BEKIM OL ASKIM BILONG BAIBEL

God i wanem kain man?

God em wanpela spirit yumi no inap lukim. Em i wokim heven, graun, na olgeta samting i gat laip. I no gat wanpela i bin wokim God—em i no gat kirap bilong en. (Song 90:2) God i laik bai ol man i painim em na kisim stretpela save long em.—Ritim Aposel 17:24-27.

God i wanpela man em yumi inap save long nem bilong em. Yumi ken luksave long sampela pasin bilong em taim yumi tingim ol samting em i bin wokim. (Rom 1:20) Tasol bilong save gut long God, yumi mas stadi long tok bilong em, Baibel. Em i helpim yumi long save long ol gutpela pasin bilong God.—Ritim Song 103:7-10.

God i gat wanem tingting long wansait pasin?

Krieta bilong yumi, Jehova, i heitim wansait pasin. Na em i wokim ol man i kamap olsem em yet. (Lo 25:16) Long dispela as klostu olgeta bilong yumi i heitim wansait pasin. God i no as bilong wansait pasin. God i larim ol man i stap fri long makim ol samting ol i laik mekim. Tasol sori tru, planti man i mekim wok nogut long dispela fridom na ol i mekim wansait pasin. Jehova i bel hevi tru long dispela.—Ritim Stat 6:5, 6; Lo 32:4, 5.

Jehova i laikim tru pasin fea, na em bai no larim wansait pasin i stap inap oltaim. (Song 37:28, 29) Baibel i tok promis olsem klostu nau God bai pinisim tru wansait pasin.—Ritim 2 Pita 3:7-9, 13.