Pisin Bilong Spit
WANPELA MAN LONG KENYA I RAITIM DISPELA STORI BILONG “KIRAP!”
EM I SAVE SPIT TRU. Mak bilong wing i olsem sarip, na spit bilong en i winim planti narapela pisin. Maski em wanpela liklik pisin em hevi bilong en i olsem sampela gram tasol, em inap spit tru. Wanpela buk (The Encyclopedia Americana) i tok: “Ol i tok, pisin swift em inap spit olsem 160 kilomita long wanpela aua.” Tru tumas, em pisin bilong spit!
I olsem dispela pisin i no hatwok long flai long ples antap, na long tanim tanim na sut i kam daun long painim ol binatang. Dispela pisin i save mekim planti samting taim em i flai, winim ol narapela pisin. Olsem: Em i save dring, kaikai, painim ol samting bilong kaikai, bungim ol samting bilong wokim haus, na poromanim narapela pisin bilong kamapim pikinini. Ol i lusim bikpela hap taim bilong flai, olsem na sampela man bilong bipo tru ol i bin ting, dispela pisin i save wokim haus long skai, insait long ol klaut long wanpela hap ol man i no inap lukim. Sampela bilong dispela lain pisin inap flai i stap 9-pela mun long wanpela yia—ol i no malolo. Dispela narapela kain liklik pisin i save slip tu taim em i trip long skai!
God i Wokim Em Bilong Flai
Wing bilong dispela pisin i nambawan tru na dispela i mekim na em i save flai gut tru. Mak bilong wing i olsem sarip na i tanim liklik bambai wing i no daunim spit bilong en olsem wing bilong planti narapela pisin i save mekim. Taim ol i flai i stap antap tru, ol i wokim wing hariap hariap na bihain ol i trip inap liklik taim na bihain ol i wokim gen wing, na dispela i mekim na ol i spit moa yet.
Ol inap tanim nabaut na sut i go daun samting, long wanem, ol inap wokim wanpela wing i go hariap hariap, winim narapela wing bilong ol. Dispela i mekim na pisin inap baut hariap na spit yet. Olsem na ol inap spit tru taim ol i raunim ol binatang i flai na kisim ol long maus bilong ol i op bikpela. Ol i mas kaikai planti binatang bambai skin i gat strong bilong flai spit na mekim ol samting. Na ol dispela pisin inap flai planti handet kilomita long wanpela de bilong painim ol binatang bilong kaikai.
Maski gras bilong dispela pisin i no gat gutpela kala, em i nambawan pisin i save flai gut tru. Gras bilong pisin man na pisin meri i waitpela liklik o braunpela. I gat kain kain pisin swift i stap long olgeta hap, na ol man inap lukim ol long ol kantri i hat o i hat liklik. Long taim bilong kol, ol dispela pisin i save stap long ol kantri long Hap Bilong Not, ol i save flai inap planti tausen kilomita i go long ol kantri i gat bikpela san.
Ol i Pasim Haus Long Glu
Dispela pisin i save mekim wok long narapela kain samting bilong wokim haus bilong en—spet bilong em yet! Glan bilong en long kamapim spet i narapela kain stret. Em inap kamapim planti spet na dispela i wok olsem glu bilong pasim ol samting em i wokim haus long en.
Inap wan wan taim tasol dispela pisin i save pundaun i go long graun i stret, na em i no inap sindaun malolo long wankain pasin olsem ol narapela pisin. Lek bilong en daunbilo i olsem liklik huk na lek i sot tru, olsem na lek i no inap apim pisin i go antap bambai em inap wokim gut wing na lusim graun. Tasol lek bilong en daunbilo i gutpela bilong pas long samting i sanap, olsem arere bilong ol traipela baret ston, na hul bilong maunten, na banis bilong haus. Taim dispela pisin i laik wokim haus, em i no inap bungim ol samting i stap long graun, olsem ol lip, liklik stik, na graun malumalum olsem ol narapela pisin i save mekim. Em i mas painim narapela rot.
Wanpela bilong dispela kain pisin (chimney swift) i save bungim ol liklik stik. Em i save flai siksti namel long ol han bilong diwai, na holim liklik han bilong diwai, brukim, na kisim i go. Bihain em i pasim ol liklik stik em i bin bungim wantaim spet bilong en, na pasim ol long banis samting. Narapela bilong dispela kain pisin (American palm swift) i save spit tru na bungim ol samting i trip nabaut long win, olsem gras bilong man, gras bilong pisin, ol liklik hap kapok na ol narapela samting i no hevi na i trip long win, na em i mekim wok long ol dispela samting wantaim spet bilong en bilong wokim haus.
Wanpela narapela bilong dispela kain pisin (edible nest swiftlet) i gat nem i stret long en. Em i save wokim haus long spet bilong en i kamap strong. Inap planti handet yia, ol i bin wokim wanpela kain sup long spet bilong dispela pisin, na ol man bilong Esia ol i save laikim tru dispela sup. Ol i tok, long olgeta yia ol i mekim wok long planti milion haus bilong dispela pisin bilong wokim dispela gutpela sup.
Wanpela bilong dispela kain pisin (African palm swift) i save wokim narapela kain haus long spet bilong en. Dispela liklik pisin i save pasim ol gras bilong pisin long spet bilong en aninit long lip bilong diwai pam, na wokim olsem liklik matres. Haus i hangamap na maus bilong en i go daun, na planti taim win i save sakim nabaut dispela haus. Olsem wanem na liklik kiau inap i stap insait long haus na i no pundaun? Long buk bilong em (Trials of Life), David Attenborough i tok: “Yumi kirap nogut tru long wanpela kiau inap i stap insait long liklik haus tru. Tru tumas, kiau bai pundaun sapos pisin i no bin pasim haus long lip na pasim kiau long haus long spet bilong en.” Haus na kiau bilong pisin i pas strong long lip bilong diwai pam, na pisin papa na pisin mama i save holim tupela sait bilong haus long lek bilong ol, na ol i save senis senis long sindaun antap long kiau. Taim kiau i bruk pinis, pikinini pisin bai i stap insait long haus em win i save sakim nabaut, i go inap long taim gras bilong wing i kamap na em inap flai na lusim haus.
Ol man i amamas long lukim planti tausen pisin swift i flai spit, na tanim tanim nabaut, na krai strong olsem ol i amamas tru. Taim yu sanap long graun na lukim ol dispela pisin i raun long antap, bai yu pilim olsem dispela pisin i stap fri long flai, na Man i bin wokim ol i gat bikpela save tru. Tru tumas, em wanpela pisin bilong spit!
[Ol Piksa long pes 27]
Pisin Alpine swift
Pisin Common European swift
[Kredit Lain]
Animals/Jim Harter/Dover Publications, Inc.
[Piksa long pes 27]
Pisin Chimney swift
[Kredit Lain]
© Robert C. Simpson/ Visuals Unlimited
[Piksa Kredit Lain long pes 26]
© D. & M. Zimmerman/VIREO