nius ripot long pasin i no stret we i bin kamap tru, yu ting em i gutpela long tingim tingim dispela nius? Sapos yumi lusim bikpela haptaim long ritim, harim, na watsim ol kain nius olsem, dispela bai mekim yumi belhat na bel hevi. (Prov. 24:10) Na samting i nogut moa em olsem, yumi inap lusim tingting olsem Kingdom Bilong God tasol bai pinisim olgeta pasin i no stret.

13. Olsem wanem gutpela sediul bilong Baibel ritim i ken helpim yumi long holim yet stretpela tingting long pasin i no stret?

¹³ Gutpela sediul bilong Baibel ritim na pasin bilong tingim ol tok long bel i ken helpim yumi long karim hevi bilong pasin i no stret. Wanpela sista nem bilong em Alia i bel hevi tru long lukim ol man long komiuniti bilong em i karim hevi long pasin i no stret. Em i pilim olsem ol dispela man husat i mekim pasin i no stret, ol i no kisim hevi long pasin ol i mekim. Em i tok: “Mi skelim ol samting na mi askim mi yet olsem, ‘Tru tru mi bilip olsem Jehova bai stretim ol dispela hevi?’ Em long dispela taim mi ritim Jop 34:​22-29. Ol dispela ves i helpim mi long tingim olsem i no gat wanpela man inap hait long Jehova. Em wanpela tasol i gat stretpela pasin tru, na em wanpela tasol bai pinisim olgeta hevi bilong yumi.” Taim yumi wok long wetim Kingdom Bilong God long kamapim stretpela pasin, yumi ken mekim wanem long nau?

SAMTING YUMI KEN MEKIM LONG NAU

14. Yumi ken mekim wanem long nau? (Kolosi 3:​10, 11)

¹⁴ Yumi no inap kontrolim pasin i no stret em ol narapela i mekim, tasol yumi inap kontrolim pasin yumi yet i mekim. Olsem yumi stori pinis, yumi bihainim pasin bilong Jisas taim yumi soim pasin laikim. Kain pasin laikim i ken kirapim yumi long soim rispek long ol narapela na long ol man i mekim pasin i no stret tu. (Mat. 7:12; Rom 12:17) Jehova i save amamas taim yumi mekim gutpela pasin na pasin i fea long ol narapela.—Ritim Kolosi 3:​10, 11.

15. Taim yumi autim tok i tru bilong Baibel long ol man, dispela inap mekim wanem long ol?

¹⁵ Nambawan gutpela rot yumi ken daunim pasin i no stret em taim yumi autim ol tok i tru bilong Baibel long ol narapela. Wai na yumi tok olsem? Bikos “save bilong Jehova” inap senisim wanpela man em pastaim em i gat pasin bilong kros na pait na em i kamap man bilong mekim gutpela pasin na pasin laikim. (Ais. 11:​6, 7, 9) Wanpela man nem bilong em Jemal, paslain long em i lainim tok i tru, em i joinim wanpela grup em ol i agensim gavman long kantri bilong ol bikos ol i pilim olsem gavman i daunim ol manmeri. Em i tok: “Yu no inap senisim pasin bilong ol man long rot bilong pait. Pasin bilong pait i no senisim mi, tasol ol tok i tru bilong Baibel mi lainim i senisim pasin bilong mi.” Ol tok em Jemal i lainim i kirapim em long lusim pasin bilong pait. Taim planti man moa i kisim save na bihainim tok i tru bilong Baibel, bai i no gat planti man bilong mekim pasin i no stret.

16. Wai na yu laik autim gutnius bilong Kingdom long ol manmeri?

¹⁶ Olsem Jisas, yumi laik tru long tokim ol manmeri olsem Kingdom Bilong God tasol bai pinisim tru pasin i no stret na dispela pasin bai i no stap moa. Dispela save inap strongim ol manmeri em ol narapela i mekim pasin i no stret long ol. (Jer. 29:11) Stacy em yumi stori pinis long em, em i tok: “Mi lainim tok i tru na dispela i helpim mi long karim hevi bilong pasin i no stret em mi lukim na i bin kamap long mi tu. Jehova i yusim tok bilong Baibel long mekim isi bel bilong yumi.” Yu mas redi gut pastaim na bai yu ken autim gutpela tok bilong Baibel olsem pasin i no stret bai pinis. Taim yu bilip tru long ol tok bilong Baibel em yumi skelim long dispela atikol, yu bai redi long stori long dispela topik wantaim ol narapela long skul o long ples wok.b

17. Jehova i mekim wanem bilong helpim yumi long karim hevi bilong pasin i no stret long nau?

¹⁷ Yumi save olsem yumi bai karim yet hevi bilong pasin i no stret, long wanem, Satan i stap yet olsem “hetman bilong dispela graun.” Tasol yumi gat helpim i stap na yumi wet long lukim dispela taim we Jehova i tok promis long em bai “rausim” Satan na pinisim em olgeta. (Jon 12:31) Long rot bilong Baibel, Jehova i kamapim klia risen na pasin i no stret i go bikpela tru long nau na samting em i pilim taim em i lukim ol manmeri i karim hevi bilong pasin i no stret. (Sng. 34:​17-19) Long rot bilong Pikinini bilong em, Jehova i skulim yumi long samting yumi mas mekim taim yumi lukim pasin i no stret long nau na ol samting em klostu nau Kingdom bilong em bai mekim bilong pinisim tru pasin i no stret. (2 Pita 3:13) Yumi ken givim bel yet long autim gutnius bilong Kingdom na luk fowed long dispela taim we graun bai pulap long “stretpela kot na stretpela pasin.”—Ais. 9:7.