Sik Aids Long Afrika—Gutpela Samting Bai Kamap Long Yia 2000 na Bihain Long En?
WANPELA MAN LONG SAMBIA I RAITIM DISPELA STORI BILONG KIRAP!
LONG Septemba long yia i go pinis, sampela man bilong ol narapela narapela hap bilong Afrika ol i bung long Lusaka, Sambia, bilong mekim Namba 11 Kibung Intenesenel Bilong Sik AIDS na STD Long Afrika. Wanpela as tingting bilong dispela kibung em long strongim olgeta kantri long wok wantaim bilong bekim dispela askim, Olsem wanem yumi ken pasim sik AIDS long i go bikpela long Afrika?
Profesa Nkandu Luo, em i minista bilong helt long Sambia, em i tok sik AIDS long Afrika na long ol narapela kantri i stap rabis em i go “nogut tru,” na em i tok moa, dispela sik i “pasim na daunim ol gutpela wok ol dokta na ol haus sik i bin mekim, na ol gutpela samting i kamap long sindaun bilong ol man na long wok bisinis.”
Taim ol i mekim sampela tok long pasin bilong was gut long blut, ol i kamapim olsem sampela man i kisim sik AIDS long rot bilong blut ol i bin kisim long haus sik. Wanpela dokta i makim lain bilong World Health Organization’s Blood Safety Unit, em i tok, taim man o meri i slip wantaim poroman i gat binatang jem i kamapim sik AIDS, i no olgeta taim em bai kisim sik AIDS, tasol olgeta man i kisim blut i gat binatang jem bilong AIDS long en ol bai kisim sik AIDS! I gat gutpela as na dispela dokta i tok, “sapos yu laik stap gut, no ken kisim blut bilong narapela man.”
Dispela kibung i kamapim klia olsem pe bilong ol marasin i bikpela tru, na dispela i givim hatwok long ol man i gat sik AIDS long baim ol marasin bilong helpim ol, o ol i no gat rot tru bilong kisim dispela marasin. Olsem: Ol man long Yuganda i save wok long taun i kisim 200 dola long wanpela mun. Tasol pe bilong marasin bilong daunim dispela sik em inap 1,000 dola long wanpela mun!
Kibung long Lusaka i kamapim olsem, maski nau yumi stap long yia 2000, ol dokta i no inap painim wanpela gutpela rot bilong pasim sik AIDS long go bikpela. Tasol ol man i stadi long Baibel ol i save olsem Man bilong wokim yumi, God Jehova, em tasol inap pinisim olgeta sik, na em i bin tok promis olsem long nupela graun “bai i no gat wanpela man i tok: ‘Mi gat sik.’ ”—Aisaia 33:24, NW.
[Mep/Ol Piksa long pes 31]
Profesa Nkandu Luo
[Kredit Lain]
Photograph by permission of E. Mwanaleza, Times of Zambia
Map: Mountain High Maps® Copyright © 1997 Digital Wisdom, Inc.