Pas Bilong Ol Man
Makim Poroman Marit Yupela i mekim pasin olsem wanpela papa i tingim ol yangpela taim yupela i raitim stori “Baibel i Tok Wanem? Rot Bilong Makim Poroman Marit.” (Oktoba 8, 1999) Mi laik tok tenkyu long dispela. Ol yangpela i no gat gutpela save, olsem na planti ol i marit hariap. Ol i popaia na ting pasin bilong bel i kirap em i wankain olsem pasin bilong laikim tru wanpela man. Mi no laik stap wantaim wanpela man pasin bilong em i narapela kain tru long pasin bilong mi, sapos olsem mobeta mi stap wanpis.
S. R. M., long Brasil
Mi gat 40 krismas na mi no bin marit. Long olgeta de mi beten long Jehova long painim wanpela poroman, na mi wok strong long kisim ol gutpela pasin bilong mekim marit i kamap gutpela. Taim mi kaunim ol tok bilong helpim mipela long painim wanpela poroman i strong tru long ol samting bilong spirit, na em i gat wankain tingting long ol samting mi laik mekim, na em i wok strong long kamapim ol pasin bilong spirit bilong God, dispela i strongim mi tru. Tenkyu tru long yupela i strongim mi long wok yet long wetim Jehova.
E. F., long Amerika
Pisin Bilong Spit Mi save stap long veranda bilong mi, na inap planti yia nau mi save lukluk long ol pisin swift i wokim haus bilong ol. Ol i save kam long mun Me na long mun Ogas wantu tasol ol i go pinis. Tenkyu long dispela stori “Pisin Bilong Spit” (Oktoba 8, 1999), nau mi kisim sampela save moa long dispela naispela pisin.
A. D., long Jemani
Stori Bilong Man Mi mekim wok painia winim 10-pela yia nau na planti taim mi gat strongpela laik long tenkyu long yupela long ol stori em yupela i save raitim gut tru. Ol stori bilong ol misineri i gutpela samting tru long mi. Long bipo yet mi gat laik long kamap wanpela misineri. Ol stori olsem bilong Willem na Gré van Seijl (“Ol Samting i Kamap i Winim Ol Samting Mi Bin Ting Bai Kamap,” Oktoba 8, 1999) i helpim mi long holimpas dispela laik bilong mi long mekim wok bilong God long narapela kantri.
P. K., long Amerika
Taim mi kaunim dispela stori mi bin i stap bel hevi tru. Sampela taim mi pilim olsem bai mi no inap winim ol mak bilong spirit mi bin putim. Na tu, mi bin hatwok long holim stretpela tingting long wok bilong mi olsem man bilong autim tok long olgeta de. Willem na Gré i save ting gutpela samting bai kamap, maski hevi i bin painim ol, na Jehova i blesim hatwok bilong ol. Dispela i strongim mi olsem mi tu inap winim ol mak bilong mi sapos mi bilip strong.
K. C., long Amerika
Toktok Wantaim Ol Narapela Tenkyu tru long stori “Ol Yangpela i Laik Save . . . Bilong Wanem Mi No Save Toktok Wantaim Ol Narapela?” (Novemba 8, 1999) Mi gat 17 krismas, na klostu dispela stori i mekim na mi ting yupela i raitim bilong mi tasol. Em i kamapim stret ol tingting i stap insait long bel bilong mi. Planti taim mi harim ol narapela i tok mi save tingim mi yet tasol. Tasol sapos wanpela man i save stap isi na i no save toktok olsem ol narapela, orait i no gat as bilong tingting kranki long dispela man.
R. R., long Jemani
Wanpela sik nogut i kisim mi taim mi liklik yet, dispela i mekim na mi pilim olsem mi no gat poroman. Dispela stori i helpim mi long luksave long hevi bilong mi na painim rot bilong winim dispela hevi. Bai mi wok strong long painim ol poroman insait long kongrigesen bilong mi.
J. F. F., long Brasil